Incheina

Kum 2003 ni tain ka hria. Ka la hriat reng chu, pawl 7 kan zir kum a ni a, kum bul sikul kan kal țan ni chuan tlar hmasa berah ka țhu a; ka hnungah hmeichhe pahnih an țhu bawk a. Chumi ni chuan t-shirt nghawng bial, tukkhum hnuai zawn țet hi ka hâ a, chu chu ka hnunga țhu hmeichhe pahnih chuan an kawk a, an nui an nui mai a, hrehawm ka ti hle. Anmahni kha ka haw lo va, mahse, ka t-shirt kha ka hua a. Rah hrual nawk nawk ka châk a, hâl ral daih ka châk a, min tizaktu a nih avangin ka haw ngawih ngawih a ni. Khami ni ațang khan ka ha nawn leh ngai ta lo.

Dolly Parton-i 'Coat of Many Colors' ang em hi chu inbel ngai lo mah ila, kekawr mawngbel na na na chu ka ha rei hle. Mi nei zawkte lah hian silhfena pawp lo tur lai pawp awm te, țet lo tur lai țet awm te an hmu thei țhin khawp a; heng thil zawng zawngte hi incheina ngaihthah leh ngainat loh vang a ni lo va, retheih vang a ni. Italian fashion designer lar Elsa Schiaparelli-i'n, "Hun khirh leh harsa tawn lai hian incheina hi thil huatthlala tak a ni," a lo tih hi a dikzia hre chiangtu ka ni.

Pawl 9 ka zir kum khan kum tluanin mi smartshoe hlui min pek chu ka bun țumtla țhak. Hei hi ka smart vang leh smartshoe ka ngainat vang a ni lo, bun tur dang ka neih loh vang a ni. 1st yr BA ka zir kum khan sneaker pakhat ka bun țumtla țhak bawk. Hei hi sneaker ka ngainat vang a ni lo, a dang bun tur ka neih loh vang a ni. M.A ka zir thleng pawhin pheikhawk hi a chhuat pawp thleng rakin ka bun țhin a, fur ruahtui tlak lai hi chuan mawza chungah polythene ka bun hnan țhin.

Sikula uniform inang tlang neih hi thil țha tak a ni. Thawmhnaw nei deuh leh nei lo deuhte inang tlang taka min khairualtu a ni a, sikul uniform hlutna hre chiangtu niin ka inhre ve. College-ah chu chu a chiang zualin ka hria. T-Shirt hi a man a tlawm a, hak a nuam a, ka ngaina bawk. A rawng dák rak thlenga ha țhin ka ni a, tun thleng pawh hian ka ni. Incheina ngainat loh hi ka inzir a ni lo va, ka neih miau loh avangin ngaina lovin ka awm lo thei lo a ni zawk.

Tun hnu, eng pawl pawlah emaw ka inhman hnu hian loh theih lohva neih baka inchei a ngaih chang a awm ta fo mai a, hrehawm ka ti țhin. Ka thawh chhuah tawk chiah hi silhfen ka lei a, ka inbel țhin; chu chu ka lungawina pawh a ni. Incheina atan sum pawh ka sêng tlem khawp. A chang chuan, silhfen hi min timilem lehzualtu niin ka hre fo bawk. A aia mamawh zawk dang ka ngah avangin incheina atana sum sèn hi hreh tak têin ka hreh a, hmun pawimawha kala thil pawimawh tih dawn hi ka buai ru fo rêng bawk.

An duh dana inchei tura min duhtu chuan a hmanrua min pe sela, ka inbel mai ang. Min pe thei dawn a nih si loh chuan an duh dana inchei turin min beisei suh se. Incheina hi min tizahawmtu leh zuamawma min awmtir theitu ni mah se, mi ropui kan nih leh nih loh hriltu a ni lo. Polish physicist, khawvel mihring piang tawh zinga Science subject pahnih (Physics & Chemistry)-a Nobel Prize dawng kawp thei awm chhun, Marie Curie pawhin silhfen pakhat bak a inbel ngai lo.

Share this

TS Khupchong