Hnam martarte an inpuiah an lo lawi leh ta

Vawiinah khan Mizoram zalenna sual laia ram tana martar mi pathumte ruhro chuan a INPUI a rawn lawi lut leh ta! Heng mi pathumte hi Capt. Rumliana, Tualte; L/Cpl. Lalhmuakliana, Zemabawk leh L/Cpl. Lalnghilhlova, Lungmuat te an ni a, Vanapa Battalion-a mi vek an ni.

Kum 1967 kum tir lam khan Mizoram sawrkar khan Mizo National Army (MNA) leh Mizo National Volunteer (MNV) chu mumal taka kaltir a tum avangin, an inawpna dan leh battalion hotute pawh a siksawi a. Lt. Col. Biakchhunga chu Zampuimanga Battalion Commanding Officer (CO) atana ruat thar niin CO charge la turin khawthlang lam a pan a.

Hetih lai hian Army Chief ni lai Gen. Thangzuala Sailo chuan khawthlang lam a lo fang ve mek bawk a; chungte nen chuan April ni 9, 1967 khan Sertawkzawl-ah an intawk khawm a ni. Sertawkzawl hi Hortoki khaw bul lawka awm niin ram buai lai khan sawi khawm zingah a tel a, tunah chuan khaw ram a ni ta.

Sertawkzawla riak tura an inbuatsaih lai chuan zanah Capt. Rumliana chuan, "Captain ka nih vangin ka duty lo bik tur a ni lo. Ram leh hnam tana rammu vek kan ni a, ka awl bik lo vang," tiin khaw daiah a duty ve ta a. Chutia an duty lai chuan tlangkawng atang leh Tlawng luikam lam atangin vai sipaiho an rawn kal ta thut mai.

Capt. Rumliana chuan kap ta lo chuan Gen. Thangzuala Sailo te chu kaitho turin a tlan thuai a, Gen. Thangzuala te hi himdamin an chhuak thei ta a; nimahsela, vai sipaihovin an rawn nangching zui tak avangin Capt. Rumliana leh a thiante pahnih chuan ram tan an nunna hlu tak mai an hlan ta a ni.

Martarte ruhro phawrh tur hian Ex-MNA hruaitute chu thawhtanni khan Hortoki panin an chhuak a; Hortoki Joint YMA-te chuan a bul atanga a tawp thlengin an lo buaipui a, Mizo tlawmngaihna hi a hlu takzet mai. Sertawkzawl YMA-in heng martar pathumte thlanlung hi tha taka an lo phun avangin an thlan awmna pawh awlsam takin an hre thei.

Vawiina chawhnuah khan Mizo Hnam Run-ah heng martarte ruhro hi luhpui a ni a, ram tana martarte'n an inpui an lawi lut leh ta a ni. A hmuahna inkhawm hi rei lo te hman a ni a, martar chhungte pawh an tel. Martarte ruhro phawrh hi politics-a inbeih nan an hmang fo va, a pawi takzet. Kan ngaihdan a ni lo a nih pawhin, Mizoram zalenna sual kan thlawp lo a nih pawhin, martarte thisen leh thlarau bakah, an chhungte zahna avang talin ngawih ngam mai a va tha thin em!

Heng martarte nupui leh fanau te, an unau te, an chhungkhat lainate hian an fapa, an pa, an unaute hi an hmuh hnuhnun berah kha chuan tlangval thatho leh hrisel tak niin, ram leh hnam tana feh chhuaka dam taka haw leh ngei tum an ni ngei ang. Nimahsela, an hmuh leh meuh chuan kum 50 chuang lo liam tawhin, an ruhro bak chan an nei tawh lo. An chhungte lunglen turzia leh an ngaihtuahna a thar leh turzia te dawnpui loh theih a ni lo.

Heng Mizo hnam martarte'n an thisena an ziah hnan hnam thuthlung hi, keini thangtharte hian chhunzawm ila, a thawk chhuak thei lote pawhin i hlatsan lo vang u. Kal hla tawhte pawh kan thinlungah Mizo hnam rilru lo tho leh sela, hnam tana beitu, an ruang - mahni in lum mai ni lo, mahni khaw kawtchhuah pawh thleng zo lova piallei dai bela fam chang tate hmabak i chhunzawm zel ang u.

YouTube-a Mizo rap music video en hlawh zual 10

Mizoramah internet a chak telh telh a, YouTube entu an pung zel ni pawhin a hriat a. A bik takin nikuma Jio 4G free-a a hman theih khan Mizo zingah YouTube tlawhtu an tam phah ngei ni pawhin a lang. Mizo kutkawih liau liau music video pawhin entu nuai an kai tar fer fur a; nikuma Lilzo leh Ricky Drac an rawn lar phei kha chuan, YouTube-ah Mizo rap awm ang angte'n thlirtu an ngah hlawm hle.

Hei le, YouTube lama Mizo rap music video upload (a theih chin chinah official video) zinga en hlawh zual 10 ka thlang chhuak a. Heng 10 bakah Mizo rap music video, entu nuai chuang nei a la awm nual. Tin, video thenkhat chu official video an upload ni lo, midangin an lo re-upload a awm ve leh bawk a, heng hi top 10 chhiarnaah telh a ni lo; chutiangah chuan official music video zawk lak zel a ni.

Heng top 10 zingah hian Lilzo telna music video hi 4 ngawt a awm a, RickyDrac telna music video hi 3 a awm bawk. Top 10-te chu i han tlar thla den den teh ang. A title zel hi an video link a ni a, view, comment leh like & dislike hi he thu buatsaih hun May ni 22, 2017 zan dar 9:30-a a dinhmun a ni e.

1. Lilzo - Duati

He video hi vawi nuai 6 chuang teh meuh mai en a hlawh tawh a, nuai 7 a kai tep mai. Thla rei lo te hnuah view hi nuai 10 a kai ngei a rinawm. A upload-tu hi KC Video Production a ni a, YouTube-ah kumin hi a kum 2 awmna tur a ni ta.

2. Lilzo - Ka sawm che

Hei pawh hi Lilzo tho a ni a, vawi nuai 5 chuang fe en a hlawh tawh a ni. A upload-tu hi John Chhana a ni a, nikum, 2016 kum tawp lama a lar vanglai taka upload a ni. An upload hun ngaihtuah chuan view a pung chak hle tih a hriat theih.

3. Lilzo - Ka natna i chhawk

Pathumna pawh hi Lilzo tho a ni! En hlawh video pakhatna atanga pathumna thleng hi Lilzo single video vek a ni! A upload-tu leh music video siamtu hi KC Video Production tho a ni a, kum khat vel awrh YouTube-ah a la awm chungin, vawi nuai 4 chuang teh meuh mai thlir a hlawh tawh a ni.

4. Dr. Reuben - Kumhlui liam tur

Palina hi krismas hla a ni ve thung. Dr. Reuben leh a nu Dr. Louis Hauhnar-in 'Kumhlui liam tur' tih hla an sak kha a ni a, kum 2015 krismas dawn tepah khan upload a ni. Tun thleng hian vawi nuai 3 chuang zet thlir a hlawh tawh. Krismas dawnah chuan play a hlawh chho zelin a rinawm a, view hi la tam dawn chauhvin a rinawm.

5. BOG, Ricky Drac, Rafada, Hlimhlimi - Runah

Ricky Drac a rawn lang ve ta. Gospel rapper lar tak 'Facebook' tih hla rawn champion-puitu Boyz of God (BOG), gospel singer lar chho mek Hlimhlimi leh rapper tho Rafada te nena an sak a ni a, nikum, 2016 kum tawp lama YouTube-a upload ve chauh kha a ni a, tunah hian vawi nuai 3 chuang zet en a hlawh tawh. Tunlaia Mizo YouTuber zinga lar chho mek leh lar chak tak IN-HOUSE PRODUCTION siam leh upload a ni; he channel hi YouTube-a Mizo channel zingah chuan subscriber ngah ber dawt a ni mek.

6. Ricky Drac Fanai, Sangtei Renthlei, Eric Renthlei - Medal

Hei pawh hi Ricky Drac telna tho a ni. He hla atang hian Ricky Drac-a wordplay, alliteration leh rhyme a thiamzia leh a thukzia a lang chiang hle. Sangtei Renza aw sang kang vahin a thunawnah a rawn vawrh leh bawk nen, hla nung tak a ni. Nikum chawhma lama upload a ni a, tunah hian vawi nuai 2 chuang zet thlir a hlawh tawh a ni.

7. Naupang Kawlhrawng - I hla

Champhai pum chhuak Triau Trackx an rawn lang ve thung ta a. 'Hnih leh li' atanga rawn lar Naupang Kawlhrawng rap a ni ve thung a, music video hmuh nuam tak a ni. Top 10-a lang zingah he hla hi upload hmasak ber a ni a, kum 2013 kum tawpa upload a ni a, tun thlengin vawi nuai 2 chuang zet en a hlawh tawh a ni.

8. Lilzo ft Vincy - Min chhuahpui rawh

Lilzo a rawn lang leh ta a. Mizo rap lama sulsutu, Mizote leh rap music sawi ruala a hming chuang reng tawh tur Vincy nena an rap a ni a, a upload-tu leh siamtu hi KC Video Production tho kha a ni. Kum 2014 kum tawp lama upload niin tun thlengin vawi nuai 2 dawn chu en a hlawh ta.

9. Zorini Khiangte ft 135 - A rem tawh lo

Mizo rap zinga sulsutu, a bikin Mizovin English rapper kan neih hmasak Michael M. Sailo a rawn lang ve leh ta a. Ani hi 135 angin a rawn inlan a, Mizo lengzem hla satu lar Zorinzuali Khiangte nena an hla sak 'A rem tawh lo' an rawn hit-pui a ni. A rap tak hi a tam vak lo nachungin telh loh chi erawh a ni chiah lo. Nikum hmasa, kum 2015-a Michael M. Sailo upload niin tun thleng hian vawi nuai 1 chuang fe en a hlawh tawh a, nuai 2 kai vat tura ngaih a ni. Michael M. Sailo hi hmanni lawk khan bike accident avangin a boral a, zaithiam tam tak a lo promote chhoh te ngaihtuah chuan a uiawm takzet; Mizo music industry-a a contribution hi theihnghilh a ni tawh ngai dawn lo a ni.

10. BOG, RickyDrac & Murphy - Krista pan la

A tawpna ber hi RickyDrac leh BOG telna tho a ni a, rapper Murphy pawh a tel bawk. Gospel hla tha tak a ni. Nikum, 2016 kum tawp lama upload niin tun thleng hian vawi nuai 1 chuang thlir a hlawh tawh. He video hian kumin March thlaa 10-na hauhtu Kyusho Waza ft Feli Fanai - Khuanu Samsuih a rawn pet chhuak a ni.

Incheina

Kum 2003 ni tain ka hria. Ka la hriat reng chu, pawl 7 kan zir kum a ni a, kum bul sikul kan kal țan ni chuan tlar hmasa berah ka țhu a; ka hnungah hmeichhe pahnih an țhu bawk a. Chumi ni chuan t-shirt nghawng bial, tukkhum hnuai zawn țet hi ka hâ a, chu chu ka hnunga țhu hmeichhe pahnih chuan an kawk a, an nui an nui mai a, hrehawm ka ti hle. Anmahni kha ka haw lo va, mahse, ka t-shirt kha ka hua a. Rah hrual nawk nawk ka châk a, hâl ral daih ka châk a, min tizaktu a nih avangin ka haw ngawih ngawih a ni. Khami ni ațang khan ka ha nawn leh ngai ta lo.

Dolly Parton-i 'Coat of Many Colors' ang em hi chu inbel ngai lo mah ila, kekawr mawngbel na na na chu ka ha rei hle. Mi nei zawkte lah hian silhfena pawp lo tur lai pawp awm te, țet lo tur lai țet awm te an hmu thei țhin khawp a; heng thil zawng zawngte hi incheina ngaihthah leh ngainat loh vang a ni lo va, retheih vang a ni. Italian fashion designer lar Elsa Schiaparelli-i'n, "Hun khirh leh harsa tawn lai hian incheina hi thil huatthlala tak a ni," a lo tih hi a dikzia hre chiangtu ka ni.

Pawl 9 ka zir kum khan kum tluanin mi smartshoe hlui min pek chu ka bun țumtla țhak. Hei hi ka smart vang leh smartshoe ka ngainat vang a ni lo, bun tur dang ka neih loh vang a ni. 1st yr BA ka zir kum khan sneaker pakhat ka bun țumtla țhak bawk. Hei hi sneaker ka ngainat vang a ni lo, a dang bun tur ka neih loh vang a ni. M.A ka zir thleng pawhin pheikhawk hi a chhuat pawp thleng rakin ka bun țhin a, fur ruahtui tlak lai hi chuan mawza chungah polythene ka bun hnan țhin.

Sikula uniform inang tlang neih hi thil țha tak a ni. Thawmhnaw nei deuh leh nei lo deuhte inang tlang taka min khairualtu a ni a, sikul uniform hlutna hre chiangtu niin ka inhre ve. College-ah chu chu a chiang zualin ka hria. T-Shirt hi a man a tlawm a, hak a nuam a, ka ngaina bawk. A rawng dák rak thlenga ha țhin ka ni a, tun thleng pawh hian ka ni. Incheina ngainat loh hi ka inzir a ni lo va, ka neih miau loh avangin ngaina lovin ka awm lo thei lo a ni zawk.

Tun hnu, eng pawl pawlah emaw ka inhman hnu hian loh theih lohva neih baka inchei a ngaih chang a awm ta fo mai a, hrehawm ka ti țhin. Ka thawh chhuah tawk chiah hi silhfen ka lei a, ka inbel țhin; chu chu ka lungawina pawh a ni. Incheina atan sum pawh ka sêng tlem khawp. A chang chuan, silhfen hi min timilem lehzualtu niin ka hre fo bawk. A aia mamawh zawk dang ka ngah avangin incheina atana sum sèn hi hreh tak têin ka hreh a, hmun pawimawha kala thil pawimawh tih dawn hi ka buai ru fo rêng bawk.

An duh dana inchei tura min duhtu chuan a hmanrua min pe sela, ka inbel mai ang. Min pe thei dawn a nih si loh chuan an duh dana inchei turin min beisei suh se. Incheina hi min tizahawmtu leh zuamawma min awmtir theitu ni mah se, mi ropui kan nih leh nih loh hriltu a ni lo. Polish physicist, khawvel mihring piang tawh zinga Science subject pahnih (Physics & Chemistry)-a Nobel Prize dawng kawp thei awm chhun, Marie Curie pawhin silhfen pakhat bak a inbel ngai lo.

Dihmunzawl-a in rangkachak, leivung tangkarua leh chinai lunghlu kha

"PHE building aia lian daih leh tha zawk Dinthar Presbyterian Kohhran Biak In thiattuin Rs. 2,00,000-in a thiat ngam," -T. Sangkunga, MLA

Nikum lamah khan SIPMIU chuan Tlawng lui bula Dihmunzawl-a Water Treatment Plant thiah nan cheng nuai 63.08 a seng a nih kha. Khatih laia Mizoram Assembly hnuaia Estimate Committee Chairman Pu Lalrinliana Sailo chuan, "Power sub-station dinna hmun tur tihzâwlna (earth work) atan a hranpain cheng nuai 35 hman a ni tho a. Min hmin lo a nia. Fimkhur rawh u," a ti nghe nghe. Pu T. Sangkunga meuh pawhin, PHE building aia lian daih leh tha zawk Dinthar Presbyterian Kohhran Biak In thiattuin Rs. 2,00,000-a a thiah ngam thu a sawi tih chanchinbu lamah a lang.

THIL PAWIMAWH TE:

* He in thiat tur zawnna (auction) hi an nei miah lo va, a thiat turin SIPMIU-in contractor an pe tawp mai a ni.

* Water Treatment Plant hmunhma paih fai nan cheng nuai 6.42 an seng.

* Tlawng luia chinai paih nan cheng 69764.4 an seng.

* Leivung paih fai nan cheng nuai 42.94 an seng.

HETI ZAWNG HIAN

* He in thiat tur zawnna (auction) neih a ni miah lo hi a fel tawh lo sa hrim hrim. Sawrkar department building thiat tur chuan tender chhuaha auction neih a ni thin a, SIPMIU-ah chuan neih a ni ve lo va, an contractor khan a duh zat zatin a thiat mai dawn tih a chiang reng! He thilah hian SIPMIU Project Director Pu Valbuanga nge thiam lo, a phenah thiam takin midang an inrawlh zawk? A eng emaw zawk zawk a nih loh pawhin a ni ve ve ang.

* Water Treatment Plant hmunhma paih fai nan cheng nuai 6.42 an seng a, bawlhhlawh paihna man to ber a ni hial ang. MLA Pu Rina sawi ang a nih chuan Power Sub-Station hmun tihzawlna atan a hranin cheng nuai 35 hman a ni tawh a, hetah a hranin cheng nuai 6.42 a lo awm leh a, thil mak tak a ni! He lai hmun khat hi thuang hnihin an tifai ni tak maw!!! Eng pawh ni se, nuai 35 kha chu dahtha phawt ila. Aizawl-a Mission Veng-ah hian bawlhhlawh pahna man hi thla tin cheng 50 an chawi thin a, in 1000 vel lo awm ta se, thla khata Mission Veng-in bawlhhlawh paihna atana an senso chu cheng 50,000 tihna a ni a, Water Treatment Plant hmunhma paih fai nana an pawisa hman hian Mission Veng-a in tinte bawlhhlawh paih faina senso kum khat (thla 12) a phuhru thei zan a ni! Kum khat chhunga Mission Veng in tinte bawlhhlawh paihte hi hmun khatah dah khawm ila, Water Treatment Plant hmunhma an paih faite hmun khatah dah khawm bawk ila; BAWLHHLAWH HLU BIK chu a awm tih tu pawhin kan hmu thiam mai awm e!

* A bul lawka lui awm, Tlawng luia chinai paih nan cheng 69764.4 lai an seng a, he tlawng luia chinai hi helicopter an paihtir a ni lo maw? Aizawl leh Kolasib hi kilometre 80 chuang hreta hla a ni a, Dihmunzawl leh Tlawng inkar aiin a let 30-50 vel laiin a hla zawk awm e. Helicopter chuanna rate hi Rs. 1300 a ni. Tlawng luia chinai an paihna man hian Kolasib-ah vawi 53 zet i zin thei. A tlangpuiin Pawan Hans-ah seat 10 a awm a; tlawng luia an chinai paihna man hian nang bakah i chhungte paruk bakah, SIPMIU hotupa Pu Valbuanga leh UD & PA Minister Pu Zodintluanga leh in thiattu contractor te nen Kolasib-ah vawi 5 zet in kal thei tihna a ni. Dihmunzawl leh tlawng lui inkar tawi tea chinai paihna man hi a va tam em! A phurtu truck neitu/contractor chu tlawng luia nitina tui phur thin Mizoram University tui phurte'n nihlawh an va ti dawn em!

* Leivung paih nan cheng nuai 42.94 an seng leh tlat mai bawk a; leivung man tam a ni leh ta. A building/khawl etc. thiah nana cheng nuai 13 vel hmanga leivung paih nana cheng nuai 42.94 lai an hmang leh daih hi thil mak tak a ni. Leivung p He leivung hi a pung thei em ni tih zawhna a awm thei. A thuhrimin, Dihmunzawl in thiahna senso-ah sawrkarin cheng nuai 63.08 an seng, han tih hian sawrkarin an la na tlat a, a thiahna man ngau ngau chu cheng nuai 13 vel chauh alawm an ti zel. A thiat tura a hrana contractor la, bawlhhlawh paihtu tur pawh a hrana laa a hmuna thian faitu tur a hran theuhva contractor la an ni awm chuang si lo va, sawi hran phet an tum hi a mak riau.

Eng pawh ni se, khu lai in thiahna senso atana cheng nuai 63.08 lai sengtu contractor hi, mahni in saknaa leivung paih tur ilo fahrana han chhawr chakawm tak chu a nih hmel loh.

Ka nu'n mi tihsak ngai lo

Ka nu chuan a ei ai min eitir ngai lo va, a sin aiin min sintir hek lo

Ei tur tha leh tui a awm chuan ka nu chuan ama ei turah a ngai lo va, ka ei turah a ngai sa tawh thin. Chuvangin eitur a awm chuan ka ei aiin ei rawh a ti ngai lo. Khua a vawt a, thawmhnaw lum ka mamawh a. Intuama inthuam lum ka mamawh thin. Chutih hunah chuan, intuam lumna tur awm ang ang chu ka nu'n mi sintir a, ama sin turah a ngai lo. A ngaihdanah chuan, ka tan liau liau a ni thin.

Ka nu chuan a hranpa liau liauvin mi tawngtaisak ngai lo

Ka nu chu tawngtai ngaina mi a ni a, tawngtai hunbi a neih bakah, a dun hun hunah a tawngtai leh thin bawk a, rei tak tak a tawngtai thin a ni. A tawngtai apiangin ka hming a lam tel ziah a, ka tan a tawngtai a, a hranpaa ka tana tawngtaina a nei tawh lo. A tawngtai apiang kha ka tan vek a ni thin. Tawngtainain mi dil a, tawngtainain mi hlan a, tawngtaina vekin lawmthu a sawi leh thin.

Ka nu chuan min duat ngai lo

Ka nu chuan thil tha tinreng min zirtir thin a, mut dawnah Pathian thu leh Bible thawnthu te min hrilh thin. Ka hriat atana tul lo mi hrilh ngai lo va, ka mamawh loh mi leisak ngai lo va, ka mamawh loh mi eitir ngai hek lo. Ka duhna hmun apiangah mi kalpui ngai lo va, ka duhzawng apiang mi tihsak ngai hek lo. Ka ngen apiang mi pe ngai lo va, ka mamawh bak engmah a ti ngai lo a ni. Mahse, min hmangaih em em si.

Blog atanga sum hmuh theih dan

Website/domain nei tan chuan wordpress-ah pawh google adsense hi a dah theih a, mahse, domain neih loh chuan wordpress lamah adsense a dah ve theih loh niin ka hria. Blogger lam hi Google ta a nih angin domain neih loh pawhin adsense chu a dah theih a, blog siam tawp kha a pawimawh chu a ni mai. Blog siam lam kan thupui a nih dawn loh avangin thupuiah kan lut nghal ang.

1. A hmasa berah chuan i blog-a adsense dah thei tur chuan, a lo berah blog post 10 vel tal neih a ngai a, thla 6 chhung vel blog update phawt a ngai. Thla 6 chhung blog i neih hnuah adsense i apply chauh thei. Criteria neuh neuh dang pawh a awm nual nain, hei hi a pawimawh ber chu a ni mai,

2. www.blogger.com-ah kal la, han sign in phawt mai teh. Chumi hnuah a lema lang ang khuan vei lamah Earnings tih awm kha click rawh.

3. Chumi hnuah a lema lang ang khuan vei lamah Earnings tih awm kha click la, Sign Up for Adsense tih a lo lang ang.

4. Phur takin Sign Up for Adsense tih khan han click nghal var la. Chuta tang chuan a tih dan chu Google adsense siam dan - YouTube kaltlangin tiha point 5-na atangin a inang tawh a ni. Link hrana luh a buaithlak mai mai i tih palh takin hetah han dah ve leh mai mai ila.

5. Sign In khi i click ang a, Your website tihah khian a phei ang a, second 2/3 vel lek han nghak det la, i blog/website link chu amahin a lo indah nghal mai ang. A hnuaia Content language dah turah Mizo tawng thlan tur a awm loh avangin English kha han dah tawp mai la.

6. Accept association i click ang a, google adsense account i neih sa tawh chuan ti khan a zo der. Continue tih i click ang a, blog lamah i let phei tawh ang.

7. Google adsense nei sa lo tan chuan Your Information-ah a lut ang a, i postal address ilo fahran te i dahkhat ang a, i submit ang. Chuan, chu i application submit chu an lo review ang a, ni thum vel hnuah i email i check ang a, an approve chuan google adsense account i nei ta tihna a ni ang.

8. Adsense account i nei tawh a, tlem han khawih leh hlek tur a la awm. A lem hmangin entir ila, a awlsam ber awm e. Earnings-ah i kal a, Show ads on blog-ah Yes i thlang ang a, Display ads below my posts and in the side bar i tick leh mai dawn nia.

9. Layout-ah i lut ang a, Main tih lo awmah edit tih i click leh ang. A hnuaia a lem hi en la, i fiah leh kuarh ang.

10. Window a lo pop up ang a, Show Ads Betweenn Posts kha i tick ang a, a hnuaiah Text and Image leh Text Only  tih a lo lang ang a, duh zawk zawk tick mai tur. Text and Image i thlan chuan google advertisement lo lang kha thlalak leh thu nen a lo lang thin ang a, Text Only i thlan zawk chuan a thu chauhvin google advertisement kha a lo lang thin ang. Tichuan, a hnuai bera Save tih awm kha click leh mai tur a ni.

2. La duhthawh ta zel ila. A thenah (template azir a ni thei) chuan blogger atanga adsense account kan siam zawh tawh chuan adsense gadget hi amahin a lo awm nghal mai thin a, a thenah a awm lo thei tho bawk a. Chuvangin sawi belh reng reng ang. Layout-ah tho khan ding lam sirah (hei hi template hman azirin veilamah pawh, hmun dangah pawh a awm thei) Add a Gadget a awm a, click tur. Window lo pop up-ah khan Adsense zawna + awm kha click la, i OK leh ang a, Save arrangement i click leh ang a, i zo fel ta e.

Ti khan i blog atanga sum hlawh thei turin thu hle hla, thlalak leh video han post chur chur teh le. I hausak chuan mi han hre reng dawn nia.

Taka, ka tarlan hmaih tep. I blog-a google advertisement lo lang kha i click vaih chuan he post entawn chunga harsa taka adsense account i siam kha a chhe nghal ang. A nih loh vek leh, i blog-ah a rawn display tawh lo vang. I tan luatah i lo click tlut tlut ang e. Kha kha chu i visitor-te click turah i dah dawn nia.

I sum khawl zat chu i adsense account lamah i check thei ang. Payment dan tur pawh adsense account-ah khan payment setting a awm e.

YouTube video monetize dan

YouTube hmanga sum la lut tur chuan YouTube video-te monetize vek a ngai a, chumi hma chuan hengte hi chhiar hmasa phawt rawh, i fiah zawk nan.

1. YouTube channel la nei lo tan leh google account la nei lo tan Google account siam dan leh YouTube channel siam dan hi chhiar hmasak phawt a ngai a. Chumi hnuah YouTube video te monetize thei turin adsense account siam leh phawt a ngai a, chumi chu a la nei lo tan Google adsense account siam dan - YouTube kaltlangin hi chhiar la, tichuan, bul kan tan thei chiah ang.

2. A hmasa berin YouTube-a i sign in hnuah veilam chung lam kila My Channel i click ang a, a chung lama Video Manager i click leh ang a, veilama CHANNEL tih i click leh ang a, Monetization tih lo lang chu i click leh ang a, Account status hnuaia Monetize videos kha click rawh. Tichuan, hei hi a lo lang ang.

3. Ad Formats hnuaia tick tur awm zawng zawng khi tick vek rawh, i induhthawh nasa mai dawn si a. Tichuan Monetize tih lo lang hring va va kha i click leh dawn nia. Ti khan, a zo ta der mai.

4. Video upload apianga monetize chawp zel cchu a buaithlak mai mai a, chuvangin i upload apiang default-a a lo in-monetize theih nan veilam sir Monetization hnuaia Upload defaults kha click la.

5. A sena rin bial chhunga tick tur awm zawng zawng khi tick la, veilam chung kilah save-na tur pawl vat vat chu i click leh ang a, sum lo haw tur chu i lo nghak veng veng tawh dawn nia.

Hriat tur pawimawh te:

1. I YouTube dashboard atang leh i adsense account atang khan sum inkhawl zat a hriat theih a, US $ 100 a tlin hunah chauh i payment thei ang. Adsense account lamah khan payment setting a awm a, payment dan tur chi hrang hrang duhthlan tur a awm. Wire transfer hi a awlsam ber a, bank account number leh thil dang thenkhat dahkhah mai khan, US $ 100 a tlin hunah kan account number-ah India pawisain a lo lut tawp mai a ni.

2. YouTube video i upload-ah fimkhur rawh. Copyright nei reng reng upload lo la, thlalak leh video music/song-ah hnam dang dah lo la a him ber. Tin, thlalak leh video sexy lutuk ang chi te, tualthah buai buaina leh naupang khuaikhem lam hawi emaw ang kha upload suh ang che. Thu i awih loh chuan i YouTube account an paihsak daih che ang a, i hawihil der ang. Ka experience tawh a, copyright awm video ka upload fo avangin kum 2011 April ni 1-a ka siam, ka YouTube channel, US $ 300 ka hlawh chhuah tawhna chu ka chan phah tawh. Sawi nawn leh ang, hnam dang music leh hla reng reng upload lo tawp mai rawh. Copyright nei lo tam tak erawh a awm a, chung chu a hman theih vek thung. I duh chuan search ve la.

3. Sum inkhawl chak tur chuan viewer neih that a ngai. Video upload tam hrim hrim te pawh a tha e. Facebook lama pawt liam mai mai lo khan i upload apiangin i wall lamah thehlar la, a link post thin la, chu chu facebook kaltlanga sum hmuh theih dan a ni mai. A hranpain google product hrang hrangte angin facebook-ah sum a siam ve theih loh! WhatsApp pawh chutiang chiah chu a ni. Video i upload apiangin i group awmna zawng zawngah a link share vek mai rawh. Link share an phal loh leh an remove che ang a, a na lo teih teih em mai.

Harsatna i neih chuan, a bikin payment setting vel khawih thiam lo chuan ka email: tskhupchong@rocketmail-ah emaw, facebook-ah TS Khupchong hi mi rawn contact tawp dawn nia, inthlahrun a ngai lo.

Lawmthu sawina angrenga kan YouTube channel MIZO HOME VIDEOS min subscribe-sak duh chuan ka lawm ngawt ang!

I hausak hunah mi han hre ve reng dawn nia aw...

Google adsense account siam dan - YouTube kaltlangin

Hnam dangte chu YouTube hmanga sum hai lutin mi hausa tawntawah te an chhuak thei a, Mizo zingah ngei pawh sum siam nana hmang thahnem tak an awm tawh a ni. YouTube channel neiin video upload mah se, sum a siam ngawt theih loh. Google adsense account neih a ngai a, YouTube video upload tawhte monetize a ngai bawk a, ngai neuh neuh a awm ve. Chung te chu kan inhrilh hre dawn a ni. Blog lam aiin YouTube lam kan thlur bing zawk avangin YouTube kaltlanga siam dan han sawi ila a tha ang. Blog lama siam i duh chuan Blog atanga sum hmuh theih dan hi i lo chhiar mai dawn nia.

1. A hmasain google account neih phawt a ngai a, i la nei lova a siam dan i hre lo a nih chuan Google account siam dan hi chhiar hmasa phawt rawh.

2. Google account i nei tawh a nih pawhin youtube-ah channel neih a ngai leh a, a siam dan i hre lo a nih chuan Youtube channel siam dan hi chhiar leh bawk ang che.

3. Google account i nei tawh a niha youtube channel i nei tawh a nih chuan, google adsense account siam leh a ngai ta. Youtube Creator Studio dashboard-ah luh a ngai a; dinglam chung ber a kilah i icon kha click la, Creator Studio lo lang kha i click leh dawn nia. Hetiang hian:

4. Creator Studio i click hnuah veilam sira CHANNEL kha i click leh ang a, a hnuai ami ang hian a lo lang ang. Hriat tur chu, i yotube channel hi verify phawt a ngai a; a hnuaia a lema i hmuh ang khuan icon zawna verify tih awm khu i click ang a, i phone number i dah ang a, code number a rawn thawn kha i chhu lut ang a, zo der.

5. A sena rinbial khi Monetization a ni a, a hnuaia Enable khi i click ang. Tichuan, Apply for monetization tih a lo lang ang a, a zawna START tih awm chu i click leh ang a, hei hi a lo lang dawn a ni.

5. Tick tur awmte kha tick la, I accept tih khi i click leh ang. Tichuan, Sign Up for Adsense tih a lo lang ang a, a zawna START kha click leh mai tur a ni. Tichuan, a hnuaia milem hi a lo lang ang.

6. A hranpa liau liauva adsense account siam i duh chuan Create Account khi i click ang a, a tihdan tur a lo lang zel ang. Mahse, chu chu i ka suggest lo vang che, a buaithlak mai mai! Sign In tih khi click tawp mai la, a hnuaia milem hi a lo lang leh ang.

7. Accept association khi i click leh chat ang a, i mimal information (postal address etc.) dahkhah tur a lo lang ang a, i dahkhat ang a. Tichuan, google adsense account chu i siam zo der. Google lamin i adsense account siam chu an la approve cheu a ngai a, a tlem berah channel view hi 10,000 a awm tlin a ngai a, video upload tawh i neih a ngai a, copyright nei video upload loh a ngai bawk a, chungte chu i tihhlawhtlin chuan kar khat vel chhung an review hnuah email lamah i adsense account an approve thu an lo thawn ang.

Tichuan, i video i monetize ang a, awm hmunah sum lo haw tur chu i nghak der der tawh mai dawn a ni! Video monetize dan i la thiam lo cheu a nih chuan, YouTube video monetize dan hi uluk takin i lo chhiar mai dawn nia. Tichuan, lawmthu sawina angrengin kan youtube channel MIZO HOME VIDEOS hi min lo subscribe-sak ve dawn nia aw...

YouTube channel siam dan

YouTube-a video upload thei tur chuan channel neih phawt a ngai a, sum thawh chhuah nana hmang tur pawhin a ngai tho. Chuvangin YouTube channel siam dan i han sawi phawt teh ang.

1. A hmasain google account neih phawt a ngai a, google account siam dan i hriat loh chuan Google account siam dan uluk takin lo chhiar hmasa phawt ang che.

2. Google account nei tan YouTube-ah account neih leh a ngai a, YouTube account kan tih hi thenkhat chuan channel an ti bawk a, a inang deuh reng a, danglamna tlem a awm. A nihna takah chuan google account i neih khan YouTube account i nei nghal a; chumi YouTube account khan youtube video-te kha i duh duh i like-in i comment thei a, mahse, channel i neih loh chuan video i upload thei lo a ni.

3. YouTube channel nei turin www.youtube.com-ah lut la, a hnuaia thlalak ang hian a lo lang ang.

4. Ding lam sir kila sign in tih awm khi i click ang a, i google email leh password i chhut luh hnuah YouTube-ah chuan i lut fel ta phawt. You are now registered with Youtube a rawn inti kuau ang! Tichuan, a hnuaia a lem ang khuan vei lam sira Home hnuaia Channel-ah khan click ang che.

5. Vei lam sirah channel tih i click chuan a hnuai ami ang hian a lo awm ang a, a sena rinbial ang hian, i channel hming tur i phuah dawn a ni. Entirnan, i channel hmingah Mizo Tapchhak te hmang duh ta a, first name-ah Mizo, a hnuaia last name-ah Tapchhak i dah mai ang. Chu chu i zawh veleh rinbial hnuai zawka Create Channel tih khu i click ang a, youtube channel i nei ta!

Hemi hnuah hi chuan i duh leh i channel banner tur te i siam ang a, i duh leh profile picture te i thlak ang a, setting dang kha chu i duh dan ang angin i thlak tawh mai dawn a ni. Channel hming i thlak duh pawhin a la thlak theih cheu va, duh zah zah thlak theih erawh a ni lo. YouTube atanga sum hmu chhuak thei tur chuan video upload-te monetize a ngai a, a tih dan i hriat duh chuan Google adsense account siam dan - YouTube kaltlangin leh YouTube video monetize dan hi i chhiar mai dawn nia. Harsatna i neih chuan inthlahrung hauh lovin facebook lama TS Khupchong mi rawn contact dawn nia. Lawmthu sawina angrenga kan YouTube channel MIZO HOME VIDEOS min subscribe-sak duh chuan ka lawm ngawt ang!

Eng pawh ni se, enjoy YouTube ti phawt mai ang!

Google account siam dan

Google account siam chu thil har tak a ni lo nain, hre lo te awm palh theih a nia, chuvangin i han dah reng reng teh ang. A hmasain eng nge google account siam a tulna tih zawhna a awm maithei. Tangkaina tam tak a awn thei ang. Email kan nei nghal a, blogger-ah blog siam dawn chuan google account neih a ngai a, youtube-ah channel siam dawnin google account neih a ngai a, google adsense-ah account siam dawnin a ngai bawk a, google hnuaia apps leh thil dang dangah hian a ngai vek mai. Tichuan, google account chu i'n siam dawn teh ang.

1. A hmasa berin HETAH hian lut rawh. A hnuaia thlalak ang hi a lo lang ang.

A sena rin chhung ami hi dahkhah vek tur

2. Tichuan, dahkhah tur i dahkhah vek hnuah Next Step tih kha i click leh ang a, a hnuai ami ang hian a lo lang ang.

3. Agree tih i click leh ang a, a zo der. Google lamin an lo welcome var ang che a, continue tih click tur awm kha i click leh ang a, tikhan google account leh email i nei ta a ni. I duh chuan YouTube-ah channel i siam thei ta e.

YouTube channel siam dan i hriat duh chuan YouTube channel siam dan hi i chhiar mai dawn nia. Harsatna dang i neih chuan facebook lamah TS Khupchong hi inthlahrung miah lovin mi rawn contact dawn nia.

Indian film hlawhtling ber Baahubali 2: The Conclusion

Baahubali 2: The Conclusion chu Indian film zinga sum thawk chhuak hnem ber a ni ta! April ni 28, 2017-a tihchhuah hian thla khat pawh la tling lovah khawvel pumah ₹ 8,42,52,65,000 ($ 131 million) a hlawh chhuak nghal a, record ding lai 2014-a tihchhuah ₹ 7,91,01,30,000 ($ 124 million) hlawh chhuaktu PK chu a rawn khum nghal a; US Box Office-ah Marvel superhero Guardians of the Galaxy Vol. 2 hnuaiah a awm nghal.

Theatrical release poster

Baahubali 2 hi an tihchhuah kar khan ₹ 66,24,96,000 ($ 10.3 million) a hmuchhuak nghal a, America-ah No. 3 hauh nghalin Dream- Works Animation 'Boss Baby'  leh Tom Hanks-a 'The Circle' leh hollywood film lar tak takte chungah a awm vang mai. An tihchhuah rual hian US-a hmun thlan bik 425-ah tihchhuah niin chawhrualin hmun khatah ₹ 15,67,153 ($24,364) hlawh chhuak zel ang a ni. Hemi kara No. 1 film 'The Fate of The Furious'  chuan hmun 4077-a an tihchhuahah, chawhrualin hmun khatah ₹ 3,14,537 ($4,890) zel hlawh chhuak ang a  ni. US-a foreign film an tihchhuah tirha hlawhtling ber pathumna a ni a, Chinese films 'Hero' (2004) leh Jet Li-a 'Fearless' (2006) te hnuaiah a awm.

India ramah chuan a release ni April ni 28, 2017 khan Telegu, Tamil, Malayalam leh Hindi version-a tihchhuah a ni a, hemi ni hian India ram chhungah ₹152.6 crore a hlawh chhuak nghal a. Ni thum a ral meuh chuan ₹415 crore a hlawh chhuak der zu nia!

Tin, kan tarlan tak angin khawvel hmun dangah pawh a hlawhtling hle. A tihchhuah ni hian ₹60 crore a hlawh chhuak nghal a, chung zinga ₹30 crore chu US leh ₹16 crore chu UAE-a hlawh chhuah a ni. Ni thum a han ral leh meuh chuan khawvel pumah ₹125 crore a hlawh chhuak tling der tawh a, chung zinga ₹64 crore US chauhva hlawh chhuak a ni zui.  Tichuan, May ni 3, 2017 khan Baahubali 2: The Conclusion chu US box office-a Indian film sum hai chhuak hnem ber a rawn ni ta a, Dangal film, ₹ 79,11,42,150 hlawh chhuak chu a rawn khum ta a ni. May ni 9, 2017 thleng khan he film hian US-ah ₹ 1,08,06,60,000 (USD$16.8 million) a hlawh chhuak tawh.

S.S. Rajamouli-a film direct hi kum 2015-a Baahubali: The Beginning an lo tihchhuah tawh chhunzawmna a ni a, Tamil leh Telegu tawng hman Prabhas, Mahendra Baahubali, Rana Daggubati leh Anushka Shetty te hi a changtu langsar an ni. Baahubali film hmasa zawk pawhin Rs. 6,43,20,00,000 ($ 100 million) a lo hlawh chhuak tawh bawk. Chuti fakauva film hlawhtling chu Wall Street Journal chuan 'Star War of India' tiin a sawi nghe nghe.

Kum 2011-a UN-in a tarlan danin khawvela mihring awm zat hi mi tluklehdingawn 7 (7 billion) kan ni a, he film-a an sum hmuh zawng zawng hi khawvel puma mihring awm zawng zawngin cheng 1 chuang theuhvin kan insem thei tihna a nih chu! Eng le khaw le, ka computer-ah a awm vang tawh a, ka'n en dawn ang e!

Official trailer - HETAH

Torrent download-na - HETAH

I chhiar theih atana buatsaihtu - T.S. Khupchong

feedback : tskhupchong@rocketmail.com

Youtube subscriber ngah ber leh hlawh hnem ber PewDiePie

Forbes chuan kum 2016 chhunga Youtube atanga sum lalut hnem te chu nikum kum tawp lam khan a tichhuak a; chung mi 10-te kum khat lak luh chu a vaiin cheng tluklehdingawn 4.56 (Rs. 4,56,10,32,750) lai zuk ni a! Heng zinga vaibelchhe 97 lai chu pakhatna sum lakluh a ni nghe nghe; kum khat chhung chauh a ni lehnghal a, a pui hem hem hle!

Kum 2016 chhunga PewDiePie sum lakluh hi Rs. 97,04,32,500 lai a ni a, tunah (9th May, 2017) hian subscribers 5,49,57,992 nei tawhin, April ni 29, 2010-a channel a siam atanga tun thleng hian view 15,23,33,84,304 lai a awm tawh a ni. 

 

Swedish gamer Felix Arvid Ulf Kjellberg, kum 28 hi a youtube channel PewDiePie hmangin
youtube atanga sum hai lut hnem ber a ni

 

Felix Arvid Ulf Kjellberg hi October ni 24, 1989 khan Gothenburg, Sweden-ah a piang a. Kum 21 mi a nih kum, 2010 khan a youtube account hmasa zawk 'Pewdie' tih chu a siam a, mahse, a hnuah a password a theihnghilh avangin April ni 29, 2010 khan 'PewDiePie' a siam ta a ni.

Hemi hma hian Chalmers University of Technology-ah industrial economics leh technology management lam a zir a, mahse, kum 2011 khan a bansan tawl mai. "Ka zirlai ai chuan gaming video siam hi ka tui zawk a ni," a ti. Mi tam tak chuan University bansana career atana youtube a thlang chu mak an ti hle a, mahse, tunah chuan a hausakpui ta a ni.

Chutia zirna a bansan ta mai chu, a nu leh pate an lawm lo kher mai. A youtube career thlan chu an duhpui loh avangin, a video hmasa lam siam nana a sum mamawh te pawh chu an pe duh lo va; chumi atan a photoshop art te a zuar kual a, hot dog te zuarin a inhlawh thin. Chutiang bei chho zelin subscriber pawh an pung chak hle a; kum khat lek hnu, December 2011 khan subscriber 60,000 vel lai a nei tling der tawh.

Hma lam panin a kal chho zel a, subscriber 7,00,000 a neih tlin hnuah Nonick Conference 2012, Spain rama neihah thu a sawi der tawh. Nonick hi digital business trend conference lian a ni a, gaming sector leh feature hrang hrangte thlirhona leh zirhona (workshop & presentation) neih thin a ni. Hemi tum hian Felix bakah Microsoft atangin Joshua Williams, Ablegamers Foundation atangin Mark Barlet, Kiip.me atangin Courtney Guertin, Much Different atangin Christian Lönnholm leh Eon Interactive atangin Dante Simpson te'n thu an sawi a ni.

September, 2012 khan subscriber 20,00,000 a nei tawh a, hemi kum October thla khan OpenSlate youtube channel ranking-ah 1-na a ni. Machinima nena hun eng emaw chen an thawh dun hnuah, an thawh dunna titawpin hemi kum December thla khan digital media brand lian tak Maker Studios nen thawhdunna thuthlung an siam.

 

Felix Arvid Ulf Kjellberg-a bialnu Marzia Bisognin chu

 

Felix Arvid Ulf Kjellberg hi YouTube view tluklehdingawn 10 nei tling hmasa ber a ni a, tunah zet chuan tluklehdingawn 15 chuang zet view a nei tawh. TV show lian tam tak aiin thlirtu a ngah zawk a ni. August ni 15, 2013 Smosh lehpelin khawvela youtube-a subscriber ngah ber a ni a, hemi kum December thla atangin youtube lama thlirtu ngah ber a ni nghal. Subscriber ngah ber a ni tum hian Felix chuan, "Kum 2010-a youtube channel ka siam tirh khan, khawvela subscriber ngah ber ka ni ang tih ka ring pha ngai lo," a ti nghe nghe.

Kum 2014 thla khan Maker Studios chuan PewDiePie tan iPhone application a siam a, he application atangin a duh apiangin a video an en thei a, an video duhzawng an dahkhawm thei a, an thiante an thawn chhawng thei bawk. Hemi hnu lawk hian PewDiePie chuan video upload-in, a youtube video-te chu comment theih lohva a dah tawh tur thu a sawi. "Comment ka han en a, a tam zawk chu spam a ni a, a then chu mahni infakna niin a thenin min lo bei vak vak bawk a; chung chuan min tihnual thin a, hmuh tawh loh ka duh a ni," a ti. Comment a khar (disable) hnu hian audience te nen Twitter leh Reddit lamah an inkawm zui a. September thla laihawlah video upload lehin, a online forum pakhat boaarmy.net tlangzarh a tlangzarh a, October thlaah a youtube comment chu approve theih turin a siam ta bawk. Hetih rual hian youtube comment theih lohva a dah khan a hlim zawk tih a sawi.

Kum 2012-a pawngsual chungchanga a fiamthu video (rape jokes) siam chuan sawisel a lo hlawh hle tawh a; kumin (2017) kum tir lam khan Judate sawi chhiatna lam (anti-semitism) hawi video eng emaw zat a siam avangin sawiselna nasa tak a tawk bawk. Wall Street Journal-in a tarlan danin anti-semtism lam hawi video hi 9 lai a nei a, heng zinga video 3 chu a paih (delete) leh a ni. Anti-semitic a nih loh thu sawiin, thupha chawiin insawifiah nasa hle mah se, he thil avang hian hun rei tak a lo thawhpui tawh Maker Studio chuan an thawh dunna a titawp nghal a ni.

Kum 2014 June thlaa Wall Street Journal-in a tarlan danin, kum 2013 khan PewDiePie chuan Rs. 25,86,86,400 a la lut a, PewDiePie chuan hetiang zat vel hi a hlawh chhuah thu Reddit lamah a tarlang zui a ni. Kum 2015 July thla khan Swidish newspaper Expressen chuan PewDiePie production company, PewDie Productions AB chuan kum 2014 chhungin Rs. 48,48,84,750 a lakluh thu a tarlang bawk. Forbes chuan kum 2015 October thla khan youtuber zinga hausa ber a nih thu leh, hemi kuma Rs. 77,59,42,800 a lakluh thu a tarlang.

Tichuan,kum 2016 December thla khan Forbes chuan youtuber zinga khawvela sum hai lut hnem ber a nih thu leh, a kum khat sum lakluh chu Rs. 96,97,50,000 lai a nih thu a sawi ta a. A sum lakluh hi kum hmasa, 2015 lama a sum lakluh atangin 20% laia a pun thu an tarlang bawk.

Kum 2015  khan he gamer hian This Book Loves You lehkhabu a ziak a, copy 1,12,000 lai a hralh thu Nielsen Bookscan chuan an sawi. Hei hi New York Times bestseller list-ah a tel nghe nghe a ni. Tunah hian Brighton, UK-ah a bialnu Marzia Bisognin nen an khawsa mek. A bialnu pawh hi youtuber hlawhtling tak ve tho a ni a, a channel Marzia hi Italy rama channel subscriber ngah ber a ni a, Marzia hian kum 2015 khan a bialpa Felix aiin youtube atangin sum a hai lut hnem zawk a ni.

PewDiePie hi charity lamah a thawhhlawk hle. Subscriber maktaduai 10 a neih tlin khan a lawm nan Water Campaign a nei a, hetah hian a fans 'Bro Army' te chu tanpuina thawh chhuak turin a ngen a; chumi rualin, a campaign video-a view 500 zelah US dollar 1 zel a thawh tur thu a sawi bawk. Hemi tum hian Rs. 2,88,67,072.12 (US $ 446,462) lai NGO pakhat Charity : Water tan a hlawh chhuak a ni. Kum 2014 June thla khan 'Save the Children' tan a channel kaltlangin charity a nei leh a; a sum hmuh tum zat $ 250,000 (Rs. 1,61,66,625) chu chiang taka khumin, US $ 630,000 (Rs. 4,07,44,557) lai a hmu chhuak a ni.

Kum 2016 December thla khan Africa rama HIV/AIDS veite tanpui nan 'Cringemas' livescream chu a huaihawt leh a, he livescream hi ni hnih chhung neih a ni. A ni khatnaah Rs. 1,29,33,060 (US $ 20,000) a hmu chhuak nghal a, a ni hnihna a zawh meuh chuan Bill & Melinda Gates Foundation tan Rs. 8,40,64,890 (US $ 1.3 million) a hlawh chhuak der mai nia! Hei bakah hian World Wildlife Fund tan te, St. Jude Children's Research Hospital tan te charity a lo nei tawh bawk.

Tunah hian khawvela youtube subscriber tam ber lama PewDiePie hnaih bertu HolaSoyGerman (German Garmendia) hian subscriber 3,16,71,304 a nei mek a, PewDiePie aiin 2,32,86,688 laiin a la nei tlem zawk a; PewDiePie hi kum eng emaw zat chhung chu khawvela youtube subcriber ngah ber a la nih hmel. - TS Khupchong