Tlai khat chu ka hnathawk zo hi ke-in zawimuangin ka haw a. Bazar Bungkawn kawngsîr hmun pakhata hmeichhe tleirâwl pakhat, kum 16 mi àwm vel lek leh tlangval pathum lo ṭhu ka hmu a. An bulhnai ka thlen chuan an rim chu Chhandamna thu sawi rim a nam lo tih ka hre nghâl a. Hmeichhe tleirâwl kha, kum 16 mi vêl lek a nihna tak chuan ka thinlung a chhun ngaih mai.
Ka kal zêl a. Minute 15 vêl hnuah Zodin Square ka thleng a, brigde-ah ka lâwn a. A chungah chuan hmeichhe ṭawp deuh pathum vêl leh mipa, kum 18 mi vêl lek lo ding ka hmu a. An bul ka thlen chuan damdawi mûm eng emaw zât an lo hûm a, thup an tum viau nâa an bulah ka kal miau a. An hmêl aṭang ringawt pawhin Biakin kawngka an kân khât ang tih hriat sa. Mipa kha, kum 18 mi vêl lek a nihna tak chuan ka thinlung a chhun ngaih mai.
Treasury Square ka thleng a. Venghlui pêngah chawhmeh lei turin ka kawi a. Chutah chuan nutling pui pui kâra inthlahrun hmêl taka hmeichhe tleirâwl të lo ṭhu ve chu ka pan a, a chawhmeh zawrh chu a chhiat êm avângin ka leisak duh ta lo va. Hmeichhe tleirâwl të leh a chawhmeh zawrh chhe zet chuan ka thinlung a chhun ngaih mai.
Sikulpuikawn ka thleng a. Mitdel kutdawh pakhat, mipa naupangin a rawn hruai chu ka hmu a, mak ka ti hle. He’ng lai vêlah hian kutdawh an vàn tehlul nen. Dâwr inhawngah an inkai lût zêl a. An lo chhuah apiangin hlim hmêl ka hmu a, dâwr danga an luh dâwn erawh chuan an hlim hmêl chu lungngai hmêlin a thlâk zêl tih ka hmu bawk a. Chu hun rei lo të-a an hmêl inthlâk danglamna chuan ka thinlung a chhun ngaih mai.
In ka thleng a. Haw kawnga ka thil tawnte avângin dem tur leh mawh tur ka zawng kual a, ka harh ta!
Engati nge hmeichhe tleirâwl kum 16 mi vêl lek leh mipa pathum lo awmte kha ka kalsan mai le? Keimahah hmangaih leh fuihna râwl an lo beisei reng thei si a! Engati nge mipa kum 18 mi vêl lek leh hmeichhe pathumte kha ka kalsan mai le? Keimahah hmangaihtu hmêl an lo beisei reng thei asin! Engati nge hmeichhe tleirâwl të chawhmeh zawrh chhe zet kha ka lei mai loh le? Ka lei a beisei àwm si a. Ka lei duh loh chu tu dangin nge lei duh chuang ang le? Engati nge kutdawh kha ka enliam tawp mai le? Ka pawisa them pakhat lek paw’n minute tlêmte dana an hmêl inthlâk reng tur chu a tidanglam thei àwm si a!
Kei hi thinlung kutdawh chu ka lo ni!
0 Comment to "Thinlung Kutdawh"
Post a Comment
Eng nge i ngaihdân?