Ka lo ṭawngṭaipui che asin..

Ṭumkhat chu fellowship-naah tlangval hmel fai ngo ving veng, khi sáng, amah sâng si lo, thiamna aiin rinnaah a sâng zâwk tih hriat tak mai hian thu a sawi a.

“I inṭawngṭaipui tawn ṭhîn ang u. Kan ṭhiante, kan chhûngte, kan ṭhenawmte leh midangte i ṭawngṭaipui ang u. A lawmawm duh êm mai. Han ṭawngṭaipui tak tak lo mah ila, ‘Ka lo ṭawngṭaipui ang che,’ tih ringawt pawh a dawngtu tân a thlamuanthlâk a, ‘Ka lo ṭawngṭaipui che asin,’ tih ṭawngkamte hi a hlu a nia,” a ti a.

Ka pawm khawp aniang, chuta ṭang chuan ka ṭawngṭai hun chhûng hi nidang aiin a lo rei ta a. Ṭawngṭaipui miah lova ‘Ka lo ṭawngṭaipui ang che,’ tih ka chîn ṭhinte chu ka bànsan hmak ta zâwk a. Kan ṭawngṭaipui tih kha hre lo mah se, ṭawngṭaina hi chuan a rûkin hna a thawk kheuh kheuh ṭhînin ka ring tlat a ni. Hmasâwnna an neih hauh loh erawh chuan bei a dawng duh deuh.

Ṭawngkam thuhlaah chuan, ‘Ka ṭawngṭaipui ang che,’ ti-a reh zui ta hmak te hian min ṭawngṭaipui tak tak lo tlângpui a, min ṭawngṭaipui intiama min ṭawngṭaipui tak takte chuan, ‘Ka lo ṭawngṭaipui che asin,’ an ti tlângpui. Chuvangin, ‘Ka lo ṭawngṭaipui ang che,’ tih aiin, ‘Ka lo ṭawngṭaipui che asin,’ tih hi hriat a nuamin a thlamuanthlâk zâwk em em a ni.

Min haw deuhtu an awm chuan, “Mi huat lai ber pawhin i tân ka ṭawngṭai zêl ang,” han ti ila, min huat nachhan tur an hre tawh lo rëng rëng. Kan mi huat deuhte’n chutiangin min ti se, a chiang mai. Hetah hian, ‘I hmêlmate hmangaih rawh,’ tih thu kha a inzep tãt a. Hei hi kan Mizo upate’n, ‘Ṭawngkam ṭhain sial a man,’ an lo tih kha a ni. Chutih rualin dâwt hmanga sial man tum erawh a fuh lo ngawtin a rinawm, kel pawh zu man pha suh.

I ṭawngṭai tam ang u. Bible hi chhiar reng a theih loh a ni thei, mahse, ṭawngṭai hi chu khawiah pawh, engtik lai pawhin a tih theih reng a ni. Eng anga hna sâng thawk paw’n eng anga hna hniam thawk pawh ni se, a ṭawngṭai lai a tihbuai ka ring lo. Ṭawngṭainaah hi chuan a tu-a pawh kan inhrethiam tlâng vek a ni. Chu chuan rilṭâm tawh lama darkar khat vel chham duah ang chi kha a huam lutuk turah ngai lo ta ila. Ṭawngṭai hi tlang taka Pathian kan biakna (fakna ni lovin) a ni. Ani chuan hmêl inlanin âw te chhuah nghâl mah suh se, thil tih hmangin min chhâng ṭhîn. Ṭawngṭaina hun kan inpe tlêm em em a, ṭawngṭai ngai lo pawh kan awm hial maithei. Ṭawngṭaina hun nei lo khawpin thil dang i inchîmbuaitîr lovang u. Pathian kan biak tam chuan kan innêl ang a, Ani’n min hria ang a, kan inpawh ang a, kan inkâwmngeih em em dâwn a lo ni; chu chu thian inbe ngai lo aia inbe ngunte-ah a chiang.

“Mi huat lai ber paw’n i tân ka ṭawngṭai zel ang.”

Share this

TS Khupchong