Ka Comedian Search zinkawng

Fiamthu hi ka duh ve pangngai a. Chutih rual chuan fiamthu thawh huau huau chi ka ni hauh lo thung. Fiamthu duh ṭhenkhat chuan an awmna apiangah fiamthu an thawh huau huau mai a, an bula awm pawh a nuamin ngainat an hlawh duh hle. Mahse, hei hian mipuite thinlungah — mipui hmaa fiamthu thawh ṭhinte chu khawi hmunah pawh fiamthu thawh tura ngaihna a awmtir a, a ṭha ber lem lovin ka hria.

Engti tiha Comedian Search-a lo tel nge ka nih le? Tun hnua ka ngaihtuah hian an tawktarh kha ka tel chhan ber niin ka hre ta. Ka tum ber hmu lovin a hlawhtling ber ni lo mah ila, kha kha ka tun hun atana bul inṭanna a lo ni ta reng mai.

Comedian Search kha vawi li an nei tawh a, a hmasa ber chu kum 2008 kha a ni a. Ramhlun North-a ka awm lai a ni a, chutih lai chuan keimaha khawsain sikul ka kal a. Ramhlun Venglai-a Public Higher Secondary School-ah ka lut ṭhin a; chutih lai chuan morning shift a la ni a. Zingkarah class kalin chhunah ka inhlawh ṭhin. Chhuna inhlawh ka duh avangin haw hma ka dil ṭhin a, kan zirtirtute pawhin ka dinhmun an hriatchian avangin min khawngaih a, harsatna engmah min siam ngai lo. 

Chutianga harsaa retheiin awm mah ila, pawisa thawn ngaiin vawikhatmah ka la awm lo va, Aizawl ka awm tirh ata tun thleng hian pawisa min la thawn lo reng a ni. Min thawn an tum pawhin ka duh ngai lo. Ka phone man te, ka top up man te, ka computer man te, ka school leh college kalna leh in luah man zawng zawng chu keimahin ka thawkchhuak vek a ni. (Hei hi chapo vanga tarlang ka ni lo va, ka tarlan kher nachhan chu in hriatthiam mai ka ring)

Chutianga ka khawsak lai chuan Comedian Search buatsaih a nih tur thu ka hre ta a. Mi pangngai tan pawha thil harsa em em vak awm lova ka hriat avang leh, lo hlawhtlin tâk hlauh chuan an tawktarh a ṭha em mai tiin form ka lachhuak a, ka submit ve ta rãwih a. Mahse, mi bîkte tan a ni tih ka hre chiang khawp mai! Ka mi bîk lo tih pawh ka hrechiang narawh e!

Chutih lai chuan ka chhungkaw khawsak a harsat em avangin ka pa chu Sihphir-ah mi huan enkawlin a awm a. Ka nu leh ka nau hmeichhia chauh chu kan khuaah an awm a ni. Comedian Search form ka submit hnu chuan kan khaw lamah thil ṭul tih tur a awm avangin ka haw leh ta a. Ka haw hlânin ka in luahah ka pa a rawn awm thla ve bawk a.

Kan khuaa ka haw hnu hian Comedian Search lampang pawh ka ngaihtuah chhunzawm tawh lem lo va, tel pawh ka tum tawh em em hlei lem lo va! Mahse, zan khat chu — Pathianni zan a ni a. Ka inkhawm a, ka inkhawm laiin kan makpa chuan biakina ka awm lai mi rawn ko chhuak a. Aizawla ka pa awm chu thi lek leka a nat thu min hrilh ta a.

Rilru a buai duh ngei mai! Chu’ng lai chuan phone ka la nei lo va, landline hi mi ta kan hmang a, a âwm tawk pawisa kan pe mai zel a. Ka haw veleh Aizawla ka awmna ṭhenawmte, ka phone hmansak ṭhinte chu ka phone nghal vat a, anni chuan ka pa damloh chungchang te, veng chhung welfare-te’n an buaipui thu leh damdawiina an kalpui thute min hrilh a. A rang thei ang bera chhuk tura min duh thu pawh min hrilh bawk a.

Tichuan, a tuka chhukna tur motor ka ngaihtuah nghal vat vat a. Vanneihthlak takin motor remchang a lo awm hlauh va, a tukah chuan ka chhukthla nghal vang vang a. Kalkawngah te chuan a chhe thei ang berin dâwnin ngaihtuahna a kalthui duh khawp mai.

Tluang takin ka thleng a. Inchhung ka lut chu khuma ka pa mu chu ka va hmu ta a. Kan ṭhenawmnuin damdawi a lo pe a, an lo buaipui char char hi a lo ni a. Ka pa nen hian kan inbiak tam loh hrim hrim avangin ka thleng pawh chu sawi tur a vâng duh khawp mai! A bulah ka ṭhu a, amah a harh tawh tho bawk a, ka ṭhu hi a ni deuh tawp!

A hnuah a chanchin chu min hrilh ta a. Pathianni tlaiah zu an lo in a, an zu in chu zu chhia a lo ni âwm e. In a thlen veleh a pum nâ chu a buai nghal a. Biak theih lohvin a awm zui a, a mar an hmu thei mang mang lo va. An mangang chuan damdawiinah hruai a, taxi-a an chuan lai te chuan a engmah hre lo hi a zai veng veng a ni awm e! A hnuah chu chu fiamthu nan tak an hmang nghe nghe a.

Casualty-ah chuan damdawiin an lo jection a, admit lovin an lo hruaikir leh hi a lo ni a. Vengchhung mipuite lakah a inthlahrunawmin zah a na duh khawp mai. Ka pa pawh chu a ṭha chho ve zel a. Zu ka huatna erawh a lo zual zel thung a. Ka pa hian ka hmuh laiin zu a in ngam ta lo.

Thawhṭanni-ah ka chhuk kha a ni a. Nilaini tlaiah chuan kan ṭhenawmte chuan phone ka dawn thu min hrilh a. Ka va chhàn chuan Comedian Search buatsaihtute lam aṭangin a lo ni a. Ka tih hun tur leh thil ṭul dang min hrilh a. Comedian Search-ah ka tel dawn tih ka hrechhuak ta thut!

Inbuatsaihna hun a chêp ta khawp mai. Tih tâk vekah chuan tel ve ngei ka duh bawk si a. Tichuan, inbuatsaihna em em pawh nei lovin ka va tel ta a. Vanneihthlak takin ka tling chho ve zel bawk a! Chuta ka tel chu kawng tam takah ka inchhir a, kawng tam takah ka lawm bawk a, ka tana malsawmna a nih laiin hrehawm tihna tam tak ka nei ve ṭhin.

Keimah kha ka bawrchhawr (tute emaw ṭawngkam takah) em em a. Taksa hahdam si lo, rilru hahdam bawk si lo; tun hnua a buatsaihtute zinga pakhat chuan ka tel tirh khan mi ang zãn lo emaw min tih thu a sawi nghe nghe. Thawmhnaw nei ṭha hek lo, secondhand t-shirt, Israel Point-a cheng 50-a an zawrh ṭhin saw ka lei a. Pheikhawk bun tur nei hek lo, chappal nena mipui hmaa din kha a ni thei bawk si lo, mi pheikhawk te kha ka bunsak mai mai a. Ka tlingtla ve zel a.

He ka Comedian Search tela tifuh ka intih em em pakhat chu — mi ka hnial kha a ni! Judge-te hnial kha ka hrât bik vang a ni reng reng lo! Zan khat chu, Rangvamual aṭanga lo tel nu pakhat (a hming ka hre mai ta lo) kha a perform a, ka inlan zan a nih loh avangin in aṭangin ka lo en a. Ani ṭawng duh ta deuh kha judge-te nen an inhnial an inhnial ta mai a! Lawm a hlawh em em lawi a!

Chuta ṭang chuan ngaihdan thar ka nei ta a. Fiamthu lamah eng teh ual ka ni si lo va, judge-te hi hnial ve zat zat ila a ṭha ang, ka ti rilru ta a. A tuk zanah ka’n perform a, judge-te hun a lo thlen chuan ka’n hnial tak tak maia le! Hahaha.. Judge-te nen kan inhnial lai kha vawi khat mah ka la en miah lo. Ka thisen hian a ngam thlâwt lo a ni ber.

Chumi tuk aṭangin hnialhrât ka lo ni ta a. Rangvamual nu lah kha a tla zui mai bawk si. Vanneihthlak takin kei la tling hlauh va, ka inlan apiangin kan inhnial kan inhnial ta mai a! A nuam ka ti phian bawk si a. Khami avangin mi ṭhenkhatte’n zakthei lo deuh turah min lo ngai a, mi ngawichawi leh zakzum deuh ka ni reng si. Fiamthu lama mi bîk ni si lo chu inhnial avang ringawta tlin reng theih ni suh, a tawp a tawpah chuan top 10 ka inhlângkai zo ta lo a ni.

A tawi zawngin sawi tawh mai ila. Mizoram-a Comedian Search an buatsaih vawi khatnaa tel ka ni bawk a, mipuite’n Comedian-te dawnsawn dan an lo la thiam tawk lo bawk a. Khawlai chhuahvah velah harsatna ka tawk zeuh zeuh va. Chu’ngte erawh chu, Comedian Search ka tel avanga malsawmna ka dawn nasat avangin sawi thamah pawh ka ruat lo.

Tunah chuan vawi li an buatsaih ta a. Mipuite pawh kan fingin kan changkang telh telh a, Comedian-te en dan pawh kan thiam ta. A dawnsawn dan leh tihphur dan te, a ṭawiawm dan te kan thiam tawh a, a lawmawm hle a. Mizorama fiamthuin nasa taka hma a sawn phah avangin Comedian Search buatsaihtute hi an fakawm ka ti khawp mai.

Tun hnu hian ka ngaihtuah a. Comedian Search kha kawng engkimah ka bulṭanna a lo ni tih ka hrechhuak ta a. Ka tel theih chhan pawh ka pa damloh vang a ni a, kan vanduaina phênah malsawmna ka chang a lo ni reng zawk a.Comedian Search-a tel turin Pathian-in rem min lo ruatsak thlap zawk hi a lo ni a. Chuvangin harsatna leh mangan vanduaina ka tawh chang hian, ka tana ṭha zawk tura Pathian remruat a ni tih ka hriatchian tawh em avangin ka vui ngai ta lo.

Share this

TS Khupchong