Bitgert bihchiang ang

Cryptocurrency chungchang hi ka lo tar lan fo tawh ang khan ka hre ril lo va, ka hre technical lem lo bawk a, ka mamawh tawk hi ka hriat belh ve zel chauh a ni. Miin min zawhin a tlangpui thuak thuak, buaipui tharte hriat duh zualpui chauh ka hrilh thei chauh a ni a, hetia ka ziah thin hi ka hriat viau vang emaw, chhiartute chu ti ve tura ka duh vang emaw a ni lo va, ka tawnhriat bakah ka ngaihtuahnaa awmte ka lo tar chhuak ve mai chauh a ni; lo hlawkpui an awm chuan a lawmawm hlei hlei thung ang. Miin an ngaihven a, ka blog post-ah pawh post dang ai ngawt chuan view a tam thei viau a ni.Hemi chungchang hi post tlem azawng ka lo siam tawh a, chhiar duh tan Cryptocurrency label hi click mai tur a ni e.

Tun tum chu cryptocurrency pakhat Bitgert (BRISE) chungchang tlem tê tak tak chauh ka'n tar lang teh ang. Nikum, 2021 kum chawhnu lama market-a an launch chauh a ni a; kum tawp lama twitter atanga hria ka ni thung a. Nikum December thla tìr têah khan Bitmart Exchange (CEX) chu hack a ni a, crypto hrang hrang $ 100 million hû chu rûk chhuah a ni. Bitmart-ah hian BRISE hi list tawh ni mah se, rûk chhuah theih loh turin BRISE developers-te hian hackers-te an dang thei a, an holders-te chu an him a. Chumi chungchang thu tweet pakhat chu ka chhiar fuh a, tichuan, theih ang tawkin ka'n bih chiang a. Twitter-ah ka follow a, an telegram group ka join bawk a, investment phei chu ka ti rih lo va.

Chutiang chuan ngawi rengin ka thlithlai a. Theih ang tawkin an project ka zir chiang a; website lama an tokenomics leh future plan (roadmap) te, an product te ka en bawk a. An contract-ah buyback mechanism an apply a (chu chu lei leh hralhah tax awmin, tax atanga eng emaw zat percent chu holder reward te, supply burn (titlem) nan te an hmang a ni). Lei leh hralh (volume) a san poh leh an burn hnem ting dawn tihna a nih chu. An roadmap-ah chuan anmahni puala blockchain an launch tur thu te, staking platform te, exchange leh wallet an develop thu te ka hmu a. An contract address chu theih anga zir chiangin, a him tih ka ring ta bawk a. Tin, an telegram group-ah crypto exchange lian leh lar Gate.io leh Kucoin-a list turin inbiakna an kalpui mek thu te, legal process an buaipui mek thu te ka hmu a; exchange liana an list chuan nasa takin a man a sáng vak dawn tih ka ring a, a man a la tlawm bawk si nen ngaihngam takin nikum December thla khan tam vak lo chu ka lei ta a ni (Kucoin hi volume atanga tehin exchange (CEX) zingah chuan Coinmarketcap ranking-ah 5-na a ni a, Gate.io hi 7-na a ni thung). 

Tichuan, ka lei chu ka dah ta reng a. Staking platform an launch ta bawk a, January 16, 2022 khan thla 6 chhung atan ka stake (hralh theih loh tura dah pung) ta a ni. An future plan (roadmap) zinga tel staking platform an launch a, wallet te an launch ta bawk a. Kucoin lamah erawh inbiakna an kalpui reng chungin an la tifel hleithei lo va. Bitrise tih company a lo awm tawh avangin Bitgert tiin a hmaa Bitrise (BRISE) ni reng thin chu Bitgert (BRISE) tiin an thlak ta a, an website pawh an upgrade (& redesign) ta bawk a. Tum khat chu thawktu eng emaw zat an lak tur thu announcement an chhuah a, duh an awm ka rin avangin whatsapp group thenkhatah ka post chhawng a, group pakhatah phei chuan an theih ang tawkin Bitgert chu an lo zir chiang a ni ang, an website chu hmanni lawka siam (new domain) a nih thu bakah, scam min tihsak a (tar lan tawh avangin website upgrade a ni), za lutuk lovin ka nui.

Tichuan le, February 9, 2022 khan Gate.io-ah February 15, 2022-ah an list tur thu an tweet ta a. Chu thu lawmawm tak mai chu thu lawmawm dangin zuiin, Hemi ni-ah vêk anmahni puala blockchain an launch tur thu chu vawiin, February 11, 2022 khan an tweet leh ta zui a. Chu veleh nasa takin BRISE hlutna (value) chu a sang (up) ta char char a, token an launch hnua a value san lai ber (ATH - All Time High) niin zero pakhat a kill hial a. Kei pawhin phur takin, anmahni wallet atang ngei chuan ka neih ang tawk ka lei belh ta a ni. Eng tak ang zel ang maw!

Vawiin a san lai khan a hlutna hi 50% velin a sang hman a, holder, volume & marketcap pawh nasa takin a pung a. BRISE blockchain that bikna tur chu, fee hniam hi a ni. Blockchain dang hi fee a sang viau va, a bik takin Ethereum (ERC-20) phei chu sang fer fer tak a ni a, keini han hman chi pawh ni lo. BRISE blockchain fee erawh chu BSC (Binance Smart Chain) ai pawhin a hniam dawn a, zero deuhthaw a ni dawn a, hei hi a that bik em emna tur chu a ni. Tin, transaction speed hi a sáng viau dawn a. An test-naah 1,00,000 TPS (transaction per second) a ni hem mai. Tin, a him tha (secure) hle niin an sawi bawk. Blockchain thenkhat hi hack a lo awm fo tawh niin an sawi a, blockchain him leh tha, chak leh fee tlawm bawk si chu BRISE Blockchain that bikna tura an sawi vul ber chu a ni. Tuna a value-ah hian cheng 1 lekin BRISE tam tak a la lei theih a, eng tak ang zel ang maw...

He thu buatsaih lai hian Bitgert (BRISE) hi Centralized Exchange (CEX) zingah MEXC, LBank, Bitmart, XT.COM leh IndoEx-ah te list tawh a ni a, Decentralized Exchange (DEX)-ah chuan Pancakeswap atanga lei theih a ni. Tin, anmahni wallet-ah awlsam taka Binance (BNB) nena swap theih a ni bawk.

Share this

TS Khupchong