Mite khawsak anga khawsa pha lovin, an inrêlbâwl dân te chu awt takin râlkhat thlîr dauh dauh thîn mah ila, kan nihnaah kan lungawi tâwk a, suma lei theih loh an neih loh tha tha kan nei bîk hi a va vânneihthlâk êm!
Kan nihna leh kan chan tâwkah kan lungawi a, lungawi lohna kan lo neih pawhin hmasâwn phah nan kan hmang a, khawvêl tukverha dâkchhuak reng chungin mahni inchhûnglum kan hawisan chuang lo - Mizo kan ni miau alawm.
Khawvêl sualnate'n hmun dang ang bawkin min chîm a, sualna thûk taka la liluh ngai lo kha kan buai a, theihtâwpin a tihbo tumin hma kan la a; chumi kawngah chuan infuih thar nan kan nun zemawi sawi tur leh tawktarh tur kan la nei cheu a ni. A va hlu êm!
Keini chu chhiat kan tawhin Mizo nih a nuam hlei hlei a, neih sum leh pai nei lo nih te hi retheih nihna a ni rêng rêng lo. Mi harsa an tam poh leh mi tha kan lo nih zia a lang chiang ting mai a ni. Kan lungngaih châng pawhin thlamuang tak chungin kan tap a, kan hlawhchham châng pawha kan zînga el tur dang lo awm leh zêl te hian min tiphûr sauh sauh zâwk a. Kan hlawhtlin ni-a in-îtsîk mai lova kan inlawmpui thiam te hi a hlu em em a, duhsakna kan inhlan tawn thin te hian kan ke pênna tur kawng a sial ruah a ni - hei hi Mizo a ni.
Harsatna a sân poh leh Mizo Mizo-na a lang chiang thîn. Chhûngkhat hnaivai leh laina hnai leh hmêlhriat nei lote an khawhar lo va, a hriat hlawh zâwk an ni thîn; kan ram hi khawngaihna ram a ni tlat a!
Khawvêl thiamnaah hnam dang leh ram dangte tluk lêm lo mah ila, kan awt ngai lo. Ka thil mawi hmuh te hian kan kut a tiche a, kan thil tha hriat te hian kan ngaihtuahna a kaitho thîn. Hnam danga awm zen zen lo tlâwmngaihna hi khawvêl mithmuha kan inchhuanna leh kan chungnunna a ni a, tûn thlengin kan zîngah a la awm reng a ni. Mizo nih hi a nuam asin.
Kan pasalthate hming hi khawvêl miten min hriatpui lo mah se, an nihna leh an thil tiha kan chian avângin kan ngaihsàn a thulh chuang lo. Kan hnama chi nung an tuh kha a chawrno va, a thang lian zêl a, pâr pawh a chhuah ta hial a. Chu chu tûn thlengin a la vul reng a, a chuai ngai dâwn lo.
Thil tibo kan awm chuan mi rinawm kan nih zia a lo lang a, chuti ang bawkin thil chhar kan awm chuan mi ta awt ve ngai lo kan ni tih a chiang thîn. Hei hi Mizo nih tinuamtu a ni a, hnam dangin an nei ve ngût na maw chu!
Chapo kan hlauh avângin hnam dangte hmuhah kan inpho chhuak ve vak vak ngai lo! Mi inngaitlâwm rual awmkhâwm kan nih avângin khawvêl hriat lâr hluai pawh kan ni hek lo. Kan awm dân mil tâwka khawsak kan thiam a, hmân atâ tawha lo intodelh thîn kan ni.
Kan kohhran-te hi a nung hliah hliah a, kohhran hrangte awm ve diah mah ila, biakin khâr leh zîm ai chuan biakin zauh hi kan tih than a ni. Rinna lamah kan pachhe bîk lo. Khawngaihna leh hmangaihna kan ngah avângin hnam dangte pawh kan vei a, keimahni avânga kawng dik zawh ta hi sawi sên an ni tawh nang!
Keini chu Mizo kan nia.. Kan hlimin kan lâwm em em a ni.
Ram leh hnam vei luattukna vang leh insiam that duhna avangin a chhelai thur chhuah nghauh nghauh a awl khawp mai. Nang erawh chuan kan thatna lai te, kan mawina lai te i rawn thur chhuak nalh khawp mai. Zai ngaina hnam kan ni a, a huhova kan zai dual dual thei hi a nuam. Amaherawhchu, mahni ram kan ngai lutuk te, mahni ram chhuahsan kan hreh lutuk te erawh hi chu inbih chian deuh kan mamawh chuan ka hria.
ReplyDeleteKa belchiang tulh tulh che a, thuziak i thiam zia ka hre tulh tulh mai. Ziak zel rawh, ka lo chhiar zel dawn nia.
@caribou: Khaih, i tihzahthlak em mai! Kan tunlai boruak hi a hneawm em mai a, Mizo ze tha lai zawng zawng a hliahkhuh zo takngial dawnin ka hria a, ka ziak ve mai mai a nia. Hnam dangte min hmuh dan tur hi a chhe zawng chauh nih hi ka phal lo a ni ber e.
ReplyDeleteKa lawm lutuk e.
Khi tiang khi kan mamawh khawp mai. I ziak tha hle mai.
ReplyDelete@dolerich: Ka lâwm e. Tunlai Mizoram boruak hi a ipik em a, ka ziak ve thuai mai a ni!
ReplyDelete"Kan kohhran-te hi a nung hliah hliah a" i tih khi a dik khawp mai. Mizo kohhran te aia kohhran nung khawvelah a awm ka ring lo hial asin. Khuang hnih hmanga lengkhawm zai a zai tluk tluk a, Pathian fak nana lam mup mup a, hla pakhat tui taka sa nawn tlut tlut hi an tam ka ring lo.
ReplyDeleteKu TSA chu i rawn thlawh tha hle mai. Mizo nih hi a nuam a sin. Hnamah hian chiang ila, amaherawhchu hnama chian na hian hmasawnna lamtluang kan zawhna kawng engkimah min chelhding lo thung sela, chu bak a duhthusam a awi chuang dawn em ni.
ReplyDeleteZiak tha hle mai.
...khrum
@Cari: A ni khawp mai. Keini anga kohhran kristian junior, kohhran nung si hi an tam em em lo maithei. Pathian malsawmna hi chu kan dawng nasa khawp mai, kan ram hian.
ReplyDelete@KCh: Hnama chiang chunga changkan hi a lo nuam ber e!! He².
Ka lawm e.