Kum 49 zet an taksain piallei dai a belh hnuah, vawiin Dt. 5th May, 2017 khan Mizo Hnam Martar mi 5-te ruhro chuan a run (Mizo Hnam Run) a lawi leh ta. Thenkhat chu an tisa nen an lawi a, thenkhat chu an nunna nen an lawi a, tuna Hnam Pasaltha pangate erawh chu, Zoramin an ruhro leh an thiltih bak chan kan nei ta lo a ni.
July ni 11, 1968 zingkarah chuan thlam chhunga an awm lai chu vai sipaiho chuan an kah rawn a, kan tarlan tak mi palite hi kahhlum an ni. An ruang hi khaw chhunga phum an phal loh avangin thlawhlaiah khaw mite'n an phum a, hetah hian kum 49 lai mai chu an lo cham ta a ni.
Vawiina Mizo Hnam Run-a Mizo Hnam Martarte ruhro an rawn phurh thlente chu hengte hi an ni:
1. Lt. Lalrinliana s/o Aizika, Ngopa
2. 2nd Lt. Thanseia s/o Liana, Sawleng
3. Pvt. Lalhmingliana s/o Zaluta, Kawlkulh
4. MNV Kapzawna s/o Roseia, Pualreng
5. MNV Romawia s/o Bawichhuana, Zanlawn
Heng martarte zinga mi Pvt. Romawia hi an man hnuah April ni 23, 1968 khan kahhlum a ni a, midang pali - Lt. Lalrinliana, 2nd Lt. Thanseia, Pvt. Lalhmingliana leh Pvt. Kapzawna te hi July ni 11, 1968 zingkar khan kahhlum an ni ve bawk.
July ni 8, 1968 khan Lt. Lalrinliana, 2nd Lt. Thanseia Pvt. Lalhmingliana, Pvt. Kapzawna leh midang thenkhat chu hotute tirhin duty turin Theichangbung khuaah an lut a, hemi hnu hian Theichangbung thlawhhma, 'V' Battalion-a mi Rohmingliana te thlawhhma thlamah an riak a. Hetih lai hian North Hlimen lama awm Assam Rifles ho chuan an chanchin an lo hre tawh a.
 |
| Lt. Lalrinliana |
Romawia hi hemi hma April ni 23, 1968 khan Theichangbung khuaah ril tla hnuang khawpa kah niin a lo martar tawh a, a kut leh ke phuarin vawk zawnin an zawn a ni. Ani hi khaw chhungah a ruang phum a ni thung. A ruhro an phawrh leh hian, a nghawng awmna velah electrict hrui (wire) pathum invet kual a lo awm ngat a, chumi hmang chuan an hling ni-ah an ngai. He wire hi Mizo Hnam Run-ah dahthat nghal a ni nghe nghe.
Theichangbung khua hi a awm tawh loh avangin an ruhro awmna chiah hriat a harsa tawh a, a awmna hria te pawh an upat tawh avangin a hmun thleng thei an awm tawh lo. A phumnaa tel Pu Rammawia, North Hlimen khuain a awmna sawiin a thlan awmna chu an hre thei ta a, hlawhtling takin an ruhro chuan Hnam Run a lawi lut ta a, a bik takin an chhungte an lawm hle. 2nd Lt. Thanseia chhungte atang thusawi pakhat phei chuan, "Tunah tawngka hmang ringawtin lawmthu sawi thei rih mah ila, kan hma lam hunah tawngka ringawt lovin lawmthu kan sawi ve ang," a ti hial a ni.
 |
| Pvt. Lalhmingliana, rambuai hmaa a thlalak a ni |
Lt. Lalrinliana hi rammu tura a chhuah dawnin a pa chuan sut bulah puan veng chungin, "Ram leh hnam tan i chhuak dawn a ni a, thih thlengin awm ang che," tiin a thu a chah a, a thuchah ang ngeiin, thih thlengin a awm a, a pa nen hian an inhmu leh tawh lo.
Pvt. Lalhmingliana te chhung atangin a nau Pu H. Lalmawia chuan thu a sawi a, Pu H. Lalmawia hi 'L' Battalion-a mi a ni. Ram buai tirh te kum 1966 khan anni unau thum hi rammu turin an chhuak a, an chhuah ni atangin vawi khat mah an inhmu leh ta lo. Pu H. Lalmawia ber hi a vannei a, a u Pvt. Lalhmingliana ruhro a hmu thei ta zawk a ni. Ani hian, "Ka thih hma loh chuan ka MNF ang," a ti nghe nghe.
Martarte ruhro hi lak tur a la awmin ka ring a; mi thenkhatin 'martarte ruhro hmangin politics an khel' tiin an sawi fo va, hei hi a tha lo hlein ka hria. Martar chhungte tan pawh thu ngaihthlak nuam lo tak a nih ka ring. An chhungte hian an phumna hre mah se, anmahni maiin tih ngaihna an hre lo va, chutih laia MNF lamin a la buaipui reng hi an lawm em em zawk a; an ruhro lak a nih hian a lawmpui thei lote pawhin ngawih lo chuh mai sela, a tha hlein ka hria.
0 Comment to "Martarte thisenin min au e!"
Post a Comment
Eng nge i ngaihdân?