Allison-i lungphu khâwl

Allison-i, naupang kum 3 mi lek chu damlohna nasa tak avângin a lungphu chu tâwpin, thi sa tih theih mah ni se, doctor-te’n vawikhat ṭan lâk leh tumin an buaipui hle a.

Ben Lawrence leh a chhûngkuate tân chuan zân khat mai ni lovin mitkhap kâr lek pawh a rei hle àwm e. An fanu Allison, tui taka muhîl lai chu a rawn ṭhan harh chuan khawsik sáng tak avângin a luak nghâl bawrh bawrh a. A hrawkte chu a ri bawrh bawrh a. A pa chuan a ngaihna hre lo takin, “A hritlàn luat vâng a niang a..?” tiin chuti lutuka hlauhthâwnawmah a ruat lo va. A lo tumrûk rauh rauh dân chuan, zîng khawvar veleh inrinni May ni 2, 1993-a an chhûngkuaa khawi lai hmun emaw bera chawlh hmanga zin a tum a ni.

Ben Lawrence, kum 39 mi chu USA-a Michigan State-a Clarkston khuaa Automobile Company-a Test Analyst a ni a. A nupui Beth Lawrence, kum 37 mi erawh chuan a ṭûl a ṭûl a thawk a ni. Fapa Benjamin an neih aṭanga kum 8 hnu, fa nei tawh lo tura an inngaih hnuah chuan fanu ṭha tak, Allison an nei a ni. Allison chu naupang fel tak leh lawmawm tak a ni a, kum 3 leh a nih avângin school la kal thei chiah lo mah se, school kal tur inzirlâwkna hmun (Anganwadi)-ah leh làm zirna hmunah a nu leh pate’n an dah a. A thil zira rilru pe tak a nih avângin ina a awm chânga a mut loh chuan a làm nasa thei hle a, hla a sa vak vak ṭhîn a ni.

Amaherawhchu, he mi zânah zet zawng, tinung zawng zawng te, mi hlim thei tak a nihna leh a nui hmêl te chu a hmêlah hmuh tur a awm ta lo. A mit chiang taka meng kuau mai chu muangchânga khap fak fak chungin a pa ángchhûngah a bei hle hle a. A thâwk apiangin a àwmchhûng chu thil dik lo awm niàwm takin a puak khak khak a. A tâwpah a nu leh pate ngaihṭha lo chuan an in bula damdawi in lian tak, St. Joseph Mercy-ah an kalpui ta nghe nghe a.

A thlen veleh doctor chuan rang takin antibiotic-in a lo chiu nghâl a, chumi hnuah naupang lam doctor hnêna a rang lama kalpui turin a nu leh pate chu a hrilh ta a.

Zînga khua a var veleh Lawrence-te nupa chuan Dr. James Shaya bulah an fanu chu an kalpui vat a. Dr, James Shaya chuan, “Ka rindân chuan in fanu hi a taksaa tui awm tur zat chu hlauhthâwnawm khawpin a awm phâk lo (rehydration) a ni. Chuvângin, ka phone sak che u ang a, a rang lamin damdawi inah kalpui ula, a rang thei ang berin intravenous rehydration siamsak nghâl rawh u. Tûna tih nghâl a nih loh chuan Allison nunna atan a hlauhthâwnawm thei a nia,” tiin a lo hrilh a.

Damdawi ina emergengy room an thlen chuan Allison-i khawsik pangsa chuan 38.8c a thleng hial a. A thin zâwn chu a rawn senchhuak a. Chu chu a hmuh veleh Dr. Carlito Mojica chuan nurse-te hnênah a rang lama damlo enkawlna hmuna rawn hruai lût turin a ti a. An hruai luh hnua Allison-i thin zâwna lo senchhuak awm chu a endik dâwn mêk lai chuan, Allison-i lungphu chu a muang telh telh a.

Doctor chuan, “Allison-i thisen zâmte hi engemaw infection vângin a chhe vek a, hmun tam taka a keh avângin a thisen chu a kal lohna turah a kal darh a, chuvângin a thisen pawh a tlêm telh telh a ni. Thisen a mamawh tâwk a neih loh avângin a lungphu pawh a pângngai thei lo va, chuvângin rehydrate siam nghâl loh chu tih theih dang kan nei lo,” a ti a.

Rehydration tur chuan thisen zâm a ngai a, mahse, Dr. Mojica leh amah puitute chuan damdawi kah luhna turin thisen zâm pakhatmah an hmu zo tlat lo. Doctor-te chevêl chu mangang taka lo enin Allison-i nu chuan, “Ka fanu tân tih theih pakhat tal nei ila aw..” tiin a bianga mittui lo luang zawih zawng chu a hrû a.

Tlai lam a lo nih chuan Dr. Mojica chuan, “Allison-i chu Paediatric Intensive Care Unit (PICU)-a dah a ngai a. Chumi hmuna awm, naupang specialist Dr. Elizabeth Contreras pawh ka be tawh a, ani'n tihtur leh enkawl dân tur zawng zawngte a hre vek a, chuvângin lungngai réng rêng suh u,” tiin Pu Lawrence-te nupa chu a theihtâwkin a hnêm a. Chu thu an hriat veleh Pu Lawrence-a te nupa chu, “Intensive Care Unit a?” tiin an thlaphàn a zual sauh sauh a. Ben Lawrence mangang chuan, “Eng natna nge ni a, eng nge a dinhmun chiah min hrilh thei awm se ka va ti êm..!” a ti tlawk tlawk a.

Dr. Contreras-i’n Allison-i lungphu a endik nawn leh hnu pawhin, ṭhat lam aiin chhiat lam a pan zêl a. A puitute hnênah, “Engemaw kawng zâwng tala rehydration siam dân kan ngaihtuah loh chuan Allison-i thisen zâm zawng zawng hi a thêp vek ang a, reilote-ah kan chân mai ang,” tiin Dr. Contreras chuan a hrilh a. Mahse, a puituten theihtâwpin Allison-i taksaah thisen zâm zawng mah se, an hmuh loh a awm tawh loh avângin Dr. Contreras chuan zaia a thisen zâm hmuh theihna kawng zawn ngei ngei a ngaih thu a sawi leh a. An beidawn deuh tawh avânga engmah hriattir an duh loh avângin Dr. Contreras chuan Allison-i nu leh pa chu pâwnah a chhuahpui a, “Allison-i dinhmun hi hlauhthâwnawm lutuk ni lo mah se, a taksa a chauh deuh avângin khawngaihin hetah in lo ṭhu phawt dâwn nia,” tiin damlo kantute ṭhutna chu a kawhhmuh a, a lût leh nghâl a.

Allison-i lungphu a han en leh chuan a hma aiin a chhe sauh a, a kut leh kete chu a duk vek a. Chu chu a hmuh chuan Dr. Contreras chuan Allison-i dinhmun a hlauhthâwnawm takzet a ni tih bâk sawi tur dang a hre lo.

Dr. Contreras chu Texas-a piang a ni a. Doctor zirin USA leh Mexico a kârtawn a. Naupang lam enkawlna (Paediatric) chu St. Joseph-ah a zir a, Fellowship in Paediatric Intensive Care Unit chu St. Joseph-ah hian a zo a ni. A thiltihna apianga Pathian-a innghat tlat a nih avângin zîng a thawh apiangin, “Aw Lalpa, ka hmaa hnathawh tur awm zawng zawng hi i tel lo chuan tih theih engmah ka nei lo, i chakna leh thiltihtheihnaah ka innghat e,” tiin a ṭawngṭai ziah ṭhîn a ni.

A tâwp a tâwpah chuan Dr. Contreras chuan Allison-i ke a zaina lamah thisen zâm pakhat a zaichat ta hlauh va, chuta ṭang chuan thisen tlêmtè a lo luangchhuak a. Chu chu test ngai awm apianga test atan a la nghâl vat a. A thisen an han test nâk chuan Allison-i thisenah thil thlum (sugar) awmzat tur aia tam fé hi a lo awm niin. Rang taka enkawl nghâl a nih loh chuan Allison-i hian a thihphah ngei ngei dâwn a, a lungphu pawh tlahniam deuh deuhvin 50/30 a nih hunah meuh chuan hun an nei tam tawh dâwn lo tih doctor-te chuan an hai lo chiang kher mai.

Chu an thisen lâkchhuahna aṭang vêkah chuan intravenous an ṭan nghâl a. A ke-a an hmuh hnuah a kutah an zawng leh a, chumi hnuah chuan rang takin damdawi in chhâwng li-na, pindan pangana-a naupang damlo ngaihtuahawm zualte dahna an dah lût nghâl a. Mahse, Dr. Contreras chuan Allison-i damlohna chhan dik tak chu a la hre thei ta chuang lo a ni. A rindân chuan, ‘Septic Shock’ vânga natna hrik (bacteria) nasa taka pungin chu chuan taksa tâna ṭha lo ‘toxin’ chu thisen zâmah a ṭaidarhtîr a; chuvângin kal, thin leh lung te’n an thawh tur ang hna an thawh theih loh phah niin a ring deuh ber a.

Allison-i mutna bulah chuan doctor-te’n a thisen zâma thil an kahluhna hrui te leh lung enkawlna hmanraw chi hrang hrangte chu a inzam hnawk nuai a. Dr. Contreras ṭanpui turin doctor thiam bîk (specialist) 4 leh nurse 5 chu pindan chhûngah an awm bawk a. An thil kah luhte’n hna a thawk ṭan a ni ngei ang, Allison-i chu lo harh zawkin, “Ka nu ka ngai lutuk..” a rawn tichhuak sap a. Chuveleh Dr. Contreras chuan, “Bawihte, tûn maiah chuan i nu kan la kohsak theih loh avângin min hrethiam rawh aw.. Nakinah muangchângin kan la koh dâwn nia,” a han tih chuan Allison-i chuan chhîng diar diar chungin, “Awle..” a ti a, a muhîl zui nghâl a.

Hun rei lo tê chhûnga a taksaa damdawi ṭhahnem tak mai kah luh a nih vâng leh a taksa hmun hran hrana zai a nih avângin Allison-i chu a rawn vûng ta vak a. Chutih laiin a lungphu a pângngai thei bawk si lo nen, Dr. Contreras chu a beidawng ru tawh hle a. A natna chu Viral Heart Infection a nih a ring ta a. Mahse, he damdawi ina Paediatric Cardologist (naupang lung lam thiam) awm loh lai tak a nih avângin William Beaumont Hospital-a PICU Director Dr. Mark Goetting, Paediatric Neurologist chu a phone a, Allison-i dinhmun chiang taka a hrilh hnu chuan Beaumont damdawi in lama hruai mai a duh thu a hrilh tel bawk a. Dr. Mark Goetting hi amah aia tawnhriat nei ngah leh senior zâwk a nih bâkah, Paediatric Intensive Care a zir dâwna lo kaihruaitu a nih avângin Dr. Contreras hian a rin pawh a ring hle rèng a ni.

Hetia eng nge tih hmasak ngaia eng nge tih hnuhnun tur tih leh engtia tiha ṭha tur nge tiha a buai ém êm lai pawhin Allison-i lungphu chuan chhiat lam a pan hret hret zêl a. “Code (Cardiopulmonary Resuscitation - CPR) kan vuah mai a ngai dâwn avângin kan mamawh tur ang zawng zawng chu a mutna bulah lo dah vek r’u,” tiin Dr. Contreras chuan nurse hotunu chu thu a pe a. “Damdawi zuarte’na an phal zat zat Epinephrine pawh rawn la bawk rawh u,” a ti nghâl bawk a. (Code - Lungphuin amah maia hna a thawh theih tawh loh hnua a ṭanpuitu khâwl chikhat a ni.)

Allison-i lung chuan a taksa pêng hran hrana a pêkchhuah tur zat thisen a pechhuak zo tawh lo va, mitkhap kâr lek pawha chhiat lam pan zêl a nih avângin he natna mak danglam tak hi hneha, Allison-i lungina a thawh tur ang ṭha taka a thawh leh theih a beiseiawm ta lo hle mai.

Ben Lawrence leh a nupui, darkar 2 chhûng chu ṭhu hle hle thei lo va an lo vei an lo vei lai chuan Dr. Contreras chu a lo kal a. “Tûn thlenga kan damdawi neih leh hmanraw neih ang anga kan enkawl chung pawha a la ṭhat theih loh avângin Beaumont Hospital-a kalpuia, eng natna nge ni-a engtianga enkawl tur nge tih hriatchhuah tum vat a ṭhat zâwk ka ring ta..” a tih lai tak chuan nurse pakhat a lo tlànchhuak a, “Dr. Contreras, hmanhmawh takin kan mamawh che,” a rawn tih hnuah a tlànlût leh nghâl a.

Dr. Contreras pawh pindan chhûngah a lût nghâl vat a. Allison-i thin zâwna thisen zâm chu lian deuh deuhva awma a lai a rawn thlen tâk avângin Dr. Contreras chuan Allison-i thisen zâma thisen kal lai chu a tâwp ta tih a hre thei nghâl mai a. A lungphu enna khâwlte chuan a lungphu a tâwp ta a ni tih a rawn tichiang a. Tichuan, tlai lam dar 3:35-ah Allison-i lungphu chu a châwl fel ta a ni.

Dr. Ayman Rifai chuan Allison-i lungphu chu tihnun leh tumin a thin zâwnah a nem vak vak a, a lung thleng hial khawpin nem mah se, Allison-i lung chuan hna a thawk a ni tih lanna engmah a awm ta chuang lo. Nurse pawh chuan Allison-i lung leh chuapa boruak kahluh tumin thlibâwm (?) a hmet reng bawk a. Chu'ng pawh chuan engmah awmzia a neih theih tâk loh avângin Dr. Contreras chu, “Epie,” tiin a au ta vak a. Chuveleh nurse-te chuan rang takin Intravenous-ah Epinephrine an kâplût nghâl a.

Doctor pakhat chuan Allison-i mitmu chu ènin a han enchiang a. A thluaka thisen-te’n hna a la thawh avângin,” Kan vânneih tâwpah hun tlêmtè kan la nei thei maithei,” tiin Dr. Contreras a hrilh a. Chumi hnuah nurse chuan, “CPR minute 5 kan ti ta,” a rawn ti bawk a.

Ben leh Beth Lawrence-te nupa chu an fanu chanchin leh a hmabâk hre lova rilru hrehawm leh mangang taka an awm lai chuan a enkawltute zînga mi nurse pakhat, Anne Ronk chu lo tlànchhuakin, “CPR kan ṭan e,” tiin a rawn hrilh a. Chu thu a hriat veleh Beth Lawrence chu nikhaw hre lovin chhuatah a tlu nghâl a. Ben Lawrence pawhin meiina a kan leh chhiatna hmuin ṭhenkhata CPR hman ngai hiala hliam leh nâ te chu a hmuhte chu damchhuak tumah a hmuh loh avângin a fanu hmabâk chu a ngaihtuah a, a biangah dan rual lohvin lungngaihna mittui a lo luangchhuak ngiai ngiai a.

A hnu deuhvah nurse pakhat Anne Ronk chu lo chhuak lehin, “Dr. Contreras chuan, dinhmun ṭha-ah kan la ding thei a, chutih laiin a chhe ber pawh kan thleng thei a, chuvângin eng ang dinhmun pawh kan dina lo dawngsawng thiam thei turin ka duh a ni a ti,” a la rawn ti ta deuh deuh a.

Chutianga an buai lai tak chuan nurse chuan Allison-i thisen test-na aṭanga an thil hmuhchhuah ziahna chu Dr. Contreras a rawn pe a. Chuta ṭanga a landân chuan Allison-i thisenah Potassium leh Calcium-te chu hlauhthâwnawm khawpin a tlêm a, chuvângin a lung pawhin thisen a semchhuak thei tawh lo a ni tih a hre thei ta a. Chuveleh Dr. Contreras chuan, “Rang lutukin Intravenous-a damdawi, hemi leh khami te kâplût ula.. Eh! CPR-ah eng thleng nge in dah tawh?” ti-a a han zawh chuan nurse chuan, “Minute 25,” tiin a lo chhâng a.

CPR pawh rei tâwk fang an tih tawh avângin doctor-te pawh an beidawng tawh hle a. An hlauhthâwn ber pawh engdang ni lovin CPR minute 20 aia rei tih a nih tawh chuan lung leh thluaka thisen kalte a tlêm avângin thluakin damchhûngin a thawh tur ang tak hna a thawh theih tawh loh theih vâng a ni.

Dr. Contreras chuan, “Epie tam zâwk rawn kâplût leh teh u,” a han ti leh a. CPR an tih aṭanga minute 29-naah chuan doctor pakhat chuan Dr. Contreras dâra rawn khawihin, “A pawi khawp mai, beiseina zawng zawng a bo ta a ni e. Kan thil tih lai pawh i tâwpsan tawh ang u hmiang,” a rawn tih chuan Dr. Contreras chuan thinrim zet maiin, “He thil tihna thuneitu ber ka ni. Beisei tur a awm leh awm loh ka hre lo, tâwp hun tur ka tih hma chuan kan tâwp lovang,” a ti hmak a. “Lalpa, he naupang nunna hi a nu leh pate tân zuah hrâm ang che,” tiin a ṭawngṭai zui nghâl a.

Beaumont Hospital aṭangin Allison-i hruaitu turte chu tlai lam dar 4:06-ah an lo thleng a. Pindan chhûnga mi engemaw zât zîngah Dr. Mark Goetting chu a lût phei nghâl a, Allison-i lungphu leh thil dang dangte chu a enchiang nghâl a. Allison-i lunga Electrical Activities chhinchhiahna Blue Line a han hmuh chuan a rilru té tê-a, ‘A pawi mang e, naupang hi a thi tawh a ni maw..’ ti chungin Dr. Contreras hnênah, “CPR engtianga rei nge in tih tawh?” a han ti a, Dr. Contreras chuan, “Darkar chanve,” a lo ti sap a.

“Compression zawng zawng chawlhtîr phawt rawh u,” tiin Dr. Mark Goetting chuan thu a han pe a. Chutianga an tih hnu chuan Dr. Goetting chuan Allison-i mit a enchiang a, a thluaka thisente pawhin hna an thawk tawh lo a ni tih a hre thei a. Chutah Dr. Goetting chuan a rilruin CPR nena ṭangkawpa naupang a chhanchhuah theih tâk lohte chu a ngaihtuah chhuak a, he naupang pawh chân mai hlauhthâwnnain a khat a.

“Tih ngei ngei tura pawimawh tih loh in la nei em?” tih pahin Dr. Goetting chuan Allison-i thinah a nem vak vak a. “Kawng awmchhun nia ka ngaih chu Allison-i lung hi kut ngeia kan hmeh theih nan a thin zâwna zai mai ṭhain ka hria. Eng nge i ngaihdân?” tiin Dr. Contreras chu a zâwt a. Dr. Contreras chuan remtih tihlan nan a dâr a chhìn ak a.

Dr. Goetting chuan Allison-i thin zaipawp tura chemte hriam taka a han zai lai chuan thâwklehkhatah Allison-i chu a lo thaw káwk a, a tâwp nghâl vat a. Mak tak maiin a lungphu a lo inṭan leh ta a.

Chutianga Allison-i lungphu a rawn inṭan leh hnu chuan Beaumont Hospital-a enkawl turin an phur ta vat a. An thlen hnua damdawi ina nurse-te’n Allison-i hmai dâng bâm mai leh a kut leh ke duk vekte an hmuh chuan thi tawh ang maia ngaihtuahin pawi an ti ém êm a. Allison-i lungphu pawh a awm ti mah ila a pângngai tak tak chuang lo; a chânga awma a chânga rei deuh deuh rawn tâwp leh ṭhîn a nih avângin thlamuanna tur a awm tak tak chuang lo a ni.

Dr. Mark Goetting chuan Allison-i nu leh pa bulah, “Rei tak CPR tih a nih avângin a thluakin hna a thawh tur ang a thawk zawm thei ang em tih engmah sawi ngam ka nei lo,” tih bâk engmah a sawi duh lo va. A dik tak chuan Allison-i chu engtik lai pawha thi thei dinhmunah a ding reng a ni.

Thisen an endikna aṭang chuan Dr. Goetting chuan Allison-i natna chu a hrawk pân aṭanga natna hrik (bacteria) infection-in Toxic Shock nasa tak a piantîr vâng a ni tih a hre thei ta a.  Chuvângin damdawi chi hrang hrangte chu a hun pelh miah lova tih a ngai a. Hêng damdawi pêk ngaite pawh midang kuta dah mai lovin darkar 72 chhûng zet chu rei pawh chhuahsan lovin Allison-i a vêng a ni.

Infection avângin Allison-i kal chuan hna a thawk thei lo va. Dr. Goetting leh a puitute chuan Allison-i pum chu vitpawpin, a kalina hna a thawh loh aiawh turin damdawi chi hrang hrang an kâplût a, a chhûnga tuichhia awmte an paih bawk a. Hênga an khawihna avângin Allison-i taksa pum chu a vûng nasa hle a ni.

Allison-i taksa hmun hrang hrang chu zaipawp a ngaih avângin Dr. Goetting chuan a nu leh pa kiangah pawi a tih thu sawiin, “Mahse, mangang lutuk duh suh u. Ṭhelrêt hmang thiam doctor-te’n a pân tihbo dân an hre lutuk a nia,” tiin a hnêm a.

Chu thu a hriat veleh Ben Lawrence chuan a rilruin, ‘Plastic surgery maw? Hetiang a nih chuan ka fanu chu a beiseiawm a, a dam dâwn tihna a ni maw..!’ a ti a, a làwm rilru hle a ni.

Ni 5 chhûng zet an tih theih tâwk an tih hnu pawhin Allison-i hmêlah chuan a ṭha lam ai chuan a chhe lam hmêl chu a hmuh theih zâwk mah a. Phalsak an nih apiangin a nu leh pa, a pi leh pute chu Allison-i an inkan chhâwk zat zat a. A châng chuan Allison-i’n a damloh hmaa a hla duh deuhte chu a mutna bulah tape recorder nen an zaitir ṭhîn a ni.

Amaherawhchu, ṭhat lam pan lova tlâkhniam lam a pan zêl avângin Dr. Mark Goetting chuan, “Hetiang taka damlo nâ, 100 zînga 10 damchhuak ta ang sela, Allison-i hi a 11-na turah ka dah a ni,” tiin a thawhpuite hnênah a sawi hial a ni.

Kâr khat hnu chuan Allison-i kut leh kezungṭangte chu a lo che theiin, Dr. Goetting pawh chuan beiseina a nei thar a. Chutih laiin a thluakin a hma anga hna a la thawh theih leh theih loh tur a hriat loh avângin a rilru a buai ru hle a ni. Tlai lam vawikhat chu a ni (aunt)-in a mutna bula a hla duh deuh mai tape record-a a zaitîr lai chuan rei lo tê chhûng chu Allison-i hmêlah làwm hmêl ni angin a lo êng hial a.

A thluak lama endik tur awm ang ang an endik hnu chuan Allison-i thluak chuan hmasâwn lam a pan chho va. Kâr hnih chhûnga a ṭha thei ang bera enkawl a nih hnu phei chuan a hminga koh pawh a hre thei tawh a ni.

Amaherawhchu, a kum 4 tlinna, May ni 24 thlengin engmah a la sawi thei ta chuang lo a ni. Mak tak maiin a tûk zîngah chuan a mutna aṭanga amaha thovin a kutkawr bun chu a phelh a. A enkawltu nurse Stephanie Keenan chuan, “Allison! Engati nge i kutkawr kha i phelh tâk mai? I mawipui viau a ni lo’m ni?” tia a chhânlêtna pawh beisei hauh lova a han tih nâk chuan, “Ka phelh palh alawm le..” tiin chiang takin a lo chhâng ta mai a. Stephanie làwm lutuk chuan hlim ém êm maiin Allison-i nu leh pate a va hrilh nghâl a ni.

Hetiang hi ni mah se, Allison-i thluak chuan ngaiawh thei lovin, a thil sawite chu chiang leh dik takin a sawi thei chuang lo a ni. Tlai lam vawikhat chu a awmna pindana a nu leh pate lo lût a hmuh chuan Allison-i chuan hlim taka a kut lo phar pahin, “Âpa ka ngai lutuk!” tiin a auchhuak a. A pa làwm lutuk chu, “Bawihte, kei paw’n ka ngai lutuk che asin!” ti chungin a au chûl a. Chumi hnuah, “Ânu ka ngai lutuk!” a rawn ti leh ta mai a! A nu làwm lutuk chu a biangah làwmna mittui a lo luang a, engmah sawi thei lovin a fanu hmangaih tak biangah a fâwp ngawih ngawih a. Hemi ni tlai aṭangin Lawrence-te nupa chuan an fanu chu a dam chhuah chian an beisei ngam ve ta a ni.

June ni 4, 1993 khân doctor-te chuan Allison-i dam chhuah theih lohna tura engmah hlauhthâwnawm a awm tawh lo nia hriain, “Kar hnih khat vêl hnuah chuan a dam chiang thei tawh ang. Chuvângin damdawi in aṭangin in chhuak theih tawh,” tih thu làwmawm tak chu Pu Lawrence-te nupa an hrilh ta a ni.

Mak tak maia Allison-i thi tawh hnu a lo dam leh theihna chungchânga thuthar lakhâwmtute zawhna chhângin Dr. Mark Goetting chuan, “Dama in lama kan hawtîr theih kan inring tawh lo..” tiin a sawi hial a ni. Dr. Elizabeth Contreras chuan, “Keini tih theihin engmah awmzia a nei lo. Pathianin kawng engkimah min ṭanpui a, Ama’n naupang hi a tidam..!” tiin a chhâng a ni.

Share this

TS Khupchong