Lalpui, kan la phal lo che asin!

March ni 25, 2013 zan dar 8 a ni a. Thiante ina ka leng chu ka haw a, Sikulpuikawna kea ka kal hnak hnak lai chuan phone call ka dawng a. Sialhawk khaw mi ka thianpa hi a lo ni a. Kan college zirlai chu Durtlang Hospital-ah thisen cancer-a a awm thu leh, a awmna ward te, a ngaihtuahawm thu te min hrilh a. Lawmthu ka sawi hnu chuan kan inbiakna kan titawp ta a.

Tichuan, kan college Students' Union-a ka thawhpuite chu chanchin ka hrilh nghal vat a. Aizawl-a awm, a thei thei chu kan inkokhawm a. Thawhtanni zan a nih avangin thalai inkhawm zan a lo ni a, a then an lo inkhawm hlawm a. Tichuan, a hman remchang mi 5 chu zan dar 9 khan Durtlang Hospital panin kan inphur chhuak ta vuk vuk a.

Hospital kan thlen hnu chuan a chhunga luh an lo phal tawh chiah lo va. Mahse, kan zirlai a nih thu te, hun rei lo te chauh min hmuhtir tura kan ngen hnuah min luhtir ta a. Female Surgical Ward-a kan han lut chu kan zirlai Lalsiamthari, 4th Semester BA (History) zirlai chu damdawiin khum pakhatah a lo mu a. Engmah hre tawh lo tih hriat takin harsa tih hmel takin a lo thaw kawk kawk a. A thawk zawng chuan a taksa a insêp kang dawrh dawrh a.

Chu a mutna khum ngei chu kum hnih kaltaa ka nau hrawk an zai tuma a mutna khum ngei kha a ni a. He khumah chiah hian nikum krismas dawn khan kan college zirlai pakhat nu chu damlovin a awm a, kan kal remchan em avangin ka lo kan tawh bawk a.  Ka ngaihtuahna a ti thar hle.

A bulah chuan a pa leh midang pathum hian an lo kil taih a. A pa nen chuan kan inchibai a, patling a ni na vang vang a, beisei a nei tlem tawh hle tih a hmel atangin a lang reng mai a. Amah Siamthari, Puii tia kan koh thin chu a hmel ka han en a. Oxygen an pek avangin a hmel chu a hliah vek a, a kutah chuan thisen pekna hrui a invit lut chuat bawk a. Thisen unit hnih an lo pe hlim hlawl a lo ni a.

A chhunga awm rei chi a nih loh avangin ward pawnah kan chhuak a. Pawnah chuan Puii nu leh midang an lo awm teuh va. Puii nu chuan min chibai pahin min tahkhum a. Lungchhe takin a ni min tahkhum ni. Midang pawh chu an lo inhru sap sap a. Hnuk a ulh a, tawng a harsa a, hnem thei bik ka ni lo. Mihring tih theih a awm tawh lo tih an hria, Pathian thil tih theihna mak bak an beisei tawh lo tih a hriat a.

A fanu a hmangaih em em, a chhawr theih tan dawn chauh tihah a that vanglai takin natna khirh tak tuarin nikhawhrelovin a awm mek si a. A fanu, a hmangaih em em chu a tân beiseiawmin a awm tawh si lo va. A kal hma taksa chu thlâkhlelhawm hle mah se en harsa a ni tawh mai si.

Awm rei phal a nih loh avangin kan chhuak vat a. Damdawiin tualah kan thu a. A nat dan an sawi te kan ngaithla a. Khua chu a vawt nuam tâwk hle a, a boruak erawh eng emaw hian a uap thung a. Damdawiin kawtah chuan thil thleng mai thei a awm tih hria ni awm takin mi an zi nuk nuk hlawm a.

Zan dar 10 vel thleng kan awm hnuah chanchin inhrilh zel tura inthlahin kan haw ta a. Ka thianpa pakhat nen kan Students’ Union office-ah chanchin ngaichângin kan awm ta reng a. College chanchinbu tur te kan khawih vel mek a. Zing lam dar 1:30 a nih chuan phone call ka dawng a, Puii chahthlâk thu chu. Kum 20 mi lek niin Puii kan chân ta a nih chu!

A hma lawka ka hmuh kha ka mitthlaah a rawn lang leh a, ka lung a chhe hle mai a. College-a ka thawhpuite ka hrilh kual zung zung a. An lo mut tawh hlawm avangin ka thianpa nen chuan engtia tih tur nge ni ang tiin kan inkhâp nasa a. Lirthei kan neih loh avang leh taxi hman tur pawh a awm tawh loh avangin a ngaihna kan hre lo hle a. MSU lama kan pu Mama chu ka han phone a, a awmna veng lamah an rawn phurhthlâk dawn avangin damdawiin tlàn chhoh kher a ngaih loh thu te, a tûk lamah an khaw lama zui a tum thu leh kal ve kan duh chuan lo mu-a lo insiam turin min hrilh a.

Chhiat tâwk chhûngte nen kan inbe reng a, kan zirlai duhawm tak a nih avangin zui ngei kan tum a. Zing dar 5-ah a ruang chu an khaw lama chhuahpui an tum thu ka hre ta a. A phone theih ang ang chu kan han be kual a. Tichuan, kan office-ah chuan riah mai tumin ka mu ta a.

Ka mu tan chiah tihah chuan ring tak maiin têk a rawn tla a, ruah a rawn sur zui nghal a. Hmána ka naupan laia ka nuin mi fel thih ni-ah chuan ruah a sur thin a tih kha ka hre chhuak zawk a. Muthilh ngial ka tum pawhin ka muhil thei ta lo va. Thiante phone call ka dawng reng bawk nen ka tlaivar ta ringawt a.

Zing dar 5 velah chuan a chhûngte chuan min rawn be leh a, kan kal dawn leh kal dawn loh thu te, Puii thiante zingah kal duh an awm chuan an kal theih tur thu te min rawn hrilh a. Mahse, a thiante contact-na tur pawh kan hre si lo va, tu tu nge a thiante tih takngial pawh kan hre thei si lo. Keini chu a hrana kal kan tum thu kan sawi hnu chuan an chhuak ta a.

Kan miss, Miss Nutei nen kan inbia a. Dar 10-ah Principal room-ah SU hruaitute nen meeting neih a nih tur thu min hrilh a. Thiante ka han hrilh kual leh a. Kei erawh chu ka haw a, chaw tlém ka bar a. Ka insiam hnuin ruang zui thei turin ka chhuak ta a. Thiante chu ruang zui dan tur chungchang rêl turin Principal hovin an meeting a. Kei leh kan GS Chhuantea erawh chu MSU GS motor-ah chuangin kan tlân ta vang vang a.

Kan thiante meeting chu Principal-in motor hire-na tur pawisa thahnem tak a lo pe a, college staff hovin a râlna tur sum thahnem tak an lo khawn khawm bawk a. Tin, college-a a thiante chu exam lai an nih avangin an kal ve thei ta si lo, an thiannu taksa hnuhnung chu pangpar-in an rawn thlah ta bawk a. SU leaders pathum leh kan Miss te chu bolero hire-in an rawn tlân ta a. Serchhip-ah kan hruaitu pakhat an rawn lam chho nghal bawk a.

Kan chhuah tlai avangin khaw thim hnuah kan thleng a, rilru leh taksa chu a chau hle mai a. Puii ruang hmu tura kan han kal chuan a chhûngte chuan min lo tah khum nasa mai a, lung a chhe thlawt a ni. Puii chu ngainatawmna nei reng reng lo kuang chhungah an lo zalh a. A ngawi reng a. Tui takin a muhil chiah chiah mai a; a hma lawka a na tuar hmel kha ka mitthlaah a awm reng a.

Zanah kan tlaivar a. A kalte aiawhin thu tawi tê ka sawi a. Hnuk a ulh teuh va, a hrehawm em em mai a. Tlaivarin Puii chhungte an tap a. A pa pawh aw râwl chhuah meuhvin a tap hawm hawm a, Puii an au va, Puii erawh a ngawi reng a.

A khât tawkin Puii ka han en thin a. A taksa an khuhna puan te chu a lum tâwk lo va, a thlahna pangparte pawh a mawi zo tawh lo. Amah ngaia an auhna tap râwl a ring zo tawh lo va, eng tah hla mah hi a ko eih turin a lungrun thei ta lo a ni.

‘Bawihte, i thiante an hrilhhai lutuk asin..’ tia a nu tap ri te, ‘Bawihte, i damna turin theihtawp chhuah ka inhuam asin. I mak em mai’ tia a pa tap rawih rawih te, ‘Pui, mahniin i mut ngai loh kha... Lalpui, i exam theih loh tur thu han sawi leh ta che...’ tia a unaute beidawng au râwl chuan min fan a, insûm theih rual a ni lo. An kuang an chhin dawna ‘Puii hi amahin a mu thei lo, amahin a mu ngam lo, amahin a mu ngai lo’ tia an tahna te chuan mittui a tiluang a, a unau tlangvalte pawh pachang thei lovin an tap rawih rawih a - Puii’n min kalsan ta atin ni.

Miss Nutei’n thu a sawi a, râlna a hlân a. Thlalakpuina te kan neih hnuah Puii chu chatuan atana kan ban phâk tawh loh turin an phur chhuak ta a. Kuangah an chhin hnan a, thlanah an zalh ta. Puii a awm ta lo.

Puii boral hun hi an exam lai a ni a. Semester system a nih tawh avangin mi tam tak chu 75% class kal tling lovin exam thei lovin attendance-ah an tla a. Chutiang a nih lai pawhin mi hrisel lo tak Puii attendance chuan 80% a pêl val val a. Zirna leh class ngai pawimawh mi a ni tih a hriat hle. College-ah pawh ze zawi, mi tawngtam lo a ni a, mi inthlahrung mi a nih avangin thian pawh a kawm tam lo hle.

Amah hi a hrisel lo hle a. Hrisel lo tak leh taksa bawrhsawm chung pawhin class a kal hram hram thin. Kar khatah vawi khat tal a nu be lo chuan a awm thei lo va, an khuaa a haw chang pawhin a nau tam takte mutna lânin a nu leh pate bulah a mu thin. A hrisel loh avangin a u leh naute pawhin an hrethiam em em a, a lo haw châng chuan a nu leh pate bul mutna an kian thin a ni.

Chutiang khawp chuan a bawrhsawm a. Mahse, class kal thulh khawpin a awm ngai lo. Chutiang a nih laiin March ni 12 atanga insawisel tanin a hnungzang leh a kâ te a rawn na chhuak a, a nâk nâin thâwk a tihharsat tâk avangin March ni 19 khan New Life Hospital-ah a inentir a. A thisen result a that loh avangin hemi ni vek hian Durtlang Hospital-ah an lut chho va. A tûk March ni 20-ah thisen cancer a ni tih hriat a ni a.

Chhûng leh khat an inhrilh kual a, an khua atangin a nu leh pa leh a chhungte pawh an rawn chhuk ta bawk a. Tichuan, March ni 24 atangin a rawn zual ta a. Thisen an pe a, zung tur pawhin puak a ngai ta hial a. Ani erawh chuan an exam hun lai a nih avangin a exam thei lo mawlh chu a la lungkham fan a.

A tuk March ni 25 a lo ni a, biak theih a ni ta lo. Nilengin mu leh mal nei lovin a awm a, a tlai telh telh a, a zual deuh deuh va. Chutianga a awm hnuin zan dar 1:30-ah a thlarau chuan a taksa a chhuahsan ta a ni. GAC chuan Puii kan chân ta...

Damdawiinah ni 3 vel lek a awm hman a, a chhûngte leh thiante mangang leh thlabar pawha an awm hmain a kal ta thut si a. Tuar thiam a har an ti ngawih ngawih a. Chhungkaw inkawmngeih tak an nih avangin an kim thei lo. An chhungkuaah Puii hmun ruak a zau va, Govt. Aizawl College-a Puii seat ruak hi tuman an luah khat zo ngai lo vang.

Lalpui, kan la phal lo che asin.

31.3.2013

Ziak leh chhiar leh Kei

Naupan tët të atanga ka pu (ka nu pa), pastor hnena awma enkawl seilen ka ni a, a fate hi zirtirtu deuh vek an nih avangin zirna an ngai pawimawh chhungkua khawp mai. Lehkhabu pawh an ngah narawh e. Chumi vang ni hmiang, naupang të ka nih atangin lehkhabu chhiar ka chîng chho tan ta a. A chhiar a tam na na na chuan a ziah pawh a lo awm ve zel a. Kum 2002 chho bawr vel atang khan thu ka ziak tan a. Presbyterian Kohhran tihchhuah Kristian Naupang-ah ka ziak thin! Chu'ng lai chuan khua/veng chhung chanchinbu velah ka ziak nasa a. Kum 2005 atangin Vanglaini, Thingtlang Thawm tih column an siam tirh kha ka ziak ve ngei nguai thin a. Chuta tang chuan daily newspaper-ah ka thai tial ve ta zeuh zeuh a. Ka article chhuahna newspaper ka dahtha vei thlap thlap a ni a, engtik lai khan nge ka tihbo tak ka hre lo. Daily newspaper-a ka article ziah zawng zawng deuhthaw chu ka chân ta vek mai a ni. Ka ui khawp mai.

Kum 2007 atang khan magazine lamah ka insuan a. Magazine-a ka thuziak an chhuah hmasak ber chu, Comedy Fiamthu Magazine-in 'Mi ropui Samdala' tih ka ziak an chhuah kha a ni awm e. Chumi hnu chuan Sabereka Khuangkaih hian ka thuziak chhete te hi min chhuahsak thin bawk a, ka ngai ropuiin ka hlut thei khawp mai. Ka ziak hnem telh telh a, ka duh aiin magazine eng eng emawah hian a chhuak nasa ta mah mah emaw tih mai tur a ni a. Han laktlak em em phei chu a awm chuang law. Ka article ziah tawh zawng zawng hi poetry leh short story tiam lovin 100 chuang zen zawn chu a ni tawh awm e. Poetry erawh chu 10 vel bak ka la phuah awm lo ve.

A peiha peih ta hrim hrim chuan essay inziahsiak velah pawh ka ti zeuh zeuh va. Kum 2011-a MSU-in Inter-College Essay Writing Competition a buatsaiha 'Sunhlu - Hriselna atan a thatna leh a tangkaina' tih thupui inziahsiakah lawmman pathumna ka dawng ve hlauh mai a. Ka ngaihlu thlawt mai. College level-ah poetry leh essay inziahsiakah lawmman a dawng nual tawh bawk a, Mizoram pum huapah erawh chuan ka ziak tam lo hle. Pawl 12 kan zir laia Lengzem Chanchinbu-in pawl 12 zirlaite tana essay inziahsiak a buatsaiha Top 10 ka lan ve tawkna kha, essay inziahsiaka ka telna hmasa ber a ni awm e. MSU buatsaih nen hian Mizoram pum huap inziahsiaka ka telna chu a ni mai awm e.

Kum 2009 khan kum khat chhûng lehkhapuan leh pen nena ka lo ziah ve tau tau, ka lehkhabu (novel) hmasa ber 'Hmangaihna Tuboh' chu thianthate zarah ka chhuah ve ta hlawl a. College ka luh tirh niin kan college Principal-in college-ah min tlangzarhsak a, a ropui ka ti leh pek asin aw...! Vanneihthlak takin min duhsaktute zarah nikum, kum 2012 khan kan chhu nawn ve leh mial a. Synod Bookroom-ah te, State Library-ah te dahin ka hnemhnanpui ve khawp mai. Kum 2012-ah tho ka fiamthu lehkhabu 'Nun Tihlimtu' kan tichhuak bawk a. Novel leh fiamthu bu a hlut dan a indan hleih deuh. Kum 2011 khan thianthate nena kan lehkhabu inziahtawm, kan article dahkhawmna bu 'Mi Anglo Sulhnu' kan tlangzarh ta bawk a. Hetah hian ka thuziak pahnih ka dah tel nghe nghe a.

Kum 2008 atangin magazine ka enkawl tan a. Ka magazine enkawl hmasak ber chu, ka article chhuah hmasa bertu magazine, Comedy Fiamthu Magazine chu a ni. Ka zirnain a tuar phah a ni ang chu, hemi kum hian 1st yr BA ka'n fail nghal pang a. Chutih rualin chanchinbu lamah ka insawrbing thei ta hlauh zawk a. Kum 2009 chho vel atangin Lungdi Magazine, Zunleng Magazine te nen kan han ti chho va. Chu'ng zawng zawng ka bansan hnuah kum 2011 atangin Mapuia te nen Fiamthu Huang Magazine kan ti ve leh a, hei phei chu a hit chho hman viau a. Mahse, kum khat kan kal hnuah college ka chhunzawm leh tak avangin ka bansan leh ta a. Tun thleng hian thianthate'n min la duhsak zel a, mahse, ka la tang thei hram hram a ni! Ka nun nen a inzawm tlat si a. Kan la ti leh ang chu.

Chhiar lampang pawh hi ka taimak zawng tak a ni! Kum 2002 chho atangin lehkha chhiar hi tih tak takin ka uar chho va. Kan khaw YMA Library-ah member niin kartin lehkhabu pahnih zelin ka hawh thin a. Librarian fel tak chuan lehkhabu chhiar ka tuizia hriain mi duhsak a, pahnih baka hawh theih loh kha pathum pali te'n mi hawhtir thin. Chu'ng hun lai chuan ka lehkhabu chhiar list leh chhiar zawh ni, a ziaktu tih vel hi ka chhinchhiah thlap thlap thin a, kum 2002-04 chhovah phei chuan kum khatah lehkhabu 100 chuang ka chhiar chhuak hman hial a! Chhiar tur ka neih hi chuan nuam hi ka van ti thei tak!

GK bu te, Year Book ang chi te hi ka hawh a, ka lakai chhuak vek thin. Lalhmachhuana Zofa 'Mizoram General Knowledge' (first edition) pawh kha ka'n awt mai mai khawp a! A leina tur nei hek lo, ka thianpain sports-naah a dawng hlauh va, ka hawhsak a, a bu pumin pen leh lehkhapuan nen ka lakai chhuak vek a, tun thlengin ka la kawl a. A lehkhabu pawh a bu pangngaiin ka kawl ve ta bawk! Year Book chhah tak tak ka lakai thinte kha tun hnua ka ngaihtuah lêt leh hian taima ka inti ngawih ngawih. Year Book mai bakah GK bu dang dang te, thu bengvarthlak tawh phawt chu ka lakai vek thin. Kha'ng hun lai na na na kha chuan keimah hrim hrim pawh GK-ah ka sang ka ti ve sak ngam! A ziaha ziah tam na na na chuan thluak hian a lo chhinchhiah ve a ni ber.

Chu'ng lai chuan thingtlang kilkhawra awm tih takah, current te hi kan nei chau thei em em a, kan nei ngai lo a ni ber zawk ang chu. Chhunah sikul kan kal a, sikul kal loh ni-ah kan feh a. Chumi a nih avang chuan lehkhabu chhiarna hun hi zingkarah leh zanah bak ka nei ngai lo. A then chu ka lakkai duh thin avangin, zanah ka lakai mai thin a. Êng kan nei tha lo va, bati leina kan nei hek lo va, mei ênga lehkhabua mi ka thu lakai lai chu ka pa thiante lo lêng chuan min lainat ve a ni chék ang, an hmehdêt (torchlight)-in min lo ensak thin. Theihnghilh a har dawn mang e. Chu'ng ka thil lakkai te chu ka la dahtha khiau va, tun hnuah hian ka hmang tangkai chho ta khawp mai. Lehkhabu tam tak hen a ni si a.

Aizawl-a ka awm tâk hnuin lehkhabu lei hi ka uar ve ta chauh va. Ka lei tan tak tak chu kum 2010 vel emaw atangin a ni chauh awm e. Lehkhabu dahna tha neih loh chuan a bo duh khawp mai a, tun thleng hian lehkhabu 150 vel chu ka lei tawh a, midang nena intehkhin phei chuan zahthlak khawpin a tlem. Mahse, a hranpaa thawhchhuah neih lem loh chuan lei tam hi a lo harsa khawp mai; a bo zel bawk nen. Tum khat phei chu Mizo history pahnih (a hming ziak lo mai ila) cheng 150 man leh 250 man ka lei rual thawt avangin hun eng emaw chen chu chawhmeh leina tur ka nei lo hial a ni!

Chutiang khawp chuan bei mah ila, lehkha ziak leh chhiar ka thatchhe tial tial ta mai a. Internet & facebook ka khawih tam telh telh a, ka chhiar leh ka ziak a tlem tial tial a. A chhan chu, a hmaa lehkhabua kan chhiar thin kha internet-ah hmuh tur a lo awm zel tak vang a ni deuh ber awm e. Chuti chung chuan lehkhabu lei erawh ka uar telh telh thung a. Lehkhabu lei ka uar chhoh tak zel avang leh, a chhiar lam ka thatchhiat tak em avangin ka lehkhabu la chhiar loh pawh ka nei nual tawh a ni. Computer te kan nei reng remchang lo va, thuziak han dahthatna mai tur a vâng hle mai a. Chutih lai chuan internet lamah blog hmangin awlsam takin a dahthat theih a, blog-ah ka thuziak tam zawk mah chu ka dahtha tawh awm e.

Blog hmang chuan thiante, blog hmang ve thote nen kan inkawm a, kan inkawp a, thuziak kan inchhiarsakin kan infuihphur tawn a, hei hi thuziak lamah phurna nasa tak min pe thin a, ka kut a la tiche tawk tawk a ni ber. Khawl han hman than tawh chuan kuta thil ziak thatchhiat a lo awl em em mai hi a lo ni a, kuta ziak ka peih ta meuh lo. Thuziak pawh ka chawl ta hle mai a, khawl neih leh hunah chuan a tih hleih theih deuh a beiseiawm e. Lehkhabu ziah hi ropui ka ti em a, hriselna tha tak ka neih chhoh zel chuan ka la tum khawp mai. A chhiar lam pawh a hma ang em ni thei dawn kher tawh lo mah ila, tan lak chhoh ka tum khawp mai a. Lehkha chhiar lova muthilh theih loh hi ka tum em em tawh mai a ni!

Ka tlangval hunah chuan...

Ka pianchamphaphak a lo thleng ve leh ta mawlh mawlh mai. Upa nih hi a lo va han har dawn lo tak em! Mahse, rilru erawh chuan puitlin lam a pan thei lo va, puitlin lam a pan thei love kan tih laiin, naupan lai rilru pu leh tawh chiah si lovin kan fîm ve leh kur tho si. Mihring nuna engkim laklawh hun lai vel ni tain ka hria -  ka tun hun hman hi.

Ti ve khanglang ila, ka naupan deuh lai te, ka tleirawl chhuah tirh laite chuan 'ka tlangval hunah chuan aw...' tiin duhthu ka sam nasa mai thin — "Ka tlangval hunah chuan zanah te nula ka rim ve ang a, chhas te ka nei ve ang a... Thawnthu bu tam taka nula leh tlangval inhmangaihte nun chu kan nun a ni ve tawh ang a... Chhungkaw tan ei bel ka ni ang a, chhungkuaah ro ka rel ve thei tawh ang a. Kan khawtlangah, kan vengah leh khawi hmunah pawh midangte tana ei tlak tura chhum hmin ka ni tawh ang," tiin.

Kum hian zir hle mah se tlangval nih hi ka la inpawm thei chuang lo va, kum 10 chuang kal tawha 'ka tlangval hunah chuan...' titu khan tun thlengin ka la ti fan a ni. Mi'n tlangval hmuha min hmuh hnu thleng pawh hian nula rim ngai lohna khawvelah ka chêng a, hmangaihna tem ve ting siin nun tinuamtu a nihna lai ka va tem pha ve tawh si lo. Chhungkaw ei bel nih chu khawi lam, fairel bel rawk datu mai ka la ni reng a, hmán aiin chãwm ka hautak telh telh zawk a. Thenawm khawvengte tân hnawksak ka ni. Mi thinrim inhrikthlakna leh mi titi siamtu mai ka ni a, ei tlâk ni lovin sawi sep sep nuam tawk lekin ka khawsa thin si.

Tlangval tura hlen chhuah ngai leh kalkawng zawh ngai ka zawh peih loh vang a ni ber ang a, naupan lai rilru kha a hahdam bera hriain kalsan harsa ka ti hle reng mai a. Ka kum chauh thang hian min tibuai tawk ta em em mai a nih hi.

'Ka tlangval hunah chuan...' tih hi ka bansan thei hauh lo va, ka tlangval hun tur chu nakin lawka rawn inher chhuak mai tur ni-ah ka ngai tlat a, nakin ka thlir zel a; kei hi nakin hunah ka chêng tawh a, nakin mihring ka lo ni reng tawh a ni tih ka hre der si lo. Chutih chhung chuan ka pian kuma piangte'n min tlangvalsan a, raltiang min kaisan a, puitling min nihsan a, ka tlangval huna ka nihna tura ka duhthusam zawng zawngte min lo nih khalh a, engmah min hnutchhiah tawh lo ni-ah ka la ngai tak deuh deuh a!

Hmánah kha chuan mi thil ka tihsak chang te, mi'n min tirhnaa ka kal chang te, thil tha ni-a ka hriat ka tih ve chang te hian 'tlangval' nih ka hlawh thin a, 'I van tlangval tak em!' min tih chang te hian ka lawm em em thin; ka thinlung chhungrilah ka hlim veng veng thin a, chu ka tlangvalna chuan tlangval nih min châktir thin. Mahse, khang hun lai chauh kha tlangval lai chanchin sawi tur ka neih chu a ni mai si a.

Ka that lai hun chhung zawngin mahni nihna inhre lék lovin ka muhil ang a, ka tar hunah 'ka tlangval lai kha aw...' tih ve ka duh ting si ang a, a eng lai kha nge ka tlangval lai chu ka hre leh der si lo vang a, tlangval ka châk hun lai bak ngaih tur ka nei leh chuang dawn hauh si lo. Tlangval nun hnuhma hnutchhiah tur ka neih loh chuan ka tar hun ka hrem a lo ni dawn reng mai. Chutiang hun a thlen loh nan engtikah nge ka tlangval ve ang aw... Ka tlangval hunah chuan ka hrethiam ngei ang le!

Hneh theih loh nun neitu Zodinpuii a fam ta!

Govt. Hrangbana College-a 2nd Semester zirlai, Zodinpuii chuan a natna khirh tak mai, cancer chu hun rei taka a beih lêt hnuin March ni 1, 2013 khan a kalpui ta. A thih hian kum 18 mi chauh a ni. Zodinpuii chanchin hi ka han hre chiang a, a nundan, a huaisenna leh a tumruhnain mi hneh em em a, ka nêpzia leh engmah ka nih lohzia a lang chiang kher mai.

Amah hi Durtlang mel 5-a awm a ni a, a pa'n a boralsan tawh a. Kum 2009 khan HSLC chu 1st Division-ah a pass a, Govt. Mizo Higher Secondary School-ah class 11 leh 12 chu chhunzawmin Science a la a. HSSLC a exam hma lawk atangin he a natna hian a tibuai tan tawh a. Chu a natna avang chuan an sikul lamah pawh an zirtirtute'n an hrethiam a, sikul kal mang lovin in lamah inenkawl chungin theihtawp chhuahin a bei tang tang a.

Chemotherapy khai chungin a exam lui hram hram a, chuti chung chuan class pawh kal ve mang lovin HSSLC (Science) chu 2nd Division-ah a pass thei hial a. Natna khirh tak tawk chunga HSSLC 2nd Division-a a pass thei chu, a chanchin hria apiang mak tih a hlawh a, tualchhung lam TV Channel pawhin lo hriain chutiang mi huaisen leh mi tumruh chanchin chu Zoram pum hriata tarchhuah an duh a. Interview an tum pawhin, "Ka ti tha lo em mai, a zahthlak," tia mahni inngaitlawm takin a lo hnial ta zawk a ni.

HSSLC a exam lai hian a natna nen nasa takin an inbei a. Exam leh chemo khai hun a inrual chang chuan a exam hmasa phawt a, chumi hnuah chemo chu a khai mai thin. Chuti khawp chuan a bei nasa a. Chemo pawh cycle 16 zet a khai a, vawi 30 teh meuh mai a inhem hman bawk. Chuti chung chuan 2nd Division-ah Science subject a la pass thei a ni! Mi pangngai tan chuan mak tih loh rual a ni lo.

Tichuan, nikum kum 2012 khan BA (Arts) chhunzawm turin Govt. Hrangbana College-ah a inziak lut ta a. Science atanga Arts-a a inlehna chhan hi cancer natna tuar chunga science practical neih a harsat vang a ni. Chutianga bei tang tangin 1st Semester chu a exam thei hram a. Paper hnih exam tur a la nei tihah a natna a zual tak zel avangin a chhunzawm thei ta lo va, Cancer Hospital, Zemabawk-ah October ni 30, 2012 khan a lut a. February ni 22, 2013 atangin a natna chuan zual lam panin March ni 1-ah chatuan ram min lo pansan ta a ni.

Amah hi mi hlim thei tak a ni a. A damloh lai pawhin a nu hnenah, "Ka nu, min ngaihtuah suh u. Ka kalna turah in lo kal ve lo vang tih ka hlau zawk a ni..." tiin a nu a thlamuan thin. Thisen var a mamawh an ngaihtuahsak lai pawhin, "Kal mai ka duh tawh, ka thla a muang a ni," a ti hial a. Nun awhawm tak, mi tam takin an neih phak loh a nei a, a thla a muang em em a ni.

Hetianga cancer nena inbuan reng chunga HSSLC Science 2nd Division-a pass thei khawpa mi tumruh leh tuarchhel, zirna ngai pawimawh em em mai, a zir chhunzawm duh avanga a natna vanga a duh pawh zir chhunzawm thei lova Science atanga Arts-a a inlet hial mai te hi a chhuanawmin a ropui a, a entawntlak ngawih ngawih a ni. Natna khirhkhan tak nen a zirna tawp lam chu a hmangral a, huaisen tak a beih hnuah natna reng reng awm tawh lohna hmunah min lo kalsan ta a ni.

Chalfilh By-Election thlîrlêtna

Kumina thil thlenga mipui ngaihven la hlawh deuh ber, Chalfilh Constituency By-Election chu a zo fel ta a, INC Candidate Dr. Ngurdingliana chu hneh tak maia thlan tlin a ni tih kan hre theuh tawh awm e. Amah a la thalai a, mithiam a ni bawk a, a hmachhawp lian ber tur a sawi hmasak berah pawh bial chhung hnufual em emna - Education leh Health hi a ngaih pawimawh hmasa tur thu a sawi nghal a, a lawmawm khawp mai. Chumi a nih avang chuan amahah bial chhung mipuite'n beiseina sang tak an neih a rinawm. Tun thla 8 chhung hi a tan fiahna a ni dawn a, MLA dang zawng ai chuan rilru leh taksa a hah viau ngei ang le. Inthlan hma khan bial chhung khaw hrang hrangte harsatna hriaa zir chiang turin a bial chhung khaw hrang hranga zan 2/1 riah vek a tum thu a sawi a, tlin tak maw!

Ruling Party pawh ni se, eng vanga hetiang em ema chak chiang nge a nih, tih hi zawhna lian leh pawimawh tak a ni. Sawi hmasak ber tur chu - NLUP hi a ni. Chalfilh bial chhungah hian khaw eng emaw zatah NLUP sem mumal a la ni lo va, chhungkaw tam tak chuan 1st Phase pawh an la dawng lo a ni. Tam tak chu dawng tura thlan an ni a, inthlan dawn khan tam tak chu bank account an hawnsak chuk chuk nghe nghe a. A hriate'n an sawi danin, Congress vote lo chu NLUP dawng lo tur leh list atanga paih turin an vau thin a ni awm e. Chuvangin, kum khata cheng 20000/30000 pawh la lut mang lote tan chuan NLUP chân dawn ai chuan, NLUP dawng tura Congress candidate vote mai kha thil harsa tak a ni lem lo. Chuvangin, MNF Candidate-in, "Dr. Ngurdingliana ka khing lo va, NLUP ka khing," a ti hi thil âwm tak a ni.

Tin, inthlan hmaa Dr. Ngurdingliana kan kawmnaah, "Chalfilh Bial mipuite khian min ngaizawng a, kei paw'n ka ngaizawng," a tih hi thil diktak a ni! Dr. Ngurdingliana hian eng emaw zûn a nei nia! Nu leh pate, kum upa lam hlei hlei hian an duh emaw tih tur a ni a, hei hi mi biangbiak a thiamna te, a thil phal leh mi rethei berte pawh angkhat veka a kawm theih vang a ni ngei ang. A inah leh a bulah thingtlang nu leh pate an tlangnel em em vek mai hi a tlin theihna chhan pawimawh tak a ni a, a nupui hi politician nupui tur diktak niin ka hmu bawk. MP ni tura CM Lal Thanhawla hual lai nia sawi a ni a, chuti chung chuan bial a hmangaih avangin, "Chalfilh bialah min dintir la, ka tling a nih chuan kum tawpah ka ding leh ang a, a bak chu ka chuh tawh lo vang," tia a dil thu a sawi bawk. Congress candidate ni lovin MNF candidate ni ta se, vote a hmu chhe em em chuangin a rinawm loh.

Mizo mipui tam zawk chuan Kidnap lemchan vang te, kan nitin mamawh - tui, êng, gas leh thil dang te a chhiat em avang te'n Congress hi tlahniam hle turah an ngai a, mahse, heng thil kan sawite hian khi bial chhung khi a nghawng ve mang tlat lo. Kidnap lemchan hian sawi a hlawh hle laiin bial chhungah chuan tu'n an sawi ve mang lo. Khawpuia kan lak thutak ang em emin thingtlang lam chuan an la thutak vak lo a ni mahna. Thingtlang mite tan chuan tehna a tling lo a tih theih ang chu. Tin, kan nitin mamawh - tui, êng leh gas tih vel hian thingtlang hi a nghawng lo lehzual. Sawrkar inthlak avangin a that thut phah lo va, a chhiat thut phah hek lo. Chuvangin heng kan mamawh chi hrang hrang supply tha lo hi thingtlang mite tan chuan dan pangngai, ngaiawhna mai a nih avangin a nghawng teh chiam lo va, eng party tan pawh ni se chhiat phahna tur leh that phahna tur a tling ve tlat lo a ni.

Dr. Ngurdingliana khingpui lian ber chu MNF Candidate Lalvenhima Hmar hi a ni. Inthlan tur thãwm a rik tan atangin Congress lamin boruak a neih hma atangin boruak lian tak a nei tan tawh a, mahse, a zuih chho telh telh a, Congress lam an rawn pawng telh telh thung. Hei hian Congress leh MNF political game inthlauhzia a tilang chiang hlein ka hria. Pu Vena bik hi han sawi kai ta ila. Amah leh a campaigner te hian tih fuh loh lian tak an nei a - chu chu communal feelings tichhuak thei tur zawnga an campaign kha a ni. Kha kha an chhiatpui ber niin a lang. Chalfilh bial chhungah khian a mala lak chuan Hmar mipui chu an tam berin a rinawm a, chutih laiin Hmar mipui aiin Lusei leh Paite leh a dangte belhkawm an la tam zawk a ni. Chu chu an hmuh thelh deuh niin a lang. An campaign dan avangin party danga Hmar vote a hui phah em em chuang si lo va, an party chhunga mi ngei ngei Hmar ni lo vote tam tak a kal hran phah thei bawk si a, neutral vote a umbo va, hei hi a chhiatpui ta ber ni-ah a ngaih theih.

Tuna Pu Vena dinhmun hi ka thlir a, hmabak a nei chau hlein ka hria. Inthlan hmasaah khan UDA (ZKP+MPC+ZNP) Candidate a ni a, a tling zo ta lo va. Tunah MNF-ah a lutin a rawn ding chhuak leh a, a hma aiin a tlahniam leh ta a. Hei hi inthlan hmasaa a vote hmuhna pahnih - MPC leh ZNP-in candidate hrang an siam vang niin a lang. Tuna a tlin tak si lohvah chuan kum tawp General Election-ah hian chance a nei tawh lo mai ang em? MPC leh ZNP ticket-in a ding tawh lovang tih chu chiang sa a ni a, MNF hian risk la-in an vawrh chhuak leh ngam kher ang em? An khuaa a vote hmuh dan en chuan bial dangah ding tawh mai zawk se a dingchang thei zawk mai lovang maw, tihte hi zawhna pawimawh tak tak awm theite a ni.

MPC Candidate Pu Lalhmangaiha leh ZNP Candidate Pu C. Lalchhandama te han thlir leh thuak thuak ila. Pu Lalhmangaiha candidate tur a ni tih ka hriat khan mak ka ti a, mak ka tih rualin ka lawm hle bawk. Kum dangah Chalfilh bial khi Party-a mi lian leh mi pawimawh dang an dah duh ngai lohna, tling pawh ni se Minister tur ni lo tih chiang reng te an dah ngai lohna a ni a, thenkhat phei chuan bial dang zawng zawnga party candidate tha tha an dah hnuah a bang nawi kan chang ve tawk thin, an ti nghe nghe! Chutiang a nih laia an Party President meuh a rawn ding chhuak hian mipui tam tak a tilawm a, a vote hmuh tam zawk hi lawmthu sawina vote ni-ah ka ngai. Tin, a pa Brig. Thenphunga Sailo-in mipuite hnena a thuchah leh ngenna khan mipui thinlung a khawih a, mi a hneh a, kha khan awmzia a nei thui hle bawk ang. Candidate hi mipuite ngaihzawn turin awm thiam thei phei sela chu sang taka invawrh tur a ni.

General Election-ah hian MPC hian Zoram pumah vote sing chuang zet hi chu an hmu ve reng thin a, hei hian PC ruh tak tak an la tamzia a tilang a. Chalfilh bial chhungah ngei ngei pawh chutiang chi, PC ruh em em mai eng emaw zat an la awm tih a hriat a; chutih rual chuan, PC ruh kan tih te hi kum upa lam te an nih avangin an tlem hret hret a, an Pary President hian kalphung thar deuh emaw, insiam thar lehna tur tha deuh emaw a ngaihtuah chhuah loh chuan an dingchang har hlein a rinawm a. An Policy, Six Basic Needs tha kan tih em em laia MPC a lian thei hauh lo hian mamawh leh tlakchham an nei tih a tichiang hle a; he by-election hi awmze neiin hmang sela a duhawm hle ang.

ZNP hi khi bial chhungah a chhe ber an ni ngai lo. Mahse, inthlan hmasa zawka Congress an tlin veleha NLUP dawn duh vanga Congress party-a lut hum hum zingah ZNP mi leh sa, chhungkaw tam tak an tel ve a, tun thlengin ngai an la awh chho thei ta lo a ni. An party Candidate hi mi fel tak, kohhran-ah pawh a kul a taia tang thin niin an sawi a, mahse, mipui hîpna em em a nei lo va, kum upa lam tawh a nih avangin thalai a hîp em em lo niin a hriat a ni. An khua Phuaibuang-a vote 100 pawh a hmu tling lo kha Opposition party an nih laia Phuaibuang khawchhuak tho Pu Chawngtinthanga vote hmuh that ngaihtuah chuan - thil mak tak a ni. Hei hian ama mimal bakah ZNP dinhmun thui tak a tarlangah a ngaih theih ang.

Kum 2008 inthlanah khan Phuaibuang khaw chhuak Pu Chawngtinthanga kha thlan tlin a ni a, an khuaah pawh a sang filawr hle. Mahse, mi tam tak sawi danin, an khaw pa an thlang tling kha a khua angin an chhawr vak lo a ni awm a, chutih laia ZNP candidate lo ding chhuak lehah hian beiseina an nei sang vak lo niin a ngaih theih bawk ang. ZNP Policy, thlai thar rate leh a hralhna chungchang hi thingtlang mipui chuan tha an ti em em a, mahse, kum 10 chuang an kal chhung hian sawrkarna an la la thei lo chu a ni a. Congress leh MNF ning intite hian engati nge MPC leh ZNP hi an sawilan ngai miah loh? He party pahnih hian, sawi tawh angin ding chhuak tur chuan mamawh leh tlakchham lian tak an nei tih phat rual a ni lo.

Party lam chu han dahtha tawh ila. Kum 2008 atang khan mumal takin, Mizoram-a inthlanna thianghlim leh senso hautak lo zawk a awm theih nan Mizoram People Forum (MPF) chuan hma a la a, kawng tam takah chuan a hmalakna hi hmuh theihin a lang a, a lawmawm hle. Chutih rualin Party leh Candidate te tan chuan, a thatna leh that lohna tam tak a awm thei ang. An hmalakna avang hian Election Commission of India-ah pawh an mikhual lo hle niin an sawi nghe nghe a. Mahse, engati nge mi tam takin an sawisel si? Chhan eng emaw tak a awm a ni.

Tun By-Election-ah hian MPF chuan  hma a rawn la leh ta a. Party panga te chu inremna thuthlung siampuiin, mipuiin candidate te an hmelhriat theih nan Common Platform tum thum a buatsaih a. He'ngah te hian Candidate zawng zawng sawm an nih loh avangin Chalfilh bial chhung zirlai pawlte chuan an theih ang angin hma an la ve a, Khawruhlian-a MPF Common Platform pawh an boycott nghe nghe a nih kha. He'ng a boycott-tu zingah hian MPF member te pawh an awm ve nawk a, hei hian MPF hrim hrim an dodal lohzia a tilang chiang hle awm e. Zirlai pawl hmalakna hian tun thleng hian rah duhawm a la nei lo va, MPF hian an kalphung an siamrem dawn a nih loh chuan a tul anga hmalak zel an tum thu an sawi nghe nghe a nih kha.

Heta lo lang chiang em ema chu, MPF hi mipuiin kan beisei sang em em a, an hmalakna hi kan duhkhawp ta lo deuh em, tih hi a ni. General Election-a an kalphung an siamrem a nih loh chuan, bial dang zirlai pawlte pawhin chet an tum tur thu min hrilh ve bawk a. Chuvangin, huapzo MPF ni thei sela a duhawm ngawt ang. Hetih lai hian party lam atang pawhin duhkhawp lohna a awm niin a lang. Kohhran dinchhan deuhva kal a ni a (Local Forum-a a puipate hi Kohhran Upa deuh vek), Kohhran pawi sawi an hlauh vang leh, Kohhran mipui vote hmuh tlem an hlauh avangin party-te hian a lang a pauvin an sawisel ngam lo va, an vui ngam lo ni pawhin a lang; Kohhran lenna ramah chuan thil âwm tak a ni.

Tun tumah pawh hian MPF-in a duh loh zinga langsar ber, ruaitheh a lar hle. Chanchinbu lama kan lo hriat dan chuan, Chalfilh bial chhung khaw eng emaw zatah ruaitheh a ni a; mahse, MPF erawh a ngawi hmiah thung. Hei hian an inremna an kengkawh tlang ngam lo tihna emaw, an inremna palzutte lakah action lak theih dan an nei lo tihna emaw a kawk thei ang. Heti a nih laia 'MPF duh loh dana awm an hriat loh thu' an sawi fo erawh thil mak danglam tak a ni! MPF hi vul zel sela, dik famkim bik an ni lo tih erawh pawm ngam sela, insiamthat nan hmang hlauh teh se.

Eng pawh ni se, Chalfilh Constituency MLA thar Dr. Ngurdingliana hi ka lawmpui em em a, bial chhung mi ka nihnaah amahah beiseina sang tak ka nei bawk. Chalfilh bial mipuite mamawh em em, Moral Reformation hi rawn kalpui sela, Economic, Health & Education a siamthat chuan Moral Reformation hi a thleng mai dawn a ni tih hriain theihtawpa hma la turin duhsakna ka hlãn e.