MS-i

Ka hnathawh leh ka hnathawhna hmunin a zir vang ni maw, kan office-ah hian inlêng neuh neuh rawn lêng lût hi kan nei thei hle a, chu’ng zingah chuan kutdawh pawh an bâng lo. Sawrkar office a nih lo avangin han inkhap theih a ni chiah lo va, ṭanpui beiseia kutdawh lo lutte erawh chu kutbengin kan chhuahtir ngai lo thung.

Ni khat chu office-a chhun thingpui ina ka ṭhut vang vang lai chuan hmeichhia kum 28 mi vel hi a rawn lut a, a hmel a chhe vak lo va, a nulian zeih zawih hle. Mahse, a pawr deuh pheng a, a thawmhnaw inbel pawhin nitin tui a hmu lo tih a hriat theih mai a, a hmel han en mai chuan khawngaih thla a la deuh nain chhe lo ena lo en vawng vawng a awl khawp mai.

Ka ṭhutna lam a la rawn pan ta deuh deuh va, chhe lo ka tih ang bawkin chhe lo min ti ve em ni chu aw ka ti hman a, ka bula chair ruakah chuan a \hu a; a zahzum hmel hle a. Chutih lai chuan patling pakhat nau pua hi a rawn lut a, “Lo chhuak rawh, ‘ngati nge khatah i lo awm leh hman a?” a rawn ti nghal bawng bawng a. Nula chu a ṭhut luih tlat avangin chupa chuan a rawn pawt a. “Lo chhuak rawh ka ti a ni lo’m ni? I haw ang,” a han ti a.

“Lo va haw rawh, hei hi thil hrilh duh ka nei,” a tih tak tlat avangin chupa pawh chu a chhuak ve leh mai bawk a.

Ka chhang ei lai chuan a en tâk dauh dauh avangin nuam ka ti chiah lo va, thingpui leh chow plate khat ka chahsak a, a rawn thlen hnu chuan tui tih hmel takin a ei ta bawrh bawrh a A ei zawh chuan a hmui a hru fai a, thingpui a in leh nghal chat a. Thingpui in pah chuan, “Ka tana Pathian vantirhkoh i nih ka va ring em!” a ti a, a thingpui in lai pawh chu a tlâk nghal a.

Ka khawngaih mi tak a nih avangin han rinhlelhna em em pawh ka nei lo va, ka nui mai a. “Mi hawihhawm tak i nih dawn hi,” a ti leh sap a. Kei chuan, “Hawihhawm ti-a sawi ka ngai lo; mahse, engtin nge mite chunga ṭhat ka chhuah theih ang, tih erawh ka ngaihtuah ve fo mai,” ti ringawtin ka lo chhang a.

Ani chuan, “Ka pu, ka chungah ngei hian ṭhat i chhuah thei. Sum leh pai lamah i hnen aṭangin engmah ka beisei lo va, mahse, ka chanchin hi ka hrilh che ang a, ka thih hma ngei hian Zoram mipuite hriatah min puansak la ka duh a ni,” a han ti dap dap a. Amah ngaichangin ka ngawi reng a.

“Kei hi khawvela nun ning ber ka ni hial ang. Khawvel hian mihringte a bum ṭhin a, hmun nuam leh lei vanram anga kan ngaihna hmunte pawh chatuan hremhmun tluk zeta hmun ṭihbaiawm leh rapthlak  a lo ni fo si. Chu’ng hmunah chuan nun khawchhuahna beiseiin ka beisei hmun ka pan a, manganna ruamah ka tlu lut ta a nih hi.” a han ti a.

Kei chuan, “Ka pi, khawi hmuna chêng nge i nih? Chhungte i la nei em?” tiin ka zawt a. Tukverh aṭangin pawn lam a en vang vang a, “Nichina lo lut kha ka pasal a ni a, a nau rawn puak kha kan fapa neihchhun a ni; kum 2 a la tling lo. Mi pangngai hmuhin min lo hmu ang e,” a hawi hrek hrek a; “KS ka nih hi!”

Mak ka ti ngang mai. “E he! I hmel leh pian han en chuan awih a harsa hle mai. I chanchin chu min hrilh ta che,” ka ti nghal vat a.

A hawi kual zak zak a, ka hrethiam mai a; office aṭangin ka chhuahpui a, restaurant pakhatah ka luhpui a, a kil fianrial deuh lai chu ka chuh a, inhmatawnin kan ṭhu a. Eitur kan chah hnuin a chanchin chu a sawi ta a.

Thingtláng khaw lian vak lovah khawvel hrehawm chhim turin ka piang a. Chutih lai chuan chu nausen pawisawi lo leh rilru thianghlim tak, ngo leh chum leh hmêl\ha tak ka ni a, hetiang hian KS ka ni ang tih tuman an ring pha hauh lo.

Ka nu leh pate’n fanu an awh em em laia piang ka nih avangin ka hmingah Malsawmdawngi an vuah a, MSi tiin min ko ṭhin. Kan unauvah chuan a upa ber dawt ka ni a, kan upa ber chuan kum 3 mi ka nih laiin min boralsan tawh a; kum 8 ka tlin meuh chuan chhang 2 ka nei leh tawh a. Chhungkua hlim taka kan khawsak mek lai chuan ka nu leh pate chuan min boralsan thuai a; keimahni unau thum maia han khawsak theih chi ziazang a nih loh avangin kan khuaa chhungte kan neih ve chhun, ka nite bulah kan chêng a. Ka naute zawng zawng enkawl chu ka hna a nih tak avangin ka hah thei hle.

Ka nu leh pate an awm tawh bawk si lo, chhungte dang kan nei bawk si lo; ka nite chuan an rila rah ni lo ta na na na chu min en dan a hrang hret hret a, a lo rei deuh hnu phei chuan kan unauvin min tiduhdah telh telh a, chaw ei tur ṭha pawh kan nei mang lo. Zingah te hian chaw ṭhing hi an thukru a, hnathawk turin kan unauvin min chhuahsan a. An fate hmun danga an awm vek avangin keimahni unau chauhvin in kan nghak a, kan ṭhenawma awm, kan chanchin hriate chuan chhunah chaw min eitir ṭhin.

Kum 15 mi ka nih chuan lo lamah nitin hnathawk turin ka chhuak a, ka naute pahnih chuan anmahniin in an lo nghak mai ṭhin a. Tlaiah hah takin ka hnathawk hi ka haw a, in ka thlen veleh ka naute pahnih chuan rilṭama ṭap chungin eitur ka hawn leh hawn loh min zawt ṭhin. Keimaha ka haw chang chuan kawng lakah thei ei tur neuh neuh hi ka lo haw a, a rukin fanghma te ka hawn a, ka nite hriat lohvin ka naute ka eitir ṭhin. Kan chaw ei zat tur hi ka nu hian a bithliah thlap thlap a, kan rilṭam leh chauh deuh chang pawhin kan duh zat kan ei thei ngai lo.

Hetiang hian hrehawm ngawih ngawihin hun hmang ṭhin mah ila, ka naupan tët aṭanga ka nu min zirtirna angin Pathian ka hnaih hram hram a, ka harsatna leh manganna ka thlen ṭhin. Ka duh hun hunah ka inkhawm thei lo va, inkhawm thawmhnaw lah ka nei na hek lo. Ka ni chuan ṭhian ka kawm a phal lo va, len a phal lo va, sikul ka kal a phal lo va, ka inkhawm a phak hek lo. Ka nu leh pate dam laia pawl 4 thleng ka zir kha ka chhunzawm leh ta lo reng reng a ni.

Ka ni chuan inleng kan neih laiin min duat thei em em a, an awm loh veleh ṭawngkam chhe tinrengin min hau a, min vua a, rilru nâin ka ṭap zawih zawih ṭhin. Ka naute lah chuan engmah an la hrethiam ve tak tak si lo. Hmêlchhia ti-a sawi tur ka ni lo va, naupang të mah ni ila, inlêng ka nei ṭhîn a. Inlêng ka neih lai te hian ka ni  chuan min hau chiam ṭhîn a, ka zak thei lutuk. Pângngai taka nun te hi ka châk ve ṭhîn a, mahse, chu chu ka tân vâna rah ang a ni si.

Ka ni chuan zan dar 10 rik dawnah te min insuktir ṭhin a, thlasik leh nipui pawh ni se, a lem chuang lo. Ka insuk zawha ka nite an muthilh vek tawh hnuah biakinah ka kal a, ka ṭawngṭai ṭhin a, kei leh ka naute pahnih tan ka ṭawngṭai tlaivar hial ṭhin. Zing khawvar hmain ka haw a, mut hun pawh ka nei mang ngai lo. Ka ni chuan zingkarah min kaitho va, chhunah lovah ka feh a, zanah a ngai të bawkin hun ka hmang ṭhin.

Hunte a rawn inher liam zêl a, kei pawh nulaa chhiar theih ka ni tawh a, ka naute pahnih pawh a rualawt tawk lekin an fing ve tawh a, ka nun a hahthlak ta telh telh mai. Ka ni chuan ngaihzawng ka neih a remti lo bur a, ka inleng neih laia min hauh ṭhin avangin tumah an rawn leng chhunzawm duh tawh ngai lo. Fahrah kan nih avangin ka naute pahnih chuan an khawlai lennaah hmuhsit endawng tinreng an tuar a, kei ve mai hnenah an rawn thlen ṭhin; a rukin ka ṭap fo. Ka mittui min hruk huksal ṭhintu an awm tawh si lo.

Chu’ng hun lai chuan nula mâwl ve mai ka ni. Aizawl hi an sawi chauh ka hria a, chu hmun chu hla taka hmun nuam tak angah ka ngai ṭhin a, kal pawh ka châk ve ṭhin hle a. Chuta kan unauva kan awm theih chuan hetianga kan retheihna zawng zawng hi bo vek turah ka ngai hmak a, hlim taka kan khawsak theihna hmun awmchhun tur ni-ah ka ngai bawk a; mahse, chu hmun thleng tur chuan kawng a awm si lo.

Aizawl khua chu ka mumang chenin ka lo hmu a. Ka hmuh apiangin vanram tluk deuhthawa hmun nuam leh hlimawm, a mi chêngte pawh inlungrual em em angin ka lo hmu ṭhin a, chu’ngte chuan ka Aizawl hmuh leh kal châkna a tizual telh telh a. Hun remchang a awm hunah kal ka tum rân a, kum hnih kum thum hnathawka ka awm hnuah ka naute pawh hruai ka tum nghe nghe bawk a.

Vanneihthlak takin (kan ti dawn nge, vanduaithlak takin) kan khuaah Aizawl lam aṭanga thawmhnaw zuar hi an lo kal hlauh mai a. Kan inah pawh chuan thawmhnaw an lo zuar a, ka nite hriat lohvin Aizawl chanchin ka zawt a, anni pawh chuan hmun nuam tak, inchhawng sang tak tak leh motor nalh tak tak awmna hmun a nih thu min hrilh a. A han sawi an han sawi chu, a tawpah chuan, “Kal thei dawn ta ila min hruai thei ang em?” ka ti ta chawt a.

Anni chuan, “Kal man i neih phawt chuan hruai thei tehreng mai,” tiin min chhang a. Ka phur ta em em a, mahse, ka ni-in a phal dawn si lo va. Tihdan ka ngaihtuah a, “Kan khuaah in la châm rei dawn em? In châm rei dawn chuan kalna man tur ka lo inkhawl ang a, engzat nge sen ngai ang?” tiin ka zawt leh a.

Anni chuan, “Tun thla chu kan la châm dawn a, i inkhawl ngah hman lutuk ang. Kal man pawh cheng 300 chauh alawm,” an ti a. Ka phur sauh va. Kan unau chanchin zawng zawng leh Aizawl-a ka kal duhna chhan ka hrilh bawk a, chumi hnuah, “A nih chuan a lo berah cheng 500 vel tak a ngai ang, hnathawh tur i zawnna senso nen,” an ti a, tam deuh mah se, pawi ka ti chuang lo.

Tichuan, a tukah chuan ka ni hriat lohvin ka thing phurh sa chu tlem ka hralh a, nitin tlem tlemin ka hralh a, thil zuar ho haw dawnah chuan cheng 500 chu ka khawl ngah ve ta hram a. Mahse, ka buai leh ta..! Engtin nge ka naute ka kalsan theih ang? Engtin nge ka ni hriat lohvin ka kal theih ang le?

Ka rilru a hah ta khawp mai a. Mahse, ka kal châkna leh duhna chuan mi hneh thlu ngang mai si. Ka kal ang a, kum hnih ka awm hnuah pawisa pawh ka khawl ve thei ang a, ka naute ka hruai ang a, hlim takin ka nite tel lovin kan awm mai dawn a ni, tite’n ka inngaihtuah a. An phal dawn loh avangin ka kal tum thu pawh ka ni leh ka naute ka hrilh duh lo va. Tichuan, kal kan tum ni-ah chuan zing karah thing phur tur angin ka chhuak a, ka nite chhuah fel vek hnuah inah ka haw a, ka naute pahnih ka ṭawngṭaisak a, ka thawmhnaw tlemte chu bag-ah ka khung sawk sawk a, a rukin ka chhuak a. Kan khua chu kan chhuahsan ta a.

Ka thla a muang ta takzet. Kawng tluanin ka rui a, ka muhil bawrh bawrh a. Zan tin deuhthawa ka lo mangphan ṭhin, Aizawl chu zanah kan thleng ta hram a. Ka rin ang ngei ngeiin motor a lo tam hle a, inchhawng sang tak tak a lo ding ngir khup a, electric êng a de chuai bawk a, hmun nuam tak ka thleng ta, ka ti rilru a. Mahse, ka chuanpuite kha an lo awm tawh lo, ka muthilh hlan khan an lo chhuk a, ka bag neihchhun la-in an lo kalbo hman tawh a nih chu! Ka nunah buaina ata buai lehzualna a inṭan ta tak tak ta!

Ka mangang ta takzet. Ka mangphan ṭhin khua chu ka rin ang a lo ni ta hauh lo mai. Kawngah te chuan chak tak takin motor a tlan vuk vuk a, kawng sirah nula leh tlangval ṭhenkhat chu nalh tak takin an vei suau suau a, chu’ng zingah min puitu tur an awm lo. Mi tam tak awmnaah mal takin ka awm mek a ni si. Ka thawmhnaw zawng zawng a bo va, engmah neih ka nei ta lo. Khawnge tlaivar deuhthawa ka biak ṭhin ka Pa kha?!

Mittui tla zawih zawih chungin kawngsira step-ah chuan a ṭhu ta hnawk a. Ka rilruin ka ṭawngṭai reng a. Chutia lungngai leh mangang taka ka ṭhut lai chuan, “Bawihi, engati nge i tah tâk?” tih thu ka hria a. Ka han hawi chhuak a, ka hmaa tlangval lian thelh thawlh tak pahnih lo ding reng chu ka hmu ta a. Ka lungchhiat a rawn zual a, ka mittui a dir zung zung a.

Pakhat zâwk chuan, “Khatia i ṭah ringawt chuan i harsatna kan hre thei nang. Harsatna i neih chuan min hrilh la, kan pui thei che a nih phawt chuan puih che kan inhuam reng a nia,” a rawn ti leh a. An hmel ka han en chiang leh a, an incheina leh ṭawngkam aṭangin mi sual an nih ka ring ta lo va. Ka chanchin leh ka thil tawn zawng zawng chu ka hrilh ta vek a.

Pakhat zawk chuan min hnêm a, “Lungngai reng reng suh, min zui haw dâwn nia Ka nu’n i awm dan tur chu a ngaihtuahpui thei vek ang che. Chaw pawh i la ei awm si lo va, i kal nghal ang u,” a ti a. Duhthlan tur dang ka nei tawh chuang lo va, Samari miṭha tawng ang hrima inngaiin an pahnih chuan ka zui ta chawt a.

Taxi-in kan chuang a, ka taxi vawi khat chuanna a ni. Kan tlan kan tlan hnu chuan veng kilkhawr deuhva in pakhat kawt kan thleng a, kan chhuk a. Kan luh tumna in chu a lo inkalh bam a. Tlangval pakhat zawk chuan, “Ka nu chu a lo la haw lo a nih hi. Chahbi spare ka kawl tho va, a pawi lo ve,” a ti sawk sawk a. Kawngka chu a hawng a, kan lut ta a.

Kawngka hawngtu zawk chuan ṭhutna tur chu min kawhhmuh sawk sawk a. A hmel a ṭhain fel ka ti khawp mai a, mi zakzum tak ka nih avangin lawm viau mah ila, lawmthu ka sawi ṭha ngam lo va. “Tikhan ṭhutthlengah lo mu la, i eitur kan va siam ang e,” a ti a, choka lamah an pahnih chuan an lut ta daih a. Minute 10 hnuah chuan pakhat zawk chu a rawn lut a, thei tui a rawn keng a, “Kha, hei hi i ei tur kan siam chhungin lo in la, lo muhil hahdam rawh, kan siam peih hunah kan lo kaitho mai ang che,” a ti a, thei tui chu min pe a, ka lo la ve mai a, choka lamah a lut leh ta a.

A thei tui min pek chu ka in khawlh khawlh a. Ka vawi khat inna tho a ni. Ka luak a chhuah deuh avangin bur chanve chauh ka in a, ka in aṭanga rei lo te hnuah chuan ka lu a rawn hai chiai chiai a, ka taksa a zawi ta vek a. Rilru fim kar chungin ṭhutthlengseiah ka let ta reng mai a.

Tlangval pahnihte chu nakinah chuan an lo lut a, pakhat zawk chuan mut pindan lamah min pawm lut nawlh a, khumah min nghat a. An thil tum ka hrethiam vat a, au chhuak turin thahrui ka nei lo va, ṭang turin chakna ka nei hek lo. Ka thawmhnaw hakte chu an hlip a, ka taksa a zawi tlat avangin rilru na tak chungin — sikul naupang, zirtirtuin awm tura a tih ang anga a awm ang mai hian an tih ang angin ka awm a, darkar khat hnuah chuan an duhtawk ta. Mihring ka tling ta lo!

Tumah dang rawn lut tur an awm lo va, a in awmna hmun a fianrial avangin a reh tlawk tlawk mai si. Ka mittui a tla zawih zawih a, ka taksa aṭanga ka pekchhuah theih awmchhun a ni. Chumi zan chuan zankhuain ka khua a sik hluah hluah a; ka nu leh pate kha ka va ngai em!

Chuti rêng rêng chuan kar khat  chhûng hun ka hmang a, tâng enkawla min enkawl avangin pindan lamah min dah a, ka ka an hnawh a, min phuar a, eitur min pe ṭhin. Zantin nawmchen nan min hmang a, kan khuaa ka hrehawmna let thawka hrehawmin hun ka hmang a ni. In an fianrial si a, tumah an lo leng lut zen zen lo va, an lo len luh chang pawhin pindan lama ṭawng thei lo leh che thei lo tura min dah tlat avangin engmah an hre ngai lo.

Ka naute ka kalsan avangin Pathian-in min hrem a ni ngei ang le. Mahse, mi retheite Lalpa chuan  min hrem ka ring si lo. Kha leh chen a hnenah ṭawngṭaiin ka harsat manganna ka thlen a, engmah awmzia a awm si lo.

A chang chuan min thah mai an duh ṭhin niin ka hria a, mahse, chu em zawng an ngaingam lo a ni ngei ang; thi lo dam si lovin hun min hmantir si. Vawi tam tak tlanchhuah ka tum a, ka la hlawhchham zel a, chutah chuan a leta hrehawmin min siam leh si ṭhin. Ka beidawng ta takzet ta! Pathian-in ka chunga thil thlengte avangin min kalsan ta a nih ka ring a, a biak pawh ka be duh ta lo. An mi tih dan danin ka awm a, ṭan pawh ka ṭang duh ngai ta lo. Kar khat dang a liam leh hnu chuan min phuarna pawh an phelh tawh a, tlanchhuah pawh ka tum ta hek lo. Tlanchhuak pawh ni ila, khawi lam nge ka pan chuan ang?

A hnua ka hriat leh danin chu’ng tlangvalte pahnih chuan in an lo luah dun hi a lo ni a. Thla hnih vel an duhtawka min khawih hnuah chuan an tan hnawksak mai ka ni ta! An duh duha an tih atana ka awm takngial pawh phal lovin chu in aṭang chuan min chhuahtir ta! Ka rilru a nâ a, ka thin a rim takzet. Hmun dangah han sawi chhuak dawn ila, mite endawng leh hmuhsit bak ka ni dawn si lo. Chu mai ni lovin, engtin tin emaw ka nite’n an hria ang a, min lo zawng chhuak ang tih ka hlau bawk si.

Chuvang chuan zêp lo thei ka ni lo. Min chhuahtir aṭang chuan awmna tur ka nei leh ta lo. Ei tur ka nei hek lo va, neih ka nei hek lo. Ka mumanga khaw nuam tak anga ka mangphan khuaah ngei mai chuan ka vakvai mek a ni. Ka dam khawchhuah nana ka tih theih awm ang ang chu tih ka hre lo va, hmeichhia mai ka nih avangin a tawp a tawpah chuan mahni inzuarin hun ka hmang chho ṭan leh ta a ni.

Ka naupan laia ka ni min tihduhdahna chu hrehawm hle mah se, thianghlim taka awmin ka naute nen kan awm thei a, a tawrh dan dan a la awm a. Aizawl ka thlen phat aṭangin tlangvalte nawmsip bawlna hmanruaah ka awm leh a, hrehawm teh mah se, ngaiah ka neih thuai a. Tunah, mahni inzuarin ka awm ta a, a dân a dang kher mai. Hahthlak miah lovin sum ṭhahnem tak ka lalut thei a, thawmhnaw thar ka lei thei ta bawk a. Ka pawisa lakluha tlem tlem chu ka khawl a, ka unaute ka la theihnghilh lo. Engtikah emaw chuan hlim taka hun kan hman ka ring tlat a ni.

Chhun hi ka ngaina thlawt lo va, khaw êng ka hmu ngam hek lo. Zan a lo thlen hian hlim miah si lovin ka nui ṭhin. Sum pawh ka la lut ṭha viau a, mahse, mahni inzuar ka nih avangin, in han luah ve bawk ṭhin mah ila, hnawhchhuah ka tawk leh nge nge ṭhin a. A chang leh khawtlang hruaitute ben leh tihmualpho ka tawk a, hmun tin hmun tangah ka hnawng a, zan chauh hian min pawm duh a; chuvangin zan hun hi ngaina lo rual ka ni lo.

Thla eng emaw zat chutiang ka awm hnu pawh chuan ka unaute ka theihnghilh ngai lo va, ka ngai em em ṭhin. A chang chuan haw leh mai te ka duh rum rum a, mahse, haw  leh ngam rual ka ni tawh lo. Tunah chuan, hmana hmun nuam leh mi fel tak takte khawsakna hmun anga ka suangtuahna hmunah endawng leh hmuhsit ka lo ni ta. Nula ṭawp leh hmuhsitawm ngawih ngawih ka lo ni ta.

KS nih hi, a taka tuartu tan lo chuan a rapthlak leh hrehawmzia sawisen rual a ni lo. Khawngaih aiin deusawh kan tuar a, hmangaihtu aiin diriamtu kan tawng a, lainattu aiin hmusittu kan hmu si. Khawlai hmun tin hmun tang suartluan mah ila, tlangnelna hmun khawi lai mah kan nei lo. Mipa chi tin chi tang kawp mah ila, innghahna ngam tak tak mihring kan nei lo. Lei hrehawm dik takah hun kan hmang a, kan ruih lai leh inzawrh lai chiah hi kan rilru dam lai a ni; chu pawh a dam tihna a ni chuang lo.

Ṭum khat chu khawlaiah kan khaw mi pakhat nen kan inhmu nawlh mai. Min lo hai hauh lo chu niin, “Kan khua i tihmingchhia a, kan rilru a nâ a ni. A bîkin i ni leh i naute rilru i tihrehawm a, unau leh chhungkhatah pawh an ngai tawh lo che,” min ti a, ka rilru a na em em a. Ka ngaih em emte’n min tuithlar ta mai chu, ka ṭap zawih zawih a ni. Chuta ṭang chuan, khawlai ka chhuah pawhin kan khaw mi ka hmuh chuan ka hêl hram hram a, inhmuhtir loh hram ka duh ṭhin. Ka naute avanga beiseina ka neih zawng zawng chu ka naute vëk chuan an tibo ta a ni.

Chutianga awm reng renga khawsa ta chuan, ka mi kawp tam tak zingah kawm ṭhan hi ka nei a; chumi nen chuan zantin kan inkawm a. Keimah ang bawka mi vakvai, chhung leh khat pawh nei tawh lo, retheihna aṭanga beidawnna khura tlu lut ta a nih avangin kan innêl hle a; a hnuah phei chuan a awmna lamah nupa angin kan awmdun ta hial a. Engmah thawh a nei si lo, a changin ruk a ru a, keimah ka inzuar bawk a. Kan nun dan hi a rapthlak asin!

Mahse, khawlo leh tenawm takin awm mah ila kan inhmangaih em em a, thla thum kan awmdun hnuah fa ka pai ta hial a. Nau pawh chu ṭha takin ka hring thei a, khawvela min tihlimtu awmchhun a ni. Mahse, eizawnna dang kan neih loh miau avangin, ka dam chian hnuah ka hna ngai ka chhunzawm lo thei si lo. Ka pasal nen chuan zanah kan chhuak a, kei ka inzuar a, ani’n nau a lo awm a; a hriatpuina ngeiin a ni, ka inzawrh ni. A tir lamah chuan a rilru a na thei em em a, mahse, kawng dang a awm si lo. Hetiang mihring hi khawvel ram zauvah hian midang awm tak maw..

Hmana mi zakzum khan tunah khawvel hmaah thup leh khuh ka nei tawh lo. Hmana tlaivar ṭhak ṭhaka tlaivar ṭhin kha tunah tlaivarin ka inzuar ta zawk a. Hmana beiseina nena rim taka hnathawk ṭhin kha tunah beidawng takin ka inzuar mek a. Hmana Aizawla awm châk ve em em ṭhin kha tunah chuan Aizawl mi hmuh ngam alawi ka nei ta lo. Hmanah khan hmabak tam tak nen hma lam ka pan a, tunah erawh ka hnungtawlh a, chatuan boralnaa tawlh liam bak hmabak ka nei ta lo.

Nichina lo lut kha ka pasal a ni a, a nau puak kha kan fapa chu a ni. Kei chu tihian ka haw leh ang a, zan a lo ni ang a, a ngai të bawkin inzuar turin ka chhuak leh ang a. Ka pasal chuan kan fa neihchhun hi in lamah a lo awm ang a, zing khawvar dawnah in ka thleng leh ang a, ka pasal leh fapa bulah hun ka hmang leh chauh dawn a ni. Khua a lo var ang a, kan eizawnna bawlhhlawh tak avangin khawvel êng hmu ngam lovin inah kan tawm dun chawt ang a, khawvelah mal takin hun kan hmang leh mai dawn a ni.

A sawi zawng chuan MS-i chu a mittui a far kauh kauh a. Kei pawhin ka khawngaih kher mai. Thawh a tum uaih chu ka kuai ṭhu leh a.

“Ni lo ve. In eizawnna hi in thlak a ngai a ni. Theihtawp kan chhuah ang a, i thil tih i bansan tawh ang a, kan hnathawhna hmunah pawh nangmah emaw, i pasal emaw thawh âwm tawk kan ngaihtuah ang a, nun tharin hun in hmang tawh dawn a nia..” ka ti a, kan tho va. Kan ei leh in man ka pe a, kan chhuak ta a.

Note: Hei hi March ni 1, 2012-a ka ziah a ni a, phuahchawp mai mai a ni e!

Share this

TS Khupchong