06 January 2022

Cryptocurrency chungchang tlem azawng sawifiahna

Vawiin January 6, 2021 chu chawhma lamah kan thianpa pakhatin min lo call a. WazirX chungchang a ni. Kei chuan WazirX aiin Binance ka hman nasat zawk thu ka sawi a, ralkhata inhrilh mai awlai loh thu sawiin hmaichhana la inhrilhfiah turin kan ti a. Chawhnu lamah khawtlang thilah office ka dawr a, ka hmuh tum ka nghah laiin thawktu pahnih an lo inbia a. "Bitcoin i ti ve em?" an inti a, pakhat zawk chuan a tih loh thu a sawi chuan, "Tunlaiah bitcoin tih loh te chu a..." a ti deuh nang nang a. Mizote pawh hian cryptocurrency hi kan lo ngaihven hle tawh tih chu phat rual a ni lo va, a tihdan leh hriatchianna kawngah erawh kan la bangbo tlâng niin ka hria.

Cryptocurrency chungchang hi facebook leh whatsapp lamah te ka post zeuh zeuh tawh a, blog-ah ngei pawh hian ka rawn post tawh a. Chungte vang ni maw, he thil chungchangah hian zawhna hi ka dawng ve ta zeuh zeuh va. Kei tehlul hian ka thiam leh hriat a tlem em em mai a, inzir chawpa hre chawp ve chauh ka ni a; keini ai hmaa lo buaipui fe tawh pawh an awm nual ka ring a, hre zawk pawh an tam ang. Mahse, Mizo tawnga hetiang lampang ziak hi hmuh tur a la vang khawp hian ka hria a, ka ziak ka ziak ve ta chu a ni mai a. Tunah pawh ka rawn ziak ve leh ta chawt mai a nih hi.

Kum khat tha pawh ka la buaipui lo va, mahse, tuipui na na na chuan hma kan lo sawnin kan lo hriat belh ve zel a. A tirah tak chuan WazirX-ah account ka siam a, pawisa ka deposit a, crypto ka lei a, chu zawng chu a ni deuh mai. Mahse, hriat belh duhna a lo awm zel a. Binance-ah account ka siam a, hun rei tak KYC verification-ah ka tâng a. Mahse, anmahni helpline/customer care lamah ka report hnuah manual-in an rawn approve a. WazirX-a fiat currency (India pawisa) ka deposit chu USDT-ah convert-in Binance-ah a thlawnin (fee awm lovin) ka transfer a, tichuan, Binance-ah ka trade ta thin a ni.

Hun a kal zel a, tutorial hmang tangkaiin Binance-a P2P hmanga India pawisa deposit dan ka'n thiam chho va, WazirX hmang kher lovin Binance ka hmang ta zel a ni. WazirX te, Binance te, Coinbase etc te hi Centralized Exchange (CEX) an ti a, CEX chu eng company emawina an kalpui exchange (crypto trade-na platform) a ni a, neitu awm a ni. Chu lo lehah chuan Decentralized Exchange (DEX) an tih hi a awm leh a, hei hi chu eng company mah enkawl ni lem lo, neitu bik pawh awm chuang lo, a siamtuten siam chhuak tawpin a hmangtute thuin a kal zui mai thin. Entirnan, Pancakeswap, Uniswap leh crypto thenkhatin anmahni puala an siam te hi a ni hlawm.

A tirah chuan CEX hman dan kan thiam ve mai a; mahse, DEX hman dan hi a kual kikawi ve avangin hriatthiam a harsa a, fimkhur pawh a ngai hle. Mahse, sum tlemte bak invest tur nei lo tan chuan DEX hi a tangkai em em si a, a hman dan thiam chu tih makmawh a ni. CEX-ah chuan cryptocurrency value sang tawh leh lar tawhte bak hi an dah (list) lem loh avangin chungte hlawkpui tur chuan hun a duh rei a, dawhtheihna nei mi tan lo chuan hlawkpui hmaa kan asset (crypto) tihral mai te a chakawm thin. Mahse, DEX-ah chuan crypto tharlam, man tlawm tak tak, Re. 1 lek pawha tam tak lei theih te a lo ni hlawm a, chung crypto la thar deuhte chu zan hnih khat thil thua value sang vak, tihfuh hlauh chuan hausak thut theihna te pawh a ni hlawm a ni.

CEX leh DEX hi tlem han sawi zau deuh ila. CEX-ah chuan a platform neitu company-in crypto project tha leh him an dah tlangpui a, chuvangin scam avanga invest sual, sum hloh vak ang chi kha a awm mang lo. DEX erawh chu crypto siamtuten an siamte an dah luh hmasakna hmun a nih avangin, scam (a lem/inbumna) a tam em em a, mahnia research tenau tiha project (crypto) tha leh rintlak a ni em tih te inchhiar zau phawt a ngai a. Crypto lama knowledge la nei lem lo tan phei chuan, guide-tu tha tak nei sa lo tan khawih rih loh mai te pawh a him awm e (Kei ngei pawhin a tir lamah scam coin ka lei fuh tawh a, pawisa a sing tel ka lo hloh tawh a ni).

Traders tharlam (beginner) tan guideline/tutorial angreng hi ziah ka tum thin a, mahse, hriat hmasak ngai hi a tam em em a. Tuna kan tarlan zuai zuai tak exchange (CEX & DEX) chungchang bakah Blockchain, P2P, KYC, Wallet, Contract, marketcap, marketing supply, burn, burn/dead wallet etc. te sawifiah hmasak ngai a tam em em mai a, hriat chian duh tak takna nena chhiartute in lo inchhiar zau te a nih ngawt loh chuan inhrilhfiah hi a huphurhawm a, ka pamtul leh mai thin. Tun tumah pawh tihdan rawn ziah tum bawk ka ni a, mahse, bultanna tur leh ziah tur ber hriat a har em em mai a, ka kual ka kual ta mai a nih hi. Mahse, chhiartuten tlemte tal kan lo hlawkpuia kan lo hriat belh theih nan han ziak ta zel ila.

Exchange (CEX & DEX) chungchang kan ziak tawh a; blockchain chungchang tlemte tak tak, thil dang sawi zauna turin han sawi ila. Tunlaiah chuan blockchain lar tak tak a awm nual tawh a, BSC leh ETH chauh han sawi ila. BSC chu Binance Smart Chain tihna a ni a, BSC hian crypto pakhat Binance (BNB) hi pawisa bera a hman a ni a, wallet-ah pawh Trustwallet an hmang a, an DEX pawh Pancakeswap a ni. Pancakeswap-a crypto (token) thar kan lei duh chuan, Binance (exchange) atangin BNB chu Trustwallet-ah kan thawn ang a, Trustwallet hmangin Pancakeswap-ah token kan va lei (exchange/swap) dawn a ni. Hemi tihdan hi a hranpa liau liauva ziah tham a ni ang.

ETH kan tih chu Ethereum a ni a, Ethereum Blockchain hian Metamask wallet an hmang a, crypto pakhat Ethereum tih chu pawisa atan an hmang a, an DEX pawh Uniswap a ni. Uniswap-a an token (crypto) dah thar kan lei duh chuan Binance exchange (Binance lo pawh a hman theih tho) atangin Metamask-ah Ethereum (pawisa) kan thawn ang a, Metamask hmangin Uniswap-a an crypto thar dah kha Ethereum nen kan va exchange/swap mai dawn a ni. 

I crypto thar lei duh kha BSC (blockchain) hmang a nih chuan Trustwallet leh Pancakeswap hman dan i hriat a ngai a, ETH (blockchain) hmang a nih chuan Metamask wallet leh Uniswap hman dan i thiam a ngai dawn tihna a nih chu! Contract kan tih pawh sawi fe tham a awm. A tawi zawngin, crypto tin hi code hmanga siam vek a ni a, an code hman hi contract chu a ni mai. DEX-a crypto lei dawn chuan an contract address hriat ngei ngei a ngai a ni. Crypto tin hian an website-ah an Contract address chu an dah tel zel. Crypto (contract) him leh him lo hriatna awl sam chu — i crypto lei duh kha BSC hmang a nih chuan a contract kha hetah paste la, check tih i click leh chuan a him leh him loh a rawn lang mai ang. ETH hmang a nih erawh chuan hei hi hman ve thung a ngai.

Eng pawh ni se, vawi leh khatah han sawifiah sen rual a ni lo va, a hnuaiah hian tutorial video pawimawh zual ka dah a, cryptocurrency i buaipui ve dawn chuan i lo en dawn nia. Mi siam sa link ka rawn dah mai e. Ka post dang chhiar duh tan — Cryptocurrency chungchang ve thung

Binance Account Siam Dan

Binance account i siam dawn chuan ka referral code JNQ1HFIZ hi i lo hmang dawn nia :) Link

Binance-a P2P hmanga pawisa deposit dan


Trustwallet siam dan


Binance atanga Trustwallet-a pawisa/crypto transfer dan


Pancakeswap-a crypto lei dan

Share this

2 Responses to "Cryptocurrency chungchang tlem azawng sawifiahna"

  1. Ngaihnawm e.. kan addict vak ang tih hlauhawm , kan hlawk ve silo anga ha ha

    ReplyDelete
    Replies
    1. Hahaa...addict chu a awl angreng khawp mai :D

      Delete

Eng nge i ngaihdân?