Indian crypto hma lam hun a thim em?

Kan hma lawka Parliament thlasik thutkhawmah Private Cryptocurrency khap (ban)-na tur bill put luh tur thu, Lok Sabha bulettin-in nimin, Dt. 24th November 2021-a a'n tar lang meuh chu, cryptocurrency hrang hrangte hlutna nasa takin a tlahniam hlawm a, India crypto exchange lian ber WazirX-a an crypto list ho phei chu a sen thup hlawm a, 10-20% velin a tlahniam fur a, cryptocurrency hmasa leh lian ber Bitcoin pawhin tun thlaa a hlutna hniam ber hun a thleng hial a ni.

Hei hi a chhan chu, bill put luh a nih chuan pass ngei a ni dawn a ni tih a chiang a. Chuvangin India-in crypto a khap ngei dawn a ni tih ringin Indian user mi vaibelchhe 10 chuang zet chuan an crypto invest sa kha an hralh ta chur chur a, mi chuti zatin thawklehkhata an han hralh tâkah chuan market a crash ta lo thei lo a ni. Twitter lamah pawh a trend nghal chur chur a, a thenin Modi sorkar chu ânchhia an lo lawh bawrh bawrh bawk. Tunah erawh ngai a rawn awh (recover) chho mek zel thung.

Chutiang a nih laiin thenkhat chuan, 'private cryptocurrency' tih a nih avangin a zawng zawngin an khap dawn lo an ti bawk a. Private cryptocurrency ho chu blockchain transaction pawh hmuh theih loh, user ho wallet balance leh address pawh hmuh theih loh ho hi a ni a, hengho hian black money chalai nan leh thuhruk nan te, rawlrala chetna lama contribution neih nana an hman thin avangin security thilah sorkarin a khap ta mai ni te pawhin a lang. Bitcoin leh cryptocurrency lar deuhte erawh 'private' a nih loh avangin khap zingah a tel lo tura ngai pawh an thahnem hle.

Bill-a tarlan angin, sorkarin a khap hnua ti lui hremna pawh a na dawn hle a, lungin tàn leh pawisa chawitir tur pawh a tlem chhe lo hle. Chutih rualin, sorkar hriatpuiin digital currency siam chhuah tura rawtna pawh hmuh tur a awm thung a. Hei vang hian sorkar laipui hian cryptocurrency zawng zawng hi a khap bur dawn lo tih erawh a chiang viau a, crypto technology hrang hrangte pawh sorkarin a rawn hmang zui zel dawn tih pawh a hriat theih.

He thil avang hian Indian crypto investor-te chauh an buai lo va, Indian exchange lar tak tak WazirX te, Coinswitch Kuber te pawh a ruk tak chuan an buai ve hlein a lang. Sorkar hian statement mumal tak a la nei lo va, chung exchange liante pawhin rinthu an la insawisiak laih laih a, thil kal dan tur chu a la chiang zel ang. Reserve Bank of India (RBI) hian cryptocurrency hi a làwm lo sa ve hrim hrim a, fiat currency (sorkar tihchhuah pawisa) aia a lansarh hlauh leh duh lohna vang te pawh a ni mahna.

Cryptocurrency investor te i lo nih ve chuan lo hmanhmawh hralh kha a ngai hran lo. Sorkarin tuna i crypto invest kha a khap zinga a tel a nih pawhin, chhuahna hun remchang a siam ngei dawn a; tin, bill put luh tur chauh a la ni a, Act a nih hma chuan hman theih a la ni chuang lo va. Muangmarin ngaihtuahna kan la seng tlang zel dawn a nia. Sorkarin lo khap bur pawh ni se, exchange lian ho hi an awm mai mai lo turah ngai ila, Supreme Court thu te nen lam kan la hre zui zel lo vang tih sawi theih a ni lo. Indian crypto hma lam hun a êng hle tia sawi erawh a harsa ta deuh.

Sorkar laipuiin cryptocurrency a regulate tur thu hi a rik rêt rêtna chu a rei tawh a, heti zawnga an rawn her erawh kan lo rin lâwk lem loh a ni. A ruk têa thianghlim tak sia cryptocurrency hmanga hausak thut tum nak alaia hetiang thu thar kan han hria chu 'hausak thut tum leh lo mai ang' tih mai awl tak a ni e!

I duh leh hei hi lo chhiar ve hrim hrim a:
Cryptocurrency chungchang ve thung

'Ani Ka Lo Ni' thlirna by Debbie Rinawmi

He hlahril bu ‘Ani Ka Lo Ni’ hi T.S. Khupchong ziah a ni a. Hei hi a lehkhabu tihchhuah sawmna a ni . Thawnthu lamah hlawhtlinna tam tak a lo chang tawh a, nikum lama rambuai behchhana thawnthu a tihchhuah ‘Zalenna Zawngtu Zalna Zoram’ tih chu Mizo Academy of Letters Book of the Year Top 20-ah a lang pha a ni. Mi tam tak chuan Tsa hi thawnthu ziaktu ang chauhin an hre maithei a, ‘Ani Ka Lo Ni’ tih bu erawh hi chuan poet tha tak a nihna a tarlang thung. Phek 114 a chhah niin a hla te hi huang khata sawi chi an ni lo va, chutiang taka hausa chu a ni. Chutiang te a nih avang chuan hla pathum chauh han chip zui lawk ila:

1) Vai Val Valzin: He hla hi Nissim Ezekiel-a hla ‘Goodbye Party for Miss Pushpa TS’ te nen hian huang khatah a dah theih ti ila kan sawi sual kher awm lo ve. Nissim Ezekiel-a hla hi Indian hovin English tawng an hman dan tih-elna hla a ni a. A English hman danah Indian tih phung a lang tel a, English tawng thiam pangngai tak tan chuan a nuihzatthlak a, a nuihzatthlakna man tur chuan English tawng thiam a tul a ni. Hetiang chiah hian Tsa hla pawh hi Mizo tawng ‘second language’-a hmang angin a ziak a, a sawi tum chiang tho mah se, a kim lo va, Mizo tawng thiam pangngai tan chuan a nuihzatthlak lo thei lo a ni. Hetiangin-

‘Sihal leiah kua nei,

Chunglengin bu nei…’ tih ang te hi.

A nuihzatthlaknaah hian a tawp mai lo. Mihring nuna zawhna awm chu a rawn tarlang a, a thuk hle. Chang thumnaa-

‘Abdula tirsia zawng,

Islam cooker sia zawng;

Nangin eng nge zawn?’

tih bawr te hian ‘existentialism’ a pawl pha kan ti thei ang. Jean-Paul Sartre leh Soren Kierkegaard te thurin (philosophy)-a mimal zalenna, duhthlanna leh mawhphurhna a pawimawh ang hian Tsa hlaah pawh hian mi tinin zalenna kan duh avangin zawn kan nei a, chumiah chuan kan inthurual em em a ni tih te pawh a lang a ni.

2) Tawpna Bultanna: He hla zet hi chu a thupui atang reng hian a thukin a khal sa em em a. Chang tin mai hi zawhnaa a tawp rual hian chhanna a nei nghal em aw a tih theih a, a chhiar tu azir te pawh a ni mahna. He hla hi Black Sabbath album ‘13’-a ‘End of Beginning’ tih hla nen khan inanna deuh mai an nei a. Kha hla kha ‘technology’ in mihring nun a ‘clone’ chungchang a ni awm e. Chutah chuan lang lo ruamah mihring nun hlutna zawh a ni a. Chang khatnaah pawh ‘Is your life real or just pretend?’ tih a ni reng a ni. He hla phuahtu te zinga mi leh tingtang perhtu (bassist) Geezer Butler chuan, “End of beginning” hi technology-in mihring nuna ram a lak nasat turzia chungchang a ni,’ tiin a sawi. Hetiang chiah hian Tsa hlaah pawh hian mihring taksa chu mawi takin chei ve thin mah ila, tawih leh ral mai tur a ni a, chuvang chuan mihring nun leh mihring khawvel hlutna thu-ah zawhna a siam ta reng a ni. He zawhnaah hian a aia thuk zawk sawi tel a nei a. Ral leh mai tur a nih avangin he khawvel thil a ‘bera’ neih hi a fin thlak lo va, khawvel taksa ral huna intan tur thlarau hmun/khawvel atana inbuatsaih hi a pawimawh zawk tih thu hi he hla laimu hi a ni kan ti thei awm e.

3) Tawrhna Thuthang: He hla hi phek 25 laia sei a ni a, Mizo irawm chhuakah chuan a sei pawl tak a nih a rinawm. ‘A ni, ani ka lo ni’ tia a tawp avangin a lehkhabu hming kengtu ti te pawhin a sawi theih awm e. A bu hming han chhiar mai pawh hian ‘ani’ chu tu nge a nih a eng ang mi nge a nih, eng tiang fakaua pawimawh nge a nih tih hriat a chakawm hle a, chu ‘ani’ chungchang chu tlar 503-ah sawiin tlar 504-na (tlar tawp ber) chhiar thlen meuh chuan mittuiin biang a tihuh kawi nuai thei tawh a ni. ‘Ani’ hi a chak a, a harsatna tawh zozai te hi a tam em avangin thawnthu a ang hial a, chuti chunga dinhmun tha chang thei khawpa a thawkrim te hian Pathianin mihring tea chakna leh theihna a pek nasatzia a tilang a, lehkhabu hminga a hmang hial hi a awm takzet a ni.

‘Chu hmuna Samari iang mi tha kha’, tih te

‘A dawng asin, Lersia iangin…

Riakmaw a iang, thingthiang a vang’,

tih thu te hian a hla kalhmangah tunlai taka phuah siin Kristian sakhuana leh Mizo hmanlai thawnthu (folk literature) rem taka a suih zawmzia a tilang a. Chumi kawngah pawh chuan he hla hian pawimawhna tak a nei a ni.

Heng hla tarlan te pawh hi phek khatah mai chuan a nihna pawh sawi kim zawh sen a ni meuh lo va. Heng bakah hian Covid pual hla te, kohhran huang chhunga seng luh chi loh te leh hawi dang tam tak a awm a ni. A phek hmasa berah hian ‘Hei hi thinlung luangliam infin khawmna hmun a ni’ tih a awm a, a chhung thu pawh a khaikhawm tha viauin a lang. Chutih rual chuan phek tawp berah hian ‘Khawvel hi’ tih hla a awm a, chhiar a hahthlak a, a zahthlak rualin, a dik em em bawk si. Hla zawng zawngte hi a êng zawnga thlir theih an nih rualin a thim zawnga thlir chuan mihring nun chhungril that lohzia te, buaipui loh tur kan buaipuizia te, hlutna nei lo zawk kan ngaihhlutzia te a ni kan ti thei ang. Chumi thlirna atang chuan hla tawp ber pawh hian a khaikhawm tha em em tho bawk a ni.

He Hlahril bu tha leh changkang tak hi lo chhiar ve la, 'ani chu ka ni em?' tih hriat tumin mihring nun hi hlahril hmangin i han bihchiang teh ang aw...

(Debbie Rinawmi hi kan thiannu a ni a, tunah hian NIT Mizoram-ah Ph.D a ti mek. English poetry bu hnih lai mai a tichhuak tawh a ni. Hetianga thlir letna tha tak mai a ziak hi a chungah ka lawm tak zet a ni). 

Chalfilh Chhîp Chuan Chanchin

Chalfilh tlang lam hi khuaa haw apianga kan paltlang thin mah ni se, a tlang chhip Vanzau hi vawi khat mah ka la thleng lo va. November 19, 2021 (Inrinni) khan kan zirlaite (MZU Mizo department III Sem) rualin ka tel ve hlauh va. Kan naute hi an felin an zuan a zang a, an viak pawh a tha viau mai a, an la thalai seng sawngin Mizo department zirlai tih takah an rilru pawh a zau va, an bula awm hi a nuamin a hlimawm a, an la ngaihawm dawn chauh mai. MA an zir tirh atanga online-a class la nei ngar ngar, a taka la inhmu hlawm bar lo an ni a. Tun thlenga a taka hmel la inhmu lo te pawh an awm âwm e. Chung rual thenkhat chu a takah an han inhmu khawm ta thut a, nuam an tiin hlimawm pawh an tih ngei ka ring. A hmun hi a thengthaw nuam hrim hrim a, khaw thlirna a tha a, ram a lang zau va, ka hmun ngainat chi tak a ni.

A tlang zawlah hian Tourism Department in khualbuk (Tourist Lodge) an sak, enkawl lohva hun eng emaw chen awm tawh tih hriat tak hi eng emaw zat a lo ding thing rup a. A chhung ka han lut chhin a, a bang zawng zawng mai chu thil ziakin a râng khat vek tawh a. Mizote hian chawlhbuk leh ram hnuai in bang remchanga thu ziah ran (chumi khami love chumi khami tih vel) hi engtikah tak changkansan thei ang i maw!

Khanpui khaw mi thenkhat sawi danin, Chalfilh tlang chhipa Tourism department-in in an sak chiam avangin pawl thenkhatin an khing a. Chumi thubuai chu kal mekin, chuvangin khualbuk pawh enkawl chhunzawm lohvin a awm rih a ni awm e. Tlang chhipa Tourism department chu Tuizem dah te pawh a bovin a chhe zo tawh a, YMA tlawmngaiin chutia thamral mai mai tur chu rem ti lovin tuizem leh hmanraw thenkhat chu an kawl tha niin an sawi.

A chhehvel a phûl cham duai a. Kan kal ni ber kherah a tlawhtu pawh rin ai takin an lo thahnem a, a khawharthlak loh hle. Chung phulte chu hun rei tak kal taa sorkarin kang damdawi (jatropha) chinna tura an vah fai niin an sawi a; a nawm erawh a nuamin a thawventhlak phian mai.

Zan khat riak tura puan in (tent) nena kal kan ni a. Kan kal ni-ah chuan khua pawh kan chuan hman ta lo va, thlabial zan a nih avangin zanah thla a êng hle mai a. Phul hmunah mei tuahin, tingtang nen kan zai a, ar kan hem bawk a, thla êng lawmna hmun sáng tak leh nuam ve tak chu a ni. A tui fal chu tlaivar deuhthawin an zai a ni.

A tlang chhîpah tak mai chuan khaw thlirna ram tawh hi a awm a, kum sang tam tak kal ta atanga lo awm tawh leilung leh ramngawte erawh chuan ram leh hlui tik ni reng a nei chuang lo. Lungleng mi ngang hi ka ni a, chu khaw thlirna hmun sángah chuan khua ka chuan a, Pathian thil siam khuarel (nature) mawi tak tak mai te chuan ka lung a dum zo ngang mai.

Khawchhak lamah Phullen cham duai chu a lang hnai hle a, a chhak lawkah Mawmrang tlang chu tihbaiawm zetin a lo to lur mai a. Chumi zawn phei zelah Phuaibuang, Khawlian leh NE Tlangnuam khua te chu a lang dêt dêt a. A chhak lama NE Khawdungsei tlangdung bakah Lengteng tlang te pawh hmuh phakin a awm.

Tlang leh mual tin maite chu a inthuah tep a, chhim leh hmar zawngin a thlur sung a. Khua a tha a, ni a sa vawl vawl a, kawlkil inzam phei raih mai leh a chung zawna romei zam riai riai, thli thawin a chhêm lên delh delh te pawh a lang chiang ngang mai. A hnuaia ram te chu chu thlirna hmun atanga a hlat dan a zirin a rawng pawh a inang lo nuk a. A hnai deuh, thing leh maute pawh hmuh phaka thliar phakna hmun te chu a hring tak a; tlang leh mual hla deuhte chu a hringduk thung a, chu aia hla lehzual, mual inrin raih te chu a lang paw phát thung a. Chung thilte chu khuarel ngaina tan chuan hmuhnawm tak a ni.

Tlang inkhawh lianpui pui inkarah chuan Mizoram lui lian tak takte luang mah se, chu hmun atanga han hmuh mai theih erawh a awm lo thung. Chung hmun te chu zingkar, ni chhuah hmaa tiauchhumin hleuh châkawm taka a bawh khah vek a ni tih erawh a rin theih tho mai. Hla phuah thiam niha han luanliampui zawih zawih châkawm tak a ni.

Chu hmun atanga chhukin a kiang ramhnuai thing hmunah kan lut a. Pathian thil siam thingin a pek chhuah oxygen chu thlahlel takin ka han hîp vang vang a, damna boruak chuan dam man a tiawm ngawt mai. Rannung hrâm chiah chiah mai te chuan nun a tihlim a, a hmun dai raih mai, vawt lam lek lek chuan hah a tidam sawng sawng a. Khawvel thiamna leh changkanna kalsana chu hmun, khuarel loh reng reng hmuh tur awm lohna hmuna han luh chu ngaihtuahna pawh a thui a! Materialism thlipuiin na taka a nuai mek, zalênna leh hahdamna zawnga hmun zalên leh thawveng pan tawk tawkte tan chuan chhanna tling a tling.

Mizote hi kan vannei a, kan vannei tih erawh kan inhre thiam tawk lo niin ka hre thin. Mual inkhawh zui leh tlang inthuah tep, inthliar sung mai mawi em em mai te, khâng râng ruk mai leh ramngaw hring dup mai te hi phaizawla cheng hnam dangte hian hmuh nuam an ti a, hmuhnawm an ti bawk. Keini erawh chuan nitina kan hmuh chamchi a nih avangin a mawina kan hre pha zo lo va, kan ngai neih thin niin a lang.

Hei hi hriatrengna lo chang se, heti chinah ka rek bung rih ang e.

Tlang chhipah zirlaite leh zirtirtu thenkhat

Cryptocurrency chungchang ve thung

Internet khawih nasa tak ka ni a, internet kaltlanga sum hmuh theih dan te pawh ka dap nasa hle reng bawk a. He hmunah pawh hian ka rawn post fo mai. Adsense hmanga  sum lakluh dan (youtube leh blog) te, games atanga sum lakluh chungchang te ka ziak tawh a. Tun tumah chuan cryptocurrency hmanga sum lakluh dan hi ka thiam ang tawkin ka rawn dah leh dawn a ni. Kan hriat tur chu, internet kaltlanga inbumna hi a tam em em a, ponzi scheme kan tih ang (chiahpuam ang chi) pawh a tam em em bawk. Hetiang chi hi engtik lai mahin ka rawn ziak ngai lo thung.

A hmasain cryptocurrency kan tih chu digital currency a ni mai a. Sorkarin dan anga pawisa a siam hi fiat currency a ni a, internet lama pawisa (ti mai ila) hi digital currency, cryptocurrency kan tih ang chi chu a ni. Cryptocurrency hi sorkar control ni lovin internel tualzawlah a market hi a vir vel reng a ni. Tisual fe fe an tam tawh a, millionaire mai ni lo, billionaire nihpui te pawh an awm nawk reng a. Hausakpui thei tur erawh chuan dawhtheih a ngai hle thung. A market hi control-tu awm lo, decentralized a nih avangin risk pawh a sang a, 'i hloh ngam zat invest rawh' an ti thin.

Cryptocurrency exchange

Cryptocurrency trading/investment tihna platform/exchange hi tam tak a awm a. Chung zingah chuan Binance hi mi hman hlawh deuh ber niin ram azirin exchange hman pawh a lo dang ve zel a. India ramah chuan WazirX hi hman lar ber a ni. WazirX hian hmangtu (user) maktaduai 7 chuang zet mai a nei a, kumin hian nasa takin hmangtu an pung a, kumin chhung ringawt pawha an trading volume hi $ 21 billion a chuang tawh a ni. WazirX bakah hian kei chuan Bitbns te, CoinSwitch te, Buyucoin te ka hmang bawk a. India exchange lovah chuan Binance, gate.io leh BitMart te hmangin duh huna hman theih turin Coinbase, Crypto.com leh Hotbit-ah te verified account ka nei tel bawk. Crypto trade lam la ti ngai lo, beginner tak tak tan chuan CoinSwitch hi hriatthiam a awlsam ber a, WazirX te pawh hman a nuam hle bawk. Kei pawhin hun eng emaw chen chu CoinSwitch leh WazirX ka hmang ber a, zawi zawia ka hriatthiam ve hnuah exchange dang ka khawih ve ngam chauh a ni.

A tihdan tlangpui:

A hmasa berah chuan exchange eng emaw ber download a ngai phawt a. WazirX-ah bul han tan dawn ta ila. An website-ah leh an mobile application kaltlangin account a siam theih ve ve a. Phone atanga khawih kan nih tlangpui ka ring a, playstore-ah emaw an application i download ang a, account i siam ang a. KYC (document pawimawh hrang hrangte) i submit fel vek hnuah an approve chuan trading i ti thei tihna a ni. Chumi hnuah pawisa i deposit ang a (UPI hmangin a awlsam). Pawisa i neih veleh cryptocurrent/coins/token hrang hrang lei tur awm kha, i lei ang a, a hlutna a san hunah i hralh leh ang a, a zo der. Pawisa hi i bank account atanga deposit tur a ni a, duh hunah hunah withdraw leh mai theih a ni bawk. 

Sum hmuh dan:

Cryptocurrency hrang hrangah chuan Bitcoin (BTC) hi kan hriat lar ber a nih ka ring a, bitcoin pakhat hi cheng nuai 35 bawr vel a ni tawh a. Kum 2010 vela Bitcoin pakhat Re. 1 hu a nih laia lo nei nual tawh, tun thlenga hralh lova la dah ngar ngarte chu an hausa hle tawh dawn tihna a ni. Bitcoin bakah Ethereum (ETH) te, Binance (BNB) te, Cardano (ADA) etc te hi a lar deuh an ni bawk. Chung cryptocurrency i duh ber i lei kha, i dah ve ngat ngat ang a, i leina value aia a san hunah, i duh hun hunah i hralh leh mai dawn a ni. A then chuan tum khata a value (hlutna) a rawn san vak hian an hralh mai thin a, a then erawh chuan a kum tel an dah ngat ngat mai a ni. Entirnan, tunah hian ADA hlutna hi Rs 200 vel a ni a. Rs 1000-in ADA panga i lei theih a. Chu chu dahtha char char a. A hlutna Rs 10000 vel a nih hunah i hralh chuan Rs 50000 i nei tihna a ni a Rs 1000 i invest a, Rs 50000 a lo let dawn tihna a ni. Chumi tur erawh chuan teirei peih a ngai thung.

Eng te nge lei ila tha ang?

Coins tam tak a awm a; chung token te chu an website-ah lutin han zirchiang la, internet-ah mi review/analyse-na te han chhiar la, tha tura rin ber lei mai tur a ni. A chunga a lar zual tlem azawng ka sawite hi a hlutna a sang hlawm viau tawh a, Bitcoin phei chu coin pakhat lei tur ringawt pawhin hausak sa ve deuh a ngai. Mahse, pakhat lei tlin kher a ngai chuang lo va, i pawisa neih leh i phalna zat zat khan lei mai tur a ni. ADA ang chi te hi kum 10 chhung hralh lova i dah ngat ngat peih chuan i hausakpui maithei e! Tin, coins hlutna la hniam te te, Re 1 pawh la tling lo ang chi te hi pawisa tlemtein a lei teuh theih a, i chhelnain a tlin chuan chutiang te chu leiin kum han chhir liam ve zat zat la, a fuh maithei.

Engtin nge a value a san?

Ka hre thûk lutuk lo va, ka hriatthiam chinin han sawi ta ila. Coins kha market tualzawlah a trillion tel mai an rawn chhawp chhuak rum mai a. Coins thenkhat chu a siamtu, developer-te'n supply tihtlem nan an burn (tiriral) thin a ni. Market tualzawla Coins an rawn chhawpchhuah kha leitu an tam poh leh a hlutna a sang ve zel a. Exchange hrang hrangah lei theiha a awm hian leitu chu an tam mai a ni. Market-ah supply a tlem poh leh a value chu a sang ting mai a ni. Thil chu a vanna apiangah a hlutna a sang ang deuh hian.

Lei leh hralh ringawt lo deuhvin investment tihdan phung hi chi hrang hrang a awm a. Binance angah te chuan coins kan lei kha kan stake thei a; ni 30 chhung emaw, 60 emaw, 90 chhung emaw kha hralh theih miah loh leh khawih chet theih miah loh turin kan dah (lock) a. Chumi chhung chuan kan coins dah kha a pung (interest) a lo awm ve a. A tha ve riau. Hetiang lo deuh pawh investment tihdan phung dang dang pawh a awm a, chungte erawh chu ka la tih ve loh avangin sawi lo mai ila a tha awm e.

Fimkhur a ngai

Coins/token lem hi a awm ve thin a. Chungte kan lei loh nan chuan exchange rintlak (Binance, Coinbase, WazirX ang chi te) chauh hman a tha a. Tin, exchange hack hi a awm ve fo avangin exchange nazawng hi chu hman rim lutuk loh a him awm e. Tin, trading/investment chungchang hi ziah ringawt chuan a chiang tawk lo thin a. Kan thiam loh chu internet-ah a tihdan zawn nachang hriat a tha hle. A bikin youtube lamah tutorial video a tam a, hman tangkai mai tur a ni. Thiam loh chu risk chi a ni lo va, a tihdan an siamte entawna tih hram hram a tha.

Han sawi tak tak dawn chuan a kaihhnawih a tam a. Trustwallet/metamask wallet tih angreng te, Binance Smart Chain tih angreng eng eng emaw a tam em em a. Exchange pakhat atanga exchange danga transfer/deposit/withdraw dan te, P2P hmanga pawisa dah luh dan te, spot trading tih angreng te sawi tur tam tak a awm. Chung thil neuh neuhte chu kei pawhin ka thiam nghal chuang lo va, tun hnaiah youtube tutorial te nen beiin zawi zawiin ka hmang thiam ve chauh a ni a, sawi zui tawh lo mai ang.

Kum eng emaw zat hnua ka lo hausa thut a nih chuan, a thianghlim a ni tih min lo hriatsak dawn nia...hahahaa

Ti ve turin thu ka râwn hauh lo che a, i lo ti ve duh a nih erawh chuan heng ka referral link hmang hian exchange-ah i lo sign up ve dawn nia. (Exchange i hman duh khu i click ang a, ka referral link-ah i lut nghal ang).

Binance

WazirX

Gate.io

BitMart

Bitbns

Hotbit

Ka saptawng thiam loh thu

Han inphawrh mualpho a ni em lo vang a, HSLC leh HSSLC kha tha taka pass chu sawi loh, 3rd division-ah ka inhlang kai tawk tawk kha a ni a. Marksheet hluite han en let chang phei chuan mark hmuh chhiatna ber pawh English subject a ni chho zat zat mai bawk a! Saptawngah na na na chuan chhuan tur ka ngah lo khawp mai. 'Sikul chhe chhuak' intih em chu ka ngam chuang lo, ka zirna sikula chhuak mi thiam tak tak an awm tho avangin.

Zirna lamah chuan, keimah rau rauva saptawnga hma ka sawnna ber chu MA kan zir lai kha niin ka hria. Miss Ruth-i hian min zirtir thin a, kan hriatthiam awl tak turin a hrilhfiah a, loh theih lohvin English-in presentation kan ti thin bawk a. Thiam tak tak awm nual mah se, dan naranin kan harsat tlâng a, kan class kan inhre chiangin kan inngam tlâng bawk a; thiam lote pawhin zak miah lovin kan hmang miah miah ngam a, kha kha a lo tha ngang mai.

Chhiar lamah te lunglen hnêm tawk hrethiamin, tawng lamah pawh a bo lo tawkin hre thiam mah ila,  inchhuan a la har hle a ni ang, mi English-a tawng hleithei lo ka hmuh hian ka nuihzat thei tlat lo. College kal lai vel khan monthly magazine-a chhuah turin English story te, English news te chu dictionary nena tangkawpin kan let ve thei mai a, Mizo to English lehlin erawh a lo namailo hle thung! Ka la uang lo zel a ni ber.

Kum 2019-2020 chhung khan 'Last Shelter Survival' tih games hi ka khel nasa a. Mizo khel an awm mang lo. Chutah chuan hnam dangte nen thiam loh ang angin nitin English-in kan chat a, tuman min nuih ngai lo. Khami chhung khan min nuihtu tumah ka tawng lo. Kum khat tal tap nitina chat nana hman chuan hmasawnna min pe nasa hle. Ka ngaihtuahnaah a lo awm a, keini Mizote anga English thiam lo leh hmang dik lo innuihzat nasa hi a hnam angin an awm ang em aw, tih hi.

Kan pianpui tawng pawh ni lo, hnam dang tawng kan hman suala kan innuihzat hian hmasawnna aiin inkiltawihna a thlen zawk niin a lang a, hei hi chu sim thei ila a duhawm takzet a ni. Kan tawng hman sual ber hi ngaimawh si lo, hnam dang tawng hman suala nuihza tlat kan ni fur a nia. Kei ngei pawh hi ka bâng lo maithei. Tawng hi hnam anga min phuartu, hnam min nihtirtu ber a ni a, ngaih pawimawh hmasak berah neih ila a tha awm e. Saptawng thiam pawimawhzia a takin kan hre ta zel a, kei erawh chuan, kan tawng, Mizo tawng hi a hmasa berah dah ila ka la ti fan. Kan thiam ber chu Mizo tawng ni se ka la ti hram duh a ni.

Vaipain pai deuhvin Mizo tawng a hmang a, i nuih em? Nuih chànah i chang lo vang a, an vaipui Mizo tawng thiam zawkte pawhin an nuih ka ring lo. Keini chu kan ni ve tlat lo alawm. Eng tawng pawh hi, nal taka tawng zat zat thei tur chuan hman tam (tawng tam/practice) a ngai a, a ziakah te, a chhiarah te harsatna nei miah lo pawh ni ila, tawng nana kan hman ngai loh chuan tih hleih theih a ni chuang lo. Tuna Mizo zinga saptawng hmang nal tak takte hi zirna lamah te, rualpawlna lamah te, hnathawhna lamah te an hman than vang a ni. Paite tawng hi ka hrethiam vek a, ka chhiar thei bawk a, mahse, tawng nana ka hman than loh avangin tawng ka harsat hle a ni.

Sap pasala nei sawi duh lovin, vai pasala nei kan sawisel sup sup a, tih te kan sawi chawk a. Chu mai a ni nang, vai tawng thiam lo nuihzat duh miah lo, saptawng thiam lo nuihzat leh tlat hi kan ni a. Sap hi kan lo ngainain kan lo van hmangaih tak em! Chanchintha rawn pu luttu an nih vang ringawt chu a ni lo deuh maithei. Zalen taka kan pi pute an lal laiin, saphovin min tibuai a. Kan ram an rawn nêk a, tharum hmangin min hnehchhuh a. Khatah khan kan ram an awp a ni satliah lo, kan hnam tih dan phung leh nun dan phung te (culture & tradition) kha min awp behsak a. Anmahni style ngatin Pathian min biaktir a, sakhuana lam chu thu hranah dah ta ila, an ram zauhna hmanruaa min hman rualin an tawng zauhna hmanruaah min hmang tel a. Kan ram an chhuahsan tawh hnuah pawh min la awp dawn chauh emaw tih mai tur a ni a, min awp beh dan chu thûk tak a ni. Tun thleng hian kan la tal chhuak hleithei lo chu a ni e.

Tun hnaiah kan issue-in a zir bawk a, national media lama inlante'n loh theih lohvin  saptawng an hman a ngai a. Thiam nal taka an hman theih chu duhthusam ni tho mah se, thiam lo chung chung pawha an fight kha kei chuan ropui ka ti. Hmasawn turin theihtawp erawh i chhuah zel ang u.

Keimah kha

Kawlvalenchham thleng tawh mah la,

Mual za tam pen bo tawh mah la e,

Nuihzat leh cheksawlh bak i hlawh loh kha.

Deu leh endawng kha i tan eng nge sawtna?

Tawrhna hnuchhawn duhin tawrhna bawk i hmachhawn a,

Hnuchhawn hringnun thimin a hmuak che.

Siam ṭhat theih loh tihsual a awm ngai em ni?

Dai tawh lo la, i tlûk hlen hmain.

Hma lam pana i mittui a tlâk chuan,

Lo lêt leh la i nui dawn lo vem ni?

Hnungtawlh hreh mi i nih ka hria a,

I tan inher a tâwk, hma lam i hnuchhawn theih nan.

Hetah i tân chawimawina a awm,

I tân ropuina a awm a, hnehna a awm;

Zahawmna kawngka pawh a inhawng e.

Kawng khar hnan i la ni lo va,

Nghillhin i la awm hek lo.

Ka hmu che, sawta keimah kha!

Mala i awm ka hmu che a,

Lo kir la, lo ni leh la, keimah kha.

Vanglai thlahna

Naupang tê nih laiin harsatna rapthlak tak takin min nuai a, eng harsatna nge sawi dawn ila, ka la sawi duh rih loh tam tak sawi a ngai dawn si a, chumi turin ka la inpeih si lo. Tleirawl tê niin retheihnain min bâwih a, mihring nuna a nuam lai leh hlimawm lai ber chu that lai hun hi a ni a, chu huna vanglai nun hman kan duh vek a ni. Chu hun tha zawng zawng chu retheihna nen ka hmang zo a ni ta der mai.

Ka that lai hunah hian ka duh zawng leh châk zawng tih ka duh a, ka awh zawng neih ka duh a. Ka nih duh nih te pawh ka duh. Midangte pawhina awlsam zawka hlawhtlinna an chan ang hi, chan ve ka duh a, ka tana a rem lohna bik tur ka hre lo. Mahse, rem lo bik emaw tih mai tur a ni. Suangtuahna ka han neih ve te, beiseina ka han neih ve chiam te pawh hi engmah lova kal ral chu a tam zawk a ni.

Mi tawn loh ka tawng e ka ti hauh lo va, mi tawh loh tawk lah ka ni bik lo. Mi tawn tawh hrehawm lam hlir tawnga a hlimawm leh nuam lam mi tawn tawh tho tawng thei lo nih bik erawh, hriatthiam a harsat chang a tam mai. Eng pawh ni se, beiseina erawh a thi lo va, kei erawh chuan heti hian vanglai ka thlah ni mai teh se. Ka vanglai a pelh hunah, ka lawmna ni tur a intan ve tawh mahna.

Tun hi luan chhuah hun a ni

Hripui leng avangin kan inkharkhip leh ta rup rup mai. Nikum, 2020 te kha chuan thingtlang lam a la nghawng lutuk lo va, chawhmeh ilo vel pawh thingtlang atangin khawpui veng thenkhatah te an rawn pe zut zut a nih kha. Kumin zet erawh zawng, thingtlang pawhin an tuar a, khawpui pawhin an tuar, inpuih tawn pawh a harsa ta. Kar 3/4 lai mai kan inkharkhip tawh hnuah pawh positive-te'n contact an la nei dul thei a, heng mi fimkhur lote avangin mi fimkhur theih tawpte pawhin kan tuar ve zel hi a runthlak ngawt mai.

'Chhuanchham leh tanpui ngai chu inhriattir tur' tiin phone number te kan dah a, hei hi ngaihtuah chian a ngai e. Chhuanchhamin awm la, i in-report bik ngût ang em? Mi tam tak tan chuan tanpui kan ngaih thu hi kan thian tha leh hnaivai berte hrilh pawh a harsa asin! Chuvangin, in-report an tlem ang huin puih ngai hi an lo tam ru viau thei. Kan inhuam ta sa sa, kan inpe ta sa sa, heti zawng hian ngaihtuahna i seng chhin ang u hmiang.

Thla khat vel zen zawn kan inkharkhip hnua tanpui ngai tur chu — nepnawi zuar/eng eng emaw zuar/hnathawh mumal nei lo hmeithai chhungkua te, thingtlanga atanga inhlawhfa chawpa mi in luaha khawsa te, pa mal chhungkua (an eizawnna azirin) khawsak harsa takte hi chiang sa a ni a, an in-report nghah kher a ngai lo. An in luahna te hnenah in luah man an pek theih leh theih loh te zawh mai theih a ni a, an ina lutin an fairel bel thleng pawha hawnsak mai tur a ni.

A bik takin mi in luaha mahnia khawsa zirlaite enthla ila. In luah man te hi chu in neitute an fel chuan a bat theih mai. Ei leh in lamah te, bat zawngchhan chi loh tui bill leh electric bill pek tur nei remchang lo te, kar khata vawi khat chawhmeh bazar ni-a kar khat tla bazarna tur nei daih lo te a awm theih a, chhungte atangin buhfai ilo fahran pawh lirthei service a awm tawh loh avangin a inthawn theih tawh loh a ni si a. Chuvangin, anni ang hi zawng chhuakin i ngai pawimawh teh ang u khai.

Thenkhat chuan, in neitute hi in luah man free emaw, titlawm turin emaw an ngên maithei, hetiang hi in luahtu tan hlei hlei a hrehawm thin. Tin, chu bakah in neitute pawh an eizawnna azirin in luah man hi an ei ber a nih chuan, tihtlawm emaw, free emaw ngawt kha thil awlsam tak a lo ni kher lo thei bawk. Chuvangin, kan ngaihtuahna hi ngun takin seng thar ila a duhawm ngawt ang.

Veng thenkhatah chuan an ti a, mi tlawmngai leh inphal, nachang hre deuh chuan LLTF-te hnena a tul apianga hman turin pawisa an remchan ang tawk an thawh ruih ruih reng a; hei hi intihhmuh atan a tha hle. Khawtlanga mi en hrêk hrêk, hausak lutuk avanga khawtlang thil tiha tuitla lo te, kohhran leh khawtlanga inhmang peih lo leh tãl tam lo chhungkuate pawhin hmaiphihna remchangah hmang ila! Lar duh leh hmingthat duhna avang pawhin luang chhuak ila, tlaktlum duh leh beisei neih avang pawhin luang chhuak ang u! A chhan leh a vang chu eng pawh lo ni se, a thil tih kha a pawimawh ber a ni.

Thal kan tuar a, tlawng tui a kâm a, tuihna tam tak a kang a; kan phek buai a. Tuihna luang chhuak a tlem chuan nasa takin kan tuar a, kan mangang a nih kha. Mi dangte tan tuihna ni la, luang chhuak rawh. Tun hi luan chhuah hun a ni e.

Pangpar

Aw Pangpar,
'Par mawi ber' tia vuah
I vul loh ni-ah pawh,
Pangpar i ni tho va.
I hming avang ngawt pawhin,
Chawimawi i hlawh tawk a.
Mawi i chhuah loh pawhin,
Sel i hlawh chuang lo;
Pangpar i ni miau va!
I awm loh pawhin,
Pangpar i ni reng a;
I par loh pawhin,
Pangpar an la ti fan che nia.

I vul loh pawhin,
Vulmawi an ti che a;
I chuai hnuah pawh,
Chuai lo an la ti reng che.
Mawina nen an hmeh bel che a,
Duhawmna nen an tehkhin che.
Senhri par ianga vul mawi,
Chuailo par anga vul rei,
Kumtluang par anga vul reng chu,
Pangpar tho hi i ni!

Huan zawng zawngah,
I awmna huanin,
I pawi sawi hlauvin,
Duat leh dimdawi a hlawh ber a.
I chhâwl hal hlauvin,
Khawkhèn vanglai pawhin,
I chanpual tur a bo lo.
I awmna huan chuan,
Khawvel a chawimawi a,
Khawvelin a chawimawi che!

Par mawi ber,
I par hi mawi sawi nan,
I rim pawh tui sawi nan,
I awmna pawh nuam sawi nan,
An hmang remchang che.
Thu-ah i tel a,
Hlaah a lailum i luah a,
Lemziakah i langsar a,
Thlalakah lam lawm i hlawh a.
In ropuiah hmun i chang a,
Biakbukah i langsar a,
Inneihnaah an chelek che a,
Thihnaah i la tangkai leh zel a.
Hmangaihnaah chenin i inrawlh a,
Em em che hian!

Romantic leh 'tic lohvah te,
Zei leh zei lohvah te,
Awmzia i nei a.
I par azir leh,
I rawng put azirin,
Hun leh hmun i nei hrang zel a.
Ngaina lo che pawhin,
Tihnat che an duh lo;
Ranin an tluk lo che!
Hringmi tana hnawk,
Khuaiin an lawm che a;
Hringmite tana mê -
Phengphehlepin an bawm che.
I mak em em e!

I thla la nalh thiamin,
Chawimawi an hlawh a.
I lem ziak thiamin,
Hlut a hlawh a.
Hlaa an phuah thiam che leh,
Sak a hlawh leh em em bawk si.
Khawi hmunah pawh,
Eng tik lai pawhin,
I par vul chuk a ni ber.

Mit leh beng hian,
A zawng che a, a hai lo che.
Fur ruahin a nan hrep hnu che leh,
Thal thli thaw vuk vukin a nuai chang te;
Thlasik khaw vawtin a hmeh chang te leh,
Nipui ni sa i tawrh chang pawhin,
I mak e, an iai chuang lo che!
Duat taka siam,
Duat taka enkawl,
I ni reng si a.

I sawi fiah nan,
Eng dang a ngai lo;
Thil dang sawi fiahna,
I ni si a.

 April ni 20, 2021 khan ka ngaihtuahnaah pangpar a lo lut a, a vanneih bikzia ka ngaihtuah a, ka ziak chhuak ta ngawt mai a ni. Thil dang pawh a rawn lang zut zut! - TS Khupchong

Ka hming a tel em?

Mihringina kan ngaih pawimawh ber chu keimahni a ni a, keimahni tan kan nung a, kan thawk a, kan thaw a. Kan hming a lan loh kan hlau va, a lansarh kan duh a, khawi kipah kan zawng a. A zau thei ang berin thang se kan ti a, miin hria se kan duh a. Mi tam zawkin kan hming a hriatna tur a nih phawt chuan sum tam tak pawh sen kan huam thin a ni.

Min ko mâwl tawpte ai chuan kan hming ngeia min kote kan hre reiin kan ngaina bik a; kan rin loh deuhvin kan hming ngeia min koh hian kan hlim veng veng a, kan hriat chianten kan hming ni chiah lova min koh hian kan ner nak zel thin. Chuvangin mi dangte hming hriat theih leh chhinchhiah theih hi malsawmna hlu tak a lo ni ta rêng a.

Hming hi a nihna takah chuan chhinchhiahna mai a ni a, khawvela thil awm dangte chu sawi loh, mihringte hi hming nei miah lovin awm ta ila kan khawsa tlâng hleithei dawn hauh lo va, eng mah hi kan inkawh hmuh fuh hleithei dawn lo a ni. A pawimawh thlu ngang a ni ang, Kristiante'n kan inzirtirnaa mihring hmasa ber pawhin hming a nei a, kum sang tam tak a vei hnuah pawh hming sak hi kan la zawngchhang zel a nih hi.

Chuti khawpa pawimawh chuan kan thinlung a luah a. Thil tha lam sawinaa kan hming a lan chuan kan hlim ru veng veng a, thil tha lo lama a lo lan palh hlauh chuan kan zak leh chem chem a. Kan hming a chhe zawnga an sawi chuan kan thinur em em a, a tha zawnga an sawi leh erawh chuan sawi reng se kan duh leh hle si.

Khawiah pawh kan hming kan zawng a ni ringawt mai. WhatsApp group-ah i offline laiin i hming an lo sawi em tih hriat tumin i zawng a, YMA leh kohhran thalai inhmangin pawl chanchinbuah i hming a tel em tih hriat tumin i zawng a, thenawm khawvengten i hming an sawi em, thianho titi nikhuaah i hming an sawi em, puipunna hmunah i hming an sawi em tih i ngaihven hru a. Pun khawmna hmuna i hming an rawn puan phei chuan i phu zuk zel a nih kha.

Biak Inah hming kan lam a, zirna inah chuti bawk. Ni 100 inhlawhnaah kan lam a, thil tihkhawmna pawimawhah kan lam a. Chung hming lamah chuan a tel lote ai chuan a telte chu an nihlawh deuh nge nge thin. Mihring awmnaah tawh phawt chuan hming kan sawi a ni ringawt mai a, chuvangin kan zain Hminga leh Hmingi te kan ni a ni deuh ber.

Thih hnu piah lam ramah hming kan chhawm zui zel dawn em ka hre hauh lo va, Vantirhkohte pawhin hming an neih chuan hming kan nei zui zel tho chuan a rinawm. Hlaah pawh 'Khita hming an lam hun chuan' tih te pawh kan nei a, hming chu kan nei ngei dawn a ang. Kan khawvel hming kan pu zel ang nge, hming thar min saksak dawn tih erawh thih phawt loh chuan hriat a harsa a. Vanah hming an lam tak tak dawn a nih chuan, kan dam lai ngei hian khawvel hming lamna aiin chu Vana hming lamna hi kan ngaih pawimawh ber tur a ni ang.

Engtin nge Vana hming lamna kan ngaih pawimawh ang, engtin nge kan hming an lam ve theih ang, engtin nge kan hming a chuan ve ang, kan ti a ni thei, a chhanna kan nei khiau mai:

"Tin, heti hi a ni ang a, Tu pawh Lalpa hming lam apiang chu an him ang,’ a ti e, a tih kha" (Tirhkohte 2:21 )

Min Siamtu, Engkimtitheia pawhin a hming lam a duh a, a hming lam chu him min tiam a ni ber mai. Siamtu pawhin a hming lam a duh chuan a siama te hi chuan kan duh theuhvin a rinawm a. Chuvangin, mi hi an hmingin ko thin rawh, mi hming chhinchhiah tum rawh. Lalpa hming phei chu theihnghilh hlek loh tur.

Adsense lama US tax info fill up dan

Tun hnai ni hnih ni thum vel kal ta khan google chuan adsense user zawng zawngte chu mail pawimawh tak mai thawnin, USA pawn lam mite tan youtube leh website-a kan video/post/page te US viewer kaltlanga revenue lo lut te cut a nih tawh tur thu te, kan adsense tax information chu submit thuai tur te, May ni 31, 2021 ral hmaa ti lo chu khawvel pum viewer atanga sum lut 24% cut a nih tur thu te a ni a. Keini Mizo youtuber, Mizo tawnga youtube khawih thinte hian kan revenue hi India ram chhunga chengte atanga lut a nih deuh ber avangin, tax info kan submit phawt chuan US tax an cut theih tur hi a tam dawn lo a ni (USA Mizo te view atanga revenue lut hi tam lutuk lo turah ngai ila). Eng pawh ni se, India hi USA nena tax treaty nei an nih avangin he dan thar hian min nghawng pha lutuk dawn lo va, a lawmawm hle. A tih dan tur chu ka rawn dah e.

A hmasa berin Adsense Account-ah lut la, Payment > Setting > Manage Setting > Payment Profile > US Tax Info (US Tax Info-ah hian edit i click ang)

 A chung thlalaka kan hmuh angin  ADD TAX INFO -ah i click dawn nia.

Company, sumdawnna account te a nih lem loh chuan  Individual  khi i select ang a,   NEXT  i click hnuah a hnuai ami ang hian a lo lang ang.

 NEXT  i click leh chuan a hnuai ami ang hi a lo lang ang a, a chung zawk select leh tur a ni.

 START W-8BEN FORM  hi i click leh ang. A hnuai ami ang zel hian...

 Name of Individual -ah hian i hming dik tak i dah ang a, DBA hi dah khah a ngai lo. Taxpayer identification number-ah hian a chung zawkah PAN number dah tur a ni a, a hnuai zawkah eng mah chhut luh a ngai lo.  NEXT .

Address chhut luhna tur a lo lang a, i permanent address leh thil an rawn thawnna tur che number a inan chuan a hnuaia tick-na tur awmah i tick ang a.  NEXT  i click leh keuh ang.

A pawimawh lai kan thleng chho ta a. Tax Treaty-ah hian  Yes  select tur a ni a, a hnuaia tick tur awm kha i tick leh ang a, Country-ah India thlan leh mai tur a ni.

Tichuan, Special Rates and Conditions tihah hian Service Adsense te, Motion Picture and TV (Youtube/Google Play) tih te, Other Copyright (Youtube/Google Play) tih te a awm a, heng hi tick vek tur. Article and paragraph-ah leh Withholding rate-ah hian select tur a lo awm sa ang a. Withholding rate-ah hian a hniam zawk/tlem zawk zel thlan tur. A hnuai ami ang hian. Tichuan  NEXT  a ni leh mai.

Hriat tur pawimawh chu, youtube hmanga sum la lut lo, blog/website atan chauhva adsense hmang i nih chuan a chung bera Services (Adsense) chiah khi click mai tur a ni a, a bak chu click kher a ngai lo. Tichuan, a hnuai ami ang hian Document Preview a ni tawh a, tick tur awmah i tick ang a,  NEXT .

A hnuai ami ang hian Legal Name dahna tur a lo awm lang leh a, a tir lama i hming pum i dah ang khan, PAN Card-a i hming dah ang khan dah la. A hnuaia select tur awmah ka select ang khuan a chung zawk i select ang a.  NEXT  a ni leh mai.

Tichuan, a hnuaia thlalak ang hian a lo lang leh ang a. Has the individual or entity identified in the Tax identity section performed any activities and services for Google within the US?-ah hian NO i select ang a, a hnuaia tick zeuh tur awmah khan tick mai tur. Chuan, Status Change Affidavit-ah hian a chung zawk hi thlan mai tur a ni. 

 SUBMIT  a ni tawh mai. Tichuan, a hnuaia thlalak ang hian a lo lang zãn ang. I lo submit tawh a niha tih dik loh emaw, siam that ngai emaw a awm chuan dinglam sira SUBMIT NEW FORM hi click-a a bul atanga tih that leh mai theih a ni e.

Tichuan, i zo tawh. Email lamah approve-na mail i dawng ang.

In lo hman tangkai ngei ka beisei. Ka lawm e.

Keimaha Pathian thil tih mak lo lang thenkhat [2010-2012]

Rev. Vanlalbela autobiography Ka hmaah dawhkan i buatsaih thin ka chhiar a, Pathian thu a zir laia a retheihzia te, Pathian hnathawh a taka a lan dan te a ziak a, ngaihnawm ka ti hle a ni. Chutih lai tak chuan, kei pawhin zirna ka beih ve laiin harsatna ka tawk nasa em em a, Pathian hnathawh a takin a rawn thleng thin a, chu lam ziak mang lovin, ka harsatna tawh lam chu ka ziak langsar em em thin tih ka ngaihtuah chhuak a. Muthilh lam pan, lehkhabu chhiara mu der der tawh kha ka tho va, hei hi ka ziak ta a ni.

Kum 2010-2012 chhung bik tê ka tar lang ang a, chumi pawn lam hrût telh a ngai zeuh zeuh maithei bawk. Kum 2010 February thlaah college kalna hnai deuh tur tiin kum 2007 September thla atanga ka lo awm tawhna, Ramhlun North Basic Mual atangin Mission Veng-ah ka insawn phei a. James Dokhuma fanu Pi Hmangaihzuali in hnuai chu thla tina Rs. 1000 chawiin ka luah a. Keia tan chuan a tâwk rin ran viau.

A sir lehlam hrût zuai ang

He lam hi tlem sawi tel hram chu a ngai! Kum 2009 khan Govt. Aizawl College-ah ka inziak lut a. HSSLC kha zing sikula kala third division-a inziak tling tawk tawk ka ni a, Govt. Aizawl College kha admission ti hmasa sa an admit miah miah lai a lo ni bawk nen, ka in-admit ve rawih a. Ramhlun North Basic Mual (Thlanmual mawng) atang chuan hla ve vang vang tak a ni.

Zing lamah chuan college bus-in kan kal mai a, tlai lamah erawh bàn hma chang chuan kein ka haw mai zel a. Pheikhawk a hek duh hle. Sneaker man tlawm tê hi ka bun thin a, ka vawi khat lei hi kum khat ka bun tlangpui. Kum tawp lam fur a lo ni tawh chuan a chhuat a lo pawp nasa tawh thin a, pheikhawk chhungah a huh zuih thin avangin bun a nuam lo va, polythene ka bun hnan thin a ni. T-Shirt hi Israel Point-a 2nd hand an zawrh, a nghawng bial hi Rs. 50-in ka lei thin a, a a rawng dâk raih thlengin ka ha mai zel a. College t-shirt hak ni a nghahhlelhawm thin hle. College t-shirt eng hi thiante hak hlui ka ring tlang a ni.

Chhunah hian thil ka ei ngai meuh lo. Ril tam viau chang chuan college canteen-ah Rs. 5 akin ka lut thla a, Rs. 3-in chhang pakhat, Rs. 2-in thingpui no khat a daih a, chutiang chuan ka inhnawh puar mai zel a. Thiante nena canteen luh ngam rual a ni lo.

Khatih laia kan thenawm khawvengte kha an fel ka ti a. Ka dinhmun min hriatpui a ni ang, class bana ka thawh theih tur chi inhlawhna te min siamsak thin a, zanah tlaivar thaka theka (leivung paih, brick/cubic lung thiar etc)-a thawh chang ka nei fo. Ka vannei a, khatih lai khan mi dang han awh em em nachang ka hre lo. 1st Year BA ka fail a, kum ka hloh va. Kum 2010-11 chhung chu H. Rotluanga (Mapuia of Zephyr Drama Club) te nen FTH Magazine kan siam ho va, kum 2011-12 ah 2nd Year BA zir lehin kum 2013-ah ka graduate a ni. He lam chu duh tawk ang.

Tanpui vartu hnai reng chu Pathian a ni

Pathianin min awmpui a, min hmu reng a. Harsa leh rethei ngawih ngawiha ka awm lai pawhin min hlat ngai reng reng lo a ni tih a takin a lo lang thin. Kum 2010 atangin internet lama Mizo website lar tak misual.com-ah active taka lut thinin chuta tangin hmel hriat leh thian tam tak ka chhar a. Chung mite chu 2010-2012 chhunga Pathianin hmanruaa a hman, min tanpuitute an lo ni ta reng mai. Tlem tê ka tar lang dawn.

1. Pawisa ka dawng hlawl: Tum khat chu Pa Sama (Sama Khiangte, SD Enterprise neitupa) hian mi rawn call-in, "I thil tur ka kawl a, lo lam rawh" a ti a. Tuna Vodafone office, KFC opposite, Chanmari-a dawr a neih lai kha a ni a. Ka va kal vang vang a, envelope sen hi min lo pe a. Ka han hawn nak chuan Rs. 3000 lai mai a lo ni. Ka khawsak harsat em em lai, ka mamawh ngawih ngawih mek a ni tih ka hrilh pawh a ni lo, hetianga ka dawng tawp mai hi mak ka ti tawp thei lo. Hetiang chiah hian tum hnih tum thum zet chu Pa Sama kaltlangin pawisa ka dawng a. Ani hian 'chumi khami pek che a ni' a ti thin tak nain, a tu ber nge rin tur ka hre thiam lo. Amah Pa Sama bakah Pi Jenis-i (Jenis L. Bawitlung) leh Pi Maiseki (Dr. Malsawmi, Deptt of Education, MZU) te hi an ni ta deuh ber awm e. Misual.com thiante zingah hian Pu James-a (James Lalsiamliana, Agriculture Officer hi) te, Pu ZR Thahmingliana (a nickname chu Lersia) te, Pu Chhuana (a nickname chu Kawlhawk) te, Pi Lynda Zohmingliani (of Mission Veng) te...mi dang pawh ka sawi seng lo, min pui nasa lutuk.
2. In luah man min free: Ka in luah neitunu Pi Hmangaihzuali hian krismas leh kumtharah te hi chuan in luah man min tihhniamsak thin. A lawmawm thin hle. In luah man hi pek remchan theih loh ka nei thin a, thla hnih thla thum han bat chang ka nei fo mai. Chung hunah te chuan min dil ngai lo va, eng mah an sawi ngai lo. Ka neih remchan hun hunah ka pe mai thin. Tum khat chu Pi Zuali chuan, "I in luah man la bat zawng zawng hi pek a ngai lo ve" a rawn ti ta mai a. Ka lawmzia tak kha aw... "Kohhranah te phak ang tawka inhmangin, Pathian thu kan sawi thin a; hetiang hi a taka kan lan chhuahtir ve theihna a ni..." a ti ve tlat mai nia! Ropui ka ti a, ka tan chuan theihnghilh a har tawh ngawt ang. Kum 2010 atanga 2019 thleng a in hi ka luah a, mahni in leh chhungkua ang mai an ni. Tunah a in kan luah tawh lo nain, ka la tlawh fo mai.
   
3. Intihsiakah lawmman ka dawng: Kum 2010 September ni 25 khan ACCJSU buatsaihin Inter-College Debate Competition neih a ni a; khatih lai khan Comedian Search lamah tawng thei/mi hnial hrât hriatin min lo hre hlawm bawk nen, SU hruaitute khan tel turin min sawm a [Comedian Search-a tel tia mi tam takin min nuih-sawh laiin, he thil avanga kawng hrang hranga hlawkna (advantage) ka hmuh hnemzia hi!] 1st Year ka fail avangin 2010 hi ka âwl a. Dr. LN Tluangi, Principal chuan SU-te remruatna angin admission min tihtir a, 'i duh leh class-ah te i awm dawn nia' min ti bawk a. Debate-a ka'n tel chu pakhatna ka ni teh khiah a! Rs. 10000 lai mai ka dawng ruau va, Rs. 5 nena canteen lut thin tana a tamzia leh lawmawmzia chu min hriatthiampui ka ring. Lawmman (pawisa) an dahna envelope chu tun thlengin ka la dahtha a ni. Tin, kum 2011-a MSU-in Inter College Essay Writing Competition a buatsaihah telin pathumna ka ni a, Rs. 5000 ka dawng bawk. Mamawh ngawih ngawih laia chutiang thil ka tawng chu chung lam chetna ka ti lo thei lo a ni.
4. Lehkhabu min zawrhsak: Kum 2012 khan Chhum dum kara chhem dam thli tih ka thu ziak dahna chu ka tichhuak a. Kolasib lama ka misual.com thianpa Pu Marema chuan lehkhabu kenga zin turin min chah a. Ka lehkhabu (a zat chiah ka chiang ta lo, bu 30 vel chu a ni awm e) kengin Kolasib-ah ka chhuk thla rawih a, an inah ka thlen chilh ta a. Min han zawrhpui tak tak mai a (zawrhsak a ni zawk mah e). A hman lo chinah zawrhna tur te min kawhhmuh a, kei lah hmel hriat loh lakah chuan ka lo lak tlak loh nasa mai si, ka zuar hleithei der lo va, amah vek chuan min zawrhsak leh thin a! Thian dangte nena tangkawpin kan zuar zo ve ta hram a. Lehkhabu min zawrhsak mai bakah Serlui te min tlawhpui leh ta nghal a. Hlêp hlang a ni ringawt. Pu Marema min tanpuina kha ka la theihnghilh thei ngai lo. Keimah ka tlaw si a, tun hnu hian ka zak ru veng veng thin. Ziakmi nih ka tana a hlutzia chu, ka lehkhabu tihchhuahte hi dawr hrang hrangah ka dah thin a; pawisa mamawh ngawih ngawih, Rs. 50 takngial pawh nei lova ka awm chang chuan chung lehkhabu dawrah te, Synod Bookroom-ah te ka kal tawp a, ka lehkhabu man tling khawm a lo awm ngei ngei thin. Mak tak a ni!
   

Hemi chinah rek bung phawt ang. Kum 2010 hma lam te, kum 2012 hnu lamah te pawh thil mak tak tak, theihnghilh theih ngai loh tur hi ka tawng nasa em em a; hnawhchhuah ka tawh laia min lo tuamhlawm dan te, laptop a thlawn liau liauva ka dawng hlawl mai te, ei zawn nana ka hman zui tak ber college magazine buaipuia ka intah luh chhoh dan te, thil dang dang pawh hun remchangah kan la tar lang leh zel turah ngai ang.

Hetih hun chhung hian tawngtai mi ka nih em em pawh ka hre lo va, inkhawm taima tak lah ka ni ngai hek lo. Chuta tang ringawt pawhin Pathian hian amah biak-tlawn kher lo, mi sualte pawh min lo thlahthlam lohzia hi keimah atang ringawt pawhin ka chiang ngawih ngawih a ni. Ka hringnun hman chhoh dan te, ka khawsak chhoh dan te hi ka ngaihtuah lêt chang hian, a nuam lai te, a hrehawm lai thlengin fel takin Pathianin rem a ruat tih ka hmu thiam tlai khawhnu a, chung lam remruatna fel tak zel a lo ni zawk tih hi tun hnu hian ka hmu chiang em em a ni.

Kum 2005-a Durtlang Leitana ka awm tan (Aizawl hringnun bul tanna), kum 2007-a addict bula ka awm leh hnawhchhuah (retheihna tinreng tawrh tanna), 2008-a Comedian Search ka tel (hmel hriat pawimawh tam tak chhar tanna), 2009-a lehkhabu ka tihchhuah (thu leh hla lipuia intah luh tanna), kum 2010-ah misual.com ka luh tan (ka nuna mi pawimawh tak tak min tawntirtu), 2012-a college SU ka nih (zirlai pawla intah luh tanna, tunah politics thlengin), 2014-a dawra ka thawh (college souvenir siama intah luh tanna)... Heng thil ka han tar lante ringawt pawh hi a inkungkaihin inzawmna a nei vek a, pakhat hian pakhat dang tan tangkaina a nei chho zel a, heng thil thlengte hi a inchawm tawn vek a ni ber. Hengte avang hian alawm eng tik lai pawha min thlahthlam ngai lotu Pathian hian ka nun kawng hman dan turah rem a lo ruat fel vek a, ka thil tawnte kha a remruat dan zawk a lo ni ka tih theihna chhan chu! A hun laia a hrehawm em avang leh a harsat em avanga amah ka lo dem lek lek thinte kha, engkim mai kha a hun takah a nih dan tur takin a thleng a lo ni zawk reng si a.

 

2010 Debate-a ka lawmman dawn dahna envelope

V-Day thuchah

Aw nula,

I dawh ngam chuan,

Mualphopui ngam la;

Paih lovin pai la,

Hring la, pun puitu-ah tal pawh.

Aw tlangval,

I tih ngam chuan,

Nei ngam la;

Hmangaih te Ni chu,

Paa hlang kaitu che a ni mahna.

Chi i thlah pawhin,

Thlahdah lo la;

Chi thlah zet hnua,

Chi dawngtu i thlah leh zawngin,

I thlahte an tluang lo'ng e

'Zalenna Zawngtu Zalna Zoram' Ka Thlirna Mit by Lalengzauva

Vawiin chu TS Khupchong ziah Zalenna Zawngtu Zalna Zoram tih ka chhiar chhuak. Beisei lawk dan ka thiam chiah lo nain ka beisei sang viau a. A chhan chu a ziaktu hi lehkhabu ziahah a mikhual lo va, amah lehkhathiam a ni tih ka hre bawk a.

Adventure novel based on insurgency ngaihnawm angreng zet mai a ni a. Book layout leh quality-ah a hniam lo bawk. A bu hming hi a sei teh duah ka ti a, ka ngaihnat loh zawng a ni. Chu bakah ṭhangthar poet (inti)-te thuchheh ulh deuh hi a ang ka ti. A novel by TS Khupchong tih hi a fel thek thung. A kawmah thawnthubu a nih a chiang nghal vang mai a, ṭha ka ti.

Historical novel tiin a sawi theih bawk a, rambuai laia hnam sipaite chet dan leh a chhehvel a ni. A changtupa Lalchhuanawma a ni a, sipai nawlpui inkah lam aiin querilla warfare lama hmingṭha a ni.

Novel chu a ni naa dim baksak lova rambuai lai chanchin, a dik thei ang bera ziah a ang a. A thuhmahruai leh epilogue (chu a ti chiah lo na a) hian min khalh thui mah mah a, a thawnthu environment a tibuai chuang lo chungin thuhmahruai zawk hi paih daih ka lo ît deuh. Ka fak deuhna chu research based novel a ni. Thawnthu ziaktu tam berin an peih loh research lai hi a ziaktu taihmakzia tilangtu a ni a, thawnthu tihlutu tak pawh a ni.

Plot a solid tawk lo, minor plot ṭangkai lutuk lem lo ka hmu nual. Chuti chungin a insuihkhawm ṭha angreng viau lawi a. Insuihkhawm ṭha tak e ti lovin kawngro su lem lo sub plot a awm nual ka tihna a nih chu.

Indirect narration hmanga ziah a ni a, setting a fakawm viau, hnawk a awm lem lo va, plot a pui ṭha khawp mai.

War novel a nih angin sipai nungchang chi hrang hrangin a khat a ni mai a, art of expression-ah a buai lo hle. 

Hetiang lam thawnthu kan neih zingah chuan a thawnthu lo hle a, The life and adventures of Lalchhuanawma tih ni ta zawk se a inhmeh zawk mah awm e.

Sawi tel loh theih chiah loh, editing lama hmaih palh neuh neuh, chhut sual leh thu inhmu dik tawk lo a awm nual a, punctuation erawh a ṭha viau. 

Mizoram buai behchhan thawnthu ziaktu langsar ber chu James Dokhuma kha a ni a. Ani kha chu MNF a ni a, ziak thiam mah se awm ka ti a. TS Khupchong, rambuai laia piang hmana ka rin lohin heti taka ngaihnawm leh belhchian dawla rambuai thawnthu a pum thei hi a fakawm.

A ngaihnawm a nih ka ring, ka chhiar ka chhiar a, ni khat thil thu-ah ka chhiar chhuak tlat mai. Phêk 270-a chhah thawnthu, ngaihnawm taka ziak tur hian research a bei nasa tih ka hmu thiam a, ralkhatah zah takin chibai ka buk e; ziak ve dawn ila ka nêp turzia ka hre chiang.

Zanin chu mumangah MNF-ah ṭang ila, Maite daiah Chhuanawma hovin sipai lambun ang aw. Zalenna zawngtu tuarna rah chu eng emaw ti kawng talin kan seng ṭheuh si a.

THU BELH: Pu Lalengzauva hi MAL Book of the Year 2020 'Falung' thawnthu ziaktu a ni a, Govt. Aizawl West College-ah zirtirtu a ni mek. A facebook wall lama a post hi ka thianten min rawn thawn a, ka lehkhabu a lo chhiar leh a lo tuihnih hi ka lawm hle a, blog-ah ka dah tha a ni e.

'Thulovi Thu'-a ka thu

Hla (poetry) 116 (Bu hawnna nen 117) zet awmna 'Thulovi Thu' hi an tlangzarh hma atangin a hming a eng emaw ti lar riau mai a; a thli beng a fuh ni hmiang ka ti mai, an tlangzarh ni atanga kar khat em pawh a zawh hmain an chhut ang ang copy 1000 chu an hralh zo der mai a, tunah an chhu nawn leh mek. An hralh zo han tihah, lehkhabu dawra an dah zawng zawng nen lam a zo tihna erawh a ni lo va (a lo ni maithei bawk), kawl an nei tawh lo tihna a ni ber ang chu. Hetianga poetry bu hralh kal, zo nghal duak hi a la awm ngaiin ka ring lo, poetry lovah pawh a awm zen zen lo vang. A ziaktu Gladys Lalhruaitluangi hi ka lawmpui khawp mai. Inrinni kal ta, January ni 30, 2021 khan ka dawng a, zanah ka chhiar chhuak nghal a. A hla ka chhiarte atanga ka rilrua awm ang ang ka rawn ziak pawp pawp mai dawn a, miten tum taka book review an neih ang a ni dawn lo. Technical taka thlir pawh mi dang thiam zawkin an la rawn ti turah ka ngai.

He lehkhabua hla awmte hian confessional poetry rawng a kai tih loh theih a ni lo. Confessional poetry ziarang langsar tak — thihna te, anxiety/depression leh chu lam hawi bakah mipat hmeichhiatna (sex) lam hawi leh mahni chanchin puan chhuahna (ni awm tak) hmuh tur a awm nual a, a poetry tam ber hi 'ka' (first person) hmanga sawi chhuah a ni hlawm (Sex hi mihring nuna bet tlat, thu leh hlaa lo lang chhuak thin a ni a, a hlaa sex a lan avang hian a ziaktu hi sex-ah a inhnamhnawih tihna a ni lo tih hria i la). A hmasa bera 'Thulovi Chanchin Tawi'-ah hian 'Thulovi' hi Anxiety-in a suasam hrep tawh niin, depression avangin thihna a lo ngaihtuahin a lo ban ve zuau zuau tawh tih a lo lang a.

'Thulovi' hian natna thûk tak a nei a, a rûm kawk kawk a. A changin 'Keimah ka ni lo' (thupui) inti khawpa lungngaiin 'Dawihzepna kawm ngeih' (thupui) ni ten a inhria a; 'Mal ngawih ngawih' (thupui) a nihzia tar langin, 'Khua hi var tawh lo mai se' (thupui) te a ti hial mai. Chuti taka nâ a tuar chungin amah leh amah a infuih tang tang a, 'Chhelnaa thuam' (thupui) niin 'Ka dam leh hun chuan' (thupui) tiin beiseina nen a bei (fight) a, 'Ka dam leh hun chuan-II'-ah phei chuan '...Tidamtu/Ka dam leh theih nan/Na nawn leh tur pawhin/Min thawi dam leh rawh aw' tiin tanpuitu a au hial a ni. Heng kan tar lante mai bakah he lehkhabua poetry thenkhat — 'Thih hnihna' 'Her liampui se' 'Hmuh loh phur rit' leh a dang dangah hian depression, anxiety, panic rawngkai hmuh tur a awm nual mai. A lehkhabu tawp lamah hian thihna lam hawi hla a awm nual bawk.

'Kebai' te, 'Pa, ka ngai che' tih te, 'Hriat hlawh lo hmeichhia' te tih te hi a chanchin ziahna nia rin a awl hle a, a 'tak' ngãk a ni. Hengte bakah 'Ka mittui luang hian/Min vui liam se' a tihna hla 'Her liampui se' tih te ngat phei chu confessional poetry ziarang tha tak a ni a; a hlaah rau rau pawh hetiang lam - mahni inpuan chhuahna lam hawi hi ka tuipui hlawm viau mai a, ka chhiar nawn sek hlawm.

Vanneihthlak takin 'Thulovi' hi Confessional poet lar Sylvia Plath te, Anne Sexton te ang lo takin a sal tânna atangin a tâl chhuak niin a lang a, 'Queen a ni, a natna a beih letna kawngah/Ropui ber Hnehtu Lal zarah' a ti hial a ni. American poet Sylvia Plath leh Anne Sexton (hmeichhia ve ve tih kan hria ang chu maw) te hian tuar chhuak zo lovin mahni nunna an chhat ve ve a ni. Confessional poet lar tak takte hi hmeichhia an lo ni deuh zel a, Mizo zingah pawh hetiang lampang rawngkai ziak nasa hi kan hmeichhiate zingah an awm nual a. Tawrhna nasa tak hi hmeichhiate hian phelh thawl mamawh zualin, an inbun ruak ta hiau hiau mai niin a lang (thuruk zep kawngah pawh hmeichhia chuan harsatna an neih nasat hi :P ).

Gladys-i a themthiam em emna pakhat chu, a hla eng emaw zat hi a tlar tin hawrawp hmasa ber theuh remkhawmin thu awmze nei a lo chhuak a (acrostic style), chu thu awmze nei chu a hla thupui atan a hmang nghal tlangpui a; a hla thupui chu a hlain a pho chhuak tha em em leh zel a, hei hi a themthiamna leh a danglam bikna a ni. Acrostic style-a phuah hi pariat a awm a, entirnan pakhat 'Hnawl Hnu Kehsawmi' tih hla hi a tlar tin hawrawp hmasa ber dah khawm hiana thupui ang hi a rawn chhuak a ni. Tin, tlar tin hawrawp hmasa ber inang tlang veka phuah hi pahnih pathum chu hmuh tur a awm a, tlar 13 seta sei a hla pakhat 'Kehchhe Thinlung Thli'-a tlar tin hawrawp hmasa ber zel hi 'L' theuhvin a intan a, 'Thian' tih theuhva intan 'Ka thian, khaw nge i awm?' tih hla te, 'A' hlira intan 'Channa' te pawh a awm. Hei hi Mizo tawng thu mal hi a chaih thiam hle tih a tilang awm e.

Kan tar lante baka a hlaa thil langsar tak chu, hmangaihna (mipa leh hmeichhe inkara thleng) hi a ni. A lehkhabu hi hmangaihna hla (love poem)-in a hawng a, chutah chuan in ralkhat duhna te, inngaihzawnna, inthenna te, indeusawhna te hmuh tur a awm. Chung zinga chhinchhiah tlak deuh nia ka hriat chu, a ngaihzawng then tawh (Ex!) leh a ngaihzawn mek a khaikhinna hi a ni. 'Nang ngawi ai chuan' tih hlaa chang khat chu kan dah hram teh ang — 'Nang ngawt ai chuan/A hmel tha a, a hmelin puakah a ti a/Nang aiin LUCK mah se/A rintlakin, a rinawm a' tih hi. Chang dang pawh ka tar lang châk viau nain, lehkhabu ka tihlu lo vang tih ka hlau si. Hemi changah hian 'LUCK' hi hawrawppuiin a dah kher a, di hlui (Ex) elsenna/tihelna tih loh theih a ni lo va, kei chuan ka lawm zawng tak a ni.

'Thulovi' hi fam zûn ngaihna hian a phuar nasa hle niin a lang a. 'Pa, ka ngai che' tih te, 'Fam zun' leh 'Chunnu, i hrai hian a au che' tih te a langsar zualah ka ngai a, a dang pawh a la awm nual. 'Pa, ka ngai che' tihah phei chuan zirna lama hlawhtlin ni-a a pa a ngaihzia chiang leh fiah takin a au chhuahpui a, a chang hnihna (leh tawpna)-ah phei chuan 'Pa, ka ngai che' tia bul tanin hemi vek hian a khar leh a, rilru a khawih hle a ni. 'Alzheimer' poetry a phuah hian he natna huatthlalakzia a tar lang chiang ngang mai a, alzheimer symtom (natna lan chhuah dan) a rawn sawi chhuak thiam hle. 'Nu la ni lo chunga 'I nu ka ni si a' tia nu anga a inhmeh bel thiam hi a nêp lo hle mai bawk.

A hla phenah thu mawi tak tak hmuh tur a tam a, thu chaih kual a thiam ngang mai. A hla thenkhat chu tlar hnih te, tlar thum te a ni hlawm a, tlar hnih chauh hla hi ka dah lang ang a, a dang chu dah châk tak chungin a thupui chauh ka tar lang hram teh ang. 'Ngaihnawm bul tanna' hla tlar hnih chauh chu 'Nang nena kan thawnthu tawpna duhawm lo kha/Ani nena thawnthu ngaihnawm bul tanna a lo ni reng si a' tih hi. A va han mawi lungrun tak em aw...! A tlar thum chauh hlate chu — 'Lal zei' tih te, 'Duhsam atthlak' 'Mi chak i nih kha' 'I tarmit chauh vuah rawh' 'Tumruhna' leh 'Khuarei' tihte a ni. Ka tar lang lo vang ka ti zet nain pakhat ka dah leh hram teh ang, 'Thulovi' hian min lo hrethiam mai se (a thu lo bawk a!). 'I tana ka rinawmna kha/Hmuh leh khawih theih ni se/I hre chiang tur' (Duhsam Atthlak) tih hian thu tam taka sawi fiah ngai lovin, a rinawmzia a tilang chiang em em mai a, mi fate hi an lo va thiam tak!

A hla sei dangah pawh thu mawi tak tak a zep tel nual mai. 'Ka theihnghilh che' tih hlaa 'Ka hriat chhuah changin ka theihnghilh thin ang che' tih te hi a rilin a thûk riau mai a, 'Zalenna ramah zalengte muangin an leng si lo (Bo Hnu Hlimna) te, 'Reh ri ka lo chhuah bengchheng ve chel chul ang e' (Bengchhenpui Tur Reh Ri) han tih mai ang chi te hmuh tur a awm nual.

A kawma digital painting nalh tak mai, nula pakhat '(Thulovi' ni awm tak) thinlung keh sawm ni âwm taka saruak (lek lek)-a thu sawp nuai, a mala zaina ni âwm tak lang, puan sen Mizo puanchei ziaa invêt, a kut lehlama hruihrual (hruihrual satliah lo deuh), a chhipa pangpar lem zâm kual raih mai leh, a kut veilam awm zawn taka kraw lem a keng hi — a chhung thu chhiar chhuak phawt la, a kawmin a chhung thu leh thu ken a phawh chhuah zawhzia i chiang uarh uarh ang. A lem ziaktu hian a ziak thiam thlawt a, hetiang idea neitu pawh hian a ngaihtuah thiam thlawt bawk.

Erotic poem lampang hrût tawh lovin (ka inno' ve si a) thu tlangkawmna lam hawi tawh ila. A lehkhabu hawnna 'Thulovi Chanchin Tawi' chungchang hi a nu nen kan sawi dun a. "Mizo thalaite zingah Anxiety/Depression etc nei tam tak an awm a, inbunruahna tur mamawh ngawih ngawih, nei remchang si lo pawh tam tak an awmin ka ring a. Mahni intihlum tate zingah hetianga a ruka tuar, tuar chhuak zo ta lo hi an awm nawkin ka ring. Chutianga pai mai mai lova thu leh hla lama tuiten inbunruahna tur kan nei hi kan vanneih hle a ni" tih te ka sawi a. Tin, "Mahni hla (poem) a bua tichhuak an awm nual tawh a, Gladys-i ang renga chiang leh tlang (frank)-a mahni inbun ruak hi an la awm ka hre lo, ka la chhiar fuh lo pawh a ni maithei. Hla phuah thin zingah pawh a tawn ang tawng, a tawrh ang tuar tam tak an awm ka ring a, chung mite chuan ani anga huaisenin an la phuah chhuak (publish) ngam rih lo niin ka hria. Hetianga Gladys-i'n insumkarna nei lova a rawn pho chhuak hi a tha ka ti a, chung mite ai a rawn awh a, hma a rawn hruai a, a hnung zuitu hi an la rawn awm chho tuk tuk ang" tih te ka sawi bawk a. A nu chuan, "Hetianga huai taka a ziak ngam hi, amah hi a dam chiang em a ni" a ti thlawt mai. Chutih lai chuan Gladys-i chu a piah deuhvah a lo nui hak hak a.

 

Gladys-i, Keimah, Masanga (ka nau/thianpa), Atlani (poet ve tho)

 — T.S. Khupchong |2|February|2021

Pu Bualhranga lehkhabu 'Khuarei Sulhnu' chhiar chhuak e!

 Tukin dar 2 vel khan Pu Bualhranga autobiography 'Khuarei Sulhnu' phek 900 vel laia chhah chu ka chhiar chhuak ve hlawl a, ka hriat loh tam tak ka hriat belh a, chutih rualin zawhna tam tak he lehkhabu hian min neihtir bawk. Book review pangngai ang em em pawh ni lovin, he lehkhabu ka chhiara ka ngaihtuahnaa lo awm tlem azawng han thai lan ve hrim hrim ka duh a. A hmasain Zofate thu pawimawh tak min hluitu Pu Bualhranga leh he lehkhabu a lo chhuah theihna tura mi tangkai, Dr. Rohmingthangi (he lehkhabu ziak tura lo fuihtu) leh a thu lo chhut chhuahsaktu thianpa Mahmuaka (of ZPM) te an fakawm ka ti hle mai.

He lehkhabu hian a pian leh murna, lehkha a zir chhoh dan leh chhungkaw khawsak chhoh dan bakah, MNF a zawm hnua a rammut dan te, MNF underground sorkar politics vir vel te, a eizawnna bul tan chhoh dan te, sumdawnna kalpui tura thil pawimawh tak tak te, overground politics te, eirukna (corruption) dona kawnga hma a lo lak dan te min hrilh fiah a, bengvarthlak tak a ni. A bikin MNF White Paper kimchang takin a telh a, hei hian phek 839-888 (phek 49) zet a awh a ni. Tin, MNF underground sorkara A DUMPAWL chanchin, tute nge, engtianga kal chho nge tih chiang takin chhiar tur a awm a. MNF White Paper hian a dumpawl lo lam (a ziding lam ti mai ila) thu leh hla a tar lan bakah, Pu Bualhranga hian a dumpawl lam thu hla a tar lang bawk a. Heng thu pahnih inkalh tlat (inhnial tlat/inchhan tawnna) hi ngun taka chhiarin chhiartuten thutlukna an siam ve thei turah ngai ila.

Thangtharte MNF independence movement chungchang kan ngaihven deuh deuh va, bias miah lovin ngaihtuahna thianghlim tak nen thu dik kan zawng a; hetiang lehkhabu lo chhuak hi chung mite tan chuan malsawmna a ni. Rambuaiah khan, East Pakistan-a an chhungkuaah buaina chhuakin, inman tawnna a thleng rup rup a. 'Intellectual' te, 'green signal' te, 'vuibawm' leh tarlan tawh 'a dumpawl' chungchang kan hre lar hle a. Eng nge a nih chiah hriat harsa khawpin thangtharte tan thu dik hriat a har a, zawhna hlira khât, a tuartu leh tawngtute tana thil chiang em em, ngaihven mite tana thutlukna siam harsa khawp a ni ringawt mai a. He lehkhabuah hian a lehlam lehlam thu chiang taka chhiar tur a awm a, hei ringawt pawh hi chhenfakawm tak a ni.

Ngun taka he lehkhabu ka chhiar hian, Pu Bualhranga'n zalenna a sual lai chanchin, he lehkhabua a han telhte hi MNF White Paper chhan letna/do letna/insawifiahna a ang viau mai a (White Paper-ah hian Pu Bualhranga puhmawhna thu a inziak tel a); a lehkhabu la chhiar turte chuan ramhnuai lama a khawsak dan a ziak in chhiar hmain White Paper thu kha ngun takin chhiar hmasa ta ula, chhiar dan leh ngaih dan siam thiam a awl zawk mahin ka ring. White Paper-a thu inziak kha thil awmzia sawi fiahna/insawi fiahna a nih ang bawkin Pu Bualhranga thu pawh chutiang chiah chu niin ka hmu tlat a ni.

Pu Bualhranga hian East Pakistan atanga a lo chhuah chhoh dan tak hi chiang takin a ziak lang lo va; a diary-a thu inziak chu a rawn dah tawp a ni. Ni 5.4.1971-a a diary chu East Pakistana a awm lai niin, chumi chhunzawmna chu Ni 8.5.1971 a ni leh daih a, 'April ni 5 bakah chuan hei hi Dairy ka vawn zui leh chu a ni, Aizawlah ka awm tawh tih a lang' tiin a comment zui a. Zoram a chuan chhuah dan kimchang tak chhiar tur awm lo (a ziah kân hlauh) hian chhiartuteah zawhna lian tak a awmtir lo thei lo va, hemi hnu a diary erawh a ni indawtin a chet vel dan kimchang takin a tar lang thung.

Tin, he lehkhabu hi MNF White Paper a counter-na anga a lan thu ka tar lan bakah, Pu Laldenga huatna, hun rei tak lo intuh tawh chu he lehkhabuah hian Pu Bualhranga hian a phawrh chhuak leng a, thu dik tar lan tumna ngau ngau ai mahin, Pu Laldenga huatna inphawrh chhuahna a ang lek lek. Tawngkam hman pawh a duhtui lo ngang a, MNF White Paper a comment-na tawngkam thenkhat phei chu 'Mawl lulai tak a ni' tih te, 'Thu buluk, mi mawl ngaih dan a ni. Atchilh si lo, atchilh anga lang, huai si lo huai anga lang, a suak, a hût, a lem bawk kha a ni' tih te a ni a, hei hian chhiar mi titîm thei lek lek mai. Chu mai ni lovin, Mizo Union hruaitu hmasa Pu C. Pahlira'n 'Remna leh Muanna' thu ziak a neih chu a ngai ngaiin a rawn dah a, Pu C. Pahlira thuziak hi Mizo Union lamin rambuai chungchanga an ngaih dan anga ngaih loh theih a ni lo va, a thuziak ngai ngaia Pu Bualhranga'n a rawn dah hi, he lehkhabua a thuziakte nemnghehna tur emaw, a tanfung leh tanghmun sawh nghehna tura a dah emaw, a thuziak tanpuitu tura a dah emaw a nih a rinawm (Hengte avang hian a nia, he lehkhabu hi thinrim inleih buakna, huatna intuh phawrh chhuahna a ang, ka tih ni).

MNF ramhnuai sorkara a dumpawl politics hi he lehkhabuah a inziak chipchiar viau a, boruak intham chhoh dan leh, a puah keh dan thlengin tar lan a ni. A dumpawlte kha MNF-ah khan lehkha thiam rual, an sorkara a lawk tam tak telna, sipai lamah lah officer lian tak tak rual an ni a. Inremna neih hnua hetiang lam ziak zingah pawh, a dumpawl lam chhuak lehkhabu chu administration lam inziahna leh a lu lawk politics vir vel tar lanna niin, a ziding lam chhuak lehkhabu erawh chu ramhnuai lama sipaite chettlatna lam a ni deuh zel rêng a ni. Hemi a nih avang hian inremna neih hnuah pawh a ziding lam leh a dumpawl lam indona hi thu leh hla hmangin a la kal reng niin a hriat theih a; thangtharte hian hemi chungchanga thutlukna siam mai tur chuan, a lehlam lehlam thu chiang taka kan zir a pawimawh khawp ang.

He lehkhabu chhiar rual hian Pu R. Zamawia 'Zofate Zinkawngah...' kha ngaihtuahnaah a lo lang lo thei lo va. Kha lehkhabuah khan MNF administration chungchang (East Pakistan thleng) a lang chipchiar viau a, a dumpawl chungchangah erawh kan tuihalna a phuhru zo lo. He lehkhabuah zet chuan Pu Bualhranga hi a leihin a inleihbaw hiau hiau niin a lang a, sawi hreh leh sawi tîm nei lovin a ziah miah miah mai a ni; chu chu thangtharten kan zawn ber a ni lawi si. Chutih rual chuan rating pe dawn ila, Pu Zamawia lehkhabu kha keimahah chuan a la sang fal nalh a mai.

Chu lam chu kalsan dawn ila. A thu maia kan lo hriat, chiang taka thangthar zawkten kan hriat fumfe si loh chu Rev. Zairema leh Pu Bualhranga'n Pu Hawla chungchanga Supreme Court-a PIL an thehluh thu kha a ni a. He lehkhabuah hian a chinchhuakin, chiang leh chipchiar takin a rawn tar lang a, a chhenfakawm ngang mai. MLA Pension a lak duh tawh lo chungchang a tarlan mai bakah, eirukna do pawl SOSA anga hma an lak dan zawng zawng te, kan Kristianna pawnlang lutuk a vei dan te, eirukna (corruption) a huat dan te thahnemngai taka a rawn ziah hian min hneh hle a, amah ngaisang tawh sa tan ngaihsan lehzualna tham a tling tih loh rual a ni lo.