Ka tlâk lo takzet em?

Hun rei tak ka lo kawma ka lo kawp tawh, ka ṭhiannu chuan pasalah hnam dang min neihsan ta a. Ngaihtuahna a kal thui kher mai.

Chutih lai vel chuan khawi emaw laiah hnam dang pasala neih chungchang an sawi a, hmeichhia ni ngei tur pakhat chuan, “Mizo mipate chu neih tlâk in vâng em alawm,” a rawn ti khanglang a. Ka sa zak mai.

Ka ṭhiannu pasal neih tâka chu a mimal tak pawha ka hriatchian a nih avangin ka inkhaikhin nghal vat a.

• Ani chu milem pathian bia, Hindu tlangval a ni a; kei chu Pathian nung bia, Kristian tlangval ka ni.
• Zirlai a ni a, hnathawh engmah a la nei bîk lo va, a chhûngte’n an châwm. English, Hindi a thiam a, Mizo ṭawng a thiam lo; zirlai ka ni a, lehkha zir chungin hna chhetë ka thawk a, chhûngte tibuai lovin ka intodelh ve tâwk. English, Hindi ka thiam, Mizo ṭawng pawh ka thiam.
• A ngo ving veng bîk lo, a hmêl phei chu a vântlâng chung lam bîk lo. A sang duau a, a tlâw hmêl hliah hliah; kei chu ka ngo veng a, hmêlṭha viau anga sawi tur ni lo mah ila, amah kher kher kha chu vântlâng hmaah ka cho. Sàn zâwngah ka chen lo va, mahse, ka ni duau lo va, ka sa a inphut mawi zâwk.
• A nu leh pate hi sakhaw mi tak an ni a, an inkhuahkhirh nasa; ka nu leh pate hi sakhaw mi tak an ni ve tho va, mahse, min khuahkhirh em em lo.
• An society kan hria, in hria; kan society in hria, kan hria. A nuam zâwk tur chu neutral tak pawhin thlîr ila, a lang chiang em em.
• Ani chuan sikret a pak hlat hlat ṭhin a, zu pawh a in, a rui chhe ngai lo nain; zûk leh hmuamah ka fihlim a, zu pawh rui chhiaa rui chhe lo tur paw’n ka in lo hrim hrim.
• An inchhûngah Hindi an hmang, anmahni ṭawng a ni a, ka ṭhiannute ṭawng a ni lo; kan inchhûngah Mizo ṭawng kan hmang, kan ṭawng a ni a, ka ṭhiannute ṭawng a ni.
• Duhtâwka sum hman tur an nei, an hausa, an neinung; duhtâwka sum hman tur kan nei lo, kan rethei, kan harsa. Sum hi nun hlimna a ni ber lo tih erawh ka hrechiang, ka ṭhiannu paw’n a hriatchian ka ring.
• A hmangaih ve lutuk, a hmangaih thu chu ṭawngkain a hrilh fo; kei paw’n ka hmangaih khawp mai. Ṭawngkain ka hrilh fo va, ama tan liau liau poetry ka phuah a, amah avang liau liauvin thu ka ziak nual tawh.

Hnam dang aia neih tlâk ka nih lohna bîk eng nge awm le? Kan Mizo nulate hian ngaihzâwng atan pawha Mizo tlangvalte hi neih tlâk kan nih lohna chhan eng nge sawi tur in neih? Kan ṭhat lohna leh kan tlin tâwk lohna chu hnam dang pawhin an nei ve tho va, in hmu lian zâwk lo mai mai a ni.

Share this

TS Khupchong