Dul a mar pang a, pum a na deuh riai riai a, fianrialah thlamuang takin kan han vawih pût a, pum a thep suai suai a, thla a’n muang sawng sawng a. Chutah chuan vawih siamtu kan fak mawlh mawlh ṭhîn. Eng eng emaw kan ei a, pum lamin a lo ngeih lo va. Mawng a thîp deuh váwt vâwt a, vawih a chhuak deuh bawk si.
Kan han îp ṭang ṭang a, îp tâwp chin a thlen hnuah muangchângin, dîm zetin îp kan thlah riai riai a. Thaw chauh a chhuak thei lo, a them a rawn chhuak a, a tuiril nen. Ṭhen leh rualte bulah inthlahrung takin kan awm ta dâk mai thîn.
Chaw hel leh thil dang deuh kan ei a, puipunnaah ka vawih a chhuak ta tlat a. Ri miah lovin kan han vawih sâ sâ a, êk khât deuh nen, a rawn nam ta rum rum a. Hre lo awmin kan awm ta hmiah hmiah a, bula mite an buai thung a. Tunge vawih ber a hriat tawh lêm lo va, tlêm tlêma inhîp semin rei lo te hnuah uih chu an hîp zo ve mai a.
Chutianga tih leh tumin kalkhâwmnaah kan vawih leh a. Muang fân raihin a rawn ri chhuak rãih a, a ri chu a va lunglênthlâk tehlul êm! Zawngchhang chi erawh a ni hauh si lo. Chutah chuan kan mualpho ta nge nge thîn.
Mi thenkhat chuan ring taka vawih hi intihtheih nan tak an hmang a, mi zîngah ring tak takin an vawih kawng kawng thîn. Ring deuha vawih hi a uih lêm lo nâ a, mi dang tân rimawi ngaihthlâk manhla tak a ni lo.
Vawih ri hre riau te hi an awm thîn. An bulah chuan ri lo leh uih lovin vawih mah la, a thaw ri-ah vawih a ni tih an hre tho tho. An bengin thli thaw leh vawih thaw a thliar hrang thiam tlat a, an bulah chuan fîmkhur a ngai khawp mai.
Mahni chauha awm lai chuan duhtâwka vawih a thiang a, mi zîngah chuan tawp nihna mai a ni. A hun leh a hmun a awm e.
0 Comment to "Vawih thawnthu"
Post a Comment
Eng nge i ngaihdân?