11 June 2015

Kâ hi chhîpah sawn ila,
Thahrui zawng hi nghawng chungah;
Tlang sáng berah ding ila,
“Khawnge Beiseina Khawvel?”

A thâwmah tlang chim sela,
Luipui fâwn bulh bulh rawh se.
Khawpui ri dur dur sela,
Senmei alh zuai zuai rawh se.

Lei kak thûk tak inhawng chuan,
Duh takin min hîp sela;
Arsi tla chum chumte chuan,
Ngai takin mi pan rawh se.

Thiamna zawng zawng bo sela,
Theihna zawng zawng mang rawh se.
Thim țihawmin khat sela,
Thinlung hi keh chhe rawh se.

Țap ri rimawi chang sela,
Mangang râwlin muan rawh se.
Thinrim râwlpui khâwk sela,
Rûm ri nawn awn awn rawh se.

Silhfen inbel pawtthlerin,
Tlangchhip ata zuangthlaa,
Khawvel hriat thama auvin,
“Khawnge Beiseina Khawvel?”
Subscribe to RSS Feed Twitter-ah pawh ka awm e!