18 September 2017

Samuel Johnson pianchampha pualin

Google Doodle hi holiday pawimawh, thiltih pawimawh, mi pawimawh bik te thih/pian ni etc. hriatrengna atana hun rei lo te chhung emaw, ni khat chhung emawa Google homepage logo an siam thin a ni, Google Doodle hmasa ber hi kum 1998-a 'Burning Man Festival' puala an siam kha a ni a, Larry Page leh Sergey Brin te siam a ni nghe nghe.

Vawiin chu Google Doodle-ah Samuel Johnson hman a ni a; vawiin hi a pianchampha vawi 308-na niin, chumi hriatrengna leh amah chawimawina atan an hmang a ni ber. Johnson hian kum 1755 khan 'A Dictionary of the English Language' a siam a, he lehkhabu siam nan kum 9 zet hun a hmang an ti. Indian Express phei chuan, "one of the greatest single achievements of scholarship" tiin a fak nghe nghe a. A dictionary siam avang hian mi tam tak chuan, 'Father of Modern Dictionary' an ti hial a ni.

Johnson hi lexicographer a ni piah lamah, essayist, poet, literary critic te a ni tel bawk a. Kum 1765 khan 'The Plays of William Shakespeare' a tichhuak a, a 'Preface'-ah chuan Shakespeare-a tawngkam bungrua hmante sawifiahna a neih bakah, a thu leh hla sawifiahna te a telh a, hei hian ngaihhlut a hlawh hle a, literary criticism lama amah vawrh kângtu tak pakhat pawh a ni awm e. Keini, India ram hmarchhak kila chêng literature zirlaite tân pawh mikhual a ni lo.

Kum 1774 khan 'The Patriot' a print a, hetah hian ram hmangaihna chungchang sawiin, ram hmangaihna dik leh dik lo te a sawi bawk. April ni 7, 1775 khan thu dam rei tak mai, "Patriotism is the last refuge of the scoundrel," (let buangbar lo mai teh ang) tih chu a chhak chhuak nghe nghe. Amah hi alawm, "Mihring tehna rintlak ber chu a chunga thil tha lo titute a en dan hi a ni," titu chu. Lal Isua khan amah khengbettute kha, "Ka pa, anni hi ngaidam rawh, an thiltih an hre lo a ni," a tih kha! Johnson-a tehnaah chuan a tling hle ta ve ang.

Kum 1709 September ni 18-a piang a ni a, December ni 13, 1784-ah a thi. Kum 1838-ah a pianna in opposite, Lichfield's Market Square-ah a lim an din a, London leh Uttoxeter-ah a lim din a ni bawk. Thil chhinchhiahtlak ve deuh mai chu, Oxford khuaa Pembroke College-ah kum khat zet lehkha a zir a, sum leh pai harsatna avangin degree nei lovin a chhuahsan. Mahse, kum 1755-a a dictionary a tihchhuah hmain, Oxford University chuan Master of Arts (M.A) degree an pe der. Chu mai ni lovin, Kum 1765 khan Dublin-a inkulh Trinity College chuan honorary doctorate degree an pe a, Oxford University vekin kum 1775 khan he degree hi an hlãn ve leh bawk. Hei vang hi ni maw, "thiltih ropui hi chaknaah ni lovin taimaknaah a lang chhuak thin," a tih hi ni.

A thu pakhat duh deuh mai, Mizo tawnga lehlin tîm ve deuh ka nei a, chu chu ka thianpa kawp Rinkima (Seiji) ka lehlintir a. Chu a thusawiah chuan ram hmangaihna ril tak awmin ka hmu tlat pek. Mi tam tak, mahni chenna leh khawsakna thlahlel lo khawpa ram dang hnam dangin an chiahpiah, an chiahtui leh chiahzawp an awm laiin ani erawh chuan an hmunpui ber London chu a chawimawi thiam ngei mai!

"Mi'n London a nin chuan nun a ning tihna a ni; London-ah hian mihring duh leh awh zawng a kim si a."
Hei hi a pianna khuaa a lim an siam chu a ni
Share:

Samuel Johnson pianchampha pualin

Google Doodle hi holiday pawimawh, thiltih pawimawh, mi pawimawh bik te thih/pian ni etc. hriatrengna atana hun rei lo te chhung emaw, ni khat chhung emawa Google homepage logo an siam thin a ni, Google Doodle hmasa ber hi kum 1998-a 'Burning Man Festival' puala an siam kha a ni a, Larry Page leh Sergey Brin te siam a ni nghe nghe.

Vawiin chu Google Doodle-ah Samuel Johnson hman a ni a; vawiin hi a pianchampha vawi 308-na niin, chumi hriatrengna leh amah chawimawina atan an hmang a ni ber. Johnson hian kum 1755 khan 'A Dictionary of the English Language' a siam a, he lehkhabu siam nan kum 9 zet hun a hmang an ti. Indian Express phei chuan, "one of the greatest single achievements of scholarship" tiin a fak nghe nghe a. A dictionary siam avang hian mi tam tak chuan, 'Father of Modern Dictionary' an ti hial a ni.

Johnson hi lexicographer a ni piah lamah, essayist, poet, literary critic te a ni tel bawk a. Kum 1765 khan 'The Plays of William Shakespeare' a tichhuak a, a 'Preface'-ah chuan Shakespeare-a tawngkam bungrua hmante sawifiahna a neih bakah, a thu leh hla sawifiahna te a telh a, hei hian ngaihhlut a hlawh hle a, literary criticism lama amah vawrh kângtu tak pakhat pawh a ni awm e. Keini, India ram hmarchhak kila chêng literature zirlaite tân pawh mikhual a ni lo.

Kum 1774 khan 'The Patriot' a print a, hetah hian ram hmangaihna chungchang sawiin, ram hmangaihna dik leh dik lo te a sawi bawk. April ni 7, 1775 khan thu dam rei tak mai, "Patriotism is the last refuge of the scoundrel," (let buangbar lo mai teh ang) tih chu a chhak chhuak nghe nghe. Amah hi alawm, "Mihring tehna rintlak ber chu a chunga thil tha lo titute a en dan hi a ni," titu chu. Lal Isua khan amah khengbettute kha, "Ka pa, anni hi ngaidam rawh, an thiltih an hre lo a ni," a tih kha! Johnson-a tehnaah chuan a tling hle ta ve ang.

Kum 1709 September ni 18-a piang a ni a, December ni 13, 1784-ah a thi. Kum 1838-ah a pianna in opposite, Lichfield's Market Square-ah a lim an din a, London leh Uttoxeter-ah a lim din a ni bawk. Thil chhinchhiahtlak ve deuh mai chu, Oxford khuaa Pembroke College-ah kum khat zet lehkha a zir a, sum leh pai harsatna avangin degree nei lovin a chhuahsan. Mahse, kum 1755-a a dictionary a tihchhuah hmain, Oxford University chuan Master of Arts (M.A) degree an pe der. Chu mai ni lovin, Kum 1765 khan Dublin-a inkulh Trinity College chuan honorary doctorate degree an pe a, Oxford University vekin kum 1775 khan he degree hi an hlãn ve leh bawk. Hei vang hi ni maw, "thiltih ropui hi chaknaah ni lovin taimaknaah a lang chhuak thin," a tih hi ni.

A thu pakhat duh deuh mai, Mizo tawnga lehlin tîm ve deuh ka nei a, chu chu ka thianpa kawp Rinkima (Seiji) ka lehlintir a. Chu a thusawiah chuan ram hmangaihna ril tak awmin ka hmu tlat pek. Mi tam tak, mahni chenna leh khawsakna thlahlel lo khawpa ram dang hnam dangin an chiahpiah, an chiahtui leh chiahzawp an awm laiin ani erawh chuan an hmunpui ber London chu a chawimawi thiam ngei mai!

"Mi'n London a nin chuan nun a ning tihna a ni; London-ah hian mihring duh leh awh zawng a kim si a."
Hei hi a pianna khuaa a lim an siam chu a ni
Share:

15 September 2017

Khawvel ngaihsan martarte

Ram tana nunna hlãna martar Capt. Thangrehlova
Mizo National Front (MNF)-in ‘Martarte Ni’ tia an lo vuah September ni 20 chu kan lo thleng leh ta reng mai. MNF chuan kum 1980 atangin kum tin an lo hmang tawh thin a, tu emaw thihchampha emaw, pianchampha emaw ni lovin, ram leh hnam tana nunna hlante hriatrengna ni a ni ber awm e. India ramah Mahatma Gandhi thih champha, January ni 20 hi ‘Martarte Ni’ atana hman thin a ni a; Orissa-ah chuan British ho lak atanga zalenna sualtu, duat leh duhsak taka ‘Punjab Kesari’ (Lion of Punjab) an tih hial Lala Lajpat Rai (1865–1928) thih champha November ni 17 hi ‘Martarte Ni’ atan an hmang thin bawk.

Mizoramah chuan a state pum angin September ni 20 hi ‘Martarte Ni’-ah hmang lo mah ila, MNF chuan ram leh hnam zalenna atana nunna hlân tate hriat reng nan, Mizote’n mitthi puala thla kan neih chhun ‘Mimkut thla’ (September) thla ni 20 chu ‘Martarte Ni’ atan a hmang a, MNF ramhnuai sawrkar (underground government) khan kum 1980 atangin a hmang tan a, MNF ni pawimawh bik paruk zinga pakhat a ni. Mizote hian hei lo hi Mizo zawng zawng huapzo ‘Martarte Ni’ dang kan nei reng reng lo. Ram leh hnam tana nunna hlantu zawng zawngte pualin Luangmual-ah ‘Martar Thlan’ siam a ni a, hei hi a ram pum ang pawha Mizo hnam martarte tana kan tih theih sáng ber a ni rih niin a lang.

Martar kan tih hi chi hnihin a then theih a, sakhuana lama martar leh ram inrelbawlna thil avanga martarte hi an ni. Rin dan leh ngaihdan, pawm dan inan loh avangin sakhuana lamah martar an awm thin a; dinhmun tha zawk emaw, dinhmun ngai luah tur emawa beihna avangin politics lamah martar an awm thin bawk. A eng martar pawh ni se, midangte tana leh ram tana nun hlântu an nih avangin an ropuina hi chuti maia sawia fiah zo chi a ni lo vang. Isua’n a thisenin sual lak ata mihringte min chhandam tawh a; Indian freedom fighter ropui Subhash Chandra Bose chuan, “Thisen min pe la, zalenna ka pe ang che,” tiin British laka zalenna sual turin Indian ho a lo sawm khawm chiam tawh bawk. Zalenna sualtute thisen man hi a va to em!

Athanasios Diakos (1788 –1821) hi Greek War of Independence-a an pasaltha hmingthang a ni. Kum 1821 kum tir atanga Grik hovin Turkey (Ottoman Empire) atanga zalenna an sual khan Diakos hi sipai rual hotu a ni. Hemi kum April thlaah khan Turkish sipaiho mi 10,000 zet chuan Greece chhim lama Grik sipai zalenna sualtute an bei a, Grik sipai mi tlemte-te chuan Alamana luikamah huaisen takin tan an lo khawh a, darkar eng emaw zat chu inbeihna rapthlak tak a thleng nghe nghe. A tawpah an sipai hotu Diakos chu hliam tuar chungin an man a, Turkish commander chuan an sipaia a tel chuan officer-a a dah tur thu te, Turkish nula hmeltha tak chu nupui atana a neihtir tur thu tein a thlem a, mahse, Diakos chuan a lo hnar fithla thak a, “Grik miin ka piang a, Grik miin ka thi leh ang,” tiin a lo chhang a ni. He a thusawi hian khawvel hriat a hlawm a, amah pawh khawvelin a ngaihsan phah hle.

Zoramin zalenna a sual laia zalenna sualtute thuvawn pawimawh tak pakhat chu, 'Felna avanga ram a that dawn chuan nang hmasa la, thihna avanga ram a that dawn chuan kei ka hmasa ang' tih a ni a, hei hi a takin an nunpui chiang hle. October ni 31, 1968 khan Mizoram khawthlang lam Lunghret-ah Mizo sipaite zan mu lai chu vai sipaihovin an bei a. Tlangval kum 20 mi Cpl. Lalnunmawia chu vai sipai hovin, “Inpe la, engtin mah kan tina lo vang che. I haw ang a, nunphung pangngai takin i nung thei ang,” tiin an thlêm a, mahse, Cpl. Lalnunmawia chuan, “Tuiah emaw, khawmualah emaw, boruakah pawh rinawm taka awm tura thutiam tawh kan ni a, nangni vaiho hmaah ka inpe lo vang,” tiin a lo chhang a, damna kawng duhthlan tur a awm reng chungin thihna kawng a zawh ta zawk a ni. Ani hi entirna pakhat mai a ni a, ani ang hi Zoram zalenna sual lai khan mi tam tak an awm.

Martarte hi an chên loh leh dai loh tur khawvel dintute an ni a; mahni nawmsakna zawnga theihna kan hman mek laiin kan khawvel hman a nawm lehzual zawk nan an nunna an hlãn a, an khawvel kalsanin midangte khawvel din tumin an hmanhlel a; khawvelah chuan a bak awm tawh lo, thil zawng zawng tawpna ‘thihna’ chu an hmuh loh tur an tu leh fate tân liau liau an thlang zawk thin. Khawvela an chanvo neih theih ve chhun chu ‘thihna’ a ni. Martarte hi thih ngawt lo deuh duhthlan tur tha zawk leh duhawm zawk pek an ni cháwk a, mahse, chung duhthlan tur duhawm leh tawktarh tuihnai paltlangin an khawvel an hlãn ta thin a ni. Hei vang ni maw, khawvel hian martarte hi a ngaisang a, a chawimawi thin. British Press mite’na ‘khawvela misual ber’ ti hiala an lo sawi thin, misual leh tawrawt hmingthang Aleister Crowley meuh pawh khan, “Martarte hi history siamtu diktak an ni,” a lo ti hial a; misual berte thleng pawhina an ngaihsan chu martarte hi an ni tlat a ni. Hei vang hian, khawvel awm chhûng chuan ram leh hnam tâna nunna hlãntute hming hi hmuhsitin a awm ngai lo vang.

Khawvel hian martarte a zah a, a ngaisang thin. Khawvela poet ropui ber ber — Lord Byron, John Dryden, Alexander Pope, Thomas Moore, Oscar Wilde, RW Emerson, WB Yeats, John Milton, George Herbert, Emily Dickinson, Victor Hugo leh mi langsar tak takte hi martarte chungchang phuah uar hlei hlei an ni a, thawnthu-ah pawh martarte chanchin tarlanna hi thawnthu ngaihnawm a ni thin. Khawvela lehkhabu chhut hnem ber Holy Bible-ah meuh pawh martarte chanchin a chuang a nih kha. Lemchan lamah lah ni se, martarte chanchin behchhana siam te chu khawvelin hmuhnawm a tih ber ber te a ni bawk. Kum 1857-a First War of Indian Independence-a phusa tak, hemi kum April ni 8-a kum 29 mi lek nia an khaihlum tak Mangal Pandey chanchin behchhana kum 2005-a an film siam, ‘Mangal Pandey: The Rising’ kha khami kuma India rama film sum hlawh chhuak tam ber palina a ni pha hial.

MNF-in kum 2016-a ‘Zoram Chhantu Martarte’ lehkhabu a tihchhuahah khan kum 1966-1986 chhunga Zoram chhan nana nun hlãntu mi 1700 vel hming tar chhuah a ni a; hriat chhuah theih tâk loh pawh mi thahnem tak an awmin a rinawm bawk. He Mizo Independence War a chhuah hma kum 100 hma lam, kum zabi 19-naa Mizoram-a sapho an lo luh dawna lo bei lêta nunna chânte pawh hnam martar an ni vek bawk. Chung martar zawng zawngte nunna hmangin kan vawiin khawvel hi lei a ni a; thisen tam taka lei kan ram neih chhun vawnhim leh venhim, chhanhim leh chhanchhuah hi thangtharte tih tur a ni lo thei ta lo.

Vawiina mite hian kan hnam martarte kha, ram tana an hlan a ropui ang hûin chawimawi thiam lo mah ila, thangtharte khawvela finna leh thiamna a sáng zel ang a, chhuan lo awm leh zel turte’n an khawvel dintute nasa taka chawimawi an duh hun a la thleng ngei dawn a; chu hun thleng pawhin, chu hun a ral hun thleng pawhin hnam martarte kha an thi ngai dawn reng reng lo a ni. Hnam martar pakhat Capt. Chhawnthuama hla ‘I hming a dai lo vang’ tih thunawn hmangin a tawp i khar dawn teh ang. Ni e, Mizo hnam martarte kan zah che u a, kan chhuang che u a, Mizo a awm chhung chuan in hming hi a dai ngai dawn reng reng lo a ni.

Aw i hming a dai lo vang,
Thang leh thar chuan tam ral mah se,
Zoram chhana i tuarna hian a man tawk e
Chham ang i zalna piallei hmun leh,
Zan mu chhîng lo doral karah
Kan tuanna mual tuai ang tharin
Nghilh ni i awm dawn lo.
Share:

Khawvel ngaihsan martarte

Ram tana nunna hlãna martar Capt. Thangrehlova
Mizo National Front (MNF)-in ‘Martarte Ni’ tia an lo vuah September ni 20 chu kan lo thleng leh ta reng mai. MNF chuan kum 1980 atangin kum tin an lo hmang tawh thin a, tu emaw thihchampha emaw, pianchampha emaw ni lovin, ram leh hnam tana nunna hlante hriatrengna ni a ni ber awm e. India ramah Mahatma Gandhi thih champha, January ni 20 hi ‘Martarte Ni’ atana hman thin a ni a; Orissa-ah chuan British ho lak atanga zalenna sualtu, duat leh duhsak taka ‘Punjab Kesari’ (Lion of Punjab) an tih hial Lala Lajpat Rai (1865–1928) thih champha November ni 17 hi ‘Martarte Ni’ atan an hmang thin bawk.

Mizoramah chuan a state pum angin September ni 20 hi ‘Martarte Ni’-ah hmang lo mah ila, MNF chuan ram leh hnam zalenna atana nunna hlân tate hriat reng nan, Mizote’n mitthi puala thla kan neih chhun ‘Mimkut thla’ (September) thla ni 20 chu ‘Martarte Ni’ atan a hmang a, MNF ramhnuai sawrkar (underground government) khan kum 1980 atangin a hmang tan a, MNF ni pawimawh bik paruk zinga pakhat a ni. Mizote hian hei lo hi Mizo zawng zawng huapzo ‘Martarte Ni’ dang kan nei reng reng lo. Ram leh hnam tana nunna hlantu zawng zawngte pualin Luangmual-ah ‘Martar Thlan’ siam a ni a, hei hi a ram pum ang pawha Mizo hnam martarte tana kan tih theih sáng ber a ni rih niin a lang.

Martar kan tih hi chi hnihin a then theih a, sakhuana lama martar leh ram inrelbawlna thil avanga martarte hi an ni. Rin dan leh ngaihdan, pawm dan inan loh avangin sakhuana lamah martar an awm thin a; dinhmun tha zawk emaw, dinhmun ngai luah tur emawa beihna avangin politics lamah martar an awm thin bawk. A eng martar pawh ni se, midangte tana leh ram tana nun hlântu an nih avangin an ropuina hi chuti maia sawia fiah zo chi a ni lo vang. Isua’n a thisenin sual lak ata mihringte min chhandam tawh a; Indian freedom fighter ropui Subhash Chandra Bose chuan, “Thisen min pe la, zalenna ka pe ang che,” tiin British laka zalenna sual turin Indian ho a lo sawm khawm chiam tawh bawk. Zalenna sualtute thisen man hi a va to em!

Athanasios Diakos (1788 –1821) hi Greek War of Independence-a an pasaltha hmingthang a ni. Kum 1821 kum tir atanga Grik hovin Turkey (Ottoman Empire) atanga zalenna an sual khan Diakos hi sipai rual hotu a ni. Hemi kum April thlaah khan Turkish sipaiho mi 10,000 zet chuan Greece chhim lama Grik sipai zalenna sualtute an bei a, Grik sipai mi tlemte-te chuan Alamana luikamah huaisen takin tan an lo khawh a, darkar eng emaw zat chu inbeihna rapthlak tak a thleng nghe nghe. A tawpah an sipai hotu Diakos chu hliam tuar chungin an man a, Turkish commander chuan an sipaia a tel chuan officer-a a dah tur thu te, Turkish nula hmeltha tak chu nupui atana a neihtir tur thu tein a thlem a, mahse, Diakos chuan a lo hnar fithla thak a, “Grik miin ka piang a, Grik miin ka thi leh ang,” tiin a lo chhang a ni. He a thusawi hian khawvel hriat a hlawm a, amah pawh khawvelin a ngaihsan phah hle.

Zoramin zalenna a sual laia zalenna sualtute thuvawn pawimawh tak pakhat chu, 'Felna avanga ram a that dawn chuan nang hmasa la, thihna avanga ram a that dawn chuan kei ka hmasa ang' tih a ni a, hei hi a takin an nunpui chiang hle. October ni 31, 1968 khan Mizoram khawthlang lam Lunghret-ah Mizo sipaite zan mu lai chu vai sipaihovin an bei a. Tlangval kum 20 mi Cpl. Lalnunmawia chu vai sipai hovin, “Inpe la, engtin mah kan tina lo vang che. I haw ang a, nunphung pangngai takin i nung thei ang,” tiin an thlêm a, mahse, Cpl. Lalnunmawia chuan, “Tuiah emaw, khawmualah emaw, boruakah pawh rinawm taka awm tura thutiam tawh kan ni a, nangni vaiho hmaah ka inpe lo vang,” tiin a lo chhang a, damna kawng duhthlan tur a awm reng chungin thihna kawng a zawh ta zawk a ni. Ani hi entirna pakhat mai a ni a, ani ang hi Zoram zalenna sual lai khan mi tam tak an awm.

Martarte hi an chên loh leh dai loh tur khawvel dintute an ni a; mahni nawmsakna zawnga theihna kan hman mek laiin kan khawvel hman a nawm lehzual zawk nan an nunna an hlãn a, an khawvel kalsanin midangte khawvel din tumin an hmanhlel a; khawvelah chuan a bak awm tawh lo, thil zawng zawng tawpna ‘thihna’ chu an hmuh loh tur an tu leh fate tân liau liau an thlang zawk thin. Khawvela an chanvo neih theih ve chhun chu ‘thihna’ a ni. Martarte hi thih ngawt lo deuh duhthlan tur tha zawk leh duhawm zawk pek an ni cháwk a, mahse, chung duhthlan tur duhawm leh tawktarh tuihnai paltlangin an khawvel an hlãn ta thin a ni. Hei vang ni maw, khawvel hian martarte hi a ngaisang a, a chawimawi thin. British Press mite’na ‘khawvela misual ber’ ti hiala an lo sawi thin, misual leh tawrawt hmingthang Aleister Crowley meuh pawh khan, “Martarte hi history siamtu diktak an ni,” a lo ti hial a; misual berte thleng pawhina an ngaihsan chu martarte hi an ni tlat a ni. Hei vang hian, khawvel awm chhûng chuan ram leh hnam tâna nunna hlãntute hming hi hmuhsitin a awm ngai lo vang.

Khawvel hian martarte a zah a, a ngaisang thin. Khawvela poet ropui ber ber — Lord Byron, John Dryden, Alexander Pope, Thomas Moore, Oscar Wilde, RW Emerson, WB Yeats, John Milton, George Herbert, Emily Dickinson, Victor Hugo leh mi langsar tak takte hi martarte chungchang phuah uar hlei hlei an ni a, thawnthu-ah pawh martarte chanchin tarlanna hi thawnthu ngaihnawm a ni thin. Khawvela lehkhabu chhut hnem ber Holy Bible-ah meuh pawh martarte chanchin a chuang a nih kha. Lemchan lamah lah ni se, martarte chanchin behchhana siam te chu khawvelin hmuhnawm a tih ber ber te a ni bawk. Kum 1857-a First War of Indian Independence-a phusa tak, hemi kum April ni 8-a kum 29 mi lek nia an khaihlum tak Mangal Pandey chanchin behchhana kum 2005-a an film siam, ‘Mangal Pandey: The Rising’ kha khami kuma India rama film sum hlawh chhuak tam ber palina a ni pha hial.

MNF-in kum 2016-a ‘Zoram Chhantu Martarte’ lehkhabu a tihchhuahah khan kum 1966-1986 chhunga Zoram chhan nana nun hlãntu mi 1700 vel hming tar chhuah a ni a; hriat chhuah theih tâk loh pawh mi thahnem tak an awmin a rinawm bawk. He Mizo Independence War a chhuah hma kum 100 hma lam, kum zabi 19-naa Mizoram-a sapho an lo luh dawna lo bei lêta nunna chânte pawh hnam martar an ni vek bawk. Chung martar zawng zawngte nunna hmangin kan vawiin khawvel hi lei a ni a; thisen tam taka lei kan ram neih chhun vawnhim leh venhim, chhanhim leh chhanchhuah hi thangtharte tih tur a ni lo thei ta lo.

Vawiina mite hian kan hnam martarte kha, ram tana an hlan a ropui ang hûin chawimawi thiam lo mah ila, thangtharte khawvela finna leh thiamna a sáng zel ang a, chhuan lo awm leh zel turte’n an khawvel dintute nasa taka chawimawi an duh hun a la thleng ngei dawn a; chu hun thleng pawhin, chu hun a ral hun thleng pawhin hnam martarte kha an thi ngai dawn reng reng lo a ni. Hnam martar pakhat Capt. Chhawnthuama hla ‘I hming a dai lo vang’ tih thunawn hmangin a tawp i khar dawn teh ang. Ni e, Mizo hnam martarte kan zah che u a, kan chhuang che u a, Mizo a awm chhung chuan in hming hi a dai ngai dawn reng reng lo a ni.

Aw i hming a dai lo vang,
Thang leh thar chuan tam ral mah se,
Zoram chhana i tuarna hian a man tawk e
Chham ang i zalna piallei hmun leh,
Zan mu chhîng lo doral karah
Kan tuanna mual tuai ang tharin
Nghilh ni i awm dawn lo.
Share:

Mihring hnehtu poetry

New York-a term thum chhung ngawt Governor ni thei Mario Cuomo chuan, "Politician te hi poetry hmangin an campaign a, prose hmangin ram an kaihruai," tiin a lo sawi tawh a, hei hian poetry ropuina leh an lo dah sànzia a tilang chiang hle. Poetry chu mi rilru hneh theihna nei, thiltihtheihna leh ropui bik riauna nei tih a sawi chiang viauin ka hria.

American hovin an ngaihsan em em, USA President hmasa ber nia an sawi, mi ropui, rothap leh rorum George Washington pawh kha African sal pakhat Phillis Wheatley chuan a ram kaihhruai dan ropui a tihzia chu poetry phuahin a thawn a, Washington chuan lehkha thawn let ve lehin, "great poetical talents" tiin a fak hial a, Massachusetts khawpui Cambridge tlawh turin a sawm chûk mai a ni. Phillis Wheatley hi American mihâng hmeichhiate zinga poetry dahkhawmna tichhuak hmasa ber niin kum 1773 khan a chhuak a ni.

US President John F. Kennedy rëng khan poet ropui Robert Frost a ngaina a. Kum 1961 January thlaa presidential inauguration neih a nih khan a poetry a chhiar chhuak a, president nemnghehna inkhawma poetry chhiarna hmasa ber a ni nghe nghe. Kum 86 mi Frost khan he hun atan liau liauva chhiar tura a phuah 'Dedication' chu chhiar chhuah a tum a, nimahsela, dawhsana a ding chhuak chu, ni êngin thlasik vur a chhun tlêt sût mai chuan 'The Gift Outright' tih chu chhiar lo thei lovin a siam a, a chhiar chhuak ta zawk niin an sawi.

Kum 1901-a high school a zawh khan a hnua US President ni zui ta Harry S. Truman chuan Lord Tennyson-a poem 'Locksley Hall' ziak chu a wallet-ah a dah reng thin niin a sawi a. "Paper-ah ka lakai a, ka tibo va, ka lakai leh a, chutiang reng reng chuan vawi hnih sawmthum vel lai chu ka lakai hman a ni," tiin journalist Merle Miller hnenah a sawi ve bawk. Chuti khawpa poet leh an poem-te'n ngaihhlut leh ngaihsan an hlawh vang ni maw, tun thleng hian chung mite thu leh hla chuan khawvel mite zir leh ngaihsan a la hlawh ta zel a ni.
Alfred Lord Tennyson
Khawvela hruaitu ropui tak takte hian poetry an ngaina a, anmahni tichaktu-ah pawh an hmang thin. Anmahni tih-elna poetry pawh a chhuak hnem nangiang reng a. Hmanlai Mizote-ah pawh chuti tho chu a ni. Khua leh khua inrun thin an nih angin intihelna hla an phuah nasa a, lal tana hriat nuam lo poetry pawh a chhuak nual niin a hriat. Tin, puipunna hmun leh intihhlimna hmunah te, ramvahna leh thil tihkhawmna hmunah reng reng poetry phuahin an chham nghal a, an lâm a, inawm tlei nan an lo hmang nasa tawh thin tih lehkhabu hrang hrang atangin hmuh theih a ni bawk. An hun laia poetry phuah thiamte chuan ngaihsan an hlawhin ka ring a, lalte pawhin an duhsak viau thin ka ring – C. Thuamluaia thawnthu ‘Engtin awm ta zel ang maw’ tihah pawh chutiang deuh chu kan hmu nghe nghe.

Nimahsela, chuti khawpa thlahtute'n poetry an lo buaipuia an lo tui chilh chung pawhin, kum zabi 21-na a lo nih meuh chuan Mizote thinlungah poetry zungzam chu a zuzi titih a, ral a ral riai riai zel chu a nih hi.
Share:

Mihring hnehtu poetry

New York-a term thum chhung ngawt Governor ni thei Mario Cuomo chuan, "Politician te hi poetry hmangin an campaign a, prose hmangin ram an kaihruai," tiin a lo sawi tawh a, hei hian poetry ropuina leh an lo dah sànzia a tilang chiang hle. Poetry chu mi rilru hneh theihna nei, thiltihtheihna leh ropui bik riauna nei tih a sawi chiang viauin ka hria.

American hovin an ngaihsan em em, USA President hmasa ber nia an sawi, mi ropui, rothap leh rorum George Washington pawh kha African sal pakhat Phillis Wheatley chuan a ram kaihhruai dan ropui a tihzia chu poetry phuahin a thawn a, Washington chuan lehkha thawn let ve lehin, "great poetical talents" tiin a fak hial a, Massachusetts khawpui Cambridge tlawh turin a sawm chûk mai a ni. Phillis Wheatley hi American mihâng hmeichhiate zinga poetry dahkhawmna tichhuak hmasa ber niin kum 1773 khan a chhuak a ni.

US President John F. Kennedy rëng khan poet ropui Robert Frost a ngaina a. Kum 1961 January thlaa presidential inauguration neih a nih khan a poetry a chhiar chhuak a, president nemnghehna inkhawma poetry chhiarna hmasa ber a ni nghe nghe. Kum 86 mi Frost khan he hun atan liau liauva chhiar tura a phuah 'Dedication' chu chhiar chhuah a tum a, nimahsela, dawhsana a ding chhuak chu, ni êngin thlasik vur a chhun tlêt sût mai chuan 'The Gift Outright' tih chu chhiar lo thei lovin a siam a, a chhiar chhuak ta zawk niin an sawi.

Kum 1901-a high school a zawh khan a hnua US President ni zui ta Harry S. Truman chuan Lord Tennyson-a poem 'Locksley Hall' ziak chu a wallet-ah a dah reng thin niin a sawi a. "Paper-ah ka lakai a, ka tibo va, ka lakai leh a, chutiang reng reng chuan vawi hnih sawmthum vel lai chu ka lakai hman a ni," tiin journalist Merle Miller hnenah a sawi ve bawk. Chuti khawpa poet leh an poem-te'n ngaihhlut leh ngaihsan an hlawh vang ni maw, tun thleng hian chung mite thu leh hla chuan khawvel mite zir leh ngaihsan a la hlawh ta zel a ni.
Alfred Lord Tennyson
Khawvela hruaitu ropui tak takte hian poetry an ngaina a, anmahni tichaktu-ah pawh an hmang thin. Anmahni tih-elna poetry pawh a chhuak hnem nangiang reng a. Hmanlai Mizote-ah pawh chuti tho chu a ni. Khua leh khua inrun thin an nih angin intihelna hla an phuah nasa a, lal tana hriat nuam lo poetry pawh a chhuak nual niin a hriat. Tin, puipunna hmun leh intihhlimna hmunah te, ramvahna leh thil tihkhawmna hmunah reng reng poetry phuahin an chham nghal a, an lâm a, inawm tlei nan an lo hmang nasa tawh thin tih lehkhabu hrang hrang atangin hmuh theih a ni bawk. An hun laia poetry phuah thiamte chuan ngaihsan an hlawhin ka ring a, lalte pawhin an duhsak viau thin ka ring – C. Thuamluaia thawnthu ‘Engtin awm ta zel ang maw’ tihah pawh chutiang deuh chu kan hmu nghe nghe.

Nimahsela, chuti khawpa thlahtute'n poetry an lo buaipuia an lo tui chilh chung pawhin, kum zabi 21-na a lo nih meuh chuan Mizote thinlungah poetry zungzam chu a zuzi titih a, ral a ral riai riai zel chu a nih hi.
Share:


Total Pageviews

Followers

He blog-a thu leh hlate hi a ziaktu phalna lo chuan engti kawng zawng maha chhuah chhawn phal a ni lo. Chhuah duh i neih chuan ka profile-a email-ah emaw, TS Khupchong link-ah emaw mi rawn contact dawn nia.

Labels

Popular Posts (Last 30 Days)

Recent Comments

Blog Archive

Powered by Blogger.

Ka luh ṭhinna