Kutthlak chîng MLA

Tun hnaiah kan MLA pakhatin driver kut a thlak thu social media lamah a darh chiam a; a darh rualin a hmuna awm dangte'n an hmuh dan leh, dawt a nih lohzia an sawi sup sup a, chutih rualin anmahni lam insawithiamna a awm bawk a. Mipuite'n thu dik zawk kan hriat loh avangin he thil hi chhui chian ni sela a duhawm hle ang. He thil hmutu (witness) tam tak an awm ngeiin a rinawm a, thu dik hriat chhuah hi thil harsa tak tur niin a lang lo. A tua zawk zawk pawh thiam lo se, dan anga hrem a țha hle. Chutih rualin, hetiang lama kan ram hruaitu (legislator etc)-te'na sawi sep an kai ta fo mai hi inenfiahna tur an neih ve pawh a rinawm. An lo thiam lo a niha civil mi kut an thlak a nih ngat chuan mipuite zah lohna lian tak leh a hnam pum ang pawha thil mualphothlak tak a ni ang.

Pu R. Lalrinawma, Mizoram State Assembly Deputy Speaker

Legislator-in civil mi kut an thlak hi Mizoram-ah chauh ni lo, India ram state dangah pawh a lo thleng fo tawh a, mi state chuan an la thutak țhin hle. Nikum 2016, May thla khan Manipur-a MLA pakhat Dr. Ng Bijo Singh chuan civil mi Leishangthem Itocha Meitei chu hmun ualau takah kut a thlak a, victim hian FIR a thehlut nghal a; Khurai khuaa hmeichhiate chuan hei hi duh lohna an lantir nghal a, MLA hi ‘Gunda' ti hialin an au chhuahpui a ni.

Nikum vek June thla khan Punjab Congress MLA Sukhjinder Singh Randhawa chuan Pathankot district-a Sewa Dal hotu IS Gulati chu kut a thlak vei rawk a, mipui an thinrim hle a, nasa takin lungawi lohna an lantir a ni. Kut tuartu ber Gulati hian, “All India Congress Committee (AICC) vice-president Rahul Gandhi-a hnenah Randhawa hi party ațanga ban turin kan ngen ang a, kan ngenna hi tihhlawhtlin a nih loh chuan Congress kan chhuahsan ang," a ti nghe nghe. Nimahsela, he MLA hi kumin Punjab MLA inthlanah khan thlan tlin a ni leh tho a ni!

Hengte bakah nikum July thla tawp lam khan Bihar MLA pakhat Mehboob Alam chuan Katihar district-a bank manager pakhat Rakesh Ranjan chu kut a thlak a, bank manager hian FIR thehlutin, police lam pawhin thubuai an siamsak nghal a ni. August thla pawh khan Maharashtra MLA pakhat Ramchandra Avsare chuan police constable pakhat chu kut a thlak a, ani pawh hi thubuai awrhtir nghal a ni bawk. Heng lo pawh sawi tur tam tak a la awm.

Ram hruaitute hi keimahni ang bawka mihring ve tho, thinrim ve thei an ni. Chutih rualin, mipui vantlang chung lama ngaih leh mipui mit fukna an nih avangin midangte mualphona tling lovah an mualpho thei a, mitin maiin an nitin chezia kan ngaihven an nih avangin kut thawhna awm ngawih ngawihah pawh an insum a ngai hle zawk a, buaina awm theiah pawh a hmetmittu leh a zawldawhtua an tan ngam a pawimawh hle ang. Chutiang ni lova kawngpuia tlan nikhuaa nihna hre viau si, zahawmna leh insumtheihna lantirna kawnga nihna hre leh si lo an nih chuan mipui thinurna hi awlsam taka tawn buak theih a ni a, an la tawng baw nge nge ang tih a hlauhawm hle; mipui thinurna hian second thought a nei ngai si lo.

Kan khawpui chepzia kan hre țheuh va, traffic jam pawh nitinin kan tuar țhin. Chutih laia kan VIP țhenkhatin an nihna hre rana traffic jam lak mam an tum ve ngawt zel hi a huatthlala hle. Hun pawimawh bik (Assembly țhutkhawm etc) lai te a nih chuan thuhran a ni a, chutiang pawh ni lova anmahni mimal thil pawimawh - mitthi ral tura an kalna kawngah te, damlo kan tura an kalnaah te, mo lawm tura an kalna te thlenga VIP tlana tlan vuk vuk an tum țhin hi sim hlawm sela a duhawm hle. Kawngpui hi VIP ta bik ni lovin, mipui ta a ni.

Keini ramah pawh Congress MLA țhenkhat zingah kut ram deuh, civil mi kut thlak hreh lo an awm niin a lang. Tun hnaiah ringawt pawh MLA leh Minister zingah hetianga sawi kai an awm nual. MLA a ni emaw, kut hnathawk mi a ni emaw, a tua pawh ni se, midangte kut thlak ngawt hi dan kalh a ni a, dan anga hrema lungina tantir emaw, pawisa chawitir emawa hrem mai tur a ni. Chutih rualin kan ramah hetiang thil a lo thleng fo tawh nachungin, kutthlaktu MLA-te chungah hremna lek a nih kan hre ngai lo. Dan bawhchhiat avanga MLA lungin tantir phei chu sawi tur a tlem hle; dan an bawhchhe ngai lo chu a ni si lo.

Midangte kut thlak chîng MLA-te hi inmalbeih a ralah chuan, patling leh patling tumah inhlauh bik ngawt thu awm suh! Lirthei steering herha eizawngte ngat phei chuan kan ram hruaitu țhenkhat hi chu duh sela, an tukzal hma viau ang. Ram hruaitu an nih avangin tu pawh mai hian kan zah a, kan thiamna zawkah ngei ngei pawh kan thungrul mang lo. Ram hruaitu ni lo sela chuan a let dawng nasa hlei hleiah an țang ngei ang! Tin, ram hruaitu ni lovin thuneihna vilik thei dinhmunah ding lo sela chuan, heng MLA kut ramte hian kut an thawh țha ngam kher lo maithei. Thuneihna chapopui țhinte hi thuneihnain a kalsan hunah chuan chapona tur an nei tawh dawn si lo va, an va khawngaihthlak dawn tak!

Hetianga civil mi kut thlak hreh lotu legislator kan nei nia a lang fo mai hi hi a zahthlakin a vanduaithlak takzet a, a awmna Congress party lam pawhin hetiang mi hi party timualphotu a nih avangin MLA ațanga chawlhtir emaw, party ațanga hnawhchhuah emaw thlenga a chunga hremna an lekkawh ngam a țha hle ang. Inthlan a hnaih tawh chuan thil ho tê anga lang pawh hi a pawi thui duh țhin hle. Dan chunga leng hi tumah kan awm lo va, hna hniam ber ațanga a sang ber thawk thlengin danin min phuar tlat a ni. Mi naran (civilian) kut thlak aiin ram hruaitu kut thlak chu tu tan pawh a na lehzualin a rinawm a, an phu tawk hremna an dawn ngei theih dan kan dikna chanvo hi lan chhuahtir ngam hi mipuite pawhin kan mawhphurhna a ni tih hria ila a țha hle ang. Chutiang a nih loh chuan, kan thlan tlinte kut kan la tuar fo dah ang e.

T.S. Khupchong
feedback : tskhupchong@rocketmail.com

Share this

TS Khupchong