April Fiamthu

1. Bawnghnute a zuar ve a, fak dân tur a hre si lo. "Bawnghnute tui pawlh loh no. 1 khat cheng 10, pawlh loh tak tak 20," te a ti vel.

2. Doctor sum duh pawh khan a'n duh mai mai. Putar pakhat a inentir ve a. "Ka pu ka thawh thutin ka lu a hai thin a," a tia, doctor chuan, "Tho thut lo la ni mai alawm, khawi cheng 100!" a lo ti tih zawm zat..

3. Doctor: Ka postmortem pa pakhat pawh kha lo dam leh ta ang se, a mâwl tawh ngawt ang.

Tlangval: Ngatinge?

Doctor: A  kal-ah a thluak ka dah daih alawm.

4. Exam-naah khan a'n thiam àwm lo mai mai asin, a hmaa thu hnenah, "Min hrilh ve la, cheng 20 ka pe ang che," te a ti vel.

5. Khawvela mi zawng zawng hi kristian ni vek ila, piangthar vek ila, setana a hrilhhai âwm..!

6. Naupang pakhat pawh kha, "Pawl engzat nge i nih? an tia, "Pawl 7 tur ka nia, pawl 6 ka fail a, ka nawn," a ti zaih zel.

7. Naupang pakhat pawh kha an inkhâwmnaah, "Lazara nge mi hausa nih i duh?" an tia, naupang chuan, "Dam laia mi hausa, thih hnua Lazara," a lo ti zaih!

8. Rinzuala khan sakei kha a hmu hnai asin, "A hmuihmul pawh kha zo purun ang sung a ni," te a ti vel.

9. School naupang pakhat pawh kha class lak laiin kuhva a ei a, an sir-in, "Open your mouth," a tia, a tihngaihna hre lo chuan, "Ha ha ha!" a ti tawp!

10. Zu in mi pakhat pawh kha motor accident-naah khan a na lo pawlah a tang hlauh mai a, a rawn bai chhuak saih saih a, "Pathian-in zu in turin min la duh a nih hi!" a rawn ti heu mai!

11. Thleninpa -  Ka pu, eng nge i hming?

Mikhualpa - R. Beiseia. Nang eng nge i hming?

Thleninpa - Artalhtumlo-a.

Note: Hei hi misual.com-a mi nen a inang lo a nia.

Nuih leh nuihza siamtu

Mihringte nui hi taksa mai ni lovin kan ngaihtuahna atanga lo chhuak a ni a. Eng emaw thil nuihzatthlâk kan tih tak kan hmuha kan ngaihthlâk hian kan nui a, kan nuih a tihzat chhan pawh a awm teuh ang. Kan kum azirin kan nuih tizatu pawh a lo dang zêl thîn.

A tlángpui thuin mihringte hian nuihzat chhan pahnih kan nei. Pakhat chu thil nung emaw, nung lo emaw awm dân leh chezia vâng a ni a, pakhat leha chu kan ri hriat te vâng a ni. Kan thluak hian chuti anga nuihzatthlâk kan hriat emaw, kan hmuh emaw te hi lo manin thluaka hriatna thazâmah a thawnchhâwng leh a, tichuan, kan lo nuichhuak ta thîn a ni.

Mak tak maiin mihringte nuihzatna hian hun hi a nei ve deuh roh va, chu chu ‘punctuation effect’ an ti a. Kan nuih tiza em emtu an han sawi zawh chiah hian za em em maiin kan nui thîn. Khawvela thil nung awm zawng zawng zînga nui thei awmchhun chu mihringte kan ni a; a tlángpui thuin puitling hi ni khatah vawi 17 zêl nui ang an ni.

Nuih hian mihring taksa a tihrisêl thei hle. Nuih hian thil nin ngawih ngawihna (stress hormons) a tihziaawm theih bâkah damlohna nasa tak lo awm mai thei tur pawh a vêng thei bawk. Nuih hian blood pressure a tihniam a, thisen zâma oxygen awm a tipung thei bawk.

Mi tam takina kan hriat lohva chu, nuih hi insawizawina (physical fitness) chi khat a ni tih hi. Mithiamte chuan vawi 100 nuih leh hah taka minute 15 chhûng insawizawi hi a that dân a inang chiah a ni an ti. Kan nuih hian kan àwma thahrui awm te, kan nâka thahrui awm te, hmaia thahrui awm te,  ke leh hnungzânga tha zawng zawngte chu an tang vek a, chu chu exercise tha lutuk a lo tling ve tlat mai!

A pawimawh bera chu, nuih hian rilru hahdamna a thlen hi a ni. Rilru tâwt up up, thinurna, hlauhthàwnna, lungngaihnate hian mihringte hrisêlna  a tichhe thei a, chu'ng zawng zawngte chu kan nuih hian kan ngaihtuahna atangin a labo vek thei a ni.

Chu vângin nuih hi a hrisèl a, nuihza siamtute hi zah hliah hliah tur kan ni. Mizote hian fiamthu thiamte en dân kan la thiam lo hle a, zir tur pawh kan la ngah khawp mai. Khawlaia mi lo chhaih nawmnah chîng leh lo nuihsawh vêl te kan la chìn chhûng chuan hnam hrisçl kan ni hauh lo vang le..

Riang

Lungngaia rûm

Lungchhiaa insûm

Lungawi lova tûm chu

Thlarau rethei leh riangvai

Thlantui fîmin a bual leh a hual

Thinlung baihvai leh beidawng chu

Sianga riang tura piang

Nun hlimna zawnga ûmtu

Nung tura thih hreh tlat chu

An zalh ta e

Piallei daiah

Awm lo atâ lo awmin

Awm atâ a awm ta lo

Mizoram Kutdawh

Aizawl-a awm chuan kan hre vek ang a, kutdawh an lo tam tâk zia hi. Anni ka hmuh hian ka ngaihtuahna hi a kalthui thîn khawp mai. Hmânlai kan pi leh pute khân Mizoram-ah kutdawh an awm tih rawn hmu ta sela, mak an ti ngawtin ka ring.

A tlângpuiin kutdawh kan tih hi mitdel an ni hlawm a. Kawng sirah bâwm dahin an zai mai thîn. Tumah pe turin an dîl lui lo. A thlâwna pawisa hmuh aiin an thiam ang tâwkin an zai mai a. A nihna taka sawi chuan zaia inhlawh an ni. Nilêngin an zai a, chu chu an ei bêl ber a ni. Thenkhat erawh chu dâwr hrang hranga lût kual thîn an ni a, he'ng ho hi pawisa pe lova chhuahtîr a zahthlâk thîn a, kawng sîra thu ai chuan an hmuhchhuah hnem ka ring thîn.

Thenkhat chu nupui fanau neia chhûngkua din tawhte an ni. An kutdawh atangin nupui fanau an châwm thîn. Chhûngkaw châwmna khawp an la hlawhchhuak thei hian kan la chhiat loh zia a tilang. An zînga thenkhat chuan inah TV an hûng a, mobile phone-te pawh an hûm ve. He'ngte hi an kutdawh atanga an hlawhchhuah a ni a, mawi lo pawh kan ti mai thei. Mahse, an mamawh ve miau a!

Tanpuitute hian zaithiam an tih avânga tanpui an nih ka ring lo va, anmahnia khawngaihna leh lainatna infawkkhâwm atanga lo chhuak a nih zâwk ka ring. Thenkhat erawh chuan pawisa thleng nawi nan an hmang mai thîn. Cheng 10 an thlâk a, cheng 5 an la mai. Hei hi mitthi râl tum, cheng 100 pêk paha, "Cheng 50 min lo kîr r'u.." tih nen thuhmunah ka ngai. Mahse, tuimal far te tein tuipui a siam thîn bawk si a le!

Kan khawpuiah ngei hian vai tam tak kutdawh an lo awm ta! Hei hian ngaihtuah a tithui ka ti. Mizo-ah pawh kan intodelh tâwk tawh tehrëng nen. A zak thei lo lo-ah an la tang zui a. Bazar lûn laiah an thu a, mi kawng kal lai an pawt buai a, pêk loh zahthlâk takin mi an siam thîn. He'ngte hi kutdawh hnawksak an ni; kan mamawh lo.

Mahni duhthu ngeia kut dawh an awm ka ring lo. An zak ve thîn tho. An hah a, an chau ve thei. An inthlahrung a, rilru nat an hre ve tho. Chu vângin kan tanpui loh pawhin i hmusit kher lo ang u. Tanpui ngaite tanpui hi kan tân awmhmun missionary a ni.

Pe rawh u, tichuan pêkin in awm ang.

Mizo blog khawvel

Blog ka siam tanna hi a la rei lo khawp mai a. Nikum (2010) September ni 7 khan he blog hi ka siam a, thu ka post tan a. Chhêmdam tih ringawtin ka siam tawh a, mahse, a template vel ka tih dik loh tâk nuaih avangin ka titawp leh nghal vat a, a hming ngai a hman nawn theih tawh si loh va, Chhêmdam Thlifîm ka ti ta duah mai a nih hi. Chhêmdam tih hming kha ka ui ngei mai!

Hetia blog khawvela ka rawn zuanluh atang hian thiante blog han tlawhkualte hi nuam ka ti a, blog ka neih hma atang tawhin ka lut kual nasa tawh a ni. Mizo Blog Directory atang saw'n ka lut mai thin a, ka hlei ve-na lam a nih avangin nuam ka ti phian mai. Tûnah pawh hian ka thiante blog ka luh fo-na thin, ka blog-ah pawh lo lênglût fo thînte blog tlêm chu ka'n sawi-hawt mai mai teh ang! A zawng a za chuan ka ziak kim sêng dâwn chuang law. Ka duh duh ka ziak hmasa a nih hi!

Lalhmaa: He blog hi science lampang hriatzau nana tha fahran mai hi a ni a, science lama châk lâk nan ka hman mai bâkah a post tam tak a bengvarthlâk hliah hliah a. A neitupa Pu Caribou hi ka post apiang chu taima takin min comment-sak thîn a, Mizo blog khawvelah chuan ani aia comment thiam hi an tam vakin ka ring lo. A hlu ka ti takzet a, ani hian phûrna tam tak min siam thîn a ni. Sandman nen hian 'Mizo Blog Pa' ka ti e.

Henry Vangchhia: Hei hi ka blog hriat hmasak pawl leh luh hmasakna pawl a ni. A blog-a thu inziak hi a nuna a lo tawn tawh, a inpuanchhuahna tak tak a ni hlawm a. Thu hlimawm a tam a, nui ver ver chungin a blog ka chhuahsan thîn. A neitu Pu Henry-a paw'n chanchin a lo ngah khawp mai. Tûn hnaiah a neitupa hian blog lamah harhtharna a chang a, thiante blog-ah pawh a comment hmuh tur a awm deuh zut tawh a, a lâwmawm ngei mai!

Hriselna: He blog hi luh a manhla takzet. A blog-a luh chuan a hming ang ang hian hriselna lama hriat tur pawimawh tam tak kan hmu thîn. A blog hi doctor pakhat a tling tak meuh meuh a ni. A neitupa Khumchiktheia hi bâwl fuh vëk vëk chuan doctor dang râwn a ngai tawh lo.

Tluangtea Vanchhawng: He blog hian kalpui bîk em em a nei lo. A châng chuan thawnthu tawi kan hmu a, a châng leh a chanchin ngaihnawm, a châng leh thlalak lampang; a chawhchawrawi em avângin mitin huapzo blog a ni! A neitupa Pu Tluangtea hi a reh vang vang a, thu ngaihnawm tak nen a lo kîr leh thîn.

Auld Lang Syne: He blog hming hi a awmzia ka hre lo char char a, hetia ka ziah dâwn avângin ka'n google chhin a, poem hming a ni âwm e. He blog-ah hian Pathian thu tha tak tak chhiar tur kan hmu thîn. A blog neitu Pu Ropuia hi Pathian rawngbâwltu a ni a, a rawngbâwlna lam chanchin ngaihnawm tak tak a ziakte chu keini'n thlarau lam chaw-ah kan lo hmang thîn.

Sekibuhchhuak: Hetah hian thlalak hmuhnawm, mit tivara hriatna tizau thei thil hmuh tur a awm thîn a, awmhmun atangin ram dangte khawsakphung kan hriat theih phah thîn a, luh man a awm thîn hle. Pathian thu lampang rawngkai kan hmu zeuh zeuh a, blog luh man awm tak a ni.

Ngirtling: Hetah hian thu ngaihnawm leh hlimawm kan hmu thîn. Thuziak awm te hi a tlángpuiin  nui ver ver chunga chhiar chi a ni hlawm a, a châng chuan a mimal ngaihdân tha tak tak a rawn ziak thîn. A neitupa hi nupui ngam lo mah ni se, thiante blog-a luh peih deuh mai hi a ni a, a bîkin ka tân chuan a hlu hle.

Dawldanga: He blog-ah hian thuziak zirtir nei tha tak tak kan hmu thîn. A châng chuan thu hlui lampang a rawn thet a, a chanchin ngaihnawm chhiar tur kan hmu leh zeuh thîn. A blog-a lêngte hi beidawngin min chhuahtîr ngai lo.

He'ngte bâkah luhna thin chu ka ngah khawp mai. ^-||RaLtE||-^-^ te, digimalt te, laldoma te, Lailentlang leh My INNERMOST hi Pathian thu hawi thuziak tamna a ni a, thlarau lama tuihâl chânga pûr châwkna tha tak a ni. Tin, Dolerich te, MSI@ROSE te, Pakhuangte te, Vanneihtluanga leh Siktuithiang te hi literature lam hawi thuziak tamna a ni a, literature-a tui tân chuan luh manhlâ tak a ni bawk.

He'ngte bâkah HOME-ah hian thu tawi zirtir nei tha tak tak chhiar tur a tam a, GILBERT RENTHLEI-ah hian mi khawvel huapa milâr leh entawntlâkte chanchin chhiar tur a awm thîn bawk. C'est Moi-ah hian Mizoram pâwn lam chanchin bengvarthlâk chhiar tur a tam a, ZOBERS-ah hian thu tawi te te dahkhâwm, ngaihtuahna tithui thei tak tak chhiar tur a awm thîn. Tin, RO BAWM hi a chawhchawrawi hle a, thu bengvarthlâk tak tak, khawl thil lampang ziahna leh thlai lam chanchin chenin chhiar tur a awm thîn a. Auhmun hi thu hlimawm lampang ziak thîntu, Stephen Auhmun-a auna hmun a ni. Mizo hnam rawngkai thu leh hla chhiar duh chuan Zochepa's Blog-a luh mai a finthlâk thîn hle.

Mizo blog hi a za têl a awm tawh a. Thenkhat chu enkawl zui lêm lohva zuzi mai mai a nih laiin thenkhat ve thung erawh chu sum hmuh theihna tham khawpin a lûn a ni. Eng pawh ni se, blog kan neia kan siam a nih chuan hlamchhiah mai lo ila, thu chi hrang hrang fawkkhâwm hi mi dang tân hmasâwn zêlna a ni tih hriain tan i la sauh sauh ang u.

Dangdai

Hmânni chu thil thleng dangdai deuh leh maksak deuh ka zawnna lamah he'ngte hi ka hmuchhuak nawlh a, ka rawn dahchhuak ang e. He'ng thla ka hmuh leh an chanchin ka chhiar atangin ka vânneihzia leh Pathian ropui zia ka hre nawn awn awn mai.

1. Chinese naupang hmai pahnih nei.

Chinese naute pakhat, Kangkang chu hmai pahnih neiin a piang! A hmai pâwnlang zâwk (ti mai ang!) hi a beng bulah a intan a, hmaikâwr a ang hle nghe nghe. Doctor-te paw'n hei hi a chhan chiah an hre lo va, uluk lehzuala enkawl a ngaih tur thu an sawi. A nu leh pate pawh surgery tûl apiang ti thei tura an inpeih a ngaih hmêl.

Hmai inthuaha chu

A nu nen

Damdawiinah uluk taka enkawl a ni

2. Âwma ke to.

 India rama mi, kum 8-a upa, Deepak Kumar Paswaan chu a âwmah ke pahnih leh kut pakhat bâkah mawngtam ang deuh a chawr ngãuh mai! A rilru ngaihtuahna erawh a pângngai vek thung. Hemi vâng hian he naupang hi ‘Octopus-boy’ tiin hminglem an vuahsak nghe nghe a.

Âwma ke to chu

He chawr hi nikum, 2010 June thla khân Bangalore-ah doctor-te'n darkar 4 chhûng ngawt an zai a, hlawhtling takin an paihsak a ni. An paihsak hnuin Deepak-a hian lâwm takin, “Ka taksaa thil nung dang nena ka hun hman reng thîn lak ata ka zalên ta! Tûnah chuan nun pângngaiin ka nung thei dâwn ta!” a ti nghe nghe.

Doctor-te'n theihtâwp chhuahin an zai

Zai hnuah a pa nen

3. Nula vânduai.

He American nula hi a khawngaihthlâk khawp mai. Natna vâng tak a vei avânga hetianga lo awm hi a ni a; a ruh leh thluak hnathawh zawng zawng chu a tha vek thung. Kum 16 leh 19 mi a nihin thi lek lekin a damloh phah tawh. A pian tirhin a mit pahnih hi a buang a, a mit dinglam erawh chu kum 4 mi a nih a rawng a rawn danglam a, a chhiat phah ta nghe nghe a ni.

Nula vânduai-i chu

Ei a duh ve hle, minute 15 danah thil a ei ziah a, nitina a thil ei chu calories6000 atanga 8000 lai a ni a, mahse, a thau phah chuang lo chu a nih si hi! Kum 21 mi Lizzie Velasquez hi Texas-a chêng niin communication zirlai a ni a kg 25.4 chauhva rit niin a taksaa thau hi awm loh châng (0%)te a awm thîn.

A ei thei teh a nia!

An chhungkuain

Tuma'n an thinhrîk lo

Hetianga piangsual leh vânduai tak tak hi khawvelah mi tam tak an awm a, hmuhsitna lam ni lovin chu'ng mi tam tak zinga ka tel lo hi ka vânneihzia tilangtu a ni a, min siamtu chunga lâwm ngawih ngawih tur ka lo ni.

Traffic chungchânga thu benglût

Wheel (ke bial) hi hmasang Mesopotamian Civilization hun laia hmuhchhuah daih tawh kha a ni a, thirsakawr ang chi hi Kum 1645 khan Jean Theson-a'n a siam chhuak a. A tihdinna (brake) leh a rahkalna (pedal) emaw, a herhkawina (steering)-te pawh a awm chuang lo. Kum 1839 khan K. Macmillan-a'n thirsakawr pangngai deuh a siamchhuak ta a. Chu pawh a ke thira siam a ni na a, a tak (body) chu thinga siam a ni.

Kumtin khawvel pumpuiah lirthei chesual avangin mi nuai nga leh hliam tawk maktaduai khat zet awm ziah ang a ni a, India ram hi lirthei chetsual tamna ber ramte zinga mi a ni. Lirthei chesual avanga India rama thi hi kumtin 70,000 vel leh hliam tuar mi 3,50,000 vel zet awm anga chhut a ni. He'ng lirthei chetsualna zawng zawng lo awm chhan 80% chu mihring thiam loh a ni.

* British-ho dân 'The Locomotive and Highway Act' - 'The Red Flag Act, 1865' an tih bawk chu khawvela traffic dân awm hmasa ber a ni. He dân ang hi chuan, lirthei pakhat khalh turin mi pathum - a herhkawitu, mei lo tuahtu tur leh lirthei dang lo kalte lo hrilhlawktu tur mi pakhat a mamawh a. A pathumna phei hi chu flag sen kengin yard 60-a hlaah a lo va kal hmasa tur a ni! India ramah chuan Motor Vehicle Act hi kum 1914 khan hman tan a ni a, Mizoram pawhin kum 1996 khan Mizoram motor Vehicle Rules kan nei ve tan.

* Police-te'n motor number an pekchhuahna hmasa ber chu France ramah niin kum 1893 khan a ni a, hei hi khawvela motor number hmasa ber a ni.

* Kum 1895 khan John Henry Knight chu kawngpuia thirsakawr ke pathum nei chi a khalh avangin man a ni a, court-ah hruai a ni. Hei hi traffic rules bawhchhiat avanga khawvela pawisa chawitir hmasak ber a ni. Mizoram-ah chuan traffic police-te'n pawisa an chawitir hmasak ber chu Lalthlana D/L No. 10419/M27Prof/'89-ZRM 2525 (truck) khalhtu a ni a, November ni 1, 1990 zing lam khan man a ni!

* Khawvela petrol pump hmasa ber chu kum 1906-a USA-a an siam kha a ni.

* Khawvela traffic light hmasa ber chu kum 1919 khan Detroit, USA-ah hman tan a ni a. Britain-ah chuan kum 1928 khan Wolverhampton-ah hman niin, London-ah chuan kum 1932 hnu lamah hman tan chauh a ni.

* India rama traffic sign hmasa ber chu Bombay (Mumbai)-a Mayo kawng leh Veer Narimaan kawng intawhnaah June, 1955 khan tar a ni. Mizoram-ah chuan kum 1968 bawr vel khan Mizo High School panchhohna step bulah 'School Ahead' tih chu tar a ni a, chu chu Cautionary Sign tar hmasak ber nia hriat a ni. Tin, Treasury Square leh Pawnpuite In (Reid House/Raj Bhavan North Gate ep) inkarah kum 1974 khan Pu S.Gogoi chuan 'No Horn' tih a tar a, chu chu Mandatory Sign hmasa ber a ni.

* Kum 1934 khan Britain-ah khawvela ke-a kalte kawngkanna (Pedestrian Crossing) hmasa ber chu hman tan a ni.

Source: Driver te thian; published by Transport Department, Mizoram.

SMS Duhsakna

“Ka mu hma emaw, tlai emaw zîng dâr 4 vêlah ka harh thîn a, ka phone hi ka en ngei ngei thîn. Ka beisei anga i message dangdai tak hmuh hi nuam ka ti lutuk, ni hman a nuam thei ngei mai; ka lâwm e. Mi pakhat i tihlim tih hria la, nuam takin hun i hmang dâwn nia..”

He SMS hi 21.3.11 (Thawhtanni) zîng dâr 9:45:32-a Lawngtlai-a ka thiannu hnên atanga ka dawn a ni a, nilêngin ka rilru a luah ta reng mai.

Harsatna leh rokhawlhna eng emaw tak ka tâwk a nih loh chuan zantin ka mut dâwnah ka thiante mi 70 vêl chu SMS-in duhsakna nen ka ‘mangtha’ thîn a, ka mut hun a tlai thin avângin reply ka dawng tam lo. Mahse, keimah hi ka hlim thung a, chu chu a lâwmman niin ka hre bawk.

He'ng ka SMS thawn chhuahte hi mi dang hnên atanga ka dawn ni lo, ka thian duhtakte tâna keimah atang ngeia lo chhuakte a ni a, a dawngtute'n hmun danga an la hmuh ngai loh avângin ka tâna a hlut piah lamah an tân pawh a lâwmawmin a hlu sawt ngeiin ka ring. Khi SMS atang ringawt pawhin eng tham ni lo mah se, mi hnêna duhsakna thu kan hlan hian nasa takin hna a thawk thei tih a chiang hlein ka hria.

Chuvângin ni khat hun kan thlah liam dâwn te, ni thar kan hmuah laite hian mi dangte hnênah duhsakna thu hlan uar ila hringnun a va mawi lehzual dâwn em! Mihring kan inang lo va, hna hrang hrang thawk kan ni. A then chu buai tak takte pawh an ni bawk a. Mahse, ni khata SMS vawi khat thawn keuh mai khân an hna a tikhaihlakin ka ring lo; chu pawh duhsakna! Keimahni kan lo buai deuh a nih pawhin mut dâwna thawn keuh mai kha thil harsa lua a ni lo bawk.

Hetia thiante hnêna mut dâwna duhsakna thu thawn ka chìn tan atangin keimah ngei pawh ka hlim a ni tih ka inhria a, tûn hmaa ka nun ngui leh chau tak thîn pawh khân min kiansan hret hret a ni tih ka hre bawk.

Duhsakna hlan i uar ang u; suma lei theih loh tam tak a man si a.

March Fiamthu

1. Tlangval pakhat pawh khan nuthlawi a ngaizâwng ve a, zâna a va lêng hi a bialnu fapa chuan silai lemin a lo kâp thîn a, a thih der loh chuan a tap zel sia, a bialnu hmaah a thi der zak zak.

2. “Tunge i hming?”

“Kiki-i.”

“Eng nge hmingpum?”

“Vaki-i.”

3. Zawhte pakhat pawh hian sazu hi a um a, sazu chu bur chhunga hian a tlan lut a,a luhna chu zu bur a lo nia, a lo chhuah leh chuan pâwr fe hian, "Khawnge zawhte?" a rawn ti chhar chhar mai mawle.

4. Zirtirtu: Rannungah enge chak ber?

Naupang: Chengkawl.

Zirtirtu: 'Ngati nge?

Naupang: A leiin lungah a inliak tâng thei.

5. A fapa naupang te kha a khirh ve mai mai, a pa chhiatkhum chung lo chuan a muhil duh miah lo!

6. A pu damlo thi tep tawh pawh kha an rawn kan sap sap a, a zan 4-na velah inlengte chuan, "Mama, i pu chu eng nge a an tawh?" an tia, ani chuan, "A.. Zanina a thih loh chuan a zahthlâk tawh ngawt ang," a lo ti daih.

7. An han mutui âwm asin, zing a tho chu darthlalangah a inen a, a hnar a lo awm tawh si lo. A tihngaihna hre lo chuan, "Kan sazu han vir dan em em hi!" a ti bak hlur ringawt!

8. An inkhel a, a pet goal emaw a tia, hma zawngin invawrhbin phei vel a, offside an rawn phar leh sia, a zak lutuk chu a invawrh lêt leh tawp.

9. Concert-naa stage-a lawn chîng ho hi ke-in hla deuhvah an haw tlangpui.

10. An rethei ve mai mai. Kum hlui in luah man a ba tluan zak a, kum tharah a thi dawn ta mai a. A fapa chuan in luah man a pe chhunzawm thei dawn lo tih a hre chiang si, a fapa hnenah chuan, "Taima takin khawhar inah lo riak kual thin ang che!" a ti tawp.

Ka fapa hnêna lehkhathawn

Ka fapa duhtak,

Kei ka dam a, kei ang bawkin dam ve rawh. He lehkha hi muangchânga ka ziah a ni a, a chhan chu ka chhiar chak theih loh vâng a ni - chu vângin nang paw’n khawngaih takin muangchângin i lo chhiar ve hrâm dâwn a nia. I tel lo chuan eng kan ni lo, keini chhûng hi. I pa paw’n tûkin khân kan in atanga mel 20-a hlaah motor accident a awm thu a chhiar fuh hlauh mai a, ‘thenawm lawk alawm’ tiin hman lo chung chungin kan va kal tâk kha; mel 20 chu a hla reuh lutuk.

Thla hmasa khân lehkhathawn keng thei tur an awm avângin lehkha rawn thawn che ka tum a, mahse, kan khawtlângah buaina tênau a awm a, house no. thlâk a ngai hlauh va. Kan in address a la chiang lo lutuk a, lehkha pawh ka rawn thawn rih lo mai a nih kha. Tûnah chuan address thar kan nei tawh bîk asin.

Thla kaltâ mai khân washing machine kan lei thar a, toilet bul maiah i pa’n a dah a, inthiar zawha kutsil nan a lo remchâng kher asin - i pa remhriat dân hi. I pa hi chhun hrâm hrâm i tum dâwn nia aw.. Thawmhnaw pângngai chu chain awmna jeans kekawr kha vawi nga ka su tawh e.

Tûn lai chu kan khaw awm dân hi a ninawm lek lek a ni. Kâr khat chhûngin tum hnih ngawt ruah a sûr a, a tum khatnaah ni thum a sûr a, a tum hnihnaah ni li ngawt a sûr a, kâr khat chhûng a bei tihna a nih chu.

Ruah a sûr nasa a, tûn lai chu khua a vâwt lutuk. I theih hrâm chuan kawrlum mi rawn thawn ta che. I nutei’n ‘email hmangin awlsam takin a inthawn theih’ a ti a, email-in i rawn thawn mai dâwn nia aw..

I pa paw’n thlânmual sâm hna a hmu a, a hnuaiah mi 500 vel an awm a, lal a inti ve lutuk asin.

I û paw’n tûkin khân fa a nei a, kan la tlawh hman lo. Mipa nge hmeichhia a nih kan la hre si lo va, a patea nge i nih a nutei tih pawh kan la hre thei lo a nih hi.

I bialnu pawh kha hmânni-ah intihhlum a tum a, a thu hnuhnungah a ruang chu tuifinriat ngeia paih turin a ti a. Tichuan, chutianga a awm hnuah tuifinriat-ah an paih ta a; mahse, tuifinriat mawng a thlenin a harh leh a, tui hâkin a thi ta tho tho a nih kha. A lainatawm reuh asin aw..

He’ng zawng thil hrilh theih che a ni e, thil thar danglam deuh hlek thleng a awm mai si lo va.

Duhtâwk phawt mai ang aw..

P.S: Bawiha, ka hmanhmawh êm avângin pawisa ka rawn ti tel hman lo va, ka hman hunah aw.. He lehkha pawh hi seal chhut lohvin ka rawn thawn ta mai. Lâk chhuah a har lêm lo vang chu maw..

Note: Hei hi site pakhata ka hmuh, chawhpawlh zeuh zeuh a ni a, site chu ka hmu leh ta mai lo! A rei deuh tawh a..