Ka hmangaih ka fapa tân

Ka fapa, ka va han ngai ṭhin tak che em!

I lo pian ni-a ka lawm zia kha! I û-te hmeichhia vek an nih avangin fapa nei tawh lo tur anga inngaiin a rûk tak chuan hrehawm ka tiin a kalh a kim lo ka ti hle ṭhin a; mahse, beidawn tawh hnu lamah malsawmnaah pawh a sawmna tak tak ni turin fapa ka hring ta che a, lâwm tak leh lungawi takin ka ṭhiante hnenah 'pa ka ni ve ta' ka ti hial asin. Khata ka lungawina min petu chu ka ṭhiante ni lovin nangmah liau liau i ni a, kha ka lungawina kha tunah a awm tawh lo! Ka ṭhiante bulah ṭap chungin i chanchin ka sawi mêk asin!

Ka hnathawhna avangin hmun dang dangah awmsanin i bulah ka awm reng thei lo va, khawi hmunah pawh awm ila, ka theihnghilh ngai lo che a. Phone-a kan inbiak changa 'Âpa.. I lo haw hunah chuan maw..' ti-a duhthu mi sàm khum ṭhin lai kha i la hria em? Chutianga duhthu mi sàm khum leh theih nan tunah hian duhthu ka sàm ve tawh asin. Chhuang takin ka thawhpuite hnenah i chanchin ka sawi ṭhin a, i thlalakte chu hmuhtirin duh duhin ka kâwk kual zat zat ṭhin che a nih kha. Khata ka lungawina min petu chu ka thawhpuite ni lovin nangmah liau liau i ni a, kha ka lungawina kha tunah a awm tawh lo! Ka thawhpuite hmuhah ṭap chungin i thlalak i thlalak ka lek mêk asin!

Hmun danga awma ka lo haw chângte khan khawvel hi a va nuam ngai em tiraw? I theihtawpin min lâwm a, ka thil hawn che la-a lungawi tih hriat tak maia 'Âpa, ka lâwm e aw..' tiin lawmthu min hrilh ṭhin kha! Ka bengah hian a ri a la châm reng a, i aw mawi leh pawisawilo tak mai kha hriat nawn leh ka va châk em! I lungawina ka siam avangin ka lungawi hliah hliau a, lâwm avangin ka mittui a parawl ṭeuh va, ka hmangaihna che hi a pung deuh deuh ṭhin. Khata ka lungawina min petu kha thil dang ni lovin nangmah liau liau i ni a, kha ka lungawina kha tunah a awm tawh lo! Tunah ṭap chungin ka lo haw a, hmana ka rawn hawn ṭhin che ang kha ka rawn hawn leh che asin!

I piancham a lo thlenin i pa hi ka nui ṭhin asin! I nu leh i unaute nena hlim taka kan nuih ṭhin kha — i la theihnghilh bik lovang tiraw? I duh ang ngeiin sahuan-ah kan lêng a, home te tlawh kualin ṭanpuina kan pêk ṭhin kha.. Zanah i ṭhiante i sâwm a, eiturte i sem den den ṭhin kha. I hlim ni-ah i ṭhiante i theihnghilh lo va, i hlimna khan i ṭhiante hlimna a siam ṭhin a, cake i zaisak ṭhin kha! Chutiang chuan hlim takin i duhdan ang ngeiin i piancham kan hmang liam ṭhin a, i pa hi ka lungawi hliah hliah ṭhin asin. Khata ka lungawina min petu kha sahuana nungcha mawi tak takte kha ni lovin nangmah liau liau i ni a, kha ka lungawina kha tunah a awm tawh lo! Tunah i piancham a lo thleng a, ṭap chungin hmana i cake zaina chemte ngeiin i piancham cake ka zai mêk asin!

Lal piancham a lo thlen changa i hlim ṭhin zia kha! Kan biak pawh chu i hlimna chuan a tihlungawi hial ka ring. Mi zui det det a, ka kutah manin i baloon mawi tak tak hmuhte mi kawhhmuh ṭhin kha. Ralkhata chawngzawng leh sava dang inchhaih zawr zawr te i hmu a, i râk chèl chûl ṭhin kha. Tichuan, hlim takin biakinah mi zui lut a; naupang dangte chu an nute leh an ṭhiante bula an ṭhut tlat laiin nang chu kei, i pa bulah i ṭhut tlat ṭhin kha. Inkhawm laiin i muthlu a, ka malchungah i muhil bawrh bawrh a, i hmel ka en vawng vawng a, hmangaihnaa tihkhah-liamin ka awm ṭhin a nih kha. Khata ka lungawina min petu kha biakin thusawitu ni lovin nangmah liau liau i ni a, kha ka lungawina kha tunah a awm tawh lo! Tunah Lal piancham a lo ni a, mittui tla chungin hmana kan ṭhutdun ṭhinnaah khan mal takin ka ṭhu mêk asin!

Ka fapa, min ngaina ve tiraw? Ka ngaina thlawt che a, keimah zawng zawng hi nangmahah a awmin ka hre ṭhin. I awm lohna a ruak a, i awmnaah kan khat a, i rikna apiangah hlimna a awm ṭhin. I nui ri hre lo chuan khawi hmun pawh hi hmun khawhar a chang a, i ṭap ri tal hriat tur ka nei tawh lo hi rethei ka va inti tak em! Hmana i bula awm apiang i tihhlim ang khan min han tihlim leh ta che! I awmna hmun hi hmun khawhar an chang zo ta! I bula hlima lawm ṭhin kha i thlânah khawhar leh lungchhe takin ka ṭap mêk asin. Min han hnêm la, vawi khat tal min han nuih leh ta che. I aw mawi duhawm tak khan 'Âpa..' mi han ti leh la, i pa hi lawmin ka khat leh dawn asin!

Min kalsana min liamsan hi i duhdan a ni bik lo tiraw? Min ngaina ṭhin em a, min kalsan chu i hreh ve-in ka ring a, ṭap chunga i ṭahhla ka chham lai mêk hi i awmna hmun aṭangin hlim takin min thlir bik ang maw..! Vawi khat chu 'Âpa.. Ka ngai lutuk che' han ti leh teh. Vawi khat tal chu i piancham min han hmanpui ve la, vawi khat tal chu Lal piancham i hmangho leh ang u hmiang! Vawi khat tal chu ka kut han vuan leh la, vawi khat chauh tal chu ka malchungah rawn muthlu leh hrâm ta che....ka fapa..

Ka fapa, vawi khat chauh tal chu 'Âpa..' mi han ti leh ta che..

Share this

TS Khupchong