Ka fak a che!

Aw nang ram danga awm Mizo nula, i awmna lamah hmelṭha leh sar vah an tam dawn tehlul nen. Pa tawi tirh terh ni lo, hnar bawng lo kephah hlai over si lo, sa inphut tawk tak leh kawng tinrenga kan mipate aia thlanawm i hmuh dawn tehreng nen, i ram leh hnam phatsan duh lova Mizo val ngei pasal atana i thlang ṭhin hi ka fak a che.

Aw nang ram danga awm Mizo tlangval, i awmna lamah pawh chawntawi puar ling leng, ngal kual leh thau tawi bit bet ni lo thlan tur i neih âwm tehreng nen, chu’ng chu kalsana Mizo nula ngei nupuia i rawn thlang chat ṭhin hi ka fak a che.

Aw nangni Mizoram pawna awm zawng zawngte u, kan ram riang të aia i awmna hmun leh hma a nawm zawk dawn nen, tlangram khawkrawk chhe tak tak leh vaivut lêng chum chumin a bawh ngai lohna hmun kalsana hun remchang i neih chang changa i rama rawn haw nachang i hria te, i theih loh chang pawha haw i duh leh châk ngawih ngawihna rilru avang khan ka fak a che.

Aw nangni ram pawna awm Mizo nihna theihnghilh ngai lote u, i awm leh kalna apianga Mizo awm miah lohnaah pawh Mizo i nih i zep lo ngam te, i thil tihna apianga Mizo hnam chawi lar i duhna thinlung kha a ropui kan tiin ka fak a che.

A inpui nghakte’n kan zir si lo, kan thiam si lo, kan fel si lo. In rawn haw hun nghakhlel takin kan lo thlir reng a, Mizoram tana kut in thawh theih hun kan nghak reng e.

Share this

TS Khupchong