Ka thlâ a hrâng!

College zirlai ka ni a, mi in luahin ka khawsa a. Ka in luah hi RCC building chhâwng thum niin a hnuai ber ka luah a, a thlang lam chu khâmpang awih vut hi a ni. He thil rawn thlen hmasak ber zân hian ka mut hnuin kawngka a rawn ri rak a, ka ṭhiante an nih ringin ka va hawng mai a; mahse, tumah hmuh tur an awm lo va, ka mu leh mai a.

Ka muhil dâwn ta maw tihah chuan kawngka kik thâwm ka hre leh ta a. Ka ṭhiante hi fiamthu duh tak tak an nih avângin min rawn fiam mai mai a nih ka ring a, ngaih ṭhat lohna nei lêm lovin, “In va ninawm mai mai e..” tih pahin ka va hawng leh a. Kawtah chuan mihring êk leh bawng êk hi a lo awm ṭeuh mai a. ‘An mi fiam dân mai mai chuh!’ ka ti rilru nghe nghe.

A tûka thenfai atan tiin ka mutsan leh mai a, hemi zân hian thâwm dang ka hre tawh lo. A tûk zîngah thenfai tuma ka va chhuah nâk chuan bawng êk leh mihring êk rêng rêng a lo awm tawh lo, pânhnah hlîr mai a lo awm a nih chu! Tihngaihna ka hre lo kher mai. In chung leh ṭhenawmte ka zawh kual ngial pawhin tuman ka tà an tih loh avângin ka hralh ta daih a. Ka hlâwk ta phian a.

Chhûnah chuan class ka kal ta a. Tlaia ina ka haw leh chuan pânhnah awmnaah khân nihawichi chipna kâwr hi a lo awm ṭeuh a, ka nui chhuak hawk nghe nghe. Zîng lama thil thleng hre rânin zânah ka mu a. Current ka off hma chuan thlang lam tukverh aṭangin pâwna sazuk lo ding reng chu ka va hmu ta a. Mak ka tih êm avângin ka mit ka’n nuai ṭhîn a, a la ding reng bawk si. Tukverh ka va hawng a, a tlânchhe chuang miah lo va, a mit te chu a khap fuk fuk lehnghâl.

Hralh atana man leh mai ka tum lai tak chuan thlang lam khâmah a zuangthla ta daih a. A hnu lawk, tukverha ka la dahchhuah reng laiin sazuk awmnaah tak chuan kêl a rawn bê ta êl êl a! A tak ka hmu bawk si lo va, ka hlau rilru kher mai. Reh a hnêkin a bê uar telh telh a, a tâwpah phei chuan a bê uar lutuk hi a nui chhuak hawk hawk ni berin ka hria a. Ka uang mai mai emaw tiin inchungnu chuan tukverha dâk meuhvin mi rawn hau nghe nghe a ni.

Tukverh chu ka khâr a, kêl bê pawh a reh ve mai a. Ka’n hawng leh chhin a, ka hawn rual chiahin a rawn bê leh ta a nih chu! “Awi! Lalpa leh!” tih pahin ka khâr leh nghal a, khumah puanin ka inlukhûp ta vat a. Nakin deuhvah chuan ka tho va, ka ṭawngṭai a. Ka ṭawngṭai lai chuan ka hmaiah thlî hian a rawn chhêm a, tukverh ka khâr theihnghilh a nih ringin hlau chung chungin ka’n meng chhin a, a inkhâr phui khap si. A ni tawh êm êm love tiin ṭawngṭai chhunzawm ta lo chuan in chungah ka chho va, inkhêl en chhuanlamin an inah ka riak ta a.

Dik tak chuan hemi zân hian Dumka inkhêl takngial pawh a awm lo a ni. A tûk zîngah chuan eirawngbâwl turin ka hawthla a, in chhûng ka’n luh nâk chuan chhuat laiah ka bungbêl zawng zawng chu a lo awmkhâwm ruih mai a! Kawngka ka kalh vek si, mak nge tak pawh ka hre tawh lo. In chungah tlân chhovin thil awmzia ka han sawi a, inchungpa chuan a rawn en a, mak a ti ve kher mai. Pindan lamah a va lût phei a, a rawn chhuak leh vat a, pindan lama ka luh tawh leh luh tawh loh min rawn zâwt a. Lu ka’n thin chuan, “Va en ve chhin teh,” min ti a, ka va lût ta a..

Ka khum chu ceiling-ah a lo inkhai a nih chu mawle!

Chhuat aṭanga ceiling hi ft. 10 vêla sâng a nih avângin mihring tih a ni lo tih chu ka hre chiang kher mai. Ka chhuak leh a. Inchungpa chuan a hmaa hetianga a awm ngai leh ngai loh min zâwt a, kei chuan a hma zân leh zân hmasa lama thil thleng zawng zawng te, kêl bê te pawh kha ka tih a nih lohzia te ka han hrilh chuan mak a ti ve hle a.

“Engpawh ni se, kan in lamah chaw lo ei chho phawt la, chutah chuan tih dân tur kan ngaihtuah dâwn nia,” a ti a. Khum pawh a ngai ngaia kalsanin kan chho ta a. Chaw ei khamah chuan class kal tura insiam tumin ka chhuk leh a, pindanah chuan hlau chung chungin ka’n lût leh dák dâk a, ka thil hmuh chuan min tiphu nasa kher mai. Khum kha a lo inkhai tawh lo va, a pângngai thlapa lo awmin khum inkhainaah tak chuan ka pheikhawk hi a lo inkhai nel nel mai a!

Hetiang ringawt mai chu tiin ka thawmhnawte nen ka insawn chhuak ta a ni.

A hnua an sawi leh dân chuan ka in luahna chhûngah chuan bungrua hi a lo awm rum zêl a ni âwm e. (Bungrua ka lachhuak vek tawh ka tih kha). A kawt tlângbanah chuan nihliap tharlâm tak tak a lo inkhai ṭhat zêl bawk nen, a darhzau ta zêl a. Tuman an hrechhuak thei lêm lo va. Police an duty a, tumah an man thei chuang si lo, a awm awmin an awmtîr ta a.

Hun eng emaw chen hnuah chuan in neitu leh a ṭhenawma mi te paw’n ngaiah an neih ta vêl mai mai a.

Zan khat chu intihuaisen luiin ka in luahna hluiah chuan ka va kal a, kawngka pawh a lo inkalh lêm lo va. A chhûnga ka’n luh nâk chuan bungbel hlîrin a lo khat a. Bungbêl chu zankhuain ka thiar a, a tûk aṭangin dâwr ruak ka zawng ta a. Chutiang chuan zantin ka thiar a, pâwn lamah lah nihliap a lo inkhai ṭhat zêl bawk a, ceiling-ah pheikhawk tharlâm ber ber lo inkhai tiar ṭhin bawk nen. Zantinin ka thiar ta hiau hiau a. Dâwr ka siam a. Ka hausakpui ta a ni.

Kum hnih a liam ta. Chu thlahrâng pawh chu a la awm zui zêl ni âwm tak a ni. Bungrua vêl chu hmun danga lâk buai ngai lovin sumdawnna lian tham tak ka din tawh a, ka duh tâwk êm êm a.

‘A lunglênthlâk e’ tiin zankhat chu ka va kal mai mai a. Mi rethei ṭanpui nana hman tur tiin bungrua tlêm azâwng hawn ka tum bawk a. Ka va lût a. Bungrua la lovin a ken awlsam zâwk, pheikhawk chu ka la a. Ka’n chhuak leh chiah chu man ka ni ta a ni!

Share this

TS Khupchong