Lung A Lêng Êm Mai!

Mihringte hi khawvêla kan chàm chhûng hian mahni maiin kan awm thei lo va, chutah chuan thian hlutna a lo lang nghâl mai a. Mi tam tak chu kan hringnun zinkawngah hian thianah kan innghat a, kan engkima engkim an ni.

Kan hlaphuah thiam leh zaithiamte pawhin hla-ah an lo chawi vul chúk a, chu'ng hlate han nghaihthlâk veng veng hi chuan mitthlâ-ah thiante nena kan chêttlat lai te leh nunhluite kan dawnkîr vang vang thei nia! Chutiang hla tam tak zîngah, Pu F. Thanliana hla, 'Lung a lêng êm mai' tih, F. Laldinmawii'n thiam taka a sak hian min hneh ngawih ngawih a, ka beng hian a ri a hlat phal lo va, ka thinlungin a thlah phal hek lo.

Lenkàwl êng no riai, ka thlîr ning thei lo,

A lang tláng dum dûr saw, raltiang khûmin;

Lenrual hlimthlâ leh vânglaini liam hnu,

Thinlai tina an chang zo ta si maw..

Zîng nichhuak èng mawi tak maiin khawvêl a rawn chhhun èng a, romei paw chúk maite'n phaikuam leh hmun hniam lai an bawhte chu kalsanin khawvêl a lo thar sút a. Chumi ruala hràmthiam va tinréngina râwl an han chhuah tawh meuh hi chuan lunglênna chuan min rawn fan nghâl veng veng a, kan nunhlui mual liam  tate kan ngaihtuah chhuak leh uai uai thîn.

Kohkìr rual lohva kan nunhlui liam tawhte chuan ngaihtuahna a tithar a, thianzahova kan lo chêttlatna thin han hmuh ngat phei chuan sawi hleih theih lohvin suangtuahna lipuiah kan liluh nghâl veng veng thîn. Hmána hma lam hun pawh dâwn lék lova thiante nena làm kan thai laite kha mitthlâ-ah a tharin a lo lang leh uar uar a. Chu'ng kan nunhluite avângin a ngaiin kan kûr kan kûr ta mai a nih a hi.

Hawihkawm lenrual duh lêng zawngte kha,

A then an liam piallei thuah-riat kârah;

Nauang tah ka bâng lo,

Lung a lêng êm mai.

Naupan laia kan thiantha leh kawmngeih ber berte chuan nupui pasal nei tawhin thenkhat phei chuan an hringnun zinkawng zawh tâwpin mual min liamsan ta hial a. Hetiang hun hi a la thleng dâwn a ni tih pawh ngaihtuah pha lék lova kan hlimlai nite chuan hmánlai changin, duhthusàm mai lo chu inhnemna tur a awm tawh lo. Kan thenrual hlui ka tate avângin kan hmána sûlhnu hmuh hmaih rual lohte chu mittui titlatu mai an chang zo ta a nih hi!

Iang zo awm ang maw, tleitîr vânglaini,

An ngai ve ngei ang haiang tar hun chuan;

Nauang nui zâa kan hlimlai nite,

An ngai ve ngei ang rûn thim ruai hnuaiah.

Kan naupan lai hun kalsana nulät tlangvàl kan han hriat meuh chuan kan taksa, rilru ngaihtuahna chuan thil dangah min hruai a, engmah lungkham lék lova thiante nena kan nuihho dar dar lai te, kan ngaihzâwng leh duhtakte nena hlim taka kan inchhaih vel laite kha nghilh rual a ni lo. Kan damchhûng nunah kan tleirâwl chhuah lai nun tluka nuam leh thawveng hi awm tak ang maw? Tunge mahni vânglai nghilh phal tehlul ang ni?!

Tûna pitar putarte pawh hian an vânglai hun an chhuikìr neuh neuh thîn ngei ang. Chhûngkuaa kan inkhurbin hnuah pawh vânglai ngaihna rau chuan min la kiansan tak tak thei lo va, mahni tapchhak zâwl atangin kan hlimtualte chu mitthlâin kan hmukìr rauh rauh tawh mai thîn a ni.

Fam ta lo chu e, tawn leh ni herin,

Ânnêm biahthu hlànin, 'i dam thîn maw?

Nang ngaia kumsùl hmangral chhûng khan e,

A lêng vawng vawng,' tiin chàwnbân vuan e.

Hringnun rahbi chhiara pialrâl rûn sáng la kai ta lo chu lenrual hluite nena intawn leh ni a lo herchhuak leh nawlh thîn. Chutih hunah chuan hlim taka inkuah leh inpawm chungin, hun kal tate avângin thinlung hmunkhat puin suangtuahna ruam khatah kan lêng zâ thîn a nih hi. Hun rei tak inhmuh tawh loh hnua thian hluite nena intawn leh hian kan nunhluite chu kan hrechhuak uar uar lo thei lo va, thil sual kan lo tihho tawhte takngial pawhin lunghlui a tilêng vawng vawng thîn.

Chu'ng hunah chuan hnukulh teuhvin vânglai sawiin kan titi siam siam a, inhmuh loh kâra kan lo khawsak dânte sawiin, kan hma hun kal zêl turah duhsakna kan inhlàn tawn mawlh mawlh mai thîn a ni.

Share this

TS Khupchong