Preview:
‘MI ANGLO SULHNU’
Edited by : VLC Vanlalhriatrenga
Page : 304
Price : Rs. 100/-
Prints : Gilzom Offset
Khawvelah hian ṭhian inpawlho, mize inang lo tak tak, mahse, tuina lam inang, inchemchhekawp tlat kan tih ang hi an awm. Sap-ho pawh an bang bik lo. Thu leh hla lama tui inpawl khawm PEN (Poet, Essayist, Novelist) hote avangin khawthlang thu leh hla a hausa a. Kan hranghluite zingah pawh fam chang ta — Sangzuala pa, Laldenga, J.Hmingduhawma etc. te inpawl khawmin Liars’ Association an din a, dawt chauh tuipui lovin ṭawngkam leh titi mak tak tak an thawh khawm ṭhin bakah thu leh hla hlu tak tak an vawrh chhuak ur ur a. Biakliana, Kaphleia leh Rev. Zairemate hostel awm pawhin kan thu leh hla, ziaka kan hmuh hmasak hmangin Zofate literature an lo tihausa tawh.
Chuti ang chuan Govt. Aizawl College-ah zirlai inkawmngeih bik, midang ngai lova tlei taka lo inkawm khawm ṭhin an awm a. Hming azawnga hming thlannahawm lo ber mai ‘Mi Anglo’ an inti a, chung mi ang lo hote kutchhuak chu tuna kan thlir tur hi a ni. Heng ṭhalai rual, kum lama la naupangte te te hian mi an loh dan an thiam tlat mai hi ka sawi châk lai tak chu a ni.
Mi ṭhenkhat chu mi an tumin khawvel thiamna leh hausaknaah theihtawpin an tlan a, anmahni ṭanghma chu an hai ngei a, hausak lah an hausa narawh e. Mahse, an thiamna leh finna chu midangte tan tem ve phak a ni lo. Mahse, kan mi ang lote erawh chuan an thinlunga an thu pai te, ram leh hnam tana an ṭhahnemngaihna chu â tak maiin thuziak hmangin an rawn pho chhuak ta. Mi ang tur chuan mi an loh a ngai tih an hriat avangin chu’ng mi ang lo fuankhawm chuan mi an an ve nan â tak maiin lehkhabu ṭha tak mai an sual a. Sum leh pai hlawkna uma lehkhabu ziah hlawk lohzia hrechiang em emtu, an hotupa leh an pawl meizanghlaptu, thuziakmi aia Pastor ni awm tak VLC Vanlalhriatrenga chuan chu’ng mi ang lo thuziak chu â tak maiin lehkhabuah a lo khawrpum ta rawl nen. Ât khat zawng a cheng a ni, khawvel pamhamna leh duhawmna mit aṭang chuan.
Mahse, he lehkhabua mi ang lo rualte thinlung far chhuak hian ṭhalai te, ram hmangaihtute a fuih harh ngei ka ring tlat a. Amah, an Editor ngeiin ‘Mizo ṭhalai, ṭhian hova inkawm khawm ṭhin mi tam tak chuan ruihhlo leh sual kawng zawh kan intihhmuh mek a. Chung mite hnenah chuan he lehkhabu hian kawng eng emaw kawng zawng talin awmzia nei thei sela, a ṭha zawnga ṭhianho inpawl khawm hi intihhmuh tawh zawk ila’ tia ṭhahnemngai taka a ṭhalai puite a sawmna hian awmzia a nei ngei ang.
He lehkhabu hi mi anglo sulhnu a nih ang ngeiin a zia pawh a inpawlh chiat mai. Thawnthu tawi (short story) anga chhiar theih chiah loh, novel tling pha lo deuh si, novelette an tih ang chi hi 3 vel a awm a, short story anga chhal theih tur 2 a awm a, thusep (essay/article) 5 a awm bawk a, a zavaiin thuziak 10 kan hmu.
A hmasa ber ‘Rukru Pathum’ tih Mapuia Renthlei ziah hi detective/thriller ziarang thawnthu a ni a. A thawnthu a inchingchivet dan te, rukruk chet velna phena khawtlang nun ṭha lo a vei a, khawtlang nun ṭha a thlakhlelhzia a lang chiang khawp mai. Tunlai ṭhalaite hian kan ziakmi fam ta Lalzuithanga of Thlahrang hnu chhuiin detective lam hawi thawnthu ngaihnawm tak tak an ziak chho ta a, hmasawnna ropui tak a ni. He novelette pawh hi rukrute rawk leh chhawngtu ṭhian pathum chet dan kara nula leh tlangval inhmangaihna chingchivet thawnthu a ni a. A ngaihnawmna phena a thu thuhruk hi chai fe tham a awm. Thawnthu puitling (novel) a chanah ka ît ngawt mai. A ngaihnawm a, a thawnthu a duang thiam a, hei ai hian sei se, chhiar tlaivar ṭhak tham ni se ka ti kher mai.
A dawttu ‘Kutdawh Puia’ tih hi tragic story a ni kan ti thei ang. A ziaktu Comedian-cum-Writer-cum-Debator tih theih tur T.S.Khupchong, a lai-ah hming K.C.Lalthansanga hian he thawnthu lungtichhe thei zet mai bakah hian ‘MALO Inlarna’ tih a thawh bawk a, mi ang lo zingah a mi an lohna a zualkai bik a ni maithei. Mihring nuna thil thleng thei ngaihnawm leh lungtichhe tak phawrh chhuakin kawtlaia mitdel zai ṭhinte lainat lehzual theihna tur khawpin hringnun chawfun a rawn phawrh thiam a, thawnthu tawi ṭha tak a tling a, a ngaihnawm bawk. Short story ṭha kan mamawh em em tihausatu zingah ka chhiar tel lo thei lo. A thuziah dang ‘MALO Inlarna’ hi narrative essay angah ka ngai a, mi ang lo ho a puanna a ni ber a, he a thuziak pahnih aṭang hian writer leh comedian a nihna a pho chhuak ṭha hle.
‘Ka Lei Pangpar’ hi Editor pual a ni ve thung. Nula hi eng nge a nih? Nula leh tlangval hi an inngaizawng ṭhin tak tak em ni? tia mi zawt he he awm tak VLC Vanlalhriatrenga’n nula leh tlangval inhmangaihna thawnthu ngaihnawm tak a rawn ziak tlat mai hian mi a barakhaih khawp mai! Chu a nula lah chu a vanduai em em mai lehnghal. A tak takah a lei pangpar chu a chuai tak avangin kan VLC-a hi a inkhuih pial nalh ta hle a, heti ang nular tlangvalna lam thil hi hnawmhneah lek a ngai ta em ni ang aw? tia ngaihtuah zui vang vang theih khawpin a lei pangpar nena an inkar hi a ziak ngaihnawm a, a ziak lungrun a, a ziak beidawnthlak thiam bawk. He a thawnthu tawi hian a novel thar tur ‘Zothuammawii’ chhiar min tinghakhlel zual.
Bawiha Renthlei-in nun khaw chen dan chi hrang hrang, ngaihnawm tak taka a rawn khaikhin velna ‘Nunkhua An Chen’ hi thawnthu tawi tia sawi theih a nih laiin narrative essay lam rawng a kai. ‘Ṭhalaite u, in ṭhat lai chen ula, in la naupan viau lai hian hlim rawh u.. Mahse, Pathianin in chungah ro a rel dawn tih hre reng ang che u’ titu nen khan Bawiha hi an titi a rual dun viauvin ka ring.
Kan ramngaw lam zirmi Lalchhanpuii Ralte thuziak ‘Chhinchhiahna’ hi essay ṭha tak a ni. Forestry hi literature nena unau inchhangbung an ni tih rawn nemnghettu a tlingin ka hria. Khuarel mawina leh hlutna chîk taka bihin Chhinchhiahna petu thilpek chu âm tak leh lungawi takin a chen a. Nature worshipper a ni han ti dawn ila, amah ngei hian Chhinchhiahna min petu chu ‘ka hmangaih che’ a ti leh tlat si. Ni e, thu leh hlaa tui tam tak hian khuarel thil chi hrang hrang aṭangin thu leh hla an sawr chhuak ṭhin a, ramngaw, daifim, ni êng, nungcha chi hrang hrang aṭangin hla leh thu mawi a chhuak ṭhin. He kan nula erawh hi chu khuarel mawina hlut em em sia, a petu hre tlat mi; a petu pek chhan ang taka a malsawma chhiar thiam mi a ni. He essay hi chhiar la, chhut ve chet chet teh. Chhinchhiahna chu i hmu ve em?
Lalthlamuana Hrahsel ‘Lei Piah Lam Ram’ hian ‘our sweetest songs are those that tells of saddest thought’ tih thu, Sap hla phuahthiam pakhat au aw hi a nemnghet ṭha khawp mai. A laina hnai, a ngaih em em mi pali; ‘lei piah lam rama’ leng tawhte a sunna aṭangin thihna leh a piah lam ram chungchanga thusep mawi leh ṭha tak, ril tak a rawn thai chhuak a. Essay ṭha tak a ni. Lusun dan dik te, thih hnu piah lam ram suangtuahna him leh hlawk zawk te, kan khawvel nun a tawp huna kan tawpna tur leh kan thlarau nun bul kan ṭanna tur thiam takin a rawn sep vel a ni. He essay hi chhiar la, ‘Aw thihna, khaw’nge i tûr chu?’ tiin thihna tawpna ni lovin nun bul kan ṭanna tur a lo ni reng zawk tih i chiang lehzual ang a, thilsiam dangte anga thih huna tawp ral rikngawt tur ni lovin ropuinaa inthuam tur zawk ka ni tih hre chhuak tharin chu nun hmang tura khawvela inbuatsaih dan i zir chhuak ngei ang.
Lalmuansanga Hlawndo ziah, ‘Khaw’nge I Awm?’ tih thupui i hmuh chuan Hindi film-a a changtupain a changtunu zawnga, kuhva leh coconut kung kara zai chunga a tlan kual thuak thuak i mitthla mai thei a ni. Mahse, Muansanga zawn hi nula a ni lo; a chenna, a khawsakna leh a inhnangfak mekna Zoram khawvela dikna a ni a zawn! Dikna chu a zawng mai ni lovin dik dan tur thlengin a thling bawhawkin a ziak a ni. Kan khawtlang nun chhe tawh kan vei a, kawng dik inkawhhmuh kan tum a, ram hmangaih leh ram hmangaih kan insulpel suau suauva, mahse, dikna kawng aiin dik lohna kawngah kan liam tam zawk emaw tih tur a nih avangin ram leh hnam dinhmun, khawtlang ei leh bar ṭhatna tura rilru seng ṭhin kan Economist thukhel hi a nep lo khawp mai. Article ṭha tak a tling. A khela khel a, chai zui laih laih tham khawp thuziak puitling a ni.
Chawnglianmawia hian Mizo thu leh hla zir, mithiam a ni tih Mizo hla chi hrang hrang a chhuina ‘Hla taka Hlã’ tihah hian a pholang chiang khawp mai. Hla thiltihtheihna te, hla hlutna te, hlaah hian hringnun thil tam tak a inzeh nasat dan te, kan pi leh pute hun lai ata tawh hla hi inawmtleina leh indo nan te, incho phawk nan leh thinlung na thawi dam nan te, inlêm nan leh indeusawh nante an lo hman nasatzia thiam taka tarlangin kan culture vawn nun nana hmanlai kan pi leh pute hla hlu tak tak rohva, vawn nun a ṭulzia a rawn puang a ni. He thusep hi a hlu reng dawn ka ti ngam sak. Bihchianna thuziak (research paper) lam rawngkai reng reng an hrutna mualah tlo lo leh hlu lo a awm ngai lo. Thuziakmi a nihna piah lamah Chawnga hi heti lam hawi thu ziak zel turin ka duh tlat a. A tha a thlah lo hram ka beisei. Midangte’n an beng lo chhu ngawng se, Rengkhawpui tui liak a nih ve vang nge ka chhuang bik riau a, han fak vel pawh nuam ka ti. Kan tui liah a thuhmun vang a ni mahna!
He lehkhabu ṭha tak hi C.Lalrinawma novelette ‘Ka Hmangaih Reng Che Asin’ tih hmanga khar a ni. He thawnthu hi mihring nuna chanchin ngaihnawm lai ber ber, khâm leh suar kaltlanga hmangaihna par a lo vul dan puan chhuahna a ni, Hei pawh hi novel puitlinga ziah chhuah atana ka ît zinga mi a ni leh pek a. Rinawma hi he a kutchhuak ka hmuh hian novelist ṭha tak, thawnthu sawi thiam tak a ni ka ti lo thei lo.
Heti ang hian ka theih ang tawkin MI ANGLO-ho kutchhuak chu ka’n Chhura buh thlir thuak chauh a ni a. A thawnthua a changtute hming sawi ka tum lo, a chhiartute chhiar leh lamah ka dah a, chipchiar lutuka ka bih chuan a ngaihnawmna leh a rilna ka tihbo zawh vek ka hlauh vang a ni. An thuziak tin hi uluk leh chîk takin chhiarin thlir ila, a hlutna leh a mawina kan chhar belh zel ang tih ka ring tlat a, chu an thuziak tihlu lehzualtu tur pawh a ni ngei ang.
A tawp berah chuan kan Mi Anglo ho hian an âtso zel se, â takin lehkhabu ṭha tak tak tichhuak zel se ka ti. Ṭhalaite zingah thu leh hla lam thiam tak tak, mahse, an kutchhuak hmuh tur a awm loh avanga an thiam tih hriat loh tam tak an awm. Hengho talent phawrh chhuak zel turin MALO hian ṭan la zel se, mipuite pawhin thil dang lei nana kan pawisa kan ui lo ang bawk hian lehkhabu lei nan hian kan kut tizum lo ila. Hnam changkangte’n an khawtlang siam ṭhat leh tihngheh nan te, an culture vawn nun nantea hmanraw ṭangkai bera an lo hman thu leh hla hi i hlut zel ang u.
Mi Anglo hote duhsakna sang ber ka hlan che u a. In inṭhianṭhatna hi vawng nung rengin thu leh hla hmangin par chhuang zel ula, Zoram thu leh hla tihausatu ni zel ang che u.
0 Comment to "Mi Anglo Sulhnu preview by Lalrammawia Ngente"
Post a Comment
Eng nge i ngaihdân?