SMS Mangkhâwng

April ni 1, 2009 a ni a. Ka In awm tih tur hre lo kut hlei chuan ka hmeichhe ṭhian hnaivãi zual 20 vêl chu ‘Ka hmangaih lutuk che’ tiin SMS ka thawn chhuak a. A hnu lawkah chhànna a rawn lût indawt zut a, hun ãwl hnawh khah nan chuan a ṭha angreng viau nâ a, an mi chhànna thute ka'n hmuh tâkah chuan ka lungawi leh ta chiah lo va. Ngaihtuahna thar ka nei ta a.

Engati nge hetiang êm êma duh loh ka nih tâk mai le!?

Ahriati te tal kha chuan, “Mãwl lutuk suh, khatiang khan ṭhiante an ti ngai em ni?” ti lovin, ‘I uang peih em mai,’ rawn ti tal sela ka la hrethiam ang. A lâk dân pawh ka la thiam deuh tur a nia. Ṭhian leh ṭhian inchhàn nan chuan a na mah mah.

A nih loh leh, Amy te tal khân, ‘I nula rîmna aṭangin i rawn thawn a ni maw?” ti lovin, ‘Ka va'n lãwm êm êm,’ ti ringawt pawhin min chhâng se, ka rilru a na lo deuh ang a, hmangaihna lama a hmaa ka beidawn ang êma ka beidawnna kha a tiziaawm deuh tur a nia. Tuin nge nula rîmna aṭangin, ‘Ka hmangaih che’ tih thu thawn chhuak ngai rêng rêng ni? Ka thawn tawh malék ang.

Aveni te lai lai khân, “Fiamthu i duh ṭhîn ém mai,” ti ringawt lo deuh khân, ‘Keini angte chu min duh tak tak nâng’ te la ti tal se la, mi pângngai a nih vânga sawi a nih hre kar chungin beiseina ka neih phah ve ang a, ‘Beiseina nei lo chu mitthi a ni,’ tihte mai mai chu ka arbâwm chhe vawm bo lawng lawng mai tur a nia. Beiseina siamtu chu ho tê a nia, a titâwptu lah ho tê bawk. Hringnun kawngzawhnaah hian beiseina hi min tichaktu a ni lutuk asin le.. Aveni lel lawl!

Ka ṭhiannu kawmngeih êm êm Chhanpuii mawlh hian ka hnuk a tiulh zâwk. Khatia ‘Ka hmangaih che’ tih thu ka va thawn khân, “I kai chiang mai!” mi rawn ti mawle. Chu mai pawh duhtâwk lovin a hnuah mi la rawn call zui! Zûk leh hmuam leh ruihtheih thil ka ti lo tih hrechiangtu ber a ni. Dik tak sawi chuan ka làwmna chu ho tê tak tak a ni tih a hre vek a, min tihlàwm hi a hreh ngawih ngawih a nih kha. An inah chaw ka ei tawh nguar ang!

Helen-i te lai lai, an ti mak ve hrim hrim ka ti. “Fiamthu-na hun a nih loh hi…” rawn ti hlur lo khân, ‘I va'n ti làwmawm êm êm’ te tal la rawn ti sela chuan ka lãwm zâwk fé ang. Bialpa a nei tihte chu ka hre ve reng a, ka hria a ni tih pawh a hria a, ka fiamthu a ni tih pawh a hre vek – ‘Fiamthu-na hun a nih loh hi…’ a rawn ti ta rêng a. Mahse, khami phênah khân thil awm a awm – a mi duh loh a tina mah mah. Ka lungawi thei thlâwt lo.

Janet-i pawh kha pâwl sawmpakhat leh pawl sawmpahnih ka nih chhûng zawng khân kan zir ho a, kan inhrechiang thawkhat viau a. Hmêlṭha hle mah se, amah ka ngaizâwng tak tak lo tihte chu a hre ve lutuk. Mahse, khatia, ‘Ka hmangaih che’ tih thu ka thawn zîngah khân a lo hmu hmasa pâwlah a tel a niang, a hmasa ber dawtah mi rawn reply a, “Ṭhian angin kan inkâwm emaw tia, a va mak dâwn ve…” zu rawn ti a! A va beidawnthlâk nang nang ṭhîn êm! Fiamthu man lo leh lutuk mai.

Ka lehkhazirpui, Hruaii kha alawm min tilàwm lo chu. “Naktûk chu i châk lo viau ang!” tiin mi la rawn vau lêt zaw mah mawle! Chhiartute u, hmangaihna chhàn lêt nân chuan  hriam mah mah e ti rawh u! Chuti lo deuhvin, ‘Bialnu i neih reng kha…’ rawn ti zâwk se, nei lêm lo mah ila, invau ai thlâwt chuan a lêt tam takin a nuam zâwk dâwn lo em ni? Tu’n nge chutiang ṭawngkam ṭha pângngai avângin rilru tina duh tehlul ang le? Ṭawngkam tuboh pui puia in-reply reng mai.

Nia, unau angin kan inen a, a rawn sawi; kei paw'n ka hria. Kross-i nen chuan unau ang tak takin kan inen a, bai pawh mi rawn suah ngun lutuk! Chu pawh unau anga insuah a ni; kan hai lo. Mahse, ka awmhlei SMS kha mi dang ang bawkin a lo dawng ve a. Ka fiamthu a ni tih hriaa mi rawn reply duh pawh ka ring lo va, mahse, min reply hmasa ber dawt dawt dawt lehah a rawn ṭang! “Kan in-unau dân chu a va mak deuh ve…” a rawn ti! Chu chauh pawh chu tih tawh nâk alaiin, minute nga hnu vêlah, “Hetiang a nih dâwn chuan inkâwm tawh lo law law ang,” a la rawn ti ta deuh deuh. Êm êm chuan! A rilru a dam thei thlâwt lo. Ka fiamthu duh luatah ngaihdam dîl leh chung a ngaih phah. Hmeichhiate u, eng vângin nge maw hmangaihna hlan chu in huat viau ni?

Lalze-i hi ka nau ṭhiannu a nia, kan inkâwmngeih êm êm tho a, chu vâng ngawt chuan ka fiamthu sâng khân a kal kân bîk lo. Ani mi chhàn dân erawh chu tlémin lem a nuam deuh – “A pawi khawp mai, hmangaih dang ka nei tawh a…” Pawi tak a ni! Hmangaih dang lo la nei lo se la chuan min hmangaih ve mai dâwn niin a lang. Pawi a tih tak tak phei chuan min hnâwl fithla ṭhak lo tihna a ni a; ka lo fiamthu har mah mah a ni aw…! Pawi lo, hei hi chhinchhiah kar chi a ni, a hmangaih nena an boruak fuh lo deuh ṭum hriat tum tur a ni; chumi atan chuan ka nau mawlh mai hi a pawimawh a, kawmngeih a ngai. Lalze, beiseina min pêk avângin ka lãwm e.

Ka ṭhian ṭha Mapuii tak hi a nia, pâwl kua kan nih aṭangin kan lo inkâwm ve tawh a, ṭawngkam mawihnâi deuh emawa inchhàn ve mai âwm, khati khawp khân kan lo inkâwm nasa ve a nia, ‘Inṭhian ṭhatna hian hmangaihna a hring’ tih chu, “Min va hmusit ve a…” tia reply-na khân a phet thla ta dêr mai. Ti êm êma duh loh tihnat mai hi a nâ!

Mary kha, ka nau hming nena a inan avânga khatianga ti pawh ka ni lo; kan inkâwmngeih a, hrechiang thawkhatin ka inhria a, ngaihzâwng thîkthu chhe fahran a nei tih pawh ka hre vek tih a hre vek a. Khatianga SMS ka thawnte chuan ka tifiam mai mai a ni tih hriatthiam ve mai âwm, a mi chhànna khân pialrâl rim a nam lo êm mai.

An lo chhiar a nih pawhin lo thinrim lo mai se la. A mualpho zâwk tur chu a ziaktu hi ka ni tho a. Nia, ka college kalpui Mahmuni te, ṬPi te, Remruati te hi hmeichhia an nia, kei hi mipa ka ni thung a. Mipa leh hmeichhiate chu kan inkâwmngeih ta a. Chutah chuan kan inkârah thil piang a lo awm ta a. Chu chu eng dang a ni lo, ṭhian inkawmngeihna.

Chu ṭhian inkawmngeihna avâng tak chuan alawm, ṭhian fìamin ka fiam ngam ni. Mahse, ṭhian dawnsawna an lo dawngsawng ve thei tlat ṭhin lo hi a pawi lai ber a ni. Ṭhian inkâwmngeih tak nih laia ‘Ka hmangaih che’ va tih chuan, ‘Kei paw'n ka hmangaih lutuk che’ lo tih zawm zat tur a ni ngãi a. Chutah chuan ka la thutak dâwn chuang lo; kan hlim ang a, kan nui zà ang, chu chu ṭhian inkawmngeihna a ni.

Anni mi chhàn ve dân chu, blank message – a làwmawm lo lutuk. Engmah awm lova inthawn chu, ‘Engah mah ka ngai lo che,’ tihna tluk a nia, a dawngtu tân a làwmawm lo duh viau. Tihpalhah hi chuan ka la hrethiam. Mahse, hemi ṭum na na na chu an tihpalh a ni lo tih chu kei pawhin ka ti palh lo a ni tih ka hriat avângin ka hrechiang êm êm. Hui ham! Luck loh theih cher cher ngei mai.

Hemi ni aṭangin ka ṭhian ṭhate chu ka ṭih ta dá mai a, anni lahin chuti tho. ‘Ka fiamthu hi a fuh lo nge a fuh lutuk zâwk aw…’ tih rilrûk vawng vawng châng ka nei ta. A hun lo lutuka fiamthu thawh hi a lo ṭha ber lo a nih hi.

Hemi ni aṭangin hun àwl hman dân pawh a hma aia uluk zâwk nachâng ka hre tawh a, ka thil tih tur apiang chu ngun taka ngaihtuah hmasak nachâng ka hre ta bawk.

A tâwpah ka thinrim tawh lampang beidawng deuh si chuan tlai khawhnuah, ‘April fooool!’ tih ka thawn leh ta vek a!

Share this

TS Khupchong