MLA leh Minister-te thusawi vangin Pathian rawngbawltute an au chhuak

Mizoram State Assembly session, 2017 March thlaa neihah Minister pakhat John Rotluangliana leh MLA pakhat K. Lalrinthanga te'n zu chungchang an sawi chuan sawi zui leh chai a hlawh hle a; Pathian rawngbawltute pawh an au chhuak a, facebook lam leh whatsapp lamah a darh chhuai chhuai a ni.

A link dah tawp mai ila:

K. Lalrinthanga thusawi
John Rotluangliana thusawi 

Rev. Lalramliana, Senior Executive Secretary, Mizoram Synod
"Pathian thu hi kan duh dan nemngheh nan duh duh danin kan kailek ta a ni ber. Ram rorelna sang berah 'Isua'n zu a approved' an ti nia maw le! Inthlan a nih hunah Pathian duh anga ram kaihruai thei mi kan thlang tur a ni ang. Krista avangin kan ram rorelna hi kan tidanglam ngam tur a ni."

Rev. P.C. Nghaklianmawia
"Bible thu hi a context ngaihtuah lova mahni duh dan dana hrilhfiah chi a ni lo. Hetiang zawnga Pathian thu hrilhfiah hi hrilhfiah dan dik lo a ni. Bible-in a sawi tum ang ni lova mahni ngaihdan sawhngheh nana Pathian thu hman luih hi Pathian sawichhiatna (blasphemy) a ni tih hriat a tha. 'Zu zawrh hi kan tawngtai chhanna a ni' tih leh 'Kan zu in te hi Pathian thu sawi tui nan hmang ila' tia tham lo taka kohhran deusawhtute hian Pathian thinurna an tawng baw lo a nih chuan a lawmawm ngawt ang."

Rev. P.C. Lalropuia
"Khawi ramah mah hian Kristian ram hruaitute'n an mipuite hnena Pathian thu sawi nawmna tura zu in a that tur thu an sawi ka la hre lo. A sawitu khan a hming a sawi kan Pathian leh a kohhran a zah miah lo a ni. Kristian thurin tluang pangngai mausamtu a ni bawk. Zu avanga chhungkua leh mimal rilru na, zu avanga tu leh fate sun, zu avanga chhungkaw keh darhte rilru a va na dawn em!

Rev. C. Lalbiakhluna
"Mawi lo taka MLA thenkhatin nawmnah taka Pastor-te min sawi kai hi ka rilru a na takzet. Kan Pathian duh dana ram roreltu kan va mamawh em! Zu hmangaihtu ni lo, ram hmangaihtu leh Pathian tih mi MLA chauh i thlang tawh ang u, Pathian thinurna kan tawng buak hma hian.

Rev. R. Lalhmingsanga
"Zu hi Pathian thu sawi tui nan pawh a tha dawn' tia sawitu Minister John Rotluangliana hi an kohhrana inkhawm ve thin a ni em le... Thlarau lam thuchah hmanga Pathian mite chawmna ber pakhat 'Thuhril rawngbawlna' heti em ema a hmusit hi engtizia nge ni ta le? Kohhran rawngbawlna pawimawh heti em ema Minister meuhvin a sawi bawrhbang a, a hmusit mai hi ama thlarau lam nun hi a da hneh hle zawk em ni le?

Joseph Zaihmingthanga, Revival Speaker
"Upa K. Lalrinthanga'n 'Pastor zu in ka hre teuh, tlemtein, tam tak ni lovin' a tih hian khawi lam Pastor nge a hriat? A hriat chu sawi sela... A sawi lang ngam lo a nih chuan dawt phuahchawp sawiah ka ngai ang. John Rotluangliana'n, 'Zu hi Pathian thu sawi tui nan te hian a va tha dawn em!' a tih hian amah leh amah a intimualpho tih a inhre lo em ni aw... Heti taka Pathian thu zah lo mi hian a tlin reng inring suh se. Lalpa thu hi thu tak a ni a, chuti maia chalai kual chi a ni ngai lo ve."

'Zu hi Pathian thu sawi tui nan te hian a va tha dawn em!' titu John Rotluangliana, mipui thlan Minister ngei mai chu

Țawngțaina chhângtu

Mi aia harsatna tawk nasa leh mi tawrh loh tuar bik ka ni hauh lo. Amaherawhchu, hnung lam ka thlir let chang hian, khuarkhuruma ka tlak lai te, chirh leh dûm hmuna ka tân lai te, hlîng leh bawn hmuna ka kal lai te ka hmu țhin. Țhenkhat harsatna tawh chu rilru natna, chhungkua leh inngaihzawnna kawngah te a nih ka ring a, chutiang harsatna an tawh avangin 'ka hringnunah harsatna tam tak ka tawk' an tih ve fo ka ring. Kei erawh chutiang harsatna ang mai a ni hauh lo thung. A tak ngeiin ka tawng a, a tak ngeiin ka vai a, a tak ngeiin ka tuar a ni.

Ka harsatna tawh phenah hian Lalpa'n min țanpui nasa takzet, a tak ngeiin. Hei vang hian alawm ka harsatna tawh hi malsawmnaa ka chhiar țhina, suala ka peng tur lak ata min veng țhin ka tih țhin hi ni. Mi țhenkhatin 'Lalpa'n min țanpui' an tih hi thlarau lama an chan chhah deuh vang te, chhungril lama an hlim riau vang te, thlahtute ațanga inrochun malsawmna an dawn vang te a nih ka ring. Kei chu chutiang a ni lo va, Lalpa min țanpui dan hi mit khap kar leka lo lang țhin a ni.

Entirnan, kum 10 kal ta ațanga mi in luaha khawsa mai kha ka ni a; in luah man han remchan loh țum te, zirna lama sum mamawh hmanhmawh neih mai loh chang te a awm țhin. Chutiangah chuan ania Lalpa chu lo lang țhin ni. An hnena ka harsatna ka hrilh kher loh ka țhian leh hmelhriat, sum faia cheng sang chuang chuanga min han pe tawp mai te, eng competition-tion emawa sum fai han dawn chang te, hun rei taka kan sum fai bate'n min han rulh zauh chang te, 'dawrah i lehkhabu rawn dah rawh' tih changa lehkhabu man tlem azawng lo tling khawm ve te leh a dang dang pawh. Hetiang thil hi ka mamawh loh chang ni lovin, ka mamawh hunah tak ka tawng țhin.

Lalpa inlarna hi a hring a hrana hmuh ka inbeisei ngai lo va, a țanpuina pawh pawisa buara bag khata chhar ang zawngin ka beisei ngai lo. Ka thil tawn ang khi ka laka Lalpa inlarna leh țanpuinaah ka chhiar hmiah mai a ni. Ka lawm fo va, ka lawmna erawh midangte tana hneawm hluiin ka puang fo lo thung. Lalpa rem min ruatsak danah ka lungawi thlawt a, ka lungawi thu erawh midang ka hrilh nawn chhen lo va, keimahah ka chiang em em a ni.

Heng thu ka sawi zeuh zeuh avang hian tuna ka dinhmun hi a țhain a sang em em tihna a ni lo va, mi chunga chuang ka ni tihna a ni themte liak lo. Thinurna hi pai renga reh chi a nih loh chang a awm ang bawk hian, lawmna hi puan chhuah a țul chang a awm țhin. Hmabak tam tak ka nei a, kawng zawh tur thui tak ka la nei bawk. Mi aia sánga invawrh turin kum tam tak ka la mamawh a, ka hringnun kal ta zawng zawngte chhuk thlir thei turin hun tam tak ka la mamawh tih chu ka chiang em em a ni.

Nikum lama tihchhuah 'Mt. Everest' movie kha in lo en tawh maithei. He tlang mangkhawngah hian mi 8 an thi a, he tlanga ni khat thil thua mitthi an tam ber țum a ni nghe nghe. He movie chhuah hma hian Rob Hall leh a naute chanchin lungchhiatthlak hi internet lamah ka lo chhiar tawh a, a lehkhabu pawhin chhuah a ni tawh. A ziaktu pawh Hall-a team member Jim Krauker a ni a, tlang chhip chuang chhuak zingah a tel a, Rob Hall leh a hote chhiat tawh chu a lehkhabu ziah 'Into Thin Air' ațangin kimchang takin kan hriat theih phah a ni.

Mihring nun, keima nun ngei pawh tlang lawn angin ka tehkhin țhin. Rob Hall khan a nunna chân phah mah se, a thih hmain a tum ram Mount Everest tlang chhip a thleng hman a, khawvel a chhuk thlir a nih kha; a thil tum a hlen a, a kal ta. Nang leh kei hian tlang kan lawn mek a, tlang chhip thleng hmanin kan thi ang nge, kan tum hlen hman lovin kan kal ang tih tuman kan hre lo. Kan tlanglawn kawngah hian thil țul lo kan ti em, țul lo kan pai em, țul lovah kan peng em tih te hi ngaihtuah fo a va țha em! British tlanglawnmi hmingthang George Mallory khan kum 1924 khan he tlang lawn chhuah tuma a beih țum thumnaah a thihpui. Englekhawle, ka dam chhung chuan he tlang chhip hi chuang chhuak turin theihtawpin ka bei ang, tih hi ka infuihna a ni.

[March 26, 2017-a ziah a ni].

Khawharna

Rûn ram ka nghak a,
Chhuatah ka vei sek a;
Thinlung a tãwt a,
Rilru a ipik a,
Suangtuahna a ruak thung si.
Bengah thãwm a lo ri a -
'Khawharna khawharna'
Râwl chhuahin ka țap a,
Mittui chiah a lo haw a.

Khawlaiah ka chhuak a,
Kawtthlerah ka tei rek rek a,
Thãwm riva reng reng a awm lo;
Thil nung hmuh tur a awm lo va,
Thil che hmuh tur a awm hek lo.
Khawvel a ngawi a,
Engkim a châwl țhuap a,
Keimahin ka ding reng a;
Ring takin ka au va,
Thangkhawk chiah ka chan.

Ramhnuaiah ka kal a,
Thlaler aia reh a ni;
Thli thaw a awm lo va,
Vaivut lêng takngial pawh.
Lui kawrah ka lut a,
Engkim a ro zo va;
Lui tui luang sela,
Ri a chhuah ang a,
Thãwm chhete tal a awm tur.

Van lam ka hawi a,
Ni a sa vawl vawl a,
A awmna ngaiah a ding reng a;
Zing a hlat thei lo va,
Tlai a hnaih thei hek lo.
Chhum a ding țhup a;
Inlet but butin,
Kâwl phe zawr zawr sela,
Khawpui ri un un se,
Khawhar a hnem tur.

Phone ka kheuh hawng a,
WhatsApp ka lut a,
Contact 1000 chuang neiin,
Group 100 chuangah ka awm a;
Message thar reng reng a awm lo.
Facebook ka login a,
Friend 5000 ka nei a,
Thil thar hmuh tur a awm lo;
Post leh comment zawng zawng chu,
5 years ago.

Lunglenna!
Khawharna!
Lungngaihna!

[Khawhar ngawih ngawih chang ka nei țhin a, nangni pawh in nih thi ka ring. Chutih huna khawvel ka mitthla dan leh keimah ka inhmuh dan ka ziak chhuak a ni].

Awngphah

Saruakin mi rawn pan,
Tuihalin ka lo ban.

Nui sángin mi hawisan,
Laikhumah ka keuh hman.

Inches ngaah a man,
Hlimin a țang phan phan.

Nun siamtu kan chèn țan,
Chu ngei chu ka dam chhan.

Zantin hi lawițhat zan,
Awngphah nuam kan bawh pan.

Bedsheet

Khuhtu khan phur rit a phur fo va,
Nawmchenna tinreng a dawl zo va,
Zahpah leh pawisak a lo bo va,
Pangchangte tualchai a lo do țhin.

A țhiang têa laikhum zal dun chuan,
Hlado an chham hnan - 'ah ah ah' tiin;
Theih se hringmi ianga râwl chhuahin,
A pau âwm e - 'ha ha ha' tiin.

Hahchawlhna thlantui luanna tualzawl,
Hahthlakna lungawithlak thlenna hmun;
Mut tual kha buan tualah an chhuah a,
'Hil' lova chhìnna hmun a lo ni.

[March ni 21, 2017 zan khan, WhatsApp lama Poetry Paradise group chuan 'Bedsheet' thupui hmangin poetry i phuah ang u, an ti a; hei hi ka'n ti ve a ni].

Letter to Fela

Țhian ngaih em em, ka drama ziah hmasak bera a hming ka tar lan tel loh phal loh khawpa ka ngainat, Fela Ngente,

Chung khuanu zarah ka dam zel e. Kar tawp inhmuh loh ringawt pawh a rei duh hle mai. Thawh,anni han chawlh dawn ngat phei chuan a huphurhawm rum rum nia.

Engti turin nge min beiseia engin nge mawlh ta che ka hrethiam chiah lo va, i office dawrna lamah mi huatthlala i tawng nge ka ngaihdan i hre châk hrim hrim ka hre hek lo. Amaherawhchu, kan sawrkar hnathawk hlawh tamte chungchang erawh sawi hlek turin min duh niin ka hria a. Chuvangin point të tëa țhenin Mizoram budget-in a chãwm sawrkar hnathawk, mipui rawngbawltute ka hmuh dan ka han tar lang zuai zuai ang e.

1. Sawrkar office tam zawk hi thatchhiat zirna hmun a ni. A hnathawkte an thatchhia a, an dawhkanah an hmel hliah khawpin file pawimawh intiang urh mah se zuma khelh an thlang zawk.

2. Sawrkar hnathawk tam tak hi an thawh hre lo an ni. Nitina office kal ringawt hi an hnathawh emaw an ti a, office-a an thawh zawh hman loh ina thawh zawm atana hawn khawpa țhahnemngai an tam âwm lo asin. Kan file pawimawhte thla thum thla li lai an titâng a, an hlawh lak tur thla thum thla li lai tâng se an nuar ang.

3. Office hna aia mimal thil ngai pawimawh an tam khawp. Office hun chhûng reng pawha mitthi râl, inneihnaa kal, damlo kan tura haw hma chîngte hi an huatthlala takzet a, thil pawimawha hmuh an țul chânga an lo awm loh hian vawk êk uih țha ber ber chi barh hawng hawng ka châk țhin.

4. Office-ah hian discipline an kengkawh țha lo hle a, an zawm țha lo hle bawk. Dawrtu an awm lai reng pawhin an inchhaih a, an nui duar duar a. Thingpui an in khulh khulh a, khâk an chhâk leh tlãwrh țhin. Office chhûng tihzahawm an tum lo va, an tã ni lovin midang tã anga ngaih tlatna an nei.

5. Ram leh hnam hmangaih maw?! Ram leh hnam hmangaih tak tak hi sawrkar office chhûng aiin party office chhûngah ka hmu hnem zawk. 'Ram leh hnam ka hmangaih em a, sawrkar hna ka thawk ta mai a ni' ti hi an tam âwm lo asin. An hnaa taima em emte pawh hi ram leh hnam an hmangaih vang ai mahin an hma zawna tihtur awm a nih vang chauh a ni maithei e.

6. Office chhunga 'Ka pi/Ka pu' kan tih țhinte hian sawrkar hna hi 'where, what, why, when, how' hre chiang ngat sela chuan a dawrtu zawk hi 'Ka pi/Ka pu' an ti țhin ang. Ram changkang zawkah chuan hetiang hian an ti țhin zawk an ti. Mahse, tunah rih chuan social media-ah sawrkar hnathawkte dawr an nawmzia aiin dawr an hrehawmzia sawina post a la tam zawk tlat a nih hi.

7. Mi thiam chu ka ni lo va, mi țhahnemngai erawh ka ni thung, i sawi ang deuh khian. Office ka dawr changa 'kei chu ni ila' tih vawng vawng chang ka nei ve bawk nia. Mahse, sawrkar hna thawh hi ka la châk ngai lo va, Mizoram budget zatve aia tam eiraltu zinga tel tumna ka la nei hek lo. Hemi vang hi a ni ang, sawrkar hnathawk aia sumdawngte ka ngaihsan zawk mauh mai ni.

I zawhna hi ka chhang fuh em ka hre lo va. Office hrang hrang ka dawr zing ve tawh a, ka vei zawng tar lanna remchang atan ka han hmang mai a ni.

Ka ngaihdan fahrah të të i hriat duh châng chuan inthlahrung duh suh, mi huat hlawh khawp pawhin ka ngaihdan diktakin ka chhâng zel ang che.

Tawk phawt se.

I țhian,

TS Khupchong
Mission Veng
24.3.2014; 1:30 AM

(Hei hi March ni 3, 2014-a ka țhianpa Fela Ngente-in a facebook wall-a ka chhiar tur thuziak a post chhàn lêtna a ni. Tihian ka han dahțha a ni e. Sawrkar hnathawk zawng zawng ka hmer tel lo a nia).

'Zaikung Thar' thlirlawkna

Genre : Poetry
Page : 307
Copies : 500
Press : Louis Bet, Chanmari, Aizawl
Publisher : Mizo Poetry Society (MIPOTY)
Price : ₹ 200/-
ISBN No. : 978-81-932919-5-5
Thlirlawktu : T.S. Khupchong
Date : 21/3/2017

Lehkhabu azawnga hralh tla lo ber mai ‘poetry’ hi a bua tichhuak ngam an tam lo khawp. Thuziak dang nena chilh khawma chhuah erawh a awm nual thung. Chutih laiin tun hnaiah poetry lama harh tharna a thleng a, kalhmang hrang hranga poetry phuah kan uar chho va, a lawmawm hle. Poetry hlang dahna bu tichhuak han sawi mai theihah chuan — Capt. LZ Sailo (Ka Suihlunglen Hlahril), K.C. Lalvunga (Zozam Par), James Dokhuma (Ka Hlahril: Ka Thinlung Luangliam), Lalsangzuali Sailo (Kulva), Prof. R.L. Thanmawia (Senmei etc.) leh Prof. Laltluangliana Khiangte (Rochuam etc.) te, C. Chhuanvawra, Lalzuahliana (Lungmawl Selin etc) te; tun hnai deuhvah Malsawmi Jacob (Tinkim Dawn), Lalnunpuia Hrahsel (Ngaihhrilvawn), Nununa Renthlei (Hringnun) leh F. Lalzuithanga (Paradise), C. Lalhruaitluanga (Thinlung Tuifar etc.), Laltlanthangi JH (Leikapui Zaiva), Dr. Robert L. Khawlhring (Ziakfung Chawia Ram Țuanna) te; English lamah Dawngi Chawngthu (Of butterflies and an unfinish converstion), Laldinkima (Spectrum), John Laltluangliana (Unsung) leh Debbie Lalrinawmi (Purloined Emotion) te an ni a, a dang han sawi tel loh pawh a la awm âwm e.

Chung lehkhabute hnung zui turin ‘ZAIKUNG THAR’ a lo chhuak dawn ta a, a lawmawm hle. ‘Zaikung THAR’-ah hian mi 48 laiin poetry an thawh khawm 217 zet a awm a, chung zinga 55 chu English poetry a ni. Mizo chhulchhuak poetry dah khawmna bu-ah chuan a la chhah ber awm e. Kum 2000 hnu lama phuah a nih vek avangin, tunlai Mizo țhalaite poetry phuah dan kalhmang zir chianna atan a țangkai hlein a rinawm a, Austrian ziaktu lar Franz Grillparzer (1791-1872)-a’n, “Poetry hi hringnun darthlang a ni,” a lo tih angin, tunlai țhangtharte sukthlek leh hawi zawng te, khawvel an hmuh dan leh thlir dan tehna atan pawh hmang ila, a sual lo vang.

He lehkhabu hi poetry bu atan chuan a chhah țha viau a, a chhahna ai mahin a chawhchawrawihna leh a funkimna hi a hlutna tur a ni. Hla tawi leh simple tak tak, saphovina ‘ditty’ an tih ang hi țhahnem tak a awm a, hlathu (poetic word) leh grammar-in a phuar loh poetry țhahnem tak a awm bawk. Heng — țawngkam tluang pangngaia hla phuah hi kan intihhmuh ta viau a, ‘a thu a ho em mai’ tia ngaihnep ngawt chi a ni lo; thu ken țha tak tak nei leh poetry țha tak tak a ni zawk a, țhangtharte’n hlathu pangngai hmang lova hla phuah an chîng chho zel hi hmasawnna chi khat a ni zawk tih hi kan pawm a ngai.

Poet-te hi awm lo chiah awmna boruak thil tih theihna te, mi dangte tana thli thaw hum hum ri pawh rimawia chhuah thei te an ni. He lehkhabua poetry thawhtute zingah ‘zan rei sana kal ri kara phengphehlep țap ri’ hria te, ‘tlai nem Zothlifim fawn kara Vate rilru’ lo hre thei te, a uih chung chunga tui ti em ema kan ei țhin ‘zawngțah’ hla te, ni khat thil thu-a khawvela vaiho phur hnem thei ber ‘rel’ hmanga poetry țha tak phuah thei te an awm a, a dang pawh sawi tel châkawm a tam mai. American poet James Gates Percival (1795-1856)-a’na, “Khawvel hi poetry-a khat a ni,” a tih kha he lehkhabu hian a dikzia a nemnghet chiang hle.

Hla phuah dan kalhmang hrang hrang neia phuah a ni hlawm a, chung zingah chuan sawi tel loh theih loh a awm. Accrostic poem phuah hi thil awlai lo tak a ni a, he hlaah hian a awm nual. Chu mai a ni lo, double accrostic poem thlengin zuk awma maw le! Accrostic poem phuah tawh chuan double accrostic poem phuah a harsat turzia chu in hre mai awm e. Ballad a awm a, sonnet a awm a, sunna hla (elegy) te, satirical poetry țha tak tak te, patriotic poem te, philosophical poetry thlengin a awm. Rhyme țha tak tak neia phuah te, chutiang ngaihtuah miah lova phuah te a awm bawk. Paite leipui an sawi ang maiin a chi kim hle.

K.C. Lalvunga chuan, “Hla chu mihring suangtuahna thûk, thu kam nem leh mawia chei, midangte tana ngaihthlak nuam zawng leh pawmawm zawnga chham chhuah...” tiin a ngaihdan a sawi a. He lehkhabu-ah hi chuan suangtuahna thûk tak hmanga phuah nih loh hmel tak, mahse, ril tak ni si te; thu mawia chei ni lem lo, mahse, awmze nei zet te; midangte tana ngaihthlak nuam leh pawmawm zawnga chham chhuah ni lem lo, mahse, dik leh țha tak takte a awm nual. K.C. Lalvunga ngaihdan țawmtute pawhin heng poetry hrang hrangte hi ‘poetry a ni lo’ an ti thei bik lo vang.

He poetry dahkhawmna bu hi chhangchhenu pawnfen ang maia fun kim a ni. Chhangchhenu pawnfen chhungah chuan pawisa te, sahdah te, lehkha pawimawh te thlengin a awm țhin a, chu lo pawh chu awm a la awm âwm e. Chutiang chiah chuan he lehkhabu-ah hian ‘Eloi eloi’ tih leh ‘thianghlimna hloh-ho tan’ tih te dah khawm a ni a; ‘DP’ ringawt buaipui an awm laia ‘tuipui chunga tuipui’ lo tuipui em em te, Pu Hawla lo ti-Alcohawla tawk te an awm. Heng mi 48-te hi an indaihzai khawp. Politics, social network, khuarel (nature), Kristianna (Christianity), history thlengin he lehkhabu hian a chai a ni.

MIPOTY president Prof. R.L. Thanmawia’n he lehkhabu siam chhan a sawi pakhat chu, “Awmze neia zirbingna huang thlenga kum zabi 21-na chhunga Mizo poetry hmasawn chhoh dan leh țhan dan, àwn lam leh hawi lam, kalhmang leh thupui hrang hrangte kan hriat theih nan...” tih a ni. A sawi ang ngeiin kum zabi 21-na Mizo poetry-te zir chianna atana he lehkhabu tluka țha, huam zau leh țangkai a awm kher lo vang!

Poetry phuah dan kalhmang hrang hrang nei — dân zam hrang hrang awmte hian Mizo poet-te hi a lo khuahkhirh teh chiam lo a ni tih he lehkhabu ațang hian hmu chhuakin ka inhria. Zoram pum hriat hlawh poet lar tak takte poetry leh, Siachangkawn khaw mihring awm zat em pawh hretu nei lote poetry dahkhawmna hi, lehkhabu huapzo tak leh hlu tak a ni tih loh rual a ni lo. Chuvangin ‘ZAIKUNG THAR’ leh a buatsaihtu MIPOTY dam reng rawh se.

Cheng nuai 12 man leh nuai 14 man

Kerela state-a khaw pakhat Mundakkayam-a nupa tuak khat Latha leh a pasal Vishwanathan te chuan cheng nuai 12 lek sengin in nalh leh changkang tak an sa a; chu chu square fit 928-a zau a ni. Chu in chuan mut pindan pathum a nei a, choka leh inkawmna (sitting room) a nei thlap bawk.

A lem hi han en ila, a chhe lovin a changkang hle tih a hriat. An hmanraw hman pawh a tha thawkhat hle a ni.

Chutih laiin India hmarchhak kila Kristian tam em emna hmun Mizoram-a khaw pakhat Theiriat-a Hminlokawn-ah chuan waiting shed cheng nuai 14-in an siam a; he waiting shed hi kum 2014-2015 chhunga Soil & Water Conservation kaltlanga Lunglei High Power Committee (HPC) sum hmanga an sak a ni.

Credit: Vanglaini

Thil țha hi mahni tih ngei tur a ni

Ka inkhawm bâng min hmu a, "I van fel țhin tak em!" tiin min fak a, mahse, fel i tum chuang miah lo.

Ka hnathawk lai min hmu a, "I van taima țhin tak em!" tiin min fak a, mahse, taimak i tum chuang miah lo.

Ka ruihtheihthil tih loh thu i hria a, "I van invawng thei tak em!" tiin min fak a, mahse, invawn ve i tum chuang miah lo.

Ka lehkha zir ri i hria a, "I van zir peih tak em!" tiin min fak a, mahse, zir peih i tum chuang miah lo.

Ka hnatlang lai min hmu a, "I van peih țhin tak em!" tiin min fak a, mahse, peih i tum ve chuang miah lo.

Hei hian thil țha hi midangte tihah kan khêk țhin tih a tilang. Thil țha hi midangte pawhin an tih theih chuan kan ti ve thei. Kan kâ ațanga fakna chhuak hi duhtawk lo ila, midang kâ ațangin fakna chhuahtir zawk ang u — kan nun a lo nawm deuh deuh theih nan.

Kan hliam hlui dam suh se

March ni 5, 1966, inrinni a ni a. Hemi hma March ni 2 tlai lam ațangin Aizawlah chuan Assam Rifles leh MNF volunteer-te an inkah avangin silaimu a leng nasa a, civil mi nunna chân an awm nual mai.

March ni 11, 1966 zirtawpni-a thih leh thih, dam leh dam tia Mizoram-a college awm chhun, Pachhunga College Principal Rev. Alwyn Roberts leh Aizawl Theological College thawktute leh zirlai awm ang angte'n khawlaia ruang senghawi lohte an zawn khawm khan ruang 13 lai an chhar reng a, chungte chu thlan pali-ah an phûm a ni (Rev. Lalsawma). Heng mitthite hi Aizawla inkahna avanga thi te, jet fighter-in Aizawl a beih avanga thi te an nih a rinawm.

Chawhma dar 10:15 vel a nih chuan India jet fighter chhuanvawr France kutchhuak Toofani leh British siam Hawker Hunter 4 chu Aizawl khawpui chungah a lo lang thawt a. Toofanis fighter-te hi Tejpur-a hmunpui nei leh Hunter hi Jorhat bula hmunpui nei a ni. Heng khalhtute hi Rajesh Pilot leh Suresh Kalmandhi an ni (Zozam Weekly April 21-27, 2010).

Hawker Hunter 4

Toofani leh Hunter te hi jet fighters mai ni lo, Jet Fighter Bomber an ni a, missile, rockets, cannons, machine gun leh bomb pawh a namenlo hle. Khatih hun lai chuan khawvel pum huap pawhin Jet Fighter Bomber tha leh hlauhawm berte zing ami an ni (Wg. Cdr. J. Lalhmingliana). Hunter hian Machine Gun 12 a pai thei a, missile type 303, air to air missile pahnih leh canon bakah bomb pound 1000-a rit pahnih a pai thei. Toofani hian canon bakah missile leh rocket bakah kg 227-a rit bomb pali a phur thei bawk.

Aizawl hi March ni 5 bakah a tuk ni 6-ah an bomb zui bawk a. Tuikhuahtlang, Republic, Venghnuai, Khatla, Chhinga Veng, Venghlui, Tuikual leh Dawrpui te chu a rawn bomb un un a. Aizawl bakah hian March ni 6, 1966 khan Khawzawl an bomb a, a tuk March ni 7-ah Hnahlan, March ni 8-ah Sangau, March ni 9-ah Tlabung, March ni 13-ah Pukpui, March ni 23-ah Bunghmun an bomb leh a. Hei bakah hian September ni 6-ah Pukpui leh Mualthuam bomb lehin, January ni 31, 1967-ah Hmuntlang an bomb leh bawk a ni (Thlawhtheihnain Mizoram a bomb by C. Zama).

Govt. Aizawl College-a kan kal lai chuan kan madam Ms. Zohmingliani'n tihian min hrilh țhin - "Aizawl bomb lai khan naupang tê kan la ni a. Thlawhtheihna a lo thlawh khan naupangho chuan kan hmu duh si a, thlawhtheihna atanga min lo hmuh hlauvin kopangah kan bet thap a ni," tiin.

Mizote chu vai huaa sap ngaisang thin kan ni, an ti fo. Kei chuan, A NI LO THEI NANG ka ti a ni. Lehkha min zirtir leh ringtua min siam chu thu dang daihah ngai ila. Kum zabi 19-naah sapho nen kan indo va. Hmeichhia an ngên a, in an hâl ve bawk. Mahse, anmahni rûntu khua lo chu an hâl lo. Civil mi pawisawilo an that mai mai ngai lo. Hmeichhe ngen chîng pawh hremin an thawn haw mai a ni. Kum zabi 20-naah vaiho nen kan indo va, min pawngsual a (pawngsual avanga nunna chân ta leh â zui ta te pawh an awm), min sawisa a (tam tak ramtuileilovin an awm), min that a, khua an hal a (vawi hnih vawi thum lai khua hal nawn tawk te pawh an awm), indo thlawhna tha ber ber chiin min bei hial nia!

Hei hi chu, ram leh hnam thil ngaihtuah ngai hlek lote pawhin i hre reng ang u. Kan rilru hi na sela, kan hliam hlui hi dam hlek suh se.

(March ni 5, 2016-a ziah a ni).