Party-ah ka lut ta mai

Thian thate nen kan inhawr khawm a, kan inkawm khawm a, kan ei khawm bawk a. Kum eng emaw zat chu MSU lamah lungsi takin kan lo inhmangho chho tawh a; MSU lama kan hun te a liam hnuah party lamah ke penho zai kan rel leh ta a. Chutianga thianho inlungrual zelin, vawiin April ni 3, 2017-ah MNF Hnam Rûn-ah president Pu Zoramthanga'n ka thian mi 30 chuang zet te nen min lawm lut ta a ni.

Mite'n zirlai pawl hi politics kailawn a ni an ti thin a, zep thu a chêng lo, a remchang ber a ni reng a. Zirlai pawl hi political institution tha mangkheng a ni. Tuna kan MLA hmingtha leh chhuanawmte hi han en ila, zirlai pawl atanga inzir chhuak an ni deuh fur mai. Mi tam tak chuan zirlai leh thalai la naupang tê tête politics-a kan inhnamhnawih thin hi an hrethiam lo. 'Zirlai in la ni a, in la naupang a, hetiang hi la buaipui suh u' an ti thin. Politics chu putar un leh khun tak takte buaipui tawk lekah an ngai tihna a ni. Duhthusamah chuan thalaite hian tuipui ila, zirlaite hian buaipui bawk ila, kan politics hmelhmang te pawh a inher chho bawih zawk lo'ng maw!

Kei hi mi rethei tak e ti lo chuan, sawrkar hna thawh la tum ngai miah lo, a dil pawh la dil chhin lo ka ni. Zep thu a cheng lo, zirlai pawl lamah lah tun hma angin ka tuitla tawh lo bawk nen, kan ngaihven zawng tak a lo ni ve leh zel bawk nen, thianhova thil tih remchangah ka inzep ve ta mai a ni. Party-a ka luh hi min kawm serh phah nan te, min tih phah nan te in lo hmang hlauh ang e.

Ka thian tha, min hmangaih tak takte fuih, zilh leh hauh ka tawk nasa hle. Hetiang ka tawk dawn tih ka hriat avangin thiante pawh ka luh tur thu ka hrilh mang lo va; chuti chung chuan lawm luh dawn leh a hnu thleng pawha min hau bawng bawng te, thurawn min pe mawlh mawlh te, duhsakna min hlan mawlh mawlh te an awm. Ka tan chuan hmangaihtu thian ka nei tih tilangtu a nih avangin chung zawng zawng chu a hlu takzet.

Eng pawh ni se, keimah hi keimah ka la ni reng dawn a, nimina 'kei' kha vawiin leh naktukah pawh 'kei' a la ni reng dawn. Tun hmaa zirlai pawl pakhat MSU-a ka lo inhmang thin ang khan, political party pakhat MNF-ah ka inhmang dawn tihna mai a ni a, ram tana hna kan thawhna hmun dang hret dawn tihna chauh a ni. Zirlai pawla inhmang chunga 'Zoram hi kan ram a ni' ti hla sa thinte khan, party-a inhmang chunga 'Zoram hi kan ram a ni' tih kan sak chhunzawm zel thei tur hi ka lawm hle.

Vawiin lawmluh programme-ah lawmluhte atangin mi paliin thusawina hun kan nei a, chung zingah chuan thu tawi tê sawina remchang ka nei ve hlauh mai a, a tlangpui zawr zawr, ka la recall theihte ka'n dah tel ve reng reng ang e.

"Pi leh pu zahawm tak takte u, a hmasain chibai ka buk a che u. Naupang tê la ni chung pawha ka lung lèn em emtu MNF party ka zawm thei hi ka lawm hle a ni.

"Zirlai pawlah kan inhmang thin a, chutah chuan sawrkar khalh ngil tumin theihtawp kan chhuah thin a, thil tha nia kan hriat te kan ti thin. Issue kan la a, agitation te kan nei bawk a, chutah chuan mite'n min lo hmu MNF em em thin a lo ni. Chutianga thil tha nia kan hriat kan tiha mite'n min lo hmu MNF thin hi he party tan pawh a lawmawm hlein ka hria. Thil tha tih chhunzawm zel tumin kan rawn lut a ni.

"Nakkum lawk inthlana MNF a sawrkar kan rin vanga lo lut kan ni lo va, MNF sawrkartir tuma lo lut kan ni zawk; ram leh hnam tana thil tha tia hna thawk tur chuan a sawrkar phawt a ngai miau si a.

"Vawiina lo tel thei lo kan thian leh kan thalaipui tam tak hi Mizo hnam party (kei chuan Mizo hnam party ka ti mai a) luh châk an awm a. Hmun hrang hrangah an in-pang-aw-zial mup mup a, an rawn in-tira-mei-kaiah luh diah diah dawn a ni. Chutianga kan thalaipuite tan pawha luh châkawm a nih zel theihna turin kan hotute leh party pawh rawng thar kan hnawih zel a pawimawh hle ang.

"MNF party a sawrkar theihna tura hma la turin keiniho hi tun atangin kan inpeih reng a ni. Ka lawm e."

Share this

TS Khupchong