“Thianpa, signal i nei em?”
“Aw nei e. ‘Ngati nge?”
“Kan sim card hman a inang sia, signal ka nei lo bik a..”
“Off la, on leh rawh.”
Thuawih takin a off a, a on leh a. Signal chu a lo intung thuau a, hlim takin a awm leh thei ta.
Tum khat chu thiante inah ka leng a, an light (tubelight) ka on a, a êng thei ta reng reng lo mai a. Ka tichhia emaw tiin ka lo mangang hman thawt thawt a! Ka ṭhianpa chuan, “Off la, on leh rawh,” a ti a, a thu ang chuan ka ti a, a lo êng thei ta a. Ka thaw huai mai.
Kan ngaihtuah ngai emaw chu, off-on chungchang hi. Kan khawl a ṭhat loh changin kan off hnuah a ṭhat leh hlauh beiseiin kan on leh hram ṭhin. Computer a chian loha a buai deuh chang pawhin kan restart (off-on) ṭhin. Hei hi beiseina vek a ni.
Mihring nun nen hian a inpawlh chiat mai! Chatuan nunna nei lo chu on hnua off ang hmak an ni a, beiseina nei mi chu off hnuah pawh on an ni ṭhin. Ringtute pawh hi kan tlûk (off) chang awm mah se, kan tho (on) leh tur a ni. Kan thihna kha dam nan kan hmang hlauh tur a ni.
I inphahhniam (off) hreh tur a ni lo, i hnehna (on) a ni zawk. I thinrim (off) pawhin i nui (on) leh tur a ni. Mi rethei tumruh chu off-on ang an ni, an dingchhuak ṭhin.
I nun kha inenfiah fo rawh. I nun i lo off palh a nih pawhin on leh mai ṭhin ang che.
0 Comment to "Off la, on leh rawh"
Post a Comment
Eng nge i ngaihdân?