20 April 2017

Ka țhahnemngai chuan Guinness of World Record-a 'chhungkaw lian ber' leh 'țum khata cheraw kantu tam ber' bakah Mizovin khawvel hriatpuina (approve) thlap world record kan neih theih dan tur ka ngaihtuah a. 'E, vawkte manto ₹ 98,000 (£ 1184.50) man lai kan neih kha le' tiin Guinness World Record lam contact dan ka ngaihtuah ta a. Guinness World Record-a lan theih dan (guidelines)-te ka'n en khan, vawkte man zatve vel lai mai senso a ngai a lo ni awm a; kan hnam tan intihtheihpuina ai mahin mualphona tur lam zawk a nih bawk si avangin ka buaipui zui ta lo a ni. Ni lo sela chuan, a changtu Minister Pu C. Ngunlianchunga tan pawh khawvel huapa hming lan theihna a nih dawn vei nen.
Ka han ngaihtuah mai mai a, kum 2015-a vawkte manto, ₹ 98,000 man lai mai kha tunah chuan kum hnih lai a lo ni ta a, khang vawkte-te khan thlah an nei hnem tawh viau hlawmin ka ring a. A dawngtute rilru nei taka an enkawl chho a nih phei chuan, note a hrinte leh chumiin note a hrin lehchhawn tawh turte nena a hlutna chu vawkte pakhatah ₹ 1,00,00,000 (10 million) chuang lai a ni tawh ang a, chu chu British pound (£) 12,08,67 lai a ni a. Vawk note 50 lai mai lakluh nia sawi a ni a, chu chu tunah zet chuan chutianga a hlutna chu ₹ 50,00,00,000 man vel a ni ang a, British pound (£) 60,43,376 vel lai a ni ang. Chu chu Manchester United footballer manto leh hlawh hnem Zlatan Ibrahimovic-a kum khat dawn hlawh a ni pha a ni. Chu vawk note chu Mizoram vawk note aia note țhang duh leh note nei tam thei tur chi a la ni lehnghal. Khawvela club hlu ber Manchester United enkawlna senso chu hetiang chi vawkte farm siam sela, a tum vek thei dawn a, sponsorship hranpa ngai lovin vawkte hmangin Manchester United hi a enkawl theih dawn tihna a ni. Engah nge England ațangin chuti khawpa vawkte țha chu an lo hralh chhuah phal zawk le aw, ka ti ta rum rum mai.

Hei, kum hnih lai mai a ni ta a. Mizoram vawkte aia țhang duh leh note nei tam chi 50 zet mai chu an inthlahpung ve leh fe tawhin a rinawm a, a leina man ngaihtuah chuan a hralhna man pawh a sang hle turah ka ngai a, a vulhtute (vawkte man to, țhang chak leh note ngah chi) dawngtute chu an va hausa tawh dawn em ka ti a ni. Khawvela vawk vulhtu hlawhtling ber ang zawng pawhin Guinness Book of World Record-ah a dah tel theih zel dawn a, chu bakah NLUP hlawhtlinna ropuizia tilangtu niin, a zir chiangtu tura lo zin University of Minnesota mai bakah Cambridge University, Oxford University leh Stanford University ațangte pawhin mithiam rual an lo zin lut chum chumin ka ring.

Tichuan, vawkte manto chaw luttu Minister Pu C. Ngunlianchunga hian Guinness World Record-a 'vawkte manto ber' te, 'vawk vulhtu hlawhtling ber' dah luh a nih theih nan vawkte man zatve vel lekin min sponsor sela, khawvelah pawh a hming a lar em em mai dawn a ni. Chutih rual chuan, 'țum khata cheraw kan tam ber' record min siampuia Mizo leh Mizoram min hmingțhatpuitu, khawvel mithmuha min phochhuaktu, khatih laia Art & Culture minister Pu P.C. Zoramsangliana dinhmun hniam zawka hnuhhniam a nih ang khan, Pu C. Ngunlianchunga pawhin chutiang chu a tawh ve phah ang tih ka hlau deuh. Eng pawh ni se, he vawkte manto hi a lo puitlin hnu thleng pawhin talh phal chi rual a ni lo va, vulh chi leh hralh mai mai chi a nih hmel ngawt mai.

16 April 2017

Tun hnaiah kan MLA pakhatin driver kut a thlak thu social media lamah a darh chiam a; a darh rualin a hmuna awm dangte'n an hmuh dan leh, dawt a nih lohzia an sawi sup sup a, chutih rualin anmahni lam insawithiamna a awm bawk a. Mipuite'n thu dik zawk kan hriat loh avangin he thil hi chhui chian ni sela a duhawm hle ang. He thil hmutu (witness) tam tak an awm ngeiin a rinawm a, thu dik hriat chhuah hi thil harsa tak tur niin a lang lo. A tua zawk zawk pawh thiam lo se, dan anga hrem a țha hle. Chutih rualin, hetiang lama kan ram hruaitu (legislator etc)-te'na sawi sep an kai ta fo mai hi inenfiahna tur an neih ve pawh a rinawm. An lo thiam lo a niha civil mi kut an thlak a nih ngat chuan mipuite zah lohna lian tak leh a hnam pum ang pawha thil mualphothlak tak a ni ang.

Pu R. Lalrinawma, Mizoram State Assembly Deputy Speaker
Legislator-in civil mi kut an thlak hi Mizoram-ah chauh ni lo, India ram state dangah pawh a lo thleng fo tawh a, mi state chuan an la thutak țhin hle. Nikum 2016, May thla khan Manipur-a MLA pakhat Dr. Ng Bijo Singh chuan civil mi Leishangthem Itocha Meitei chu hmun ualau takah kut a thlak a, victim hian FIR a thehlut nghal a; Khurai khuaa hmeichhiate chuan hei hi duh lohna an lantir nghal a, MLA hi ‘Gunda' ti hialin an au chhuahpui a ni.

Nikum vek June thla khan Punjab Congress MLA Sukhjinder Singh Randhawa chuan Pathankot district-a Sewa Dal hotu IS Gulati chu kut a thlak vei rawk a, mipui an thinrim hle a, nasa takin lungawi lohna an lantir a ni. Kut tuartu ber Gulati hian, “All India Congress Committee (AICC) vice-president Rahul Gandhi-a hnenah Randhawa hi party ațanga ban turin kan ngen ang a, kan ngenna hi tihhlawhtlin a nih loh chuan Congress kan chhuahsan ang," a ti nghe nghe. Nimahsela, he MLA hi kumin Punjab MLA inthlanah khan thlan tlin a ni leh tho a ni!

Hengte bakah nikum July thla tawp lam khan Bihar MLA pakhat Mehboob Alam chuan Katihar district-a bank manager pakhat Rakesh Ranjan chu kut a thlak a, bank manager hian FIR thehlutin, police lam pawhin thubuai an siamsak nghal a ni. August thla pawh khan Maharashtra MLA pakhat Ramchandra Avsare chuan police constable pakhat chu kut a thlak a, ani pawh hi thubuai awrhtir nghal a ni bawk. Heng lo pawh sawi tur tam tak a la awm.

Ram hruaitute hi keimahni ang bawka mihring ve tho, thinrim ve thei an ni. Chutih rualin, mipui vantlang chung lama ngaih leh mipui mit fukna an nih avangin midangte mualphona tling lovah an mualpho thei a, mitin maiin an nitin chezia kan ngaihven an nih avangin kut thawhna awm ngawih ngawihah pawh an insum a ngai hle zawk a, buaina awm theiah pawh a hmetmittu leh a zawldawhtua an tan ngam a pawimawh hle ang. Chutiang ni lova kawngpuia tlan nikhuaa nihna hre viau si, zahawmna leh insumtheihna lantirna kawnga nihna hre leh si lo an nih chuan mipui thinurna hi awlsam taka tawn buak theih a ni a, an la tawng baw nge nge ang tih a hlauhawm hle; mipui thinurna hian second thought a nei ngai si lo.

Kan khawpui chepzia kan hre țheuh va, traffic jam pawh nitinin kan tuar țhin. Chutih laia kan VIP țhenkhatin an nihna hre rana traffic jam lak mam an tum ve ngawt zel hi a huatthlala hle. Hun pawimawh bik (Assembly țhutkhawm etc) lai te a nih chuan thuhran a ni a, chutiang pawh ni lova anmahni mimal thil pawimawh - mitthi ral tura an kalna kawngah te, damlo kan tura an kalnaah te, mo lawm tura an kalna te thlenga VIP tlana tlan vuk vuk an tum țhin hi sim hlawm sela a duhawm hle. Kawngpui hi VIP ta bik ni lovin, mipui ta a ni.

Keini ramah pawh Congress MLA țhenkhat zingah kut ram deuh, civil mi kut thlak hreh lo an awm niin a lang. Tun hnaiah ringawt pawh MLA leh Minister zingah hetianga sawi kai an awm nual. MLA a ni emaw, kut hnathawk mi a ni emaw, a tua pawh ni se, midangte kut thlak ngawt hi dan kalh a ni a, dan anga hrema lungina tantir emaw, pawisa chawitir emawa hrem mai tur a ni. Chutih rualin kan ramah hetiang thil a lo thleng fo tawh nachungin, kutthlaktu MLA-te chungah hremna lek a nih kan hre ngai lo. Dan bawhchhiat avanga MLA lungin tantir phei chu sawi tur a tlem hle; dan an bawhchhe ngai lo chu a ni si lo.

Midangte kut thlak chîng MLA-te hi inmalbeih a ralah chuan, patling leh patling tumah inhlauh bik ngawt thu awm suh! Lirthei steering herha eizawngte ngat phei chuan kan ram hruaitu țhenkhat hi chu duh sela, an tukzal hma viau ang. Ram hruaitu an nih avangin tu pawh mai hian kan zah a, kan thiamna zawkah ngei ngei pawh kan thungrul mang lo. Ram hruaitu ni lo sela chuan a let dawng nasa hlei hleiah an țang ngei ang! Tin, ram hruaitu ni lovin thuneihna vilik thei dinhmunah ding lo sela chuan, heng MLA kut ramte hian kut an thawh țha ngam kher lo maithei. Thuneihna chapopui țhinte hi thuneihnain a kalsan hunah chuan chapona tur an nei tawh dawn si lo va, an va khawngaihthlak dawn tak!

Hetianga civil mi kut thlak hreh lotu legislator kan nei nia a lang fo mai hi hi a zahthlakin a vanduaithlak takzet a, a awmna Congress party lam pawhin hetiang mi hi party timualphotu a nih avangin MLA ațanga chawlhtir emaw, party ațanga hnawhchhuah emaw thlenga a chunga hremna an lekkawh ngam a țha hle ang. Inthlan a hnaih tawh chuan thil ho tê anga lang pawh hi a pawi thui duh țhin hle. Dan chunga leng hi tumah kan awm lo va, hna hniam ber ațanga a sang ber thawk thlengin danin min phuar tlat a ni. Mi naran (civilian) kut thlak aiin ram hruaitu kut thlak chu tu tan pawh a na lehzualin a rinawm a, an phu tawk hremna an dawn ngei theih dan kan dikna chanvo hi lan chhuahtir ngam hi mipuite pawhin kan mawhphurhna a ni tih hria ila a țha hle ang. Chutiang a nih loh chuan, kan thlan tlinte kut kan la tuar fo dah ang e.

T.S. Khupchong
feedback : tskhupchong@rocketmail.com

12 April 2017

MNF-MDF Joint Conference, April ni 11, 2017-a Siaha-a hman turah party President Pu Zoramthanga zuiin Dt. 10th April, 2017 khan Siaha-ah kan kal a. A tuk programme hman zawhin chhunah Lawngtlai-ah kan let leh nghal a. Lawngtlai-ah hian Mizo Hnam Rûn-ah hun hmangin, hemi hnu hian rambuai lai, Zoramin zalenna a sual laia hmeichhe volunteer pakhat Pi LH Suntlemi nen inkawmna hun kan nei hlauh mai a, minute 5 vel chu kan inkawm hman.

Pi LH Suntlemi hi kum 1995 khan Lawngtlai Chanmary (an țhensawm hma)-a VC lo ni thei ngat kha a ni a, a VC nih kha ruai nen ropui takin an lawm nghe nghe. Hmeichhe ropui tak leh paukhauh tak niin a lang.

Kum 1960 vel ațangin hnam movement hi a tuipui chho țan a, hetih lai hian nula kum 27 mi a ni âwm e. Rambuai lai vel hi Tuithumhnar-a an khawsak lai a ni a, a pasal hi MNF sipai Major a nih miau avangin an khaw awmna apiangah an in hi halsak leh țhiahsak a tawk nasa hle. A sawi danin, an in hi țum li ngawt halsak/țhiah a ni tawh a — Tuithumhnar-a an awm lai te, Hmawngbu, Sabual leh Khengkhawng-a an awm lai tein an in hi halsak leh țhiahsak a ni zel a, an tuar nasa hle a ni.

A pasal Kapsellova hi MNF sipaiah khan Major hial ni pha a ni a, Khuangchera Battalion-ah a awm a. India sawrkar nena inrem hnuah khan a lo chhuak ve a, kum 1990 khan a boral tawh a ni. A thih dawna thusawi chu a nupui Pi Suntlemi chuan min hrilh a:

'India independent ka hmu tawh a, Burma independent ka hmu tawh a, Mizoram independent erawh ka hmu dawn ta lo a nih hi' tih chu. Kan hnam sipaite khan independence kha an lo sual takzet a ni tih chu he thu hian a tilang chiang hle. Burma lamah pawh lo awm hrep tawh a ni a, amah Pi Suntlemi chuan Tahan khua dintu leh Burma lamah pawh MP hial ni tawh a nih thu a sawi.

Pi Suntlemi hi a hriatna a la țha hle a, kum 84 mi niin a la chak țha hle. Party President Pu Zorama a rawn chibai a, ani lahin a lo hre em em a. A chibai hnuah, "Hmeichhe sipai ka nih hi, rambuai lai khan volunteer ka ni ve alawm," a ti lang lang mai a. Programme neih zawhah ka va titipui vat a ni.

Mizoram zalenna a nghakhlel tih a hriat a, kan ințhen dawnah, "Pu Modi-a ka hmu dawn, Mizoram independent ka dil dawn," a ti tàn tân mai a, a țanawm khawp mai! Inkawmna hun kan nei rei thei lo va, a pawi ka ti hle. Tunah hian Lawngtlai-ah an khawsa mek a ni.

09 April 2017

Nizan Dt 8/4/2016 khan ka țhianpa F. Lalrinmawia (J-Fan) chuan mual min liamsan ta a, ngaihtuahna a tithui ngei mai. Jfana hi tun hma kum 7 kal taa fiamthu khawvela ka lo chenpui țhin a ni a, hmanni lawka an in bul step-ah chesualin a ringruh a tliak a, Aizawl Civil Hospital-ah enkawl a nih hnuah kan chân ta.

Ka la hriat reng chu, Comedian Search vawi hnihna, kum 2009 khan Jfana hi a tel ve a; vanneihthlak takin top 5 a inhlangkai hlauh mai. Hemi kum hi Roluaha pakhatna a nih țum kha a ni a, Roluaha bakah C. Laldinpuia of Serchhip, K.C. Tluanga of Chanmari West/Kawlkulh, K. Zoramthanga Hmar of Mauchar leh amah F. Lalrinmawia te chu top 5-a tlingte chu an ni.

Top 5 intihsiakna hi Chanmari YMA Hall-ah neih a ni a, contestant-te hi minute 10 țheuh pek an ni. Hemi țum hian Jfana sawi tur haihchham chu chhuatah nausen ang maia tãlin a țap der ta chiam mai a nih kha! Chu chu a fiamthu thawh lai, ka mitthlaa châm renga chu a ni. Hemi țumah hian Dinpuia 'tuifuni' leh KC Tluanga 'mawng vaw phel phawk' a lar em kha. Amah KC Tluanga pawhin April ni 14, 2014 khan mual min liamsan ta bawk.

Uan ve tak tak lai, 2008-2009 vel khan kan inkawmin kan inzui nasa țhin khawp a. A bikin Dinpuia of Serchhip, Zorama of Mauchar, David of Ramhlun North, Jfana of Dinthar, KC Tluanga of Chanmari West, Mafela of Keifang, Biaka of Dinthar te hi kan ni zual. Heng rual hi kan inzui dul dul a, kan thlen tawpna naah chaw kan ei a, kan riakho va, chutiang chuan kum khat chuang teh meuh kan khawsa a ni.

Țum khat ka la hriat reng chu, KC Tluanga te inah chaw eikhawm ang u kan ti a, Chanmari West-a a in luah, te tak tê maiah kan lut a. A anțam tlak țhing min hmehpui a, a lo hîng reng mai a. Amah KC Tluanga ber chuan hâwp hruih hruih pahin, "Țhiante nen chuan anțam hîng pawh a lo tui ngei mai," a ti a ti mai a. Kan hlimpui hle. He a thusawi hian țhian hlutzia a sawi fiah chiang ngei mai.

Anmahni Jfana te inah pawh kan leng fo va, farnu a nei dih diah a, țhenawmah tleirawl an lo awm ve bawk nen, nuam kan tiho dar dar hle. Dinpuia thlenin Tuikual mawng lamah te, Zoramthanga te in luah Bawngkawn-ah te pawh kan eiin kan in fo va, kan riak fo - kan in luah thlengin. Chuti khawp chuan a ni, kan inzui nasat ni. Mahse, kei zirna lam vang leh thil dang dang vangin fiamthu ka buaipui chhunzawm ta lo va, kan inkawmin kan inhmu ngai ta meuh lo.

Jfana chu naupang te tak tê ang a ni a; pa tê tak, sam leh khabehmul zuah vauh mai a ni. Aw tê leh sîn sáng lam a nei a, hrisel lo tak hmel a pu. Hming țha pawha inko lovin 'Nghalchiang' tiin ka ko mai zel a, ka phone contact list-ah pawh a hming ka save dan a ni; ani pawhin mi ko pawlawh ve viau. Zu a in ve țhin a, a ruih châng chuan zan rei pawh sawi lovin mi rawn call a, darkar khat chuang chuang te kan inbe țhin, kum 2010 hnu lam thleng pawhin.

Amah Jfana hi nikum te chuan Milan Press-ah a thawk tawh a; nikum kum laihawl khan kan țhianpa Mapuia Renthlei novel 'Lamțhuamthum' buaipuiin press-ah kan leng a, amah nen kan inhmu hlawl mai. Kan titi hlut a, "I lo kal leh hunah i lehkhabu Pindan Khawhar kha min lo ken rawh aw," tiin min chah a. Ka kal leh tâk loh avangin ka Pindan Khawhar pawh a chhiar lo hlen a, amah pawh ka hmuh hnuhnunna ber a ni ta.

Jfana dam lai hmel chu ka hmu tawh dawn lo. Tunah chuan kan țhianpa KC Tluanga (mawng-vaw-phel-phawka) nen an inhmu tawh ngei ang a, fiamthu thawhin an nui dun tlak tlakin ka ring.

(Ka țhianpa Jfana thih hnua ka ziah a ni a, a thihcham vawi khatna a lo thleng ta reng mai).

03 April 2017

Thian thate nen kan inhawr khawm a, kan inkawm khawm a, kan ei khawm bawk a. Kum eng emaw zat chu MSU lamah lungsi takin kan lo inhmangho chho tawh a; MSU lama kan hun te a liam hnuah party lamah ke penho zai kan rel leh ta a. Chutianga thianho inlungrual zelin, vawiin April ni 3, 2017-ah MNF Hnam Rûn-ah president Pu Zoramthanga'n ka thian mi 30 chuang zet te nen min lawm lut ta a ni.


Mite'n zirlai pawl hi politics kailawn a ni an ti thin a, zep thu a chêng lo, a remchang ber a ni reng a. Zirlai pawl hi political institution tha mangkheng a ni. Tuna kan MLA hmingtha leh chhuanawmte hi han en ila, zirlai pawl atanga inzir chhuak an ni deuh fur mai. Mi tam tak chuan zirlai leh thalai la naupang tê tête politics-a kan inhnamhnawih thin hi an hrethiam lo. 'Zirlai in la ni a, in la naupang a, hetiang hi la buaipui suh u' an ti thin. Politics chu putar un leh khun tak takte buaipui tawk lekah an ngai tihna a ni. Duhthusamah chuan thalaite hian tuipui ila, zirlaite hian buaipui bawk ila, kan politics hmelhmang te pawh a inher chho bawih zawk lo'ng maw!

Kei hi mi rethei tak e ti lo chuan, sawrkar hna thawh la tum ngai miah lo, a dil pawh la dil chhin lo ka ni. Zep thu a cheng lo, zirlai pawl lamah lah tun hma angin ka tuitla tawh lo bawk nen, kan ngaihven zawng tak a lo ni ve leh zel bawk nen, thianhova thil tih remchangah ka inzep ve ta mai a ni. Party-a ka luh hi min kawm serh phah nan te, min tih phah nan te in lo hmang hlauh ang e.

Ka thian tha, min hmangaih tak takte fuih, zilh leh hauh ka tawk nasa hle. Hetiang ka tawk dawn tih ka hriat avangin thiante pawh ka luh tur thu ka hrilh mang lo va; chuti chung chuan lawm luh dawn leh a hnu thleng pawha min hau bawng bawng te, thurawn min pe mawlh mawlh te, duhsakna min hlan mawlh mawlh te an awm. Ka tan chuan hmangaihtu thian ka nei tih tilangtu a nih avangin chung zawng zawng chu a hlu takzet.

Eng pawh ni se, keimah hi keimah ka la ni reng dawn a, nimina 'kei' kha vawiin leh naktukah pawh 'kei' a la ni reng dawn. Tun hmaa zirlai pawl pakhat MSU-a ka lo inhmang thin ang khan, political party pakhat MNF-ah ka inhmang dawn tihna mai a ni a, ram tana hna kan thawhna hmun dang hret dawn tihna chauh a ni. Zirlai pawla inhmang chunga 'Zoram hi kan ram a ni' ti hla sa thinte khan, party-a inhmang chunga 'Zoram hi kan ram a ni' tih kan sak chhunzawm zel thei tur hi ka lawm hle.

Vawiin lawmluh programme-ah lawmluhte atangin mi paliin thusawina hun kan nei a, chung zingah chuan thu tawi tê sawina remchang ka nei ve hlauh mai a, a tlangpui zawr zawr, ka la recall theihte ka'n dah tel ve reng reng ang e.
"Pi leh pu zahawm tak takte u, a hmasain chibai ka buk a che u. Naupang tê la ni chung pawha ka lung lèn em emtu MNF party ka zawm thei hi ka lawm hle a ni.
"Zirlai pawlah kan inhmang thin a, chutah chuan sawrkar khalh ngil tumin theihtawp kan chhuah thin a, thil tha nia kan hriat te kan ti thin. Issue kan la a, agitation te kan nei bawk a, chutah chuan mite'n min lo hmu MNF em em thin a lo ni. Chutianga thil tha nia kan hriat kan tiha mite'n min lo hmu MNF thin hi he party tan pawh a lawmawm hlein ka hria. Thil tha tih chhunzawm zel tumin kan rawn lut a ni.
"Nakkum lawk inthlana MNF a sawrkar kan rin vanga lo lut kan ni lo va, MNF sawrkartir tuma lo lut kan ni zawk; ram leh hnam tana thil tha tia hna thawk tur chuan a sawrkar phawt a ngai miau si a.
"Vawiina lo tel thei lo kan thian leh kan thalaipui tam tak hi Mizo hnam party (kei chuan Mizo hnam party ka ti mai a) luh châk an awm a. Hmun hrang hrangah an in-pang-aw-zial mup mup a, an rawn in-tira-mei-kaiah luh diah diah dawn a ni. Chutianga kan thalaipuite tan pawha luh châkawm a nih zel theihna turin kan hotute leh party pawh rawng thar kan hnawih zel a pawimawh hle ang.
"MNF party a sawrkar theihna tura hma la turin keiniho hi tun atangin kan inpeih reng a ni. Ka lawm e."

01 April 2017

Kum 2009 April ni 1 khan hetiang hi ka lo ti tawh a; a hlawhtling hle. Chu chu 'SMS Mangkhâwng' tia ziakin tlem tlem ka phuah belh a, April ni 1 a lo thlen apiangin chu thu chu ka la share ve tlauh tlauh thin. Nizan lamah ka inngaihtuah a, chutiang chi chu ka'n ti leh chhin teh ang, ka ti a; mahse, ka ngaihtuahna a thui ta tlat.

Thu thlum leh lungkuai tak, anmahni bêmna lam hawi ka thawn ang a, min rawn chhan dan ka hre châk a ni. A then chuan April ni 1 lam ngaihtuah miah lovin, min rawn chhâng maithei. A nih loh pawhin, ka thiante hi chhe lo tak tak an nih avangin, 'i chhe lo' tih hnua 'April fool' han tih leh kha a nuam chiah lo bawk. Chu chang a ni lo, a thenin tha taka min lo chhan let hnua 'April fool' han tih leh kha a nuam chuang lo hrim hrim. Mahse, keimaha châknain min tur ta tlat mai si a, ka ti tlang ta!

WhatsApp-ah broadcast list ka siam a, ka thian ngamtlak tak meuh meuh hmeichhia chhe lo thiau 30 number ka dah a, message thawn chhuah tur chu hetiang hian ka siam ta:
'Mihringte hi engtik lai pawha thi thut thei kan ni tih ka ngaihtuah chhuak thut a, chuvangin zah avanga ka hrilh hreh ngawih ngawih thin che hi i hriat thain ka hria a, ka rawn sawi tawp.

Ka hmuh leh hriat tirh atangin chhelo ka tiin fel ka ti em em che a, ka star che a, ka ngaizawng ru veng veng thin che. Ngaihzawng i neih mek chu ka ring tho va, mahse, ka sawi loh chuan, thih thut awm palh thei thil thu-ah ka star em em che tih i hre dawn si lo va, nang pawhina min lo ngaihdan ka hre dawn bawk si lo. Chuvangin zahtheihloh ka rawn chhuah tawp mai a ni.😌

I chhanna (he thu i chhiar hnua i rilrua awm kha) ka nghak e. Intihhlum tum vanga last message ang chi-a i lo ngaih palh takin, kum 2017 Sande Sikul inkhawm kai kim ka tum mek😀

He thu hi zing lam dar 1:10-ah ka thawn chhuak ta a. Dik taka sawi chuan, âwm ang lutuka ka tih chuan ka thutak viau angah an ngai ang tih ka hlau si, ho deuhva ka tih chuan ka 'April fool' kha a fuh lo vang tih ka hlau bawk si, ngaihtuahna a thui hle. Mahse, khitiang khian ka thawn chhuak ta tawp a, ka zah avangin an rawn thawn let leh pawh hmu ngam chiah lovin phone ka silent a, ka mutsan ta a.

Zingah ka tho va, rang takin WhatsApp ka en a, ka broadcast message mi 30 ka thawn chhuahah mi 26-in an read a, midang 4 chu a deliver ta lo. A read zingah mi 21 chuan min reply a, midang 5 chu an thin a rim a ni ang...bleh! Reply ka han chhiar chu ka thil tum a flop tih a chiang hle.😂 April fool-ah lo pawh khitiang khian thawn chhuak ila, a flop tho dawn tih ka chiang hle.😆😅😂! An rawn chhan letna te chu i han en teh ang.


Mapuii : April fool 😄😄😂😂 01:11 AM

Duhsaki : Happy April fool 😂👊 01:14 AM

Ngaihtei : 😄😄 last para ber hi.. 01:17 AM

Sangliani : 😏😏 01:12 AM
Ka message tur a ni em?? 01:12 AM
Thawn sual?? 😃 01:12 AM
Ka khawngaih let che 😂😂😂😂 April Fool let che ka tum a. Mahse i laklawh ka hlauh pui che a 😂😂😂 01:46 AM

Tei : 👍👍👍😃 02:04 AM

Afeli : 😄😄 02:07 AM
Rilve 02:07 AM

Linda : 😄😄😄 06:16 AM
A va tha ve. 06:16 AM
Tak tak nge infiamna? 06:16 AM
Morning 06:16 AM

Spi :😂😂💦 06:26 AM
I april fool hma emai aa 06:26 AM

Kimi : April fool a va nih hmel ve 😕 06:54 AM

Zamtei : Hahaha boss happy april fool to u too 😘😘 07:37 AM

Nutei : 😅😅😅😅😅 08:03 AM
Ka van lawm em em 08:03 AM

Caroline : 😂😂😂😂😂 08:25 AM
Vawiin ni kher lo ah min thawn la chu ka hmangaih let top top che ka ti ang 08:25 AM
😂😂😂 08:25 AM

Angaihi : Sande sikul inkhawm kai kim lai tak hi ava pawimawh em 😃..chumai bakah in ti hlum tum hmel i put loh zia hi ka hria 01:35 AM
Happy april fools day 08:31 AM

Zampuii : April fool 👍👍👍 08:47 AM

Rinthari : April Foooooolllll 😆😆😆😆 08:56 AM

Chhanchhani : 😝😝😝😝😝 09:01 AM

Betsy : Hahaha iva over reuh e awww 09:13 AM
😄😄😄 09:13 AM

Rci : April fool 09:51 AM

Janet : A topna hi hit eeeee 😆😆 09:57 AM
April fool ni si 09:58 AM

Rzi : 😂😂😂 11:20 AM


Ti hian, a flop chiang khawp mai...hairehai! Amaherawhchu, khi ka message khi April ni 1 kher lovah pawh ka thawn ngam tur thiau an ni a, chuti khawpa chhe lo leh fel, ka star ruk ngawih ngawih te vek an ni. 'Kei pawhin ka duhin ka star ve che alawm etc etc...' min ti sela chuan 'April fool' lam ka dahtha ang a, kan ni daih tur a nia awww... In duh chuan in hlawm khawm ula, 'Tsa Star Association (TSA)' din ula, a thla bi tê tê-in ka ngaihzawng turin in rawn inthehchhuak thin dawn nia...sala!

Khing message zawng zawng khi tu mah ka reply lo va, he thu hi blog-ah ka post a, a link chu ka thawn ta vek zawk a ni. Engmah sawifiah tur chuan pawh a awm si lo va, ka chawh hle.

28 March 2017

Mizoram State Assembly session, 2017 March thlaa neihah Minister pakhat John Rotluangliana leh MLA pakhat K. Lalrinthanga te'n zu chungchang an sawi chuan sawi zui leh chai a hlawh hle a; Pathian rawngbawltute pawh an au chhuak a, facebook lam leh whatsapp lamah a darh chhuai chhuai a ni.

A link dah tawp mai ila:

K. Lalrinthanga thusawi
John Rotluangliana thusawi 

Rev. Lalramliana, Senior Executive Secretary, Mizoram Synod
"Pathian thu hi kan duh dan nemngheh nan duh duh danin kan kailek ta a ni ber. Ram rorelna sang berah 'Isua'n zu a approved' an ti nia maw le! Inthlan a nih hunah Pathian duh anga ram kaihruai thei mi kan thlang tur a ni ang. Krista avangin kan ram rorelna hi kan tidanglam ngam tur a ni."

Rev. P.C. Nghaklianmawia
"Bible thu hi a context ngaihtuah lova mahni duh dan dana hrilhfiah chi a ni lo. Hetiang zawnga Pathian thu hrilhfiah hi hrilhfiah dan dik lo a ni. Bible-in a sawi tum ang ni lova mahni ngaihdan sawhngheh nana Pathian thu hman luih hi Pathian sawichhiatna (blasphemy) a ni tih hriat a tha. 'Zu zawrh hi kan tawngtai chhanna a ni' tih leh 'Kan zu in te hi Pathian thu sawi tui nan hmang ila' tia tham lo taka kohhran deusawhtute hian Pathian thinurna an tawng baw lo a nih chuan a lawmawm ngawt ang."

Rev. P.C. Lalropuia
"Khawi ramah mah hian Kristian ram hruaitute'n an mipuite hnena Pathian thu sawi nawmna tura zu in a that tur thu an sawi ka la hre lo. A sawitu khan a hming a sawi kan Pathian leh a kohhran a zah miah lo a ni. Kristian thurin tluang pangngai mausamtu a ni bawk. Zu avanga chhungkua leh mimal rilru na, zu avanga tu leh fate sun, zu avanga chhungkaw keh darhte rilru a va na dawn em!

Rev. C. Lalbiakhluna
"Mawi lo taka MLA thenkhatin nawmnah taka Pastor-te min sawi kai hi ka rilru a na takzet. Kan Pathian duh dana ram roreltu kan va mamawh em! Zu hmangaihtu ni lo, ram hmangaihtu leh Pathian tih mi MLA chauh i thlang tawh ang u, Pathian thinurna kan tawng buak hma hian.

Rev. R. Lalhmingsanga
"Zu hi Pathian thu sawi tui nan pawh a tha dawn' tia sawitu Minister John Rotluangliana hi an kohhrana inkhawm ve thin a ni em le... Thlarau lam thuchah hmanga Pathian mite chawmna ber pakhat 'Thuhril rawngbawlna' heti em ema a hmusit hi engtizia nge ni ta le? Kohhran rawngbawlna pawimawh heti em ema Minister meuhvin a sawi bawrhbang a, a hmusit mai hi ama thlarau lam nun hi a da hneh hle zawk em ni le?

Joseph Zaihmingthanga, Revival Speaker
"Upa K. Lalrinthanga'n 'Pastor zu in ka hre teuh, tlemtein, tam tak ni lovin' a tih hian khawi lam Pastor nge a hriat? A hriat chu sawi sela... A sawi lang ngam lo a nih chuan dawt phuahchawp sawiah ka ngai ang. John Rotluangliana'n, 'Zu hi Pathian thu sawi tui nan te hian a va tha dawn em!' a tih hian amah leh amah a intimualpho tih a inhre lo em ni aw... Heti taka Pathian thu zah lo mi hian a tlin reng inring suh se. Lalpa thu hi thu tak a ni a, chuti maia chalai kual chi a ni ngai lo ve."


'Zu hi Pathian thu sawi tui nan te hian a va tha dawn em!' titu John Rotluangliana, mipui thlan Minister ngei mai chu

27 March 2017

Mi aia harsatna tawk nasa leh mi tawrh loh tuar bik ka ni hauh lo. Amaherawhchu, hnung lam ka thlir let chang hian, khuarkhuruma ka tlak lai te, chirh leh dûm hmuna ka tân lai te, hlîng leh bawn hmuna ka kal lai te ka hmu țhin. Țhenkhat harsatna tawh chu rilru natna, chhungkua leh inngaihzawnna kawngah te a nih ka ring a, chutiang harsatna an tawh avangin 'ka hringnunah harsatna tam tak ka tawk' an tih ve fo ka ring. Kei erawh chutiang harsatna ang mai a ni hauh lo thung. A tak ngeiin ka tawng a, a tak ngeiin ka vai a, a tak ngeiin ka tuar a ni.

Ka harsatna tawh phenah hian Lalpa'n min țanpui nasa takzet, a tak ngeiin. Hei vang hian alawm ka harsatna tawh hi malsawmnaa ka chhiar țhina, suala ka peng tur lak ata min veng țhin ka tih țhin hi ni. Mi țhenkhatin 'Lalpa'n min țanpui' an tih hi thlarau lama an chan chhah deuh vang te, chhungril lama an hlim riau vang te, thlahtute ațanga inrochun malsawmna an dawn vang te a nih ka ring. Kei chu chutiang a ni lo va, Lalpa min țanpui dan hi mit khap kar leka lo lang țhin a ni.

Entirnan, kum 10 kal ta ațanga mi in luaha khawsa mai kha ka ni a; in luah man han remchan loh țum te, zirna lama sum mamawh hmanhmawh neih mai loh chang te a awm țhin. Chutiangah chuan ania Lalpa chu lo lang țhin ni. An hnena ka harsatna ka hrilh kher loh ka țhian leh hmelhriat, sum faia cheng sang chuang chuanga min han pe tawp mai te, eng competition-tion emawa sum fai han dawn chang te, hun rei taka kan sum fai bate'n min han rulh zauh chang te, 'dawrah i lehkhabu rawn dah rawh' tih changa lehkhabu man tlem azawng lo tling khawm ve te leh a dang dang pawh. Hetiang thil hi ka mamawh loh chang ni lovin, ka mamawh hunah tak ka tawng țhin.

Lalpa inlarna hi a hring a hrana hmuh ka inbeisei ngai lo va, a țanpuina pawh pawisa buara bag khata chhar ang zawngin ka beisei ngai lo. Ka thil tawn ang khi ka laka Lalpa inlarna leh țanpuinaah ka chhiar hmiah mai a ni. Ka lawm fo va, ka lawmna erawh midangte tana hneawm hluiin ka puang fo lo thung. Lalpa rem min ruatsak danah ka lungawi thlawt a, ka lungawi thu erawh midang ka hrilh nawn chhen lo va, keimahah ka chiang em em a ni.

Heng thu ka sawi zeuh zeuh avang hian tuna ka dinhmun hi a țhain a sang em em tihna a ni lo va, mi chunga chuang ka ni tihna a ni themte liak lo. Thinurna hi pai renga reh chi a nih loh chang a awm ang bawk hian, lawmna hi puan chhuah a țul chang a awm țhin. Hmabak tam tak ka nei a, kawng zawh tur thui tak ka la nei bawk. Mi aia sánga invawrh turin kum tam tak ka la mamawh a, ka hringnun kal ta zawng zawngte chhuk thlir thei turin hun tam tak ka la mamawh tih chu ka chiang em em a ni.

Nikum lama tihchhuah 'Mt. Everest' movie kha in lo en tawh maithei. He tlang mangkhawngah hian mi 8 an thi a, he tlanga ni khat thil thua mitthi an tam ber țum a ni nghe nghe. He movie chhuah hma hian Rob Hall leh a naute chanchin lungchhiatthlak hi internet lamah ka lo chhiar tawh a, a lehkhabu pawhin chhuah a ni tawh. A ziaktu pawh Hall-a team member Jim Krauker a ni a, tlang chhip chuang chhuak zingah a tel a, Rob Hall leh a hote chhiat tawh chu a lehkhabu ziah 'Into Thin Air' ațangin kimchang takin kan hriat theih phah a ni.

Mihring nun, keima nun ngei pawh tlang lawn angin ka tehkhin țhin. Rob Hall khan a nunna chân phah mah se, a thih hmain a tum ram Mount Everest tlang chhip a thleng hman a, khawvel a chhuk thlir a nih kha; a thil tum a hlen a, a kal ta. Nang leh kei hian tlang kan lawn mek a, tlang chhip thleng hmanin kan thi ang nge, kan tum hlen hman lovin kan kal ang tih tuman kan hre lo. Kan tlanglawn kawngah hian thil țul lo kan ti em, țul lo kan pai em, țul lovah kan peng em tih te hi ngaihtuah fo a va țha em! British tlanglawnmi hmingthang George Mallory khan kum 1924 khan he tlang lawn chhuah tuma a beih țum thumnaah a thihpui. Englekhawle, ka dam chhung chuan he tlang chhip hi chuang chhuak turin theihtawpin ka bei ang, tih hi ka infuihna a ni.

[March 26, 2017-a ziah a ni].

26 March 2017

Rûn ram ka nghak a,
Chhuatah ka vei sek a;
Thinlung a tãwt a,
Rilru a ipik a,
Suangtuahna a ruak thung si.
Bengah thãwm a lo ri a -
'Khawharna khawharna'
Râwl chhuahin ka țap a,
Mittui chiah a lo haw a.

Khawlaiah ka chhuak a,
Kawtthlerah ka tei rek rek a,
Thãwm riva reng reng a awm lo;
Thil nung hmuh tur a awm lo va,
Thil che hmuh tur a awm hek lo.
Khawvel a ngawi a,
Engkim a châwl țhuap a,
Keimahin ka ding reng a;
Ring takin ka au va,
Thangkhawk chiah ka chan.

Ramhnuaiah ka kal a,
Thlaler aia reh a ni;
Thli thaw a awm lo va,
Vaivut lêng takngial pawh.
Lui kawrah ka lut a,
Engkim a ro zo va;
Lui tui luang sela,
Ri a chhuah ang a,
Thãwm chhete tal a awm tur.

Van lam ka hawi a,
Ni a sa vawl vawl a,
A awmna ngaiah a ding reng a;
Zing a hlat thei lo va,
Tlai a hnaih thei hek lo.
Chhum a ding țhup a;
Inlet but butin,
Kâwl phe zawr zawr sela,
Khawpui ri un un se,
Khawhar a hnem tur.

Phone ka kheuh hawng a,
WhatsApp ka lut a,
Contact 1000 chuang neiin,
Group 100 chuangah ka awm a;
Message thar reng reng a awm lo.
Facebook ka login a,
Friend 5000 ka nei a,
Thil thar hmuh tur a awm lo;
Post leh comment zawng zawng chu,
5 years ago.

Lunglenna!
Khawharna!
Lungngaihna!

[Khawhar ngawih ngawih chang ka nei țhin a, nangni pawh in nih thi ka ring. Chutih huna khawvel ka mitthla dan leh keimah ka inhmuh dan ka ziak chhuak a ni].

23 March 2017

Saruakin mi rawn pan,
Tuihalin ka lo ban.

Nui sángin mi hawisan,
Laikhumah ka keuh hman.

Inches ngaah a man,
Hlimin a țang phan phan.

Nun siamtu kan chèn țan,
Chu ngei chu ka dam chhan.

Zantin hi lawițhat zan,
Awngphah nuam kan bawh pan.

Khuhtu khan phur rit a phur fo va,
Nawmchenna tinreng a dawl zo va,
Zahpah leh pawisak a lo bo va,
Pangchangte tualchai a lo do țhin.

A țhiang têa laikhum zal dun chuan,
Hlado an chham hnan - 'ah ah ah' tiin;
Theih se hringmi ianga râwl chhuahin,
A pau âwm e - 'ha ha ha' tiin.

Hahchawlhna thlantui luanna tualzawl,
Hahthlakna lungawithlak thlenna hmun;
Mut tual kha buan tualah an chhuah a,
'Hil' lova chhìnna hmun a lo ni.

[March ni 21, 2017 zan khan, WhatsApp lama Poetry Paradise group chuan 'Bedsheet' thupui hmangin poetry i phuah ang u, an ti a; hei hi ka'n ti ve a ni].

Țhian ngaih em em, ka drama ziah hmasak bera a hming ka tar lan tel loh phal loh khawpa ka ngainat, Fela Ngente,

Chung khuanu zarah ka dam zel e. Kar tawp inhmuh loh ringawt pawh a rei duh hle mai. Thawh,anni han chawlh dawn ngat phei chuan a huphurhawm rum rum nia.

Engti turin nge min beiseia engin nge mawlh ta che ka hrethiam chiah lo va, i office dawrna lamah mi huatthlala i tawng nge ka ngaihdan i hre châk hrim hrim ka hre hek lo. Amaherawhchu, kan sawrkar hnathawk hlawh tamte chungchang erawh sawi hlek turin min duh niin ka hria a. Chuvangin point të tëa țhenin Mizoram budget-in a chãwm sawrkar hnathawk, mipui rawngbawltute ka hmuh dan ka han tar lang zuai zuai ang e.

1. Sawrkar office tam zawk hi thatchhiat zirna hmun a ni. A hnathawkte an thatchhia a, an dawhkanah an hmel hliah khawpin file pawimawh intiang urh mah se zuma khelh an thlang zawk.

2. Sawrkar hnathawk tam tak hi an thawh hre lo an ni. Nitina office kal ringawt hi an hnathawh emaw an ti a, office-a an thawh zawh hman loh ina thawh zawm atana hawn khawpa țhahnemngai an tam âwm lo asin. Kan file pawimawhte thla thum thla li lai an titâng a, an hlawh lak tur thla thum thla li lai tâng se an nuar ang.

3. Office hna aia mimal thil ngai pawimawh an tam khawp. Office hun chhûng reng pawha mitthi râl, inneihnaa kal, damlo kan tura haw hma chîngte hi an huatthlala takzet a, thil pawimawha hmuh an țul chânga an lo awm loh hian vawk êk uih țha ber ber chi barh hawng hawng ka châk țhin.

4. Office-ah hian discipline an kengkawh țha lo hle a, an zawm țha lo hle bawk. Dawrtu an awm lai reng pawhin an inchhaih a, an nui duar duar a. Thingpui an in khulh khulh a, khâk an chhâk leh tlãwrh țhin. Office chhûng tihzahawm an tum lo va, an tã ni lovin midang tã anga ngaih tlatna an nei.

5. Ram leh hnam hmangaih maw?! Ram leh hnam hmangaih tak tak hi sawrkar office chhûng aiin party office chhûngah ka hmu hnem zawk. 'Ram leh hnam ka hmangaih em a, sawrkar hna ka thawk ta mai a ni' ti hi an tam âwm lo asin. An hnaa taima em emte pawh hi ram leh hnam an hmangaih vang ai mahin an hma zawna tihtur awm a nih vang chauh a ni maithei e.

6. Office chhunga 'Ka pi/Ka pu' kan tih țhinte hian sawrkar hna hi 'where, what, why, when, how' hre chiang ngat sela chuan a dawrtu zawk hi 'Ka pi/Ka pu' an ti țhin ang. Ram changkang zawkah chuan hetiang hian an ti țhin zawk an ti. Mahse, tunah rih chuan social media-ah sawrkar hnathawkte dawr an nawmzia aiin dawr an hrehawmzia sawina post a la tam zawk tlat a nih hi.

7. Mi thiam chu ka ni lo va, mi țhahnemngai erawh ka ni thung, i sawi ang deuh khian. Office ka dawr changa 'kei chu ni ila' tih vawng vawng chang ka nei ve bawk nia. Mahse, sawrkar hna thawh hi ka la châk ngai lo va, Mizoram budget zatve aia tam eiraltu zinga tel tumna ka la nei hek lo. Hemi vang hi a ni ang, sawrkar hnathawk aia sumdawngte ka ngaihsan zawk mauh mai ni.

I zawhna hi ka chhang fuh em ka hre lo va. Office hrang hrang ka dawr zing ve tawh a, ka vei zawng tar lanna remchang atan ka han hmang mai a ni.

Ka ngaihdan fahrah të të i hriat duh châng chuan inthlahrung duh suh, mi huat hlawh khawp pawhin ka ngaihdan diktakin ka chhâng zel ang che.

Tawk phawt se.

I țhian,

TS Khupchong
Mission Veng
24.3.2014; 1:30 AM

(Hei hi March ni 3, 2014-a ka țhianpa Fela Ngente-in a facebook wall-a ka chhiar tur thuziak a post chhàn lêtna a ni. Tihian ka han dahțha a ni e. Sawrkar hnathawk zawng zawng ka hmer tel lo a nia).

22 March 2017

Genre : Poetry
Page : 307
Copies : 500
Press : Louis Bet, Chanmari, Aizawl
Publisher : Mizo Poetry Society (MIPOTY)
Price : ₹ 200/-
ISBN No. : 978-81-932919-5-5
Thlirlawktu : T.S. Khupchong
Date : 21/3/2017

Lehkhabu azawnga hralh tla lo ber mai ‘poetry’ hi a bua tichhuak ngam an tam lo khawp. Thuziak dang nena chilh khawma chhuah erawh a awm nual thung. Chutih laiin tun hnaiah poetry lama harh tharna a thleng a, kalhmang hrang hranga poetry phuah kan uar chho va, a lawmawm hle. Poetry hlang dahna bu tichhuak han sawi mai theihah chuan — Capt. LZ Sailo (Ka Suihlunglen Hlahril), K.C. Lalvunga (Zozam Par), James Dokhuma (Ka Hlahril: Ka Thinlung Luangliam), Lalsangzuali Sailo (Kulva), Prof. R.L. Thanmawia (Senmei etc.) leh Prof. Laltluangliana Khiangte (Rochuam etc.) te, C. Chhuanvawra, Lalzuahliana (Lungmawl Selin etc) te; tun hnai deuhvah Malsawmi Jacob (Tinkim Dawn), Lalnunpuia Hrahsel (Ngaihhrilvawn), Nununa Renthlei (Hringnun) leh F. Lalzuithanga (Paradise), C. Lalhruaitluanga (Thinlung Tuifar etc.), Laltlanthangi JH (Leikapui Zaiva), Dr. Robert L. Khawlhring (Ziakfung Chawia Ram Țuanna) te; English lamah Dawngi Chawngthu (Of butterflies and an unfinish converstion), Laldinkima (Spectrum), John Laltluangliana (Unsung) leh Debbie Lalrinawmi (Purloined Emotion) te an ni a, a dang han sawi tel loh pawh a la awm âwm e.

Chung lehkhabute hnung zui turin ‘ZAIKUNG THAR’ a lo chhuak dawn ta a, a lawmawm hle. ‘Zaikung THAR’-ah hian mi 48 laiin poetry an thawh khawm 217 zet a awm a, chung zinga 55 chu English poetry a ni. Mizo chhulchhuak poetry dah khawmna bu-ah chuan a la chhah ber awm e. Kum 2000 hnu lama phuah a nih vek avangin, tunlai Mizo țhalaite poetry phuah dan kalhmang zir chianna atan a țangkai hlein a rinawm a, Austrian ziaktu lar Franz Grillparzer (1791-1872)-a’n, “Poetry hi hringnun darthlang a ni,” a lo tih angin, tunlai țhangtharte sukthlek leh hawi zawng te, khawvel an hmuh dan leh thlir dan tehna atan pawh hmang ila, a sual lo vang.

He lehkhabu hi poetry bu atan chuan a chhah țha viau a, a chhahna ai mahin a chawhchawrawihna leh a funkimna hi a hlutna tur a ni. Hla tawi leh simple tak tak, saphovina ‘ditty’ an tih ang hi țhahnem tak a awm a, hlathu (poetic word) leh grammar-in a phuar loh poetry țhahnem tak a awm bawk. Heng — țawngkam tluang pangngaia hla phuah hi kan intihhmuh ta viau a, ‘a thu a ho em mai’ tia ngaihnep ngawt chi a ni lo; thu ken țha tak tak nei leh poetry țha tak tak a ni zawk a, țhangtharte’n hlathu pangngai hmang lova hla phuah an chîng chho zel hi hmasawnna chi khat a ni zawk tih hi kan pawm a ngai.

Poet-te hi awm lo chiah awmna boruak thil tih theihna te, mi dangte tana thli thaw hum hum ri pawh rimawia chhuah thei te an ni. He lehkhabua poetry thawhtute zingah ‘zan rei sana kal ri kara phengphehlep țap ri’ hria te, ‘tlai nem Zothlifim fawn kara Vate rilru’ lo hre thei te, a uih chung chunga tui ti em ema kan ei țhin ‘zawngțah’ hla te, ni khat thil thu-a khawvela vaiho phur hnem thei ber ‘rel’ hmanga poetry țha tak phuah thei te an awm a, a dang pawh sawi tel châkawm a tam mai. American poet James Gates Percival (1795-1856)-a’na, “Khawvel hi poetry-a khat a ni,” a tih kha he lehkhabu hian a dikzia a nemnghet chiang hle.

Hla phuah dan kalhmang hrang hrang neia phuah a ni hlawm a, chung zingah chuan sawi tel loh theih loh a awm. Accrostic poem phuah hi thil awlai lo tak a ni a, he hlaah hian a awm nual. Chu mai a ni lo, double accrostic poem thlengin zuk awma maw le! Accrostic poem phuah tawh chuan double accrostic poem phuah a harsat turzia chu in hre mai awm e. Ballad a awm a, sonnet a awm a, sunna hla (elegy) te, satirical poetry țha tak tak te, patriotic poem te, philosophical poetry thlengin a awm. Rhyme țha tak tak neia phuah te, chutiang ngaihtuah miah lova phuah te a awm bawk. Paite leipui an sawi ang maiin a chi kim hle.

K.C. Lalvunga chuan, “Hla chu mihring suangtuahna thûk, thu kam nem leh mawia chei, midangte tana ngaihthlak nuam zawng leh pawmawm zawnga chham chhuah...” tiin a ngaihdan a sawi a. He lehkhabu-ah hi chuan suangtuahna thûk tak hmanga phuah nih loh hmel tak, mahse, ril tak ni si te; thu mawia chei ni lem lo, mahse, awmze nei zet te; midangte tana ngaihthlak nuam leh pawmawm zawnga chham chhuah ni lem lo, mahse, dik leh țha tak takte a awm nual. K.C. Lalvunga ngaihdan țawmtute pawhin heng poetry hrang hrangte hi ‘poetry a ni lo’ an ti thei bik lo vang.

He poetry dahkhawmna bu hi chhangchhenu pawnfen ang maia fun kim a ni. Chhangchhenu pawnfen chhungah chuan pawisa te, sahdah te, lehkha pawimawh te thlengin a awm țhin a, chu lo pawh chu awm a la awm âwm e. Chutiang chiah chuan he lehkhabu-ah hian ‘Eloi eloi’ tih leh ‘thianghlimna hloh-ho tan’ tih te dah khawm a ni a; ‘DP’ ringawt buaipui an awm laia ‘tuipui chunga tuipui’ lo tuipui em em te, Pu Hawla lo ti-Alcohawla tawk te an awm. Heng mi 48-te hi an indaihzai khawp. Politics, social network, khuarel (nature), Kristianna (Christianity), history thlengin he lehkhabu hian a chai a ni.

MIPOTY president Prof. R.L. Thanmawia’n he lehkhabu siam chhan a sawi pakhat chu, “Awmze neia zirbingna huang thlenga kum zabi 21-na chhunga Mizo poetry hmasawn chhoh dan leh țhan dan, àwn lam leh hawi lam, kalhmang leh thupui hrang hrangte kan hriat theih nan...” tih a ni. A sawi ang ngeiin kum zabi 21-na Mizo poetry-te zir chianna atana he lehkhabu tluka țha, huam zau leh țangkai a awm kher lo vang!

Poetry phuah dan kalhmang hrang hrang nei — dân zam hrang hrang awmte hian Mizo poet-te hi a lo khuahkhirh teh chiam lo a ni tih he lehkhabu ațang hian hmu chhuakin ka inhria. Zoram pum hriat hlawh poet lar tak takte poetry leh, Siachangkawn khaw mihring awm zat em pawh hretu nei lote poetry dahkhawmna hi, lehkhabu huapzo tak leh hlu tak a ni tih loh rual a ni lo. Chuvangin ‘ZAIKUNG THAR’ leh a buatsaihtu MIPOTY dam reng rawh se.

17 March 2017

Kerela state-a khaw pakhat Mundakkayam-a nupa tuak khat Latha leh a pasal Vishwanathan te chuan cheng nuai 12 lek sengin in nalh leh changkang tak an sa a; chu chu square fit 928-a zau a ni. Chu in chuan mut pindan pathum a nei a, choka leh inkawmna (sitting room) a nei thlap bawk.


A lem hi han en ila, a chhe lovin a changkang hle tih a hriat. An hmanraw hman pawh a tha thawkhat hle a ni.



Chutih laiin India hmarchhak kila Kristian tam em emna hmun Mizoram-a khaw pakhat Theiriat-a Hminlokawn-ah chuan waiting shed cheng nuai 14-in an siam a; he waiting shed hi kum 2014-2015 chhunga Soil & Water Conservation kaltlanga Lunglei High Power Committee (HPC) sum hmanga an sak a ni.
Credit: Vanglaini




14 March 2017

Ka inkhawm bâng min hmu a, "I van fel țhin tak em!" tiin min fak a, mahse, fel i tum chuang miah lo.

Ka hnathawk lai min hmu a, "I van taima țhin tak em!" tiin min fak a, mahse, taimak i tum chuang miah lo.

Ka ruihtheihthil tih loh thu i hria a, "I van invawng thei tak em!" tiin min fak a, mahse, invawn ve i tum chuang miah lo.

Ka lehkha zir ri i hria a, "I van zir peih tak em!" tiin min fak a, mahse, zir peih i tum chuang miah lo.

Ka hnatlang lai min hmu a, "I van peih țhin tak em!" tiin min fak a, mahse, peih i tum ve chuang miah lo.

Hei hian thil țha hi midangte tihah kan khêk țhin tih a tilang. Thil țha hi midangte pawhin an tih theih chuan kan ti ve thei. Kan kâ ațanga fakna chhuak hi duhtawk lo ila, midang kâ ațangin fakna chhuahtir zawk ang u — kan nun a lo nawm deuh deuh theih nan.

05 March 2017

March ni 5, 1966, inrinni a ni a. Hemi hma March ni 2 tlai lam ațangin Aizawlah chuan Assam Rifles leh MNF volunteer-te an inkah avangin silaimu a leng nasa a, civil mi nunna chân an awm nual mai.

March ni 11, 1966 zirtawpni-a thih leh thih, dam leh dam tia Mizoram-a college awm chhun, Pachhunga College Principal Rev. Alwyn Roberts leh Aizawl Theological College thawktute leh zirlai awm ang angte'n khawlaia ruang senghawi lohte an zawn khawm khan ruang 13 lai an chhar reng a, chungte chu thlan pali-ah an phûm a ni (Rev. Lalsawma). Heng mitthite hi Aizawla inkahna avanga thi te, jet fighter-in Aizawl a beih avanga thi te an nih a rinawm.

Chawhma dar 10:15 vel a nih chuan India jet fighter chhuanvawr France kutchhuak Toofani leh British siam Hawker Hunter 4 chu Aizawl khawpui chungah a lo lang thawt a. Toofanis fighter-te hi Tejpur-a hmunpui nei leh Hunter hi Jorhat bula hmunpui nei a ni. Heng khalhtute hi Rajesh Pilot leh Suresh Kalmandhi an ni (Zozam Weekly April 21-27, 2010).

Hawker Hunter 4
Toofani leh Hunter te hi jet fighters mai ni lo, Jet Fighter Bomber an ni a, missile, rockets, cannons, machine gun leh bomb pawh a namenlo hle. Khatih hun lai chuan khawvel pum huap pawhin Jet Fighter Bomber tha leh hlauhawm berte zing ami an ni (Wg. Cdr. J. Lalhmingliana). Hunter hian Machine Gun 12 a pai thei a, missile type 303, air to air missile pahnih leh canon bakah bomb pound 1000-a rit pahnih a pai thei. Toofani hian canon bakah missile leh rocket bakah kg 227-a rit bomb pali a phur thei bawk.

Aizawl hi March ni 5 bakah a tuk ni 6-ah an bomb zui bawk a. Tuikhuahtlang, Republic, Venghnuai, Khatla, Chhinga Veng, Venghlui, Tuikual leh Dawrpui te chu a rawn bomb un un a. Aizawl bakah hian March ni 6, 1966 khan Khawzawl an bomb a, a tuk March ni 7-ah Hnahlan, March ni 8-ah Sangau, March ni 9-ah Tlabung, March ni 13-ah Pukpui, March ni 23-ah Bunghmun an bomb leh a. Hei bakah hian September ni 6-ah Pukpui leh Mualthuam bomb lehin, January ni 31, 1967-ah Hmuntlang an bomb leh bawk a ni (Thlawhtheihnain Mizoram a bomb by C. Zama).



Govt. Aizawl College-a kan kal lai chuan kan madam Ms. Zohmingliani'n tihian min hrilh țhin - "Aizawl bomb lai khan naupang tê kan la ni a. Thlawhtheihna a lo thlawh khan naupangho chuan kan hmu duh si a, thlawhtheihna atanga min lo hmuh hlauvin kopangah kan bet thap a ni," tiin.

Mizote chu vai huaa sap ngaisang thin kan ni, an ti fo. Kei chuan, A NI LO THEI NANG ka ti a ni. Lehkha min zirtir leh ringtua min siam chu thu dang daihah ngai ila. Kum zabi 19-naah sapho nen kan indo va. Hmeichhia an ngên a, in an hâl ve bawk. Mahse, anmahni rûntu khua lo chu an hâl lo. Civil mi pawisawilo an that mai mai ngai lo. Hmeichhe ngen chîng pawh hremin an thawn haw mai a ni. Kum zabi 20-naah vaiho nen kan indo va, min pawngsual a (pawngsual avanga nunna chân ta leh â zui ta te pawh an awm), min sawisa a (tam tak ramtuileilovin an awm), min that a, khua an hal a (vawi hnih vawi thum lai khua hal nawn tawk te pawh an awm), indo thlawhna tha ber ber chiin min bei hial nia!

Hei hi chu, ram leh hnam thil ngaihtuah ngai hlek lote pawhin i hre reng ang u. Kan rilru hi na sela, kan hliam hlui hi dam hlek suh se.

(March ni 5, 2016-a ziah a ni).

09 February 2017

Kum 2010 atanga Zikpuii (Chuauzikpuii)-i'n a lo huaihawt tan, Valentines Day-a thisen pek 'Blood for Your Valentine' chu tunlai thalaite'n Valentines Day kan hman dan tha tak leh langsar tak a ni awm e. 'Inngaizawngte Ni'-a ngaihzawngte nena thisen pek hi kan intihhmuh chho ta zel a, a kum telin hemi ni-a thisen pe pawh an pung zel a; he ni pual hian Mizo thlalaite'n thisen unit 4000 dawn chu an pe tawh nia! Kan thil intihhmuhah chuan a tha leh ropui ber te zing ami a ni ngei ang.

Hei, thil danglam leh dangdai tak, midang tuman an la chìn zen zen loh tur chu kuminah hian a rawn awm leh ta tlat mai! Valentines Day pual thilpekah chuan a lian ber hial awm e! Mission Veng tlangval 'Opa' chuan a bialnu, a hmangaih em em Felpuii (of Khatla) tan banner lianpui mai 14×8 ft-a lian, 'be my Valentine forever Felpui' tih inziahna chu Sikulpuikawn-ah a tar ta luah mai le!



A bialnu tan chuan a lawmawm hlein a rinawm a, then mai mai phal chi pawh a ni lo vang! A sir chung lam kilah 'OP Photography' tih a intar kuau mai a, a siamtupa photographer a ni tih a hriat a, a thlalak han en chuan thla pawh la thiam tak a ni tih a hriat.



He banner lianpui mai hi vawiin February ni 9, 2017 atangin Sikulpuikawn lûn lai tak, Govt. Aizawl College pan chhohna step hrûlah a tar tan a, February ni 14, 2017 thleng em ni a tar dawn, ka hriatpui lo. Nang, i valentine tan eng nge i tihsak ve dawn le?


Felpuii leh Opa



14 January 2017

November ni 5, 2009 khan Texas-a Fort Hood khuaah US Army major pakhat Nidal Hasan chuan mi a pawngkah chiam mai a, hemi tum hian mi 13 thiin 30 chuangin hliam an tuar. A kum khatna, November ni 5, 2010 khan he thil thleng hriatrengna leh thite sunna hun hmannaah Rhema Marvanne chu a zai a, 'The Prayer' tih hla a sak chuan mittui a ko chhuak hnem hle. A hnuah TV interview a neihnaah, he hla a sak laiin a chung lamah angel-in an hual thu a sawi.

Rhema Marvanne
American Broadcasting Company (ABC)-in an kawmnaah, "Pathianin a hla sa turin min ti a, ka sa a ni. Ka hla sakte hian mi thinlung a khawih ka ring a, mi sual takte pawh a siam thain ka ring," a ti. Kum 3 mi a nih laiin a nu chu cancer vangin a damlo tan a, ABC-a an kawmnaah hian, "I nu nena in inkungkaih dan chiah hi eng nge?" tia an zawhna chu, "Ka nu nen kan infiam nasa thei hle a, Bible thawnthu thenkhat hmangin kan inkawm thin. A chang chuan mipa naupang lemah ka chang a, a changin amah a chang thung a. Hmuihmul lem atan mitdumna a hnawih vak zel," tiin a chhang.

A nuin chemo a lak lai te, damdawiina na tuara a awm laiin a bulah a awm tlat a, a kutah a vuan a, a pain camera-in a lo la thung a, a pawi ti hmel leh hrilhhai hmel chu youtube-ah en tur a awm. Hetih laia a rilru puthmang an zawhna chu, "Lalpa, khawngaih takin tidam rawh tiin ka ngaihtuah a. A kutah ka vuan a, tihhlim tumin ka nuih sak a ni," a ti bawk.

Hetianga a nu na tuar lai bula a pain a awmtir chhan chu, "A nu natna tawrh hian chakna leh chhelna a pek ka beisei a, a nu nun hian thui taka a nun a kaihhruai ka beisei vang a ni," tiin a pa hian a sawi. A pa beisei hi a hlawhtling a, Rhema hian a nun hnehtu ber chu a nu a nih thu a sawi ta reng a ni. A nu thih lai hian a bulah a pa nen an awm tlat a ni.

A nu hi Pathian ringtu tha tak a ni a, Pathian hla ngaina tak a ni bawk. A nu thih hnuah a pa chuan Pathian hla leh rimawi a zirtir a, a zai chho tan ta a ni. A nu hla duh ber 'Amazing Grace' tih hla chu a record hmasa ber nghe nghe a. "Ka nu kha nu mak danglam leh ropui tak, khawngaihna ngah tak a ni," tiin Rhema hian a sawi nghe nghe.

A pa Teton chuan music video a siamsak a, album pawh pahnih a siam nghe nghe. Krismas hla leh hla dang tam tak a sa a, a chang leh Mariah Carey tihdan deuh te, Elvis Presley hla sak dan hmang tein a sa bawk. A nu biak in ngainat em emna hmunah, a nu thih atanga kum hnih hnuah Krismas hla sain a malzai al al tawh a ni.

September ni 15, 2002-a piang a ni a, a pa Teton Voraritskul niin a nu chu Wendi Marvanne a ni. Trinity Hospital, Dallas, Texas-a a pian tirh chuan a'n tê na laileng khawp a, kg 1.86 chauhva rit niin kar thum zet chu Neonatal Intensive Care Unit (NICU)-ah enkawl a ni. NICU hi nausen piang hlimte uluk leh fimkhur lehzuala enkawlna hmun a ni.

Kum 2009 khan baptisma a chang a, Texas state, Plano khuaa The Branch Church-ah an chhungkuain an inkhawm thin. A nu Wendi hian kum 2008 khan cancer vangin a boralsan a, a kum leh 2009, kum 6 mi a nih laiin a nu hla duh ber 'Khawngaihna mak mawi leh duhawm' (Amazing Grace) a record a, youtube-ah upload niin entu pawh maktaduai chuang fe an awm. Film leh show thenkhatah a lo inlan tawh bawk.

High School kan zir lai khan Sir Hmingthana hovin devotion-ah 'Ho great thou art' kan sa thin a, kan sir chuan a sa ring thei hle! Khata tang khan he hla hi ka duh tan a, he hla ka ngaihthlak leh sak hi chuan Sir Hmingthana sa lai kha ka hre chhuah ziah thin. He ka hla duh em em hi Rhema chuan a lo sa ve reng mai a, a thiam ngei mai. A video ka dah e.


A nu leh pa nen
A nu nen
A nu na tuar lai kutah a vuan tlat a
A nu thlanah
A nu biak in ngainat berah a zai
Fort Hood Remambrance Ceremony-a a zai lai
Subscribe to RSS Feed Twitter-ah pawh ka awm e!