Ni khat chu ka nawmsam loh avangin keimahin inah ka awm a, pawn bathlara ṭhut pahin thu ho mai mai ka ngaihtuah a. Kan taksa pêng hrang hrangte hi hmun dang dangah han sawn kual ta ila, a awmna hmun han thlak ila, a buaithlak duh âwm, tih të hi!
Mit hi tûna a awmna aṭang hian tukkhum lamah awm ta zâwk se, a dang zawng hi chu tûna a awmnaah hian awm sela, a buaithlâk ang! ‘Hnung lam aṭanga min chhiatkhum ṭhîntute kan hmu thei tawh ang a, a ṭha viau lo'ng maw?’ ti ngawt ila, kan hmuh theih loh lam, kan hnâr awmna lam aṭangin min la chhiatkhum thei tho dâwn si.
Bus chuannaah driver-in passenger lam a hawi ang a, bus hma lam a en thung ang. Passenger-te paw'n hnung lam kan hawi ang a, driver kan hmu tho vang! A mak hë hû awm mang e! Sam dum ṭhîn tân phei chuan mita tihluh palh a awl ngawt ang. Kan hairstyle mak dân tur chu sawi lo law law ang!
Tukkhum lamah kan khap sak sak ang a, sam zawng zawng hi mithmul a ni nghâl ang a, a pawt kawlh apiang an hmêlchhe tawh ang. Eye-liner leh eye-brow vêl chu hmanna a tam vak tawh lo mai thei. Kan la hmang duh ṭalh a nih chuan a hek ṭha duh mai mai ang chu!
Hahchawlhna hmun atana kan hman, khumlaizâwlah hlei hlei a buaithlâk ang. Kan mut zangthal chuan mit kan delh reng dâwn si a, kan bawkkhum lahin kan thâw a chham mai dâwn si a, saisira mut reng a ngai ang. Saisira kan mut chuan kan hawi lohna lam zel kan hmu ang. Nupa tân hlei hlei a buaithlâk; sawi thui lovang!
Ni chhuak en turin nitlâkna lam hawi a ngai ang a, mittui hru turin tukkhum zût zût a ngai tawh ang. Lungngaih leh làwm avânga ṭah châng hian a buaithlâk àwm. Ṭah nasat deuh châng phei chuan kawr hnung a huh dup ṭhîn ang a, kawr hâk lai thlâk chhén a ngai dâwn a ni. Nuin fa ṭahbelh deuh a hauh dan tur pawh, "Ṭap ṭap teh suh, kawr i neih tlêm têm nen," tih a ni tawh ang.
A nih loh pawhin, tukkhum lama dah lovin kezungpuiah han awm ta sela.. Zum leh hriam kan rah palh ṭhin chu kan hmuh fiah dâwn em avângin kan pumpelh mahna. Mahse, he hmuna kan dah dâwn a nih chuan tûn lai infiamna lâr ber, football hi loh theih lohva a tâwp a ngai! Tunge mahni mita ball pêt peih awm tehlul ang? Ball-boot leh pheikhawk zuartute an khawro ngawih ngawih ang a, chapal hma âwng zuartute an lûn hle ang.
Kezungpui hmâwrah hian mit a awm a nih ngat chuan motor khalha ei zawngtute chuan ṭàm an hmabâk a ni mai! Biakina muthilh hrât deuh tân a ziaawm phian mai thei. Thuhriltuin inrulpuiludin-in thu a sawi ang a, hnuai lam aṭangin a aw a lo chhuak thung ang. Mipui lam paw'n thuhriltu enin bawp kan khai fur tawh mai dâwn a ni. Thu sawi rei kan ngaithei lo zual ang a, thu sawi rei peih pawh an awm tawh hek lovang! Dârkâr chanve pulpit-a inrulpuiludin tur chuan tuarchhel a ngai ngawt ang le!
Loh theih lohvin kezungpuiah tarmit kan vuah fur tawh ang. Hâwkdâk deuh tân hlei hlei a buaithlâk ang. Khawi emaw lai kilkhatah chuan an han inrulpuiludin leh úr ṭhîn ang a. Concert leh eng emaw show neihnaah chuan a tawi deuh bîk nih chuan a vânduaithlâk ngawt ang!
Tichuan, kezungpui hmâwr aṭangin chhas-te kan siai sak sak tawh mai dâwn a ni; romantic mai mai ang chu aw.. Mahse, hetah hian mit mîm zing lutuk tur mawlh mai hi kei ka lungkham! Tûna awmna tura siamtu remruat hi a fuh ka ti thlâwt e.
Mit chu dahsawn a rem lo em mai tiin hnar zawk hi han dah sawn leh dawn ta ila.. Thil dang sawn hauh lovin hnâr hi mawngtam lamah awm ta se, hritlâng hnaptui leh kan hriat hauh loh laia hnap lo chhuak palh, min timualpho fo ṭhîntu hi tlém chuan thup a awl deuh ngei ang; mahse, buaina a titam mai mai a ni.
Hnap hnìt dâwn apianga mawng dawm a ngai fo tur hi a buaithlâk ve hrim hrim a, hnâra thlan awm leh hnap hrûk dâwn apianga mawng hrûk zauh zauh a ngaih dâwn bâkah, pum lam fel zãn loh avânga mawng lamin thâwk a lâk hun a awm lo thei dâwn si lo, kan hnìmhnai dâwn em asin! Tûna a awmna aṭang mahin a rim kan hre hma tih mah nâk alaiin! Inthiara mawng hrûk hian a buaithlâk leh zual ngawt ang. Mawng silna tui kha hnârah a lo lût tel leh ṭhîn ang a, bathroom-ah mahniin kan hahchhiau tuar tuar fo lo'ng maw?
Kan nula hmêlṭhate hlei hlei hi ka ngaihtuah. Dâwrah lotion leh perfume an han lei ang a, a rimtui leh ‘tui loh fiah tur chuan mawng lama an hnim zêl a ngai ngei dâwn a, an style a mawi lo ṭei ṭui àwm e! Chu mai ni lovin, hnap hnìt dâwn apianga kekawr phelh a ngai ziah tur hi buaipui tham a ni. Sikul naupang pawnfèn fêng ṭhîn leh kekawr ha thâwl deuh hnârngul a mawi ang a, kekawr ha tait ṭhîn leh office-a ṭhu nilêng ṭhînte hnârngul chu a mawi lo ve ngawt ang. A chhan chu an ṭhutbet reng dâwn avângin mawi ngaihna thlâwt a awm lo atin ni.
Meizu mite'n an han hnârkhuchhuah ang a, mawng lam aṭangin a rawn khu chhuak thung ang. A ṭûl të-ah lo chuan ṭhut mai mai a rem tawh hek lovang. Hnâr zum tak a awm theih dâwn loh va, a pui a nawiin kan hnâr a pèr thler tawh mai dâwn a ni.
Mit leh hnar sawn a rem lo em mai tiin han dahṭha leh rih ila. Ei leh in leh ṭawng nan bera kan hman, kâ hi i han sawn leh chhin teh ang.
Zak hnuaiah kâ hi awm ta se, kareh mawi lo deuh leh hmui hausa deuh tân chuan thup mawi a awl deuh ang a, a làwmawm duh viau mai thei. Anṭam pâr han zût hian a rem bawk ang, kan zût apiang kha kâ-ah kan barh phei nghâl zung zung mai dâwn a ni. Mahse, a awlsamna aiin a buaithlâkna chu a tam hmel zâwk fú mai!
Hmangaih leh duhberte biahthu hlan hun leh ni a awm ngei ang a, zawi të pawhin ‘ka hmangaih che’ ti mah la, bân phar hrim hrim a ngai. Thihna avânga chhûngte ruang bula kan ṭah hawm hawm hun a thleng thei; chu'ng huna buaithlâk ber tura chu ṭah chhûng zawnga bân phar a ngai tur hi a ni. Kan ṭawng dâwn apiangin bân phar a ngai ang a, thusawi laklawh laia kan lâkthlâk vaih chuan kan bân khân kan kâ kha a hup zêl dâwn. A ṭawng mawh deuh bân a kham nêp deuh ang a, ṭawng duh leh ṭawng thei deuh chu an rethei nak nak viau ang. Ṭawng tam lo tura inzirtir a tihchi phian mai thei.
Nu leh pate'n min hauh ngun poh leh an hah ting. Nu àncheh leh phunchiar deuh chu an chawh hle ang. Hei mai pawh a la ni lo, Kan zaithiamte'n zai paha an zak zâwna microphone an han lek ngàr mai turte hi a hmuhnawm kan ti ang nge a buaithlâk kan lo tihpui viau dâwn? News puangtute'n an news puan paha an bân an phar zauh zauh tur hi an khawngaihthlak tlat! Kan fiamthu thiamte pawh hi a ni tho. An zakhnuai aṭangin fiamthu an han thawh zuah zuah ang a, ngaithlatute pawh an zakhnuai aṭangin an lo nui chhuak huah huah ṭhîn dâwn ta a nih chu!
Taxi driver-in a kut leh lamin a steering a vuan ang a, kawngsîra nula chhe lo zet kal hnênah, “I chuang duh em?” tiin a bân leh lam a'n phar hah ang a! Nula lah chuan, “Duh mai e,” tih pahin a'n phar ve leh hah ang a! An inbiak rei deuh phei chuan an phar tawn zak zak ang a, râlkhat aṭanga lo hmu tân phei chuan an in-bye-bye emaw an ti ngei ang a, an chuang dûn leh daih dâwn si a!
Puipunnaah hian a mak nuai nuai àwm e. Kan phun mur mur ang a, bân kan phar suau suau ang a, ranvulh leh sava tân chuan a hmuhnawm ve duh ngawt ang! Zakkha nei tân a va han hahthlâk dâwn tehlul em! A hranpain zak an nei tawh lovang a, a kâ kha an zak a ni mai dâwn a. An ka a uih viau chuan an zak a uih tihna a ni leh mai ang a, a remchâng letling phian. Chumai bâkah an zakhmul leh an hmuihmul kha a inṭâwm tawh ang a, hmuihmul ziah buai vêl kha an pumpelh thei dâwn a ni.
Misual ber pawh a ri-a kan ṭawngṭai a nih chuan bân phar a ngai ang a, kan tihtak hmêl phian ang. Chutih rualin damlo chauh tak, ‘tui’ ti tur ringawt pawha bânphar a ngai tur chu a buaithlâk lam a ni e - a bân an lo pharsak te a nih ngawt loh chuan. Chu chang a ni nêm, ha nawh dawna ban phar a ngai tur leh zak han nawh zat zat chu, a za duh viau ang.
Nula leh tlangval inngaizawngte tan a va buaithlak dawn tehlul em! An han infâwp dawn ang a, an zak leh an zak an han insîktir ang a, degree 90-a ban an phar vah a ngai ang a, a infawh rei chi loh vang. Kan mi ngei deuhte lei kan chhuah dawn chuan ban kan phar zuk a ngai ang a, mi kan seh dawnin bân kan phar a ngai bawk ang a; kâ chu pahnih kan neih dawn avangin hman thiam lam leh hman thiam loh lam a awm ang a, hman thiam lam bân chu kan phar zin zâwk dawn avangin a sek ṭul ang.
Khawi hmunah pawh sawn mah ila, a rem tak tak dawn chuang lo tih a chiang reng mai. Chuvangin tuna a awmna ngaia a awm hi a ṭha ber a; kan taksa pêng dangte pawh han sawn kual vel ṭhin mah ila, tuna an awmna aia awmhmun ṭha a awm chuang lo. Chuvangin Khuanu'n kan nihna anga min siama rem min lo ruat dan hi a lo fuh ber mai!
Note: He thu hi ka ṭhianpa, C. Lalrinawma nena kan ziah a ni a, tlem siamṭhain ka rawn dah a ni e.
I va ngaihtuah chhuak maksak mai mai e aw... Ka chhiar a, a khat tawkin ka nui tliks tliks mai. Mi tihhlim dan chi hrang hrang hi chu i va lo thiam bik thin e aw...
ReplyDeletePathianin min siam dan ang hi a lo fuhin a lo dik ber mai. Tih danglama cheibawl maksak vak hi a lo ngai reng reng lo.
i va ngaihtuah kual peih mai mai e aw, a ni ngawt mai Pathian siam dan hi a lo tha ber a ni, i han sawi takah chuan.
ReplyDeletePu Caribou, a hmasain ka lawm phawts. Nia, a dang pawh a ziah chhunzawm teuh theih! Ngaihtuahna ho mai mai a kal ding deuh a ni. Engkim hi lungawina tur a lo ni.
ReplyDelete@Pu Rp, ka lawm e. Kan taksa khawl hi a lo ropui, an awmna tur hmun theuhvah a lo awm chiang a ni! Kan belchiang tulh tulh a, Pathian ropuizia a lang chiang telh telh mai.
Ngaihtuahna kalding kual mak tak, chhiar nuam tak... ni tase dangdai tak leh tuna kan zehmang a ngaihtuah chuan ngaihna awmlo tluk ani ang. Mahse, kan zephung nise chu ngaiah kan nei ngeiin ka ring.
ReplyDeleteIn ngaihtuah chhuak thiam hle mai hehhee
I va han taima mai mai tak e aw. Mahni chauhva han nuih ruh ruh mai chu, mi â ka ang mai dawn e a. A tha lutuk tlat...Pathian drawing thiam zia a ni e.
ReplyDeleteThu leh hla a hausa deuh hi chuan, ngaihnawm takin engkim hi min hlui thin a nih hi
ReplyDeletePu Hv, nia..ngaiah chuan kan neih vat ngei ang. Mahse, tuna han ngaihtuah mai hi chuan mak duh deuh mai a nia..:) Hairehai!!
ReplyDeleteLra, i lo nui ruh ruh chu a lawmawm hle mai. Ni e, Pathian drawing thiamzia a ni..:D
LH, i lo lut teh hlawl chu ka lawm hle mai. Thu leh hla lamah chuan ka hausa lul lo mai!
TS ka vel chak che!! ka nui nasa lutuk hnathawhna ah ka mualpho der alawm!! Ka nui nasa lutuk a ri hi rawn thawn theih che ka chak!!
ReplyDeleteHnar mawngtam a awm tur te khiii..hnap hnit dawna kekawr phelh ziah ngai!!. hmui zakhnuaia awm ban phar ngai te khiii!! hahaahhahah, type pawh ka type hleithei lo!! ka nuih hi a za em ani!! Tunah hian min hmu la chu i nuih a za ve ngawt ang!, ka mittui a tla phung mai!..
Mahse ka lawm e! I ngaihtuah pui tiap tiap em mai!
A va awmzia leh pak em aw!
ReplyDeleteHun i hmangtha thin hle mai. Ngaihtuah theih tak hi i ziak thin a. Ka la chhiar nawn leh ang....
Hahaha.. Pi Ma, i nui uarh uarh ri chu hriat a châkawm ngei mai. I lo hlimpui a, ka lawm lutuk.
ReplyDelete@K'u Krista, ka lawm e. Nia, lo chhiar leh rawh...hehe. A aia ngawihnawm leh chhiar nuamin i ziak thei zawk ngeiin ka ring.
I va han sawi kim changin i va han ngaihtuah kual nasa ve, mi pahnih ngaihtuah chhuah awm vel zet a, thui a ni reng a nih hi.. Min ti hlim thin e, TSA nge nge..
ReplyDeleteHe thil hi ka ti hleithei lo!! Ka nuih hi a za em ani!! Mit tukkhum lama awm te khi!!! Bus a chuante khiii hahahhaa!! hnunglam hawi si a Bus Driver hmuh theih te khiii!! Ka nuih hi a za em ani!!
ReplyDeleteWeekend manah ka nui leh nasa ngei. Ngui deuh hunah chhiar ziah tur anih hi! Mittui a tla phung reng mai!..
@Xingibera: Mi pahnih ngaihtuah chhuah a ni tak tak alawm! I reh hle mai. Ka lawm lutuk e.
ReplyDelete@Pi Ma-i, ka va han lawm awn awn tak em! I lo hlimpui chu a lawmawm takzet! :D
Thu thiam ber ang hrim in Pu Tuaisiala thu leh hla chhiar tur a lai thleng thleng ka kal tak chu. mahse ama tih dan tak ah kan chhiar phawt teh ang
ReplyDeleteumm A enga pawh chu nise tha ka van ti kher kher em ve o
ReplyDeleteAnih chuan tunge kn misualdotcommer hiii. T.s khup chawng maw?
ReplyDeleteThu thiam ber ang hrim in Pu Tuaisiala thu leh hla chhiar tur a lai thleng thleng ka kal tak chu. mahse ama tih dan tak ah kan chhiar phawt teh ang
ReplyDeleteHahaha.. Pu Hriatpuia, aw ni chiang e. Helai thleng thleng thu fahrah tak tak chhiar tura i lo thleng hi ka lawm e. :-)
ReplyDelete