Sarah-i chuan a pasal nena kum 11 an inneih hnuah fapa duhawm tak mai a hring a, a hmelṭhain a pa mitmeng a chhûn hle nghe nghe a. Fa nei tawh lo tura an inngaih hnua an neih chauh a nih avang leh, upa lam fa a nih tawh avangin an duatin an hmangaih em em a, an nupa tihlimtu ber pawh a ni.
Mipa naupang chu kum hnih a ni tawh a. Tuk khat chu a pasal office kal tur insiam chuan damdawi bur inhawng a hmu a. Chhuah pahin a chhîn zawng tur leh dahṭha turin Sarah-i chu a hrilh a. Office tur chuan a kal ta a.
Sarah-i chuan zinga damdawi a ei hnua a chhin theihnghilh a ni tih a hrechhuak thut a, a chhîn a han zawn chuan, choka lama a fapain a lo hmuam chu a hmu a; damdawi bur chu a han en leh a, a lo phai duak mai!
Chutiang damdawi chak lutuk, puitling tan pawha tlem të të-a ei chi chu naupang kum hnih mi lekin a lo in phai duak chu niin! Sarah-i chuan a hlauthawng ta hle a, a thin a phu dut dut a. A hlauhthawn ang ngei ngeiin minute 20 vel hnuah a fapa chu a buai ṭan ta a. A ṭap a ṭap a, a tawpah phei chuan biak theih lohvin a awm zui a.
A mangang lutuk chuan damdawiin hnai berah a kalpui vat a, mahse, damdawi kha a chak em vang leh a lo in hnem em avangin doctor-ho chuan a fapa duhtak nunna chu an chhan thei ta chuang lo. Sarah-i chu a mangang em em a, a rilru a nâ a, a hlauthawng bawk a. A fapa thihna avanga a lungchhiatna leh a pasal a hlauhna chu a inzat hial awm e. A pasalin a fimkhur loh vang liau liauvin an fapa neihchhun a thi tih a hriat hunah engtin nge a tih ang le?
Huphurh takin a office-a a pasal awm chu a fapa thih thu a hrilh a. A pasal chuan ngawi rengin phone a dah hmak a, damdawiin lam a pan nghal a. A pasal lo thlen hun a va nghakhlel lo tak em!
A pasal chu a lo thleng ta. Ani chuan hlauthawng tak maiin ṭap chungin a pasal a han en a. Engtin nge a pasalin a tih ang le?
“Bawihi, thlaphang reng reng suh, i bulah ka awm tlat e.”
Nangni la engtin nge i tih ang le?
0 Comment to "Engtin nge i tih ang?"
Post a Comment
Eng nge i ngaihdân?