Mi pathum an awm a. Pakhat chu dâwr neitu a ni. Pakhat chu dâwra pickle lei ṭhîn tlangval a ni a, pakhat leh chu tlangvala ṭhenawmnu a ni a, dâwr neitu nen pawh an inhre ṭha hle.
Tum khat chu tlangvala leh a ṭhenawmnu an inkâwm a. A ṭhenawmnu chuan, “Vawiin chu dâwrah pickle ka han lei a, dâwr neitu chuan ‘I ṭhenawmpa paw’n a lo thiar tlut tlut mai’ a lo ti a…” a ti a. Tlangvala chu a zak rilru ta hle a, chuta ṭang chuan dâwrah pickle a lei ngai ta lo va.
Tlangvala chuan dâwr neitunu a hmuh hreh avângin thil dang pawh a lei duh ta ngai lo va, a dâwrtu hlun pakhat a chân ta dêr mai. Dâwr neitu chuan tlangvala’n a rawn dâwr tawh ngai loh avângin a chhan a zâwt a, tlangvala lah chuan zêp lèm lovin a chhan a lo hrilh ta mai a.
Chuta ṭang chuan dâwr neitu chuan tlangvala ṭhenawmnu, a ṭhiannu ni bawk chu a be duh ta lo va. Tlangvala ṭhenawmnu lah chuan dâwr neituin a biak duh tawh loh chhan chu tlangvala’n a thil hrilh, dâwr neitu hnêna a hrilh chhàwn vâng a ni tih a hriat avângin tlangvala chu a be duh ta bîk lo va. Tichuan, an inbe duh ta lo ṭhám mai a.
Hetah hian tunge thiam lo ber le?
A zirtir deuh: Thil tûl lo sawi mai mai hi a pawi thei.
0 Comment to "Tu thiam loh nge?"
Post a Comment
Eng nge i ngaihdân?